Luku 11

Jizọsị Tẹkẹ Gbolomaye Tolumam

(Mat 6.9-13; 7.7-11)

1Gbọrụ ene ḅụ, ḅụ Jizọsị mu gbọrụ anga sime tẹ tẹkẹ fama tẹso, ò ḍukamẹnjịapụ ma ḅẹ gbọrụḅọ ọ̀ ḅẹẹm, “KỊNỊNYANAḄỌ, Jọnị tẹkẹ kẹ ò ḍukamẹnjịapụ toluma ḅara ị́yẹrị sọ tẹkẹ kẹ wa tolumaa.”

2Jizọsị nwẹnị ịn ḅẹẹ, Ọ́ tẹkẹ ḅarị sakị ó mie ḅẹẹ:

Ḍaa,

Fịafịa sime ị́ ẹrẹ pịrịị;

yee ị́ Ama-da ḅo.

3Ene-ḅaaene-ḅaaene wamịnị na-iḅi ḅẹ fịye kẹ wa pịrịị.

4Wamịna asi wẹrịso wa pịrịị,

wamịnị sọ wẹrịso si kẹ wa mịẹ ḅọ, mịẹ ḅọ pịrị-pịrị ḅara.

Tẹ ḍụkụ tẹ wa mu kụrọtẹ daaḍiki ḅio sọ ma.

5Tẹ Jizọsị nwẹnị ò ḍukamẹnjịapụ ma ḅẹẹ, “Ọkị mịnẹ ọmịna ḅụ ḅẹ gbọrụḅọ nwẹnị ḍin karakara ogbo saakị mu mḅọ ikiaḅọ warị la tẹ ọ̀ ḅẹẹ, ‘Ikiaḅọ, sisi paa fịturu tẹra akpo kẹ ị̀ ḅọlọọ. 6Ì ikiaḅọ gbọrụḅọ ye-muarị tẹ mịọkụ ḅo ị̀ warị agba wararị, tẹ à kẹ ọ̀ pịrị fị ḅẹ gbọrụ fịye sọ à nyana-a!’ 7Kẹ ọkị mịnẹ í ikiaḅọ ḅe warị ḅioju sime tẹ pakịrị ḅa, ‘Ị̀ ḅụụ fụkama ma! Ḅọkọ ịkasị kụra-ḅio iḅerea, tẹ ị̀ awọmẹ na ị̀ na monoarị. Àrị inetẹ saakị tẹ kẹ ị́ pịrị ḅẹ gberie-sọ ofori.’ 8Ọkụma ndẹẹ anị sime ḅẹ ḅara? À ḍuko ọ́ pịrịarị, ọmịnị maa apụ ikia mẹ gotẹ ọ̀ saakị tẹ fịturu mẹ kẹ ị́ pịrị-a sọ, ị́ ḅụụ-jịrị-a tẹ ḅii, siin ḅiiarị ye mẹ ẹrẹsị ọ̀ saakị tẹ í ḅiiarị ye la ḅara, la ḅara kẹ ị́ pịrị fama ḅa.”

9“Ọkọẹrẹsị àrị ọ́ ḅẹẹarị, ó ḅii, ọmịna ḅara la ḅa, ọ́ ḍọkịị, ọmịnị ẹrị ḅa, ọ́ ḅakụụ, ịn ḅọkọ mẹ finji ọ́ pịrị ḅa. 10Ḅii ḅọ, ḅii ḅọ mḅọ ḅara la ḅa; ḍọkị ḅọ, ḍọkị ḅọ ẹrị ḅa, tẹ ịn pịkị ḅọkọ mẹ finji ḅakụ ḅọ, ḅakụ ḅọ pịrị ḅa. 11Ọmịna ḅụ tụḅọ ḍaḅọ emi tẹ mḅọ tụḅọ mḅọ ḅara inji ḅii kiri ododo kẹ inji sọma mḅọ pịrị ḅẹ? 12Anịanịa mḅọ anyị ḅii kiri ị́ ḅọrọ akpị kẹ mḅọ pịrị ḅẹ? 13Ó si la ḅara mamgba sọ ọmịnị iḅiye nimi tẹ kẹ ọmịna awọmẹ pịrịarị kụma, ndẹẹ ọmịna So-ḅio ḅẹ Ḍaḅọ ḅe rẹ Fịafịa Tẹmẹ ḅe kẹ ọ̀ ḅara ḅii apụ pịrị ḅịa ḅara?”

Jizọsị Na Bẹlịzibulu Na

(Mat 12.22-30; Mak 3.20-27)

14Jizọsị nwẹnị oru ḅụụ ḅio emi gotẹ inetẹ ẹkwẹn-a tomḅọ ḅụụ ḅio oru ḅe dee sin, tẹ tomḅọ ḅe nwẹnị saakị ẹkwẹn. Miemẹ anịanga sime atomi ma ḅụụ-buamam. 15#Mat 9.34; 10.25Kụma ini ḅẹ ja apụ ḅẹẹm, “Bẹlịzibulu, si-atẹmẹ sịḅịdaḅọ ḅe mie kụrọ kẹ ọ̀ pịrị tẹ ọ̀ kẹ in dee sin-arị.”

16 # Mat 12.38; 16.1; Mak 8.11 Osi apụ, Jizọsị ḅịḅị paka ḅẹ ye ḍọkị ḅụ, ọ̀ ḅẹẹm mịnẹ ọ̀ Tamụnọ ọ̀ mịẹarị aị ma ọkịm nwẹn ḅẹẹ elekima kẹ in ḍie. 17Kụma Jizọsị ịna ḅioḅẹngbọ sime ye nimi tẹso, ori ịn ḅẹẹm, “Amịna ḅụụ kẹ pakịrị, pakịrị ḍiema tẹ ama owu soarị sịẹ ala-a kaan-sara ḅa. Anị gbọrụ ḅara ḅụ gbọrụ warị ḅẹ apụ pua tẹ ḅẹḅẹ ịn ḅarị gbọrụ ḅụ sime-a. 18Ọkọẹrẹsị Ekwesu daarị ama nwẹnị ama owu soarị ḅẹ kụma ndẹẹ anị sịẹsime ḅarị ḅara? Ọmịnị ḅẹẹm Bẹlịzibulu kụrọ mie à kẹ oru ma dee sin-arị. 19Yẹrị mị-ḅara kẹ oru dee sin-arị kụma, ó ḍukamẹnjịapụ ma ịn tọ kụrọ kẹ dee-dee? Ó ḍukamẹnjịapụ ma ḍie-pakama tẹ mịnẹ ọ́ karakara ye ḍuko-a. 20Gbala-gbala, Tamụnọ kụrọ anie à kẹ oru ma dee sin-arị, anịẹrẹsị ó nimi mịnẹ Tamụnọ Ama-da mẹ ḅo ọ́ la tẹẹ.

21“Kụrọḅọ ori owuaị kẹ amịna ḅụụ gbori tẹ ọ̀ warị ẹbịarị ḅẹḅẹ, ọ̀ nyana aị mamgba kpaịn wararị. 22Kụma kụrọ ọ̀ nẹngị ḅọ owu kẹ ọ̀ paka tẹ ọ̀ nẹngịmam ḅẹḅẹ, ọ̀ kẹ ḅiokpọma sime owuaị mamgba ọ̀ tan so tẹ mu ò furu aị ma ḍie ḅa.

23 # Mak 9.40 “Ị̀ jụ ofori ḅọ ị̀ na tụḅụrụarị, ị̀ na kobiri-a ḅọ à kobiri tẹ aị ma gala-galamarị.

Si Tẹmẹ Ḅe Pịkịma-ḅo Mẹ

(Mat 12.43-45)

24“Si tẹmẹ tomḅọ ḅụụ ḅio paka-so sakị, ò fiin ikelema tẹ ori ịnyọsara ḅẹ anga ḍọkị ḅa. Ori ịnyọsara anga ẹrị-a ḅẹḅẹ ori ọ̀ ḅụụ ḅẹẹ ḅa, ‘À pịkịma ị̀ warị mẹ mu ḅa.’ 25Mie ḅụ ọ̀ pịkị mu tẹ ḍọkị-ẹrịm mịnẹ warị mẹ ọfịn fịafịa tẹ tẹlẹma kpaịn wararị. 26Anịtẹso ọ̀ paka mu sii ọ̀ nẹngị ja sọnọma atẹmẹ ọkị-ḅo tẹ ini na anịanga anga ḅa. Mie ḅụ ye mamgba mịẹ fama tẹso sakị tomḅọ ḅe sime-ḅara ḅo sii sukuyọ-saakị ḅụ ò sime-ḅara nẹngị ḅa.”

Jizọsị Karakara Ḅioḅẹlẹ Nyana Ḅẹ Ḅara Tolumam

27Jizọsị miemẹ ḍuko sakị tomi ma ḅio ḅụ gbọrụ ẹrẹḅọ nwẹnị ẹkwẹn pakama tẹ ọ̀ ḅẹẹ “Í iyi tẹ í ḍikiḍiki pakama-ḅo ẹrẹḅọ ma á boma tẹẹ!”

28Kụma Jizọsị nwẹnị pakịrị, “Ọkọ fama-a, Tamụnọ ẹkwẹn mẹ naa tẹ anị ḍuko ḅara mịẹ apụ ma rẹ anie boma tẹ apụụ!”

In Ḅiim Jizọsị Ḅụụ-buamaye Mịẹ Ịn Pịrị

(Mat 12.38-42)

29 # Mat 16.4; Mak 8.12 Tomi ma ḅo Jizọsị gbori-ikelema tẹso, ọ̀ nwẹnị ḅẹẹ, “Mị sakị ḅẹ apụ ma in si lamam! Ịn ḅụụ-buamaye ḅiiarị, kụma Jona ḅụụ-buamaye mẹ sikima à jen kẹ in ḍie ḅịa. 30#Jon 3.4Ịkịankoro Jona elekima sọ Ninive ḅẹ apụ pịrị gbọrụ ḅara mẹ mie Tomḅọ Tụḅọ ḅe sọ elekima sọ mị sakị ḅẹ apụ ma pịrị ḅarị ḅara. 31#1 Ama 10.1-10; 2 Pkị 9.1-12Ḅẹrẹkọn Ene ḅụ Sẹba ḅẹ Amada-ẹrẹḅọ ma saakị sịẹ tẹ ḅẹrẹ ḍuko mị sakị ḅẹ atomi ma fịnama ḅa; anị gotẹ ọkọ mịẹ ḅarịye, árị ma árị ama jụjụ-ḅio sime tẹ ḅo Ama-da Sọlọmọnị nimi tolumaye mẹ pokim. Tẹ à ḍuko ọ́ pịrịarị Sọlọmọnị nẹngị ḅọ mịanga emi. 32#Jon 3.5Ḅẹrẹkọn Ene ḅụ Ninive ḅẹ apụ saakị sịẹ tẹ ḅẹrẹ ḍuko ọ́ fịnama ḅa, Jona Tamụnọ ẹkwẹn kọn ịn pịrị sakị ịn naa tẹ ịna asi ḅụ pịkịm ẹrẹsị; tẹ, piki-pikiye-ofori ḅara ḅụ, yẹrị ọ́ ḅẹẹarị, mịanga Jona nẹngị ḅọ emi!

Jizọsị Bele Gbolomaye Tolumam

(Mat 5.15; 6.22-23)

33 # Mat 5.15; Mak 4.21; Luk 8.16 “Gbọrụḅọ-sọ tọnjọ tọnjị tẹ opu ẹfẹrẹ kẹ anị gbaịn gbaịn-a; anie nakara mḅọ anị kẹ tọnjọ-gbanaye ọgọnọ gbana tẹ warị mẹ sọ-mu ḅọ, sọ-mu ḅọ bele mẹ ẹrị ḅa. 34Ị́ atọrụngbọ ma tọnjọ sọ oju mẹ pịrị wararị. Ị́ atọrụngbọ iḅi wararị ḅẹḅẹ, í bebe oju mẹ bele anị ḅụ ḅin ḅa; kụma ị́ atọrụngbọ iḅi-a ḅẹḅẹ í bebe oju mẹ kanakana ḅio sime ḅa. 35Ọkọẹrẹsị ḍụkụ tẹ ị́ ḅụụ ḅio simearị bele mẹ ḅo kanakana sọma. 36Ị́ bebe oju mẹ bele anị ḅụ ḅin wararị tẹ gbọrụ pakịrị anga sọ kanakana ḅio ofori ḅẹḅẹ anịmgba ḅịya paka ḅa, gbala tọnjọ bele ḅịya ị́ sarama ḅara.”

Jizọsị Ḅẹrẹ Ḍuko Farịsiiapụ Ma Na Oloko Toluma Apụ Ma Na Ọgọnọ Gbanam

(Mat 23.1-36; Mak 12.38-40)

37Jizọsị ẹkwẹn fama tẹso, Farịsiiḅọ nwẹnị ọ̀ sịn ò ḅo ori na ye fị; tẹ ọ̀ nwẹnị mu tẹ ye mẹ fị ḅẹ tẹ lẹgị. 38Jizọsị tarị ḅara sịkịrị-a tẹ ye mẹ fị ḅẹ-yearị ye mẹ nwẹnị Farịsiiḅọ ḅe ḅụụ yee. 39Mie ḅụ KỊNỊNYANAḄỌ ḅe nwẹnị ọ̀ ḅẹẹ, “Mịọkụ ọmịnị Farịsiiapụ, ọmịna akọpụ ma na ẹfẹrẹ ma na ọḅụjụ mịẹ ọ́ kẹ ye sịn tẹ sịkịrị, sịkịrị ye, kụma ọmịna aḅụụ ḅio ḅụ ọ́ ḅụrụ kọsị wararị, kụrọ-kụrọ amịẹaị na, si na, ọmịna aḅụụ ḅio ḅin wararị! 40Oḅori atomi! Ó nimi-a mịnẹ Tamụnọ ḅe tẹ ọḅụ mẹ tẹmẹḅọ ḅe mịẹ pịkị ḅioju mẹ sọ tẹmẹ ye? 41Kụma ọ́ tarị ọmịna kọpụ ma na ẹfẹrẹ ma na ḅio sime aị ma kẹ igoin-apụ pịrịị, anịsakị ye goyegoye, anị mịẹ-mịẹ ḅara ḅụ, fịafịa ọ́ pịrị ḅa.

42 # Lẹv 27.30 “Ọmịnị Farịsiiapụ, ọ́ tẹkẹlẹ tẹẹ! Ọmịnị ịwọma kaịn ḅoarị ọgụ na, ja ḍụọ ḅio paka-ḅo fụlọ ḅẹlẹma kịrị-kịrị aị na, kẹ oyia akiri ḍiya ḍie, tẹ gbọrụ kiri kẹ ḅo Tamụnọ pịrị kẹ opuye sọma wararị, kụma karakara ḅẹrẹkọn na Tamụnọ ḅẹlẹma na rẹ ọ́ bala-a. Mịna aị ma rẹ anie ọ́ mịẹ na-iḅi aị, osi aị ma ḍiki-tọrụsin-a ḅara ḅụ.

43“Ọmịnị Farịsiiapụ, ọ́ tẹkẹlẹ tẹẹ! Ama-awarị ḅio iḅi lẹgị anga sikima ọ́ pịrị, na ogumaḅiri ḅụ kụn ḅara kẹ ọ́ sịn na anie ọmịna ḅụụ ḅẹlẹ-ḅẹlẹ ye. 44Ọ́ tẹkẹlẹ tẹẹ! Ọ́ kịkarị ye anie kịnị arị emi ḅara nimiatẹ nanga ḅọrọarị aḍuḅu.” 45Oloko toluma apụ ma ḅẹ gbọrụḅọ nwẹnị ọ̀ ḅẹẹ, “Ye-tolumaḅọ, í miemẹ ḍukoarị sakị ị́ wa kẹ sụa mịẹ-simarị!”

46Jizọsị nwẹnị pakịrị, “Ọmịnị Oloko toluma apụ sọ ọ́ tẹkẹlẹ tẹẹ! Ọmịnị iku ḅaka dogi-aị kẹ tomi pịrị dogiarị, kụma gbọrụ ḅara-tụngbalị kịngẹ sọ ọ́ sụn-pakama tẹ kẹ ḅara sụa saakị ịna apana gbana-a. 47Ọ́ tẹkẹlẹ lama tẹ ḅara ḍikii! Ọmịna atẹngịapụ ma ḅaa ịkịankoroapụ ma aḍuḅu ma mie ọmịnị tẹlẹma iḅimarị. 48Ọmịnị ḅara na minini tẹ mịnẹ ọmịna atẹngịapụ ma mịẹ aị ma ọmịna ḅụụ-ḅẹlẹm; ini ịkịankoroapụ ma ḅaam, ọmịnị ịna aḍuḅu ma tẹlẹmam. 49Miemẹ gotẹ Tamụnọ amịna Nimi ḅụ ḅẹẹm, ‘Àrị ịkịankoroapụ na oku-mẹnjịapụ na kẹ fịrịma ḅa; ini ịna ḅụ ḅẹ ja apụ ḅaa ḅa, tẹ pịkị ḅaa-ḅọkọ kẹ ja apụ ḍọkị ḅa.’ 50Ọkọẹrẹsị mị sakị mẹ ḅẹ atomi ma in fomu-ḅara kẹ ịn pịrị ḅa, tomikiri mẹ bịan tẹmẹ kụra-ḅio tomi ḅaa tẹ ịkịankoroapụ ma gotẹ, 51#Suk 4.8; 2 Pkị 24.20,21Ebẹlị tẹ ịn ḅaa ḅọ ḅe ḅụ saakị mu Zẹkaraya tẹ agbamịẹ-anga mẹ na Fịafịa anga mẹ na ogboku ịn ḅaa ḅọ ḅe la. Inn, yẹrị ḍuko ọ́ pịrịarị, mịnẹ mị sakị ḅẹ atomi ma fomu-ḅara da ḅa, arị ịkịankoroapụ mamgba gotẹ!

52“Ọmịnị Oloko toluma apụ, ọ́ tẹkẹlẹ tẹẹ! Kẹ ḅọkọ finji tẹ nimi warị mẹ sọ ḅẹ sambị mẹ ọ́ ḅọị tẹ, ọmịnị ḅioju sọ sọ-mu ḅịa, ọ́ pịkị ḅụụkụrọma tẹ sọ-mu ḅẹ apụ kikiarị!”

53Jizọsị anịanga koroma so tẹso, Oloko toluma apụ ma na Farịsiiapụ ma na nwẹnị saakị akụ tẹmẹ ḅụ ò ḍuko aị ma na tụḅụrụ, tẹ nwẹnị kịrị-kịrị aị kẹ ò ḅii, 54tẹ ini inetẹ ḅara, inetẹ ḅara kẹ ò tuu ḍiki ọ̀ ḅịḅị siye paka-ḅo ḅarị ḅoto.

Currently Selected:

Luku 11: KBTP

Highlight

Copy