Luku 13

Ó Si Ḅụ Pịkị-a Ḅẹḅẹ Ọ́ Fịị Ḅa

1Paa anị gbọrụ sakị mẹ ḅụ anịanga sime apụ ḍuko Jizọsị pịrịm mịnẹ Galili ḅẹ apụ agbamịẹ Tamụnọ pịrịarị ogbo Payịleti ịn ḅaam. 2Jizọsị nwẹnị in ḅii, “Payịleti kẹ arị atomi ma ḅaa ḅara gotẹ ọ́ sịn-arị Galili ḅụ ini ma sii tẹịn? 3Gbala-gbala, ọkọ-a! À ḍuko ọ́ pịrịarị, ọmịnị ọmịna asi ḅụ pịkị-a ḅẹḅẹ ọmịnị-mgba ịn fịị ḅara fịị ḅa. 4Maa apụ fa si ma tẹ Silohamụ ḅụ gele warị paịn-sara tẹ ponoma ḅaa apụ ma ḅọrọ tọ-ḅara? Ó kuromarị in sii osi apụ tẹ Jeruselemu ḅụ sime apụ ma nẹngị? 5Gbala-gbala, ọkọ-a! À ḍuko ọ́ pịrịarị, ọmịnị ọmịna asi ḅụ pịkị-a ḅẹḅẹ, ọmịnị-mgba ịn fịị ḅara fịị ḅa.”

Mgbọlụ Sụa-a Ịla Sịn Egberi Mẹ

6Anịtẹso Jizọsị nwẹnị mị egberi mẹ gbaa ịn pịrị: “Gbọrụ sakị, gbọrụ tomḅọ nwẹnị ọ̀ girepu-ḍụọ ḅio ịla sịn ẹrị anị so-pakarị. Ò mu-mu tẹ ịla mẹ ọgọnọ ḍikim, kụma gbọrụ mgbọlụ sọ anị sụa-a. 7Anie ḅụ ọ̀ nwẹnị ọ̀ ḍụọ ḍikiḍikiḅọ ḅẹẹ, ‘Ḍikii, tẹra kụra na gbasị ye à nwẹn kẹ ḅo, ḅo tẹ mị ịla sịn mẹ ḅụ mgbọlụ ḍiki tẹ, kụma gberie-sọ àrị ẹrị-a. Anị pẹlẹ gbin! Anị gotẹ kiri mẹ fama ḅẹ ye ofori.’ 8Kụma ḍụọ ḍikiḍikiḅọ ḅe nwẹnị pakịrị, ‘Ị̀ nyanaḅọ, anị wẹrịsoo, tẹ pịkị jen gbọrụ kụra kẹ anị pịrịị; àrị anị suku soku ikelema tẹ ḅụrụtẹ afun kẹ sara ḅa. 9Anịtẹso ịla mẹ jen kụra ḅụ mgbọlụ sụa, sụa iḅim, ọkọ-a ḅẹḅẹ anị sakị rẹ í inetẹ anị pẹlẹ-gbin ḅa.’ ”

Jizọsị Ịnyọsara-Ene Mẹ Ḅụ Ekeli Wararị Ẹrẹḅọ Gwọm

10Gbọrụ Ịnyọsara-Ene ḅụ Jizọsị ama-warị ḅio ye tolumarị sakị, 11gbọrụ ẹrẹḅọ sọ simem. Ma ẹrẹḅọ ma maa kụra fa si á nwẹn kẹ si-tẹmẹ ḅara-ḅio obi kọn tẹẹ, tẹ anị árị iḅoma tẹ á ḅarị inetẹ tụkụ tẹ mẹnjị-a. 12Jizọsị árị ẹrị sakị ori á ḅẹẹm, “Ẹrẹḅọ, í obi ị́ ḅụụ so tẹ!” 13Ọ̀ nwẹnị ori aḅara kẹ árị ọgọnọ gbana, tẹ anị gbọrụ sakị ḅụ á nwẹnị tụkụ sịẹ, tẹ Tamụnọ tokini.

14 # Pks 20.9,10; Dit 5.13,14 Ama-warị mẹ ḅẹ fịrịmẹnjịḅọ ḅe, Jizọsị Ịnyọsara-Ene mẹ ḅụ obi gwọ ye mẹ gotẹ ịganị tẹ tomi ma ḅẹẹm, “Sonio aḍin wa nwẹn nyana tẹ kẹ kọrịnama kọrị ḅẹm, ọmịnị arị ene ma ḅụ ḅo gwọọ. Ịnyọsara-Ene mẹ ḅụ-a!”

15KỊNỊNYANAḄỌ ḅe nwẹnị ọ̀ pakịrị, “Ọmịnị mịẹ tomi ḍie apụ! Ọmịna ḅụ tụḅọ Ịnyọsara-Ene mẹ ḅụ amịna nambulo, anịanịa asụ, fima tẹ kẹ paka mu tẹ ò minji ḅuu ḅịa? 16Mịọkụ mie Ebira-amụ tụḅọ tẹ Ekwesu maa kụra fa si na gbasị ye kẹ fịna koroma ḅọ ma kụma ọmịnị mẹẹ Ịnyọsara-Ene ḅụ á fima ma?” 17Ọ̀ pakịrị ḅara mịẹtẹ Jizọsị na fịya-a apụ ma nwẹnị ḅụụ-jịrị, tẹ tomi ma nwẹnị Jizọsị mịẹ ḅụụ-buama-aị ma go ḅioḅẹlẹ.

Mọsịtadị Nwẹnị Sịn Mgbọlị Mẹ Ḅẹ Egberi Mẹ

(Mat 13.31-32; Mak 4.30-32)

18Jizọsị nwẹnị gbela, “Tamụnọ Ama-da mẹ anị tiye kịkarị? À tiye kẹ anị tọnma ḅẹ? 19Anị kịkarị ye anie mie. Tomḅọ gbọrụ mọsịtadị sịn mgbọlị ọkị ḍiḅim ọ̀ ḍụọ ḅio. Anị so-paka ḍụḅa ḅo sịn sọ tẹso, feni amẹẹ nwẹnị anị aḅara ma ḅụ ịna awarị nama.”

Jizọsị Fịturu Sunmaye Egberi Gbaam

(Mat 13.33)

20Jizọsị nwẹnị siin gbela, “À tiye kẹ Tamụnọ Ama-da mẹ na tọnma ḅẹ? 21Anị kịkarị ye anie, ye-sunmaye tẹ ẹrẹḅọ ọkị tẹ kẹ á kẹ fịturu mịẹ ḅẹ-yearị fịlawa kpo ḅio suu tẹ kẹ koroma tẹ bebe kpo mẹ nwẹnị sun.”

Jizọsị Kpasị Wararị Ḅọkọ Egberi Gbaam

(Mat 7.13-14,21-23)

22Jizọsị opu ama ma na kala-ama ma na ḅio ye toluma ma ḅọrọ so Jeruselemu muarị ogbo, 23gbọrụḅọ nwẹnị ò gbela, “Ị̀ Nyanaḅọ, boowa kala apụ ngẹrị mie ḅọrọma ḅarịye aro?”

Jizọsị nwẹnị ịn pakịrị, 24“Ọmịnị inetẹ ḅara, inetẹ ḅara ọ́ nwẹn mịẹ tẹ kpasị wararị ḅọkọ mẹ ḅụ tolu-ḅọrọ sọ-muu; à gotẹ ọkọ ḅẹẹarị, piki-pikiye-ofori ḅara ḅụ, tọnwa tomi ḅụụkụrọma tẹ sọ mu ḅẹ ḍọkị ḅa, kụma ini inetẹ ḅịa. 25Warị nyanaḅọ ḅe saakị tẹ ọ̀ ḅọkọ gbaịn ḅa; anịsakị ọmịnị etela sime apụ ma ḅọkọ mẹ ḅakụ tẹ ḅẹẹ ḅa, ‘Wanyanaḅọ ḅọkọ mẹ finji wa pịrịị!’ Ori ọ́ pakịrị ḅa, ‘Àrị ó ḅo anga nimi-a!’ 26Anịtẹso ọmịnị pakịrị ḅa, ‘Wamịnị na ị́ na fị na ḅuu na simem; ị́ pịkị wamịna ama ḅụ ye tolumam!’ 27#Dev 6.8Kụma ori pịkị ḅẹẹ ḅa, ‘Ó ḅo anga à nimi-a, ọmịnị ị̀ ḅụụ wẹrị sikimaa, ọmịnị si-sịḅịḅio-sụa atomi!’ 28#Mat 22.13; 25.30#Mat 8.11,12Ọ́ kpọma owu tẹ pịkị aka farị ḅa, ọmịnị Ebira-amụ na, Ayịzịkị na, Jekọbụ na, ịkịankoroapụ ma na ẹrị ḅẹ sakị, Tamụnọ Ama-da yọ mẹ ḅụ, tẹ ini ọmịnị ma sukuruma pakama ḅa. 29Ịrụa mẹ saakịarị anga na anị tuuideriarị anga na ḅụ tomi ḅo ḅa, pịkị ọgọnọ-jụ na abajị-suku na ḅụ sọ, tẹ lẹgị tẹ alalị fịye mẹ fị ḅa Tamụnọ Ama-da yọ mẹ ḅụ. 30#Mat 19.30; 20.16; Mak 10.31Anị sakị ḅụ mịọkụ ọḅụkọn apụ ma ḅo tarị apụ sọ ḅa, tẹ mịọkụ ḅụ tarị apụ ma ḅo ọḅụkọn apụ sọ ḅa.”

Jizọsị Nyana Jeruselemu Pịrị Ḅẹlẹma

(Mat 23.37-39)

31Paa anị gbọrụ sakị mẹ ḅụ Farịsiiapụ ḅẹ ja apụ ḅo Jizọsị ḅẹẹm, “Ẹrọdị ị́ ḅaa ḅẹ ḍọkịarị, mịanga so tẹ jen anga muu.”

32Jizọsị nwẹnị ịn pakịrị, “Ó mu ḍuko anị pụnụ ḅe pịrịị, mịnẹ mịmgba na ḅaa na à kẹ oru dee sin, sin tẹ pịkị obi gwọ ḅa, tẹ tẹra aḍin karama ene kọrịnama ị̀ ḅara fa ḅa. 33Anịsọ mịmgba na ḅaa na berembe na àrị ị̀ mẹnjị kọn ma mu ḅa; ḅẹ anga, ḅẹ anga tẹ ịkịankoroḅọ ḅaa na-iḅi anga ofori, Jeruselemu sikima.

34“Jeruselemu, Jeruselemu! Ị́yẹrị ịkịankoroapụ ma ḅaa, tẹ, pịkị ḍụḅarị kẹ Tamụnọ kẹ oku kẹ ị́ fịrịma apụ gbin-arị ḅọ! Nda asakị à nwẹn kẹ ị́ atomi mamgba kobiri ì kuḅu ḅio suu ḅẹ ḍọkị tẹ, ịyọrọ ọḅọkọ pamba kẹ amịna awọmẹ kobiri gbaịn ḅara, kụma ị́ ḍụkụ ị̀ pịrị-a! 35#Dev 118.26Ọkọẹrẹsị ị́ Tamụnọ-warị mẹ ini anị koroma mangị ḅa. À mịẹtẹ í nimiarị mịnẹ ị́ ḅarị ị̀ ẹrị ḅịa nwenii sakị ḅo tẹ ị́ ḅẹẹ ḅa, ‘Tamụnọ KỊNỊNYANAḄỌ ḅe ẹrẹ ḅụ ḅoarị ḅọ ḅe bomaa.’ ”

Currently Selected:

Luku 13: KBTP

Highlight

Copy