Lẹvitikọsị 23
23
Tẹmẹ Alalị Fị Ḅara
1KỊNỊNYANAḄỌ ḅe nwẹnị Mozizi ḅẹẹ, 2“Izirẹlịapụ ma ḅẹẹ, tọọn wararị KỊNỊNYANAḄỌ ḅe alalị ma tẹ fịafịa akobiri ḅara ḅụ ó ḍuko wasama ḅarị aị ma, à tọn alalị ma anie mịna aị ma. 3#Pks 20.8-10; 23.12; 31.15; 34.21; 35.2; Dit 5.12-14Sonio aḍin mie ọ́ kẹ kọrịnama kọrị ḅarịye, kụma sọnọma aḍin karama ene mẹ anie tẹmẹ la ịnyọsara fịafịa kobiri ene; gbọrụ kọrịnama sọ ọ́ kọrị ḅịa; ọmịnị angarị anga mamgba ḅụ anị ene mẹ anie KỊNỊNYANAḄỌ ḅe Ịnyọsara-Ene. 4Mịna alalị ma anie KỊNỊNYANAḄỌ ḅe tọn aị ma fịafịa akobiri ma tẹ pẹlẹ arị pịrị asakị ma ḅụ ó ḍuko wasama tomi ma pịrị ḅarị aị ma.
Saḅaḅọrọ-Alalị Na Sunmaye Sọ-a Fịturu Na
(Kịẹ 28.16-25)
5 #
Pks 12.1-13; Dit 16.1,2 “Tarị akalụ mẹ ḅẹ ngei fa jei karama ene mẹ ḅẹ ḅoḅiri-so mẹ anie KỊNỊNYANAḄỌ ḅe Saḅa-ḅọrọ Alalị mẹẹ. 6#Pks 12.14-20; 23.15; 34.18; Dit 16.3-8Anịsakị anị gbọrụ akalụ mẹ ḅẹ jei aḍin karama ene mẹ anie fị KỊNỊNYANAḄỌ ḅe pịrịarị Sunmaye Sọ-a Fịturu Alalị mẹẹ; sọnọma aḍin ọ́ nwẹn kẹ sunmaye sọ-a fịturu fị ḅa. 7Tarị eneḅaka mẹ ḅụ ọ́ fịafịa kobiri nyana ḅa, ọ́ kpọma tọnwa kọrịnama kọrị ma. 8Kụma sọnọma aḍin ọ́ nwẹn kẹ fịnị ḅụ agba mịẹ KỊNỊNYANAḄỌ ḅe pịrị ḅa; sọnọma aḍin karama ene mẹ ḅụ ọ́ fịafịa kobiri nyana ḅa; ọ́ kpọma kọrịnama kọrị ma.”
9KỊNỊNYANAḄỌ ḅe nwẹnị Mozizi ḅẹẹ, 10“Izirẹlịapụ ma ḅẹẹ, ó ḅo ama mẹ tẹ à kẹ ọ́ pịrị ama mẹ ḅio sọ tẹ anị ḅẹ fịye soku ḅẹ sakị, tarị asịnmgbọlụ ma ḅẹ fịye puku mẹ ọmịnị ọkị-ḅo agbamịẹḅọ ḅe pịrị ḅa; 11tẹ ò fịye puku mẹ kẹ KỊNỊNYANAḄỌ ḅe tọrọkọ karakara ịmịẹtẹ ḅẹẹ ḅa, mịẹtẹ anị ọkị ọ́ pịrị ye sọ ḅarị ḅara; ḅaa ḅụ, Ịnyọsara-Ene mẹ ḅọrọ sakị, agbamịẹḅọ ḅe anị kẹ karakara ịmịẹtẹ ḅẹẹ ḅa. 12Ó fịye puku mẹ karakara ịmịẹtẹ mẹ ḅẹẹ fama tẹso anị ene mẹ ọ́ pịkị ḅẹkụ ḅụụ ḅụ ofori gbọrụ kụra sịḅị ḅụ ḅọrọtẹ asambịrịma ejimina kẹ dọkịma-agba mịẹ KỊNỊNYANAḄỌ ḅe pịrị ḅa. 13Ọmịnị iḅiọkụ gbẹẹtẹ iḅi fịlawa kala akpa pembeye kẹ oyia akiri ḍiya ḅẹ maa akiri ọkị tẹ olivu pulo kẹ anị pikiri tẹ kẹ mgbọlụ agba ḅara kẹ anị na sụa mịẹ KỊNỊNYANAḄỌ ḅe pịrị ḅa fịnị ḅụ ḅụụ-ḅẹlẹma kụnụ; anịsakị kẹ anị na sụa mịẹ ḅarị iru agbamịẹye anie wayịnị nwẹn-sịn iru mẹ ḅẹ maa karama pembeye. 14Ọmịnị ịwọ fịye anịanịa sịnmgbọlụ sọ fị ma, ịwọma kaịn fị ḅara, anịanịa fọịtẹ ye, anịanịa sọọtẹ ye sọ, nwenii mị ene mẹ la, nwenii ọmịnị ọmịna Tamụnọ agbamịẹye mẹ ọkị-ḅo. Mie mẹ anie ọmịnị angarị anga mamgba ikelema-koro ḅụ sime ọ́ pịrị gbamaso kẹẹ wararị oloko mu ḅụọ-fa-ḅụọ-paka la.”
Fịye Soku Alalị Mẹ
(Kịẹ 28.26-31)
15 #
Pks 23.16; 34.22; Dit 16.9-12 “Ó fịye puku karakara ịmịẹtẹ-ḅẹẹ agbamịẹye mẹ ọkị-ḅo KỊNỊNYANAḄỌ ḅe pịrịị, Ịnyọsara-Ene mẹ ḅẹ ene-ḅaa ḅụ saakị ḅintẹ sọnọma afẹnị-anga kịẹn ḅụ. 16Ọ́ sọnọma Ịnyọsara-Ene ma kịẹn ḅọrọma tẹ ḍin amesi oyi finji karama ene mẹ anie sọnọma karama Ịnyọsara-Ene mẹ ḅẹ ene-ḅaa; anị sakị ḅụ mie ọmịnị ịwọ sịnmgbọlụ agbamịẹye mẹ ọkị-ḅo KỊNỊNYANAḄỌ ḅe pịrị ḅarịye. 17Ọmịnị ọkị-ḅo KỊNỊNYANAḄỌ ḅe pịrịarị tarị sịnmgbọlụ ḅara ḅụ, ọmịnị angarị anga ma ḅụ ọmịnị iḅiọkụ gbẹẹtẹ iḅi fịlawa kala akpa kẹ oyi akiri ḍiya ḅẹ maa akiri kẹ sunmaye emi fịturu maa akpo fọị tẹ ọkị-ḅo karakara ịmịẹtẹ ḅẹẹ ḅa. 18Ọ́ gbọrụ kụra sịḅị ḅụ ḅọrọtẹ ḅẹkụ ḅụụ ḅụ ofori sọnọma asambịrịma anana na, gbọrụ asambịrịma owi-nambulo na, maa ejimina na, kẹ fịturu mẹ na sụa pịrị ḅa, arịḅẹ mgbọlị agbamịẹ-aị na, arịḅẹ iru agbamịẹ-aị na, kẹ arị ḅụ sụa dọkịma agba mịẹ KỊNỊNYANAḄỌ ḅe pịrị ḅa fịnị ḅụ mịẹarị agba, KỊNỊNYANAḄỌ ḅe ḅụụ-ḅẹlẹarị kụnụ. 19Ọ́ gbọrụ ekpe-oḅori kẹ si sin agba mịẹ, pịkị gbọrụ kụra sịḅị ḅụ ḅọrọtẹ maa asambịrịma anana kẹ dein-pịrị-agba mịẹ ḅa. 20Agbamịẹḅọ ḅe tarị sịnmgbọlụ mẹ ḅẹ fịturu mẹ na àrị asambịrịma maa anana ma na kẹ sụa sikima ḅa KỊNỊNYANAḄỌ ḅe tọrọkọ kẹ karakara ịmịẹtẹ ḅẹẹ ḅara ḅụ; arị fịafịa sime KỊNỊNYANAḄỌ ḅe pịrị agbamịẹḅọ ḅe pịrị ḅa. 21Anị gbọrụ ene mẹ ḅụ ó ḍuko wasama ḅa; ọ́ fịafịa kobiri nyana ḅa; ọ́ kpọma kọrịnama kọrị ḅịa. Miemẹ anie ọmịnị angarị anga mamgba ikelema-koro ḅụ sime ọ́ pịrị gbamaso kẹẹ-koro wararị oloko mu ḅụọ-fa-ḅụọ-paka la.”
22 #
Lẹv 19.9,10; Dit 24.19-22 “Ọmịnị ọmịna kiri mẹ ḅẹ fịye mẹ soku sakị, ó soku mu gbọrsịḅị ọmịna aḍụọ agara ma ḅẹ kunoma la, anịanịa fịye mẹ soku fama tẹso, ọkụma pịkịma mu ḅara kọnma aị kolokolo ma ọmịnị arị wẹrịso igoin-apụ ma na, igoniapụ ma na pịrị ḅa. Yẹrị anie KỊNỊNYANAḄỌ ọmịna Tamụnọ ḅee.”
Ịwọ Kụra Alalị Mẹ
(Kịẹ 29.1-6)
23KỊNỊNYANAḄỌ ḅe nwẹnị Mozizi ḅẹẹ, 24“Izirẹlịapụ ma ḅẹẹ, sọnọma akalụ karama akalụ mẹ ḅẹ tarị ene ḅụ ọ́ gbọrụ ene ḅẹ tẹmẹ-la ịnyọsara nyana ḅa sakị, sakị ḅụ, kẹ ḅiokoroma ḅụ ịn ḅẹlẹma tọnwa ọdụ ofuro alama ḅa, tẹ ọ́ fịafịa kobiri nyana ḅa. 25Ọ́ kpọma kọrịnama kọrị ma anịsakị fịnị ḅụ ọmịnị agba mịẹ KỊNỊNYANAḄỌ ḅe pịrị ḅa.”
Si Wẹrịso Sẹ Mẹmgba Pịrị Ene Mẹ
(Kịẹ 29.7-11)
26 #
Lẹv 16.29-34
KỊNỊNYANAḄỌ ḅe nwẹnị Mozizi ḅẹẹ, 27“Sọnọma akalụ karama akalụ mẹ ḅẹ oyi aḍin karama eneḅaka mẹ anie si-wẹrịso ḅẹrẹ fama ene mẹ, anị fịafịa kobiri sakị sọ ọ́ pịrị ḅa, anịsakị ó ḅuru-ịmọ ḅa, tẹ fịnị ḅụ agba mịẹ KỊNỊNYANAḄỌ ḅe pịrị ḅa. 28Mị gbọrụ ene mẹ ḅụ, ọ́ gbọrụ kọrịnama sọ kọrị ma, kẹ gotẹ ọkọ ḅẹẹarị, mịmgba mẹ anie si-wẹrịso ḅẹrẹ fama eneḅaka, kẹ mịẹtẹ KỊNỊNYANAḄỌ ọmịna Tamụnọ ḅe tọrọkọ ḅụ si wẹrịso pịrị ḅẹrẹ fama ọ́ pịrị ḅarị ḅara. 29Gbala ḅẹḅọ-ḅẹḅọ tẹ mị gbọrụ ene mẹ ḅụ ḅuru-ịmọa ḅọ goḅọ-goḅọ ini mḅọ pẹlẹ-siin ḅa ẹrẹsị mḅọ atomi ḅụ. 30Anịsakị mị gbọrụ ene mẹ ḅụ ḅẹḅọ-ḅẹḅọ tẹ kọrịnama kọrị ḅọ kọrị ḅọ, anị ḅọ mẹ, yẹrị mḅọ atomi ogbo-ḅio ḅụ mḅọ ḅaa guluguluma ḅa. 31Ọ́ gbọrụ kọrịnama sọ kọrị ma. Mie mẹ anie ọmịnị angarị anga mamgba ḅụ kẹẹ-koro wararị oloko sọ gbamaso ḅarịye ọmịna aḅụọ mamgba ikelema-koro ḅụ. 32Anị ịnyọsara ḅẹ tẹmẹ-la Ịnyọsara-Ene sọ ọ́ pịrị ḅa, anịsakị ó ḅuru-ịmọ ḅa akalụ mẹ ḅẹ esenia aḍin karama ene mẹ ḅẹ ḅoḅiri-so anị saakị ḅa, ọkị mu oyia aḍin karama ene mẹ ḅẹ ḅoḅiri-so la, anie ọmịnị ọmịna ịnyọsara mẹ nyana ḅarịye.”
Sịḅị-kikima-aị Alalị Mẹ
(Kịẹ 29.12-40)
33 #
Dit 16.13-15
KỊNỊNYANAḄỌ ḅe nwẹnị Mozizi ḅẹẹ, 34“Izirẹlịapụ ma ḅẹẹ, mie sọnọma akalụ karama akalụ mẹ ḅẹ jei aḍin karama eneḅaka mie ini Igurugu Sịḅị-kikima-aị Alalị mẹ fị KỊNỊNYANAḄỌ ḅe pịrị ḅarị sakị tẹ sọnọma aḍin kẹ anị fị ḅa. 35Tarị ene mẹ anie fịafịa kobiri eneḅaka ọ́ kpọma gbọrụ kọrịnama sọ kọrị ma. 36Sọnọma aḍin ma ḅụ ọ́ fịnị ḅụ agba mịẹ, mịẹ KỊNỊNYANAḄỌ ḅe pịrị ḅa; miemẹ anie tẹmẹ-la kobiri; ọ́ kpọma gbọrụ kọrịnama sọ kọrị ḅịa.”
37Mịna alalị ma anie KỊNỊNYANAḄỌ ḅe tọn koroma alalị ma tẹ fịafịa kobiri asakị ḅara kẹ ó ḍuko wasama ḅarị asakị, kẹ fịnị ḅụ agba mịẹ na, dọkịma-agba mịẹ na, mgbọlụ agba mịẹ pịkị iru agba na mịẹ KỊNỊNYANAḄỌ ḅe pịrị asakị ọrụ amịna karakara eneḅaka ḅụ 38KỊNỊNYANAḄỌ ḅe Ịnyọsara-Ene ma na ọmịna agbamịẹ ḍiepịrị-aị ma na, ọmịna karakara ịmịẹtẹ ḅẹẹ aị na ịlọ suma aị na, tọn ḅụụ pịrị agba mamgba tẹ ọ́ mịẹ KỊNỊNYANAḄỌ ḅe pịrịarị aị ma sikima.
39“Ó kiri mẹ ḅụ paka-ḅo aị ma kobiri suu fama tẹso, sọnọma akalụ karama akalụ mẹ ḅẹ jei aḍin karama eneḅaka mẹ ḅụ ọ́ saakị sọnọma aḍin kẹ KỊNỊNYANAḄỌ ḅe kopini afịaị alalị mẹ fị ḅa; tarị ene mẹ, ọ́ tẹmẹ-la ịnyọ sara ḅa; anịsakị ninea aḍin karama ene mẹ anie pịkị tẹmẹ-la Ịnyọsara-Ene. 40Tarị eneḅaka mẹ ḅụ, ọmịnị iḅi asịn ma ḅẹ iḅi-iḅịtẹ asịnmgbọlụ na, ọrọrọ aḅara na, ịnyịnya sụa wararị asịn ịkpangị na, kuroro akaka so-pakarị tẹịn, tẹịntẹ asịn kala aị na ọkị tẹ kẹ KỊNỊNYANAḄỌ ọmịna Tamụnọ ḅe tọrọkọ sọnọma aḍin kẹ ḍereku ḅa. 41Kụra-kụra ḅụ ọ́ fị KỊNỊNYANAḄỌ ḅe pịrịarị alalị ḅara kẹ sọnọma aḍin kẹ anị fị ḅa anị kẹẹ-koro ọ́ pịrị wararị oloko so gbamaso ḅa ọmịna aḅụọ mamgba ikelema-koro ḅụ. Sọnọma akalụ karama akalụ mẹ ḅụ mie ọmịnị anị fị ḅarịye. 42Sọnọma aḍin ọ́ nwẹn kẹ igurugu-awarị ḅio anga ḅa. Izirẹlị mẹ ḅẹ apụ mamgba igurugu awarị ma ḅio anga ḅa; 43mịẹtẹ ọmịna aḅụụ ḅụọ, ḅụọ ma nimi ḅarị ḅara mịnẹ arị Ijiputi ama ḅụ Izirẹlị ḅẹ apụ ma pakama-ḅo sakị à mịẹtẹ ini igurugu awarị ḅio angam. Yẹrị anie KỊNỊNYANAḄỌ ọmịna Tamụnọ ḅee.”
44Mị-ḅara mie Mozizi kẹ KỊNỊNYANAḄỌ ḅe tọn alalị mẹ mịẹ-pakama Izirẹlịapụ ma pịrị ḅara.
Currently Selected:
Lẹvitikọsị 23: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
