Luku 10

Jizọsị Kịnị Tesi Oyi Finji Na Maa apụ Na Fịrịma Pakamam

1Anịtẹso Jizọsị nwẹnị jen kịnị atesi oyi finji na maa apụ na sẹlẹ-ọkị, tẹ maa apụ, maa apụ kẹ tọrọkọ tarị ò mu ḅẹ ama, ama na, ọ̀ la ḅẹ anga, anga na fịrịma. 2#Mat 9.37,38Ọ̀ nwẹnị ịn ḅẹẹ, “Ḍiḅi aị ma kpọọ sara tẹ, kụma arị kobiri warị suu ḅẹ apụ boowa. Ọkọẹrẹsị ọ́ ḍụọ mẹ nyanaḅọ tẹkẹ tẹ ọ̀ kọrịnama kọrị apụ kẹ fịrịma tẹ ịn fịaị ma kobiri warị suu. 3#Mat 10.16Ó muu! Àrị ọ́ fịrịma pakamarị, gbala anana awọmẹ kẹ anana kun pẹị, pẹị anama ogboku fịrịmarị ye ọkụ. 4Igbigi sụa akpa-o, ye ḅii apụ akpa-o, okuro-o, ọmịnị ọkị ma; ọ́ pịkị etela daasịẹ tẹ sịn-ḅịḅị kẹ gbọrụḅọ-sọ pịrị ma. 5Ó mu warị sọ sakị, sọ sakị ọ́ tarị ḅẹẹ, ‘Dein sime mị warị pịrịị.’ 6Warị mẹ ḅio dein ḅẹlẹmaḅọ emi ḅẹḅẹ, yee ọ́ karị ọ̀ pịrị dein mẹ ori na sime; ọkọ-a ḅẹḅẹ, ọmịnị ọmịna dein na soo. 7#1 Kọr 9.14; 1 Tim 5.18Ọ́ bịan gbọrụ warị mẹ ḅio ó simee, tẹ ịn kẹ ọ́ pịrị ye, pịrị ye fị, pịkị ḅuu ḅẹ ye ḅuu. Kọrịnama-kọrịḅọ ḅe amịna gbẹẹ-ye nyana na-iḅim. Ọ́ mị warị sọ paka, mị warị sọ paka ma-ḅọrọ ma. 8Ó mu ama la sakị, la sakị tomi ma iḅi ḅioḅẹngbọ kẹ ọ́ daa-ọkị ḅẹḅẹ, ịn kẹ ọ́ pịrị ye, pịrị ye ọ́ fịị, 9tẹ ama mẹ ḅio sime obiapụ gwọ, tẹ ḍuko tomi ma pịrịị, ‘Tamụnọ Ama-da mẹ ḅo ó kpeki tẹẹ!’ 10#Fịr 13.51Kụma ó mu gbọrụ ama la tẹ ini ọ́ daa-ọkịa ḅẹḅẹ, ó mu etela-ogbo sime tẹ ịn ḅẹẹ, 11#Mat 10.7-14; Mak 6.8-11; Luk 9.3-5‘Ọmịna ama mẹ ḅẹ onwin tẹ wamịna aḅụọ oḅolo ye sọ wa gugu sara ọ́ pịrị tẹẹ! Kụma ọ́ kẹ ḅiokoromaa mịnẹ Tamụnọ Ama-da mẹ ḅo ó kpeki tẹẹ!’ 12#Suk 19.24-28; Mat 11.24; Mat 10.15Karakara-ḅara-ḅụ à ḍuko ọ́ pịrịarị mịnẹ Ḅẹrẹkọn Ene ḅụ Tamụnọ ọkụrụkụrụ nyana Sọdọmụ pịrị anị ama mẹ nẹngị ḅa!

Jizọsị Minini Ḍụkụ-a Ama Ma

(Mat 11.20-24)

13 # Ayị 23.1-18; Izi 26.1—28.26; Jow 3.4-8; Emọ 1.9,10; Zẹk 9.2-4 “Korazịnị, ị́ tẹkẹlẹ ḅa! Bẹtịsayịda, ị́yẹrị sọ ị́ tẹkẹlẹ ḅa! Ọmịna aḅio mịẹ ḅụụ-buama-aị ma Taya na Sayịdọnị na ḅụ mịẹm namịna mimgbe iḅere-iḅerea kụra-ḅio ịn lẹgị-sime tẹ akpa ịnwaịn tẹ fọọn kẹ ịna sịḅị sara tẹ kẹ ḍie tẹ mịnẹ ini ịna asi ḅụ pịkị tẹẹ. 14Ḅẹrẹkọn Ene ḅụ Tamụnọ Taya na Sayịdọnị na kẹ iḅi kiri sịẹma ọ́ nẹngị ḅa. 15#Ayị 14.13-15Kepanọmụ, ị́yẹrị kịngẹ kụma, í ḅiotọn-arị í gele mu so la ḅẹ? Ini ị́ kẹ gbin iderima-ḅo ḍuḅu ḅio suu ḅa!”

16 # Mat 10.40; Mak 9.37; Luk 9.48; Jọn 13.20 Jizọsị nwẹnị ò ḍukamẹnjịapụ ma ḅẹẹ, “Ó ḍuko ye naa ḅọ, naa ḅọ à ḍuko ye naa tẹ; ọ́ sịkị ḅọ, sịkị ḅọ ị̀ sịkị tẹ; ị̀ sịkị ḅọ, sịkị ḅọ pịkị ị̀ kẹ fịrịma ḅọ ḅe sịkị tẹ.”

Kịnị Tesi Oyi Finji Na Maa apụ Na Ma Pịkịma Ḅom

17Ọ̀ fịrịma pakama kịnị atesi oyi finji na maa apụ ma na nwẹnị opu ḅioḅẹlẹ kẹ pịkịma ḅo tẹ ọ̀ ḅẹẹ, “KỊNỊNYANAḄỌ, oru ma sọ ị́ ẹrẹ ḅụ wa tọn ịn pịrị ye mịẹm!”

18Jizọsị nwẹnị ịn pakịrị, “Àrị Ekwesu ẹrịm ọ̀ ḅalapụ so kọrị ḅọrọ ḅara kẹ kọrịma ideri-ḅo ḅịkị korom. 19#Dev 91.13Ó pokii! À kụrọ kẹ ọ́ pịrị tẹ ọ́ kẹ ododo na akpị na ọgọnọ sịẹ mẹnjịị, tẹ pịkị kẹ Ekwesu kụrọ mẹ nẹngịmaa, tẹ gberie-sọ ye kẹ ọ́ lama ḅịa. 20Kụma ó si-atẹmẹ ọ́ tọn ye mịẹ ye gotẹ ḅioḅẹlẹ ma, anie nakara ọmịna ẹrẹ So-ḅio kẹẹ tẹ ye mẹ anie ọmịna ḅioḅẹlẹma ḅarịye.”

Jizọsị Ḅioḅẹlẹm

(Mat 11.25-27; 13.16-17)

21Anị sakị ḅụ Fịafịa Tẹmẹ ḅe ḅioḅẹlẹ kẹ Jizọsị ḅụụ ḅio suu ḅinma tẹ ọ̀ ḅẹẹm, “Ḍa, So na Kiri na Nyanaḅọ, àrị ịmịẹtẹ kẹ ị́ ḅẹẹm, ị́ kẹ opu nimi kọn apụ na opu aị ḍawọ apụ na ḍie-a tẹ kẹ ye ḍawọ-a apụ ḍie aị ma gotẹ. Inn, Ḍa, mie í ḅiim, anị mịẹ nwẹn ḅẹẹ ḅara.

22 # Jọn 3.35; Jọn 10.15 “Ị̀ Ḍa ye mamgba kẹ ị̀ pịrị tẹ. Ḍaḅọ ḅe sikima tẹ Tụḅọ ḅe nimi ḅọ ofori, tẹ Tụḅọ ḅe sikima tẹ pịkị Ḍaḅọ ḅe nimi ḅọ ofori, anie Tụḅọ ḅe ọ̀ kẹ ḍie ḅii apụ ḅoto.”

23Anịtẹso Jizọsị nwẹnị pịkị ò ḍukamẹnjịapụ ma da, tẹ ori na ini na ngẹrị sime anga ịn ḅẹẹ, “Ó boma tẹẹ, ọmịnị ọ́ nwẹn ẹrịarị aị ma ẹrị ye mẹ! 24À ḍuko ọ́ pịrịarị tọnwa ịkịankoroapụ na amadapụ na ọ́ nwẹn ẹrịarị aị ma ẹrị ḅiim, kụma ini ẹrị-a; ịn pịkị ọ́ naarị aị ma naa ḅiim kụma ịn naa-a.”

Jizọsị Sameriya Iḅi Ḅọ Ḅe Egberi Gbaam

25 # Mat 22.35-40; Mak 12.28-34 Gbọrụ Oloko tolumaḅọ ḅo Jizọsị ḅịḅị paka ḅẹ ye ḍọkị ḅẹ tẹ ò gbelam, “Ye-tolumaḅọ, à ḅọrọ tiye mịẹ kụma à sime gbamaso ḍumo nyana ḅẹ?”

26Jizọsị nwẹnị ọ̀ pakịrị, “Fịafịa Ḍiri mẹ tiye ḍuko, ndẹẹ ị́ kẹ anị naa ḅara?”

27 # Dit 6.5; Lẹv 19.18 Tomḅọ ḅe nwẹnị pakịrị, “Í ḅioḅẹngbọ mẹmgba na, ị́ tẹmẹ mẹmgba na, ị́ ịnyọ mẹmgba na, í kuroma mẹmgba na kẹ ị́ Nyana Tamụnọ ḅe ḅẹlẹmaa, tẹ pịkị ị́ ị́ ḅụụ ḅẹlẹma ḅara kẹ ị́ na kpeki tẹ anga ḅọ ḅẹlẹmaa.”

28 # Lẹv 18.5 Jizọsị nwẹnị pakịrị, “Ị́ karakaram; mu ọkọ mịẹ, í ḍumo ḅa.”

29Kụma Oloko tolumaḅọ ḅe paa amịna ḅụụ kẹ iḅi kiri sịẹma ḍọkị ḅụ nwẹnị Jizọsị ḅii, “Ị̀ na kpeki tẹ anga ḅọ ḅọrọ tụḅọ?”

30Jizọsị nwẹnị pakịrị, “Gbọrụ sakị, gbọrụ owiḅọ Jeruselemu ḅụ sime tẹ Jeriko muarị ogbo, opu furuapụ nwẹnị ọ̀ gbaịn-koro; ini ọ̀ paụma fama tẹ ò fomu ḅaa ḅara wẹrị tẹ nwẹnị ọ̀ kẹ koroma tẹ so. 31Ḍiki ḅarị sakị gbọrụ agbamịẹḅọ ḅo anịanga ḅọrọarị tẹ ori ẹrị tẹ. Kụma ọ̀ nwẹnị etela mẹ ḅẹ saḅa-anga ḅụ mẹnjị ḅọrọ so. 32Anị gbọrụ ḅara ḅụ Livayị furo ḅẹ gbọrụḅọ-sọ nwẹnị ḅo ori ẹrị, tẹ saḅa mu tomḅọ ḅe ḍiki tẹ nwẹnị etela mẹ ḅẹ saḅa-anga ḅụ ḅọrọ so. 33#2 Pkị 28.15Kụma Sameriya ḅẹ gbọrụḅọ anị etela mẹ ḅụ ḅọrọ ye muarị ogbo nwẹnị ḅọ tomḅọ ḅe na kura. Ò tomḅọ ḅe ẹrị sakị, ọ̀ kpọma ọkụrụkụrụ nyana ọ̀ pịrịm. 34Ọ̀ nwẹnị saḅa tomḅọ ḅe sime pakịrị anga mu, tẹ olo na iru na kẹ ọ̀ la aị ma ḅaa tẹ fịna; anịtẹso ọ̀ nwẹnị tomḅọ ḅe kẹ ò dogi mẹnjịarị opu nama ḅẹ ọgọnọ gbana tẹ ọ̀ kẹ mu igoni-bịan-warị ḅio suu, tẹ iḅiọkụ ò ḍikiḍiki. 35Ene ḅaa tẹso, ọ̀ nwẹnị maa seleḅa igbigi kẹ igoni-bịan-warị mẹ nyanaḅọ ḅe pịrị tẹ ọ̀ ḅẹẹ, ‘Sisi mie ọkị tẹ kẹ ḅị tomḅọ ḅe ḍikiḍikii ị̀ pịrịị, à pịkịma ḅo sakị ị́ ọ̀ ḅụụ fama ye fama ye, à kẹ ị́ gbẹẹ ḅa.’ ”

36Kunoma Jizọsị nwẹnị Oloko tolumaḅọ ḅe ḅii, “Ị́ sịn-arị mịna tẹra apụ ma ḅụ tụḅọ opu furuapụ ma fomu ḅọ ḅe na kpeki tẹ anga ḅọ ḅara mịẹ?”

37Oloko tolumaḅọ ḅe nwẹnị pakịrị, “Iḅi kẹ ọ̀ mịẹ ḅọ ḅee.”

Jizọsị nwẹnị pakịrị, “Ị́yẹrị sọ mu tẹ ọkọ mịẹ.”

Jizọsị Mata Na Meri Na Ẹrị Ḅẹ Mum

38 # Jọn 11.1 Jizọsị na ò ḍukamẹnjịapụ ma na in muarị anga muarị ogbo ò ḅo gbọrụ ama lam, tẹ Mata nwẹn-sịn gbọrụ ẹrẹḅọ nwẹnị ọ̀ da á warị suu. 39Á mịnaḅọ ẹrẹḅọ nyanam, árị ẹrẹ Meri. Árị nwẹnị KỊNỊNYANAḄỌ ḅe aḅụọ-suku lẹgị tẹ ò tolumaye mẹ poki. 40Mata ngẹrị fịrịmẹnjịarị ye mẹ ḅarị á ḅụụ-ḅẹlẹ-a ẹrẹsị á ḅo tẹ ḅẹẹm, “KỊNỊNYANAḄỌ, ḍiki ya, ị̀ ịyịmbara ma ị̀ wẹrịso tẹ yẹrị ngẹrị kọrịnama mamgba kọrịarị. Á ḅẹẹ tẹ á ḅo ḅarasụa ị̀ pịrị!”

41KỊNỊNYANAḄỌ ḅe nwẹnị á pakịrị, “Mata, Mata! Ị́ kpọma tọnwa aị gotẹ ḅalaḅala tẹ, 42kụma ye ḅụ ḅẹ gberie kịngẹ mie tomḅọ gotẹ ḅụụ-ḅaa na-iḅi ye. Meri anị iḅiye mẹ sẹlẹ-ọkị tẹ, gbọrụḅọ sọ pịkị á ḅara anị ọkị ḅịa.”

Currently Selected:

Luku 10: KBTP

Highlight

Copy