Luku 12

Mịẹ Tomi Ḍie Amịẹaị Gotẹ Jizọsị Kọn Ẹkwẹn

(Mat 10.26-27)

1 # Mat 16.6; Mak 8.15 Tomi ẹndẹ, ẹndẹ ma kobiri ḅin tẹ jụmọ-jụmọ ḅụọ ọgọnọ sịẹ ḅara sime tẹso, Jizọsị nwẹnị tarị ò ḍukamẹnjịapụ ma ḅẹẹ, “Ọ́ Farịsiiapụ ma ye sunmaye mẹ ḍiki ḅụụ-kịẹn, à fiearị ye anie, ịna mịẹ tomi ḍie amịẹaị ma. 2#Mak 4.22; Luk 8.17Gbaịn wararị ye goyegoye anị finji ḅa, tẹ ḅọị ye tẹ tomi nimi ḅịa ye pịkị ofori. 3Anị gbọrụ ḅara ḅụ kanakana ḅio ó ḍuko ye ene ḅaka fịafịa ogbo ḅụ mie kịnị anị naa ḅarịye, tẹ kala-ḅio jụ tomi ḅọkọ gbaịn tẹ ḅeri-ḅio, ḅeri-ḅio ḍuko ye, warị isun ọgọnọ mie ini anị oloku pakama ḅarịye.

Ḍiki-ḅalafaa Na-Iḅi Ḅọ

(Mat 10.28-31)

4“Ì ikiapụ, àrị ọ́ ḅẹẹarị, ọmịnị oju akpakpa mẹ ḅaa kụma ḅarị inetẹ sii anị nẹngị jen ye mịẹ ḅịa apụ ma ḍiki-ḅalafa ma. 5À kẹ ó ḍie ḅa ó ḍiki-ḅalafaa ḅẹ ḅọ; ọ́ Tamụnọ ḍiki-ḅalafaa, anie ḅaa tẹ pịkị kụrọ nyana tẹ kẹ ẹlị ḅio gbin suu ḅẹ ḅọ ḅe. Ọmịnị ì mininii, ori anie ó mangịma ḅarị ḅọ!

6“Opulo-ngịangịa sọnọ amgbọ ịn nwẹn kẹ maa pẹnị dẹrị-a? Anịsọ Tamụnọ ịna ḅụ ḅẹ gberie-sọ kẹ ḅioḅọrọma-a. 7Mị-ḅara ḅụ ọmịna sịḅị-ḅẹ-inume ma sọ kịẹn fama wararị. Ọkọẹrẹsị ọ́ ḅalafa ma; ó ye la tọnwa opulo-ngịangịa nẹngịm.

Kịrayịsị Ḍuko Pakama Na Ọ̀ Sịkị Na

(Mat 10.32-33; 12.32; 10.19-20)

8“Karakara-ḅara-ḅụ àrị ọ́ ḅẹẹarị, ḅẹḅọ-ḅẹḅọ tẹ tomina tọrọkọ ḍuko pakamam mịnẹ mḅọ sime ị̀ pịrịm nwẹn ḅẹẹ ḅọ mẹ Tomḅọ Tụḅọ ḅe sọ ọkọ kẹ mḅọ ḍuko pakama ḅa Tamụnọ enjẹlị ma tọrọkọ. 9Kụma ḅẹḅọ-ḅẹḅọ tẹ tomina tọrọkọ ị̀ sịkị ḅọ, Tomḅọ Tụḅọ ḅe sọ Tamụnọ enjẹlị ma tọrọkọ mḅọ sịkị ḅa.

10 # Mat 12.32; Mak 3.29 “Tomḅọ Tụḅọ ḅe ḅụ siye ḍuko ḅọ, ḍuko ḅọ mḅọ inetẹ si-wẹrịso pịrị nyana ḅa; kụma ḅẹ ḅọ, ḅẹ ḅọ tẹ Fịafịa Tẹmẹ ḅe ḅụ siye ḍuko ḅọ, mḅọ inetẹ si-wẹrịso pịrị nyana ḅịa.

11 # Mat 10.19,20; Mak 13.11; Luk 21.14,15 “Ini ọ́ kẹ ama-awarị, anịanịa ḅẹrẹtọn-apụ, anịanịa kụrọ-nyana apụ tọrọkọ ḅẹrẹkọn mu muu, ọ́ ḅụụ ḍụa ḅẹ ḅara, anịanịa ó ḍuko ḅẹ ye gotẹ ḅụụ-ḅalaḅala ma. 12Kẹ gotẹ ọkọ ḍukoarị, Fịafịa Tẹmẹ ḅe ó ḍuko ḅẹ ye kẹ ó toluma ḅa sakị mẹ laa sakị.”

Ngọ Kọn Oḅori Tomḅọ Ḅe Egberi Mẹ

13Gbọrụ tomḅọ nwẹnị tomina-ogbo mẹ ḅio Jizọsị ḅẹẹ, “Ye-tolumaḅọ, ḍuko ì iyimbere pịrị tẹ ọ̀ wamịna ḍaḅọ koroma-so wa pịrị ye mẹ kẹ ị́ na ḍie.”

14Jizọsị nwẹnị ọ̀ pakịrị, “Ì ikiaḅọ, tụḅọ ị̀ kẹ ḅẹrẹkọnḅọ, anịanịa ḍuu ḍie ḅọ sọma ọmịnị maa apụ pịrị?” 15Tẹ ọ̀ nwẹnị paa ẹkwẹn inimgba pịrị, “Nyana ye, nyana ye ḅụụ na-iḅi-a ḍumo ḅụ ọ́ kpọma ḅụụ ẹbị lamaa, kẹ gotẹ ọkọ ḍukoarị, tomḅọ karakara ḍumo mẹ mḅọ nyana sara aị ḅụ ofori, mḅọ ngọ-kọn la ḅara, la ḅara sọ.”

16Anịtẹso Jizọsị mị egberima-ẹkwẹn mẹ kọn ịn pịrịm: “Gbọrụ sakị gbọrụ ngọ-kọn ḅọ kiri lolo tẹ fịaị pakama lamam. 17Ọ̀ nwẹnị saakị kuroma amịna ḅụụ pịrị tẹ ḅẹẹ, ‘Mịọkụ à ma fịaị ma kẹ koko ḅẹ anga nyana-a ḅara mẹ à tọ-ḅara mịẹ ḅẹ?’ 18Ọ̀ nwẹnị ọ̀ ḅụụ ḅẹẹ, ‘Mie à mịẹ ḅarịye. Àrị ị̀ fịye koko awarị ma kaan-sara ḅa, tẹ ḍụḅa arị nẹngị aị nama ḅa, tẹ ị̀ mbịaka ma na osi ngọ mamgba na kẹ koko ḅa. 19Anịtẹso àrị ị̀ ḅụụ ḅẹẹ ḅa, Fụḅara iḅi tomḅọ! Tọnwa akụra ḅụ ị́ kẹ anga ḅẹ ngọ ị́ nwẹn nyana tẹ. Ịnyọsaraa, fị, ḅuu tẹ ḅioḅẹlẹẹ.’ 20Kụma Tamụnọ ọ̀ ḅẹẹm, ‘Ị́yẹrị oḅori ḅọ! Mị gbọrụ ḍin í ḍumo ḅụ ị́ ḅara sin ḅa; anịsakị tụḅọ mịna aị mamgba tẹ í kobiri ḅụụ wẹrịma tẹ aị ma ọkị ḅẹ?’ ”

21Tẹ Jizọsị nwẹnị ẹkwẹn gbaịn ḅụ ḅẹẹ, “Mị-ḅara mie anị sime ngọ kobiri kpolima ḅụụ wẹrịma tẹ Tamụnọ tọrọkọ ye nyana-a apụ ma pịrị ḅara.”

Tamụnọ Kẹ Ḅiokpọmaa

(Mat 6.25-34)

22Anịtẹso Jizọsị nwẹnị ò ḍukamẹnjịapụ ma ḅẹẹ, “Anịsakị mie à go ọ́ ḅẹẹarị ye mịnẹ ọ́ ḅarị ọ́ fị tẹ ḍumo ḅẹ ye na, ọ́ sụa ḅẹ kapa na gotẹ ḅụụ-ḅalaḅala ma. 23Ḍumo kpọma yela fịye nẹngịm, tẹ oju mẹ pịkị kpọma yela kapa nẹngịm. 24Odogo afeni ma ḍikii: in ye ḍiḅi-a, ịn pịkị soku-a; ịn pịkị ye koko awarị sọ nyana-a; Tamụnọ anie fịye kẹ ịn pịrị fịarị! Ọmịnị yela feni amẹẹ ma nẹngị lama wararị. 25Ọmịna ḅụ inetẹ ḍumo gotẹ ḅụụ-ḅalaḅala ḅụ ye kẹ amịna aḍin ḅụ sụa ḅẹ ḅọ emi? 26Ọkọ sime kalịye ḅụ sọ ọmịnị inetẹ mịẹ ḅẹ ye ofori kụma ó gotẹ ḅụụ-ḅalaḅala jaị pịrị ḅẹ ye tiye? 27#1 Ama 10.4-7; 2 Pkị 9.3-6Ó piri-ḅio-ḅẹ afịlawa ma so-pakarị ḅara ḍikii: ịn kọrịnama kọrị-a, ịn pịkị ḅịtẹ ḍori ḅụụ pịrị-a. Kụma à ḍuko ọ́ pịrịarị mịnẹ Ama-da Sọlọmọnị, ori ngọ la ḅara mamgba sọ, ò ye ḅiri mịna afịlawa ma na gbasị-a. 28Tamụnọ anie kapa kẹ piri-ḅio-ḅẹ osuka ma ḅirimarị, mịmgba emi tẹ ḅaa tomi kẹ fịnị ḅio suu dọkịma ḅarị aị ma. Ọ́ sịn-arị ḅị Tamụnọ ḅe ori ó ḅirima tẹịnma ḅịa? Ọmịna minini boowa ḅara ḅakam!

29“Ọkọẹrẹsị ọ́ ḅarị ḅio dein-a ḅara sime ma, sakị mamgba ọ́ fị ḅẹ ye na ó ḅuu ḅẹ ye na ḅẹ kuroma nyanarị. 30(Miemẹ anie mị tomikiri ḅụ oru minini atomi ma mịẹ ma ḅọrọarị ye.) Ọmịna Ḍaḅọ ḅe nimi wararị mịnẹ mịna aị ma ọ́ nyana na-iḅi aị. 31Anie nakara ọ́ Tamụnọ ama mẹ rẹ gotẹ ḅio-sẹsẹẹ, tẹ mịna aị ma sọ ọ̀ mịẹtẹ ọ́ nyana ḅa.

So-ḅio Ḅẹ Ngọ

(Mat 6.19-21)

32“Ọ́ ḅalafa ma, ị̀ kala anana ogbo; kẹ gotẹ ọkọ ḍukoarị ọmịna Ḍaḅọ ori ama mẹ kẹ ọ́ pịrị mẹ ḅẹlẹmam. 33Ọ́ nyana aị mamgba ọ́ dẹrị tẹ kẹ igoin-apụ pịrịị. Ọ́ kan kan-a akpa tẹlẹma ọmịna ḅụụ pịrịị, tẹ ọmịna ngọ ma kẹ So-ḅio ḅụụ wẹrịmaa, anịanga arị fa ḅịa, tẹ furuḅọ sọ inetẹ furu ḅịa ẹrẹsị; akarakaraḅa sọ inetẹ arị sima ḅịa. 34Kẹ gotẹ ọkọ ḍukoarị ọmịna ḅioḅẹngbọ sakị mamgba sime ḅarị anga anie ọmịna ngọ simearị anga.

Amịna Nyanaḅọ Koruarị Fịrịmẹnjịapụ

35 # Mat 25.1-13 “Ọmịnị iḅiọkụ ḅịtẹ kẹ ịkpụkpụ kpọọ, tọnjọ ọlọ tẹ paka ḅẹ ye koruu, 36#Mak 13.34-36paka ere-ịya-alalị mu ḅọ afịrịmẹnjịapụ, tẹ ọ̀ pịkịma ḅo ḅẹ sakị koruarị apụ mịẹ-mịẹ ḅara, tẹ ó ḅo tẹ ḅọkọ ḅakụ ḅarị sakị anị gbọrụ kiri in finji ọ̀ pịrị ḅarị ḅara. 37Ịn Nyanaḅọ ḅo la tẹ in mono-a tẹ koruarị ye ẹrị kụma anị opu ḅioḅẹlẹma ye sọ arị afịrịmẹnjịapụ ma pịrị ḅa! À ḍuko ọ́ pịrịarị, ori ori ọgọnọ ḅẹ kapa sin koroma tẹ ịn ḅẹẹ tẹ ịn lẹgị tẹ ye fị ḅa, tẹ ori rẹ fịrịmẹnjị ịn pịrị ḅa. 38Ò ḍin-ogbo kẹ ḅo-o, ọkọ saḅa-o, ịn karakara tẹ ò koruarị ogbo ò ḅo kụma anị kpọma ḅioḅẹlẹma ye sọ ịn pịrị ḅa. 39#Mat 24.43,44Tẹ ó nimi lama ḅa mịnẹ warị nyanaḅọ furuḅọ mḅọ warị ḅo ḅẹ sakị nimi kụma mḅọ ḍụkụ tẹ furuḅọ ḅe warị mẹ kan sọ-mu ḅịa. 40Tẹ ọmịnị sọ ọkọ kẹ tẹlẹma na-iḅim, Tomḅọ Tụḅọ ḅe ó ḅiotọn-a sakị kẹ ḅo ḅarịye mẹ ẹrẹsị.”

Ḅioḅẹngbọ Kẹ Ḅụụ Ḅụ Gbana Na-Iḅi Anịanịa Gbana Na Iḅi-a Fịrịmẹnjịḅọ Ḅe

(Mat 24.45-51)

41Pita nwẹnị ḅẹẹ, “KỊNỊNYANAḄỌ, mị egberi mẹ ị́ gbaa wamịnị ngẹrị pịrị mụnọọ anị sime ḅẹḅọ-ḅẹḅọ pịrị?”

42KỊNỊNYANAḄỌ ḅe nwẹnị pakịrị, “Ḅioḅẹngbọ kẹ ḅụụ ḅụ gbana na-iḅi, tẹ pịkị ye-nimi wararị fịrịmẹnjịḅọ ḅọrọ tụḅọ? Ori anie ọ̀ nyanaḅọ kẹ amịna warị ḍikiḍikiḅọ sọma, tẹ sakị laa sakị, laa sakị fịye ḍie osi afịrịmẹnjịapụ ma pịrị ḅarị ḅọ. 43Anị fịrịmẹnjịḅọ ḅe, ọ̀ nyanaḅọ ḅo tẹ ẹrị mịnẹ ori anị ḅara mịẹarị ḅẹ kụma, opu ḅioḅẹlẹ sime ọ̀ pịrị ḅa. 44Karakara-ḅara-ḅụ à ḍuko ọ́ pịrịarị, ọ̀ nyanaḅọ ḅe ọ̀ nyana aị mamgba kẹ anị fịrịmẹnjịḅọ ḅe ḅara sụa tẹ ò ḍikiḍiki ḅa. 45Kụma anị fịrịmẹnjịḅọ ḅe nwẹnị ḅẹẹ mịnẹ ọ̀ nyanaḅọ ḅe iḅi sakị ḅo ḅịa ẹrẹsị osi afịrịmẹnjịapụ ma, ini ḅẹ owiapụ na ini ḅẹ ereme na fomu-fomu tẹ fị na ḅuu na nwenii tẹ iru ḅuu tọrụ-ḅaamarị kụma, 46ò ḅiotọn-a gbọrụ ene mie ọ̀ nyanaḅọ ḅe ḅo ḅarị ye. Ọ̀ nyanaḅọ ḅe nwẹnị fịrịmẹnjịḅọ ḅe oju mamgba fomu pẹlẹ kọsịma fama tẹ ọ̀ mịẹtẹ ọ̀ ḅịḅị poki-a apụ ẹrị-ẹrị ye ẹrị ḅa.”

47“Gbọrụ fịrịmẹnjịḅọ nwẹnị ọ̀ nyanaḅọ ḅiiarị ye nimi wararị kụma tẹlẹma tẹ anị mịẹ-a ḅẹḅẹ opu fomu-ḅara sime ọ̀ pịrị ḅa. 48Kụma fịrịmẹnjịḅọ ḅe tẹ mḅọ nyanaḅọ ḅiiarị ye nimiatẹ fomuye da na-iḅi ye mịẹ ḅọ, mḅọ fomuye kalịye da ḅa. Ịn tọnwa aị kẹ pịrị ḅọ ḅara ḅụ ịn pịkị tọnwa aị ḅii ḅa; ini ọkọ nẹngị ye kẹ pịrị ḅọ, ịn pịkị mḅọ ḅara ḅụ ọkọ nẹngị ye ḅii ḅa.”

Jizọsị Gotẹ Pakarị Pua Mẹ

(Mat 10.34-36)

49“À fịnị kẹ tomikiri mẹ ḅụ sụa ḅẹ ḅo tẹ, mimgbe ḅo nwẹn la anị saakị kọrị paka tẹ! 50#Mak 10.38À sara ḅẹ ḅo minji ḅara emi; anị mịẹ-a sime-ogbo ị́ tẹmẹ ị́ ḅụụ ḅụ dein ḅịa.” 51Ọ́ sịn-arị à dein kẹ tomikiri mẹ pịrị ḅẹ ḅo? Ẹn-ẹn, dein-a, kụma pua. 52Mịọkụ saakị tọrọkọ mu sọnọ apụ sime warị maa anga puu ḅa, tẹra apụ gbọrụ jụ, maa apụ gbọrụ jụ, tẹ gbọrụ pakịrị anga osi pakịrị na tụḅụrụ ḅa. 53#May 7.6Ḍapụ ịna owiapụ-awọmẹ na tụḅụrụ ḅa;

owiapụ awọmẹ ịna aḍapụ na tụḅụrụ ḅa;

iyingiapụ ịna eremịna-awọmẹ na tụḅụrụ ḅa;

eremịna-awọmẹ ịna iyingiapụ na tụḅụrụ ḅa;

iyingiapụ ịna awọmẹ ereme na tụḅụrụ ḅa;

ereme ịna diapụ iyingiapụ na tụḅụrụ ḅa.

Sakị Mẹ Lekiri

(Mat 16.2-3)

54Jizọsị nwẹnị pịkị tomi ma ḅẹẹ, “So-tọrụ ịrụa tuukoro koro anga ḅụ so kpiti tẹ ḅẹḅẹ ọ́ ḅẹẹ tẹ eene koro ḅa, tẹ anị pịkị koroarị. 55Tẹ abajị fẹrụ fie tẹ ḅẹḅẹ, ọmịnị mẹẹ mịmgba ọwụ paka ḅa, tẹ ọwụ pịkị pakarị. 56Mịẹ tomi ḍie atomi! Ó so na kiri na ḍiki tẹ ene mẹ sime ḅẹ ḅara ḍukoarị, kụma tiye mịẹtẹ ọ́ mị sakị mẹ fiearị ye lekiri-a?”

Ị́nịna Fịya-a ḅọ Na Ḅẹrẹ Famaa

(Mat 5.25-26)

57“Tiye mịẹtẹ ọmịnị ḅarana kuraye nimi tẹ mịẹ-a? 58Tomḅọ ogbo kẹ í gbo-gboo, ḅẹrẹkọn sakị amụ laa ogbo í inetẹ ḅara, inetẹ ḅara mịẹ tẹ mḅọ na ḅẹrẹ famaa, anieofori mḅọ ị́ fọnọ mu ḅẹrẹkọn-siri la-laa, ḅẹrẹkọnḅọ ḅe ị́ saḅama opu fịrịmẹnjịḅọ ḅẹ pịrị tẹ ori ị́ kẹ ikoli suu ḅa. 59À ḍuko ị́ pịrịarị, anịanga ị́ paka-ḅo ḅịa nwenii ị́ ị́ gbẹẹ ḅẹ igbigi mẹmgba gbẹẹ fama ḅa.”

Currently Selected:

Luku 12: KBTP

Highlight

Copy