Lẹvitikọsị 24

Tọnjọ Mẹ Bala Ḅẹ Ḅara

(Pks 27.20-21)

1KỊNỊNYANAḄỌ ḅe nwẹnị Mozizi ḅẹẹ 2“Tọn Izirẹlịapụ ma pịrịị ịn tọnjọ mẹ gotẹ ḅara kẹ pọnjị pakama-ḅo kịọnkịọntẹ olivu pulo ọkị-ḅo ị́ pịrị, mịẹtẹ gbọrụ tọnjọ biin-a ḅara kẹ sakị mẹmgba kọrị ḅarị ḅara. 3Kobiri Akpụrụ-warị mẹ ḅio ḅụụ ḍie-pakama kiki-pẹlẹ-ḅịtẹ mẹ ḅụ paka-ḅo anga ḅụ, Erọnị anị kẹ sakị mẹmgba ọrụtọn ḅara wẹrị ḅa KỊNỊNYANAḄỌ ḅe tọrọkọ ḅụ ḅoḅiri-so ḅụ ọkị-ḅo dede-ḅio la anị kẹẹ-koro ọ́ pịrị wararị oloko sọ gbamaso ḅa ọmịna aḅụọ mamgba ikelema-koro ḅụ. 4Gwa-a karakara golu tọnjọ-sịẹmaye mẹ ọgọnọ, ori anị kẹ sakị mẹmgba ọrụtọn ḅara wẹrị ḅa KỊNỊNYANAḄỌ ḅe tọrọkọ ḅụ.”

Ịn Kẹ Agba Mịẹ Tamụnọ Pịrị Fịturu Mẹ

5 # Pks 25.30 “Ọmịnị iḅiọkụ gbẹẹtẹ iḅi fịlawa ọkị tẹ kẹ fịturu oyi maa kpoo finji fọị ḅa; fịlawa kala akpa pembeye kẹ oyia akiri ḍiya ḅẹ maa akiri gbọrụ kpoo, gbọrụ kpoo ḅụ sọ ḅa. 6Anịsakị gwa-a karakara golu dẹbịlẹ mẹ ọgọnọ ḅụ ọmịnị arị kẹ maa ise ḅụ dẹẹ ḅa sonio akpo gbọrụ ise, gbọrụ ise ḅụ sime ḅa. 7Ọ́ gwa-a karakara kụnụaị kẹ gbọrụ ise, gbọrụ ise ḅụ sụa ḅa, mịẹtẹ anị fịturu mẹ ḅụ, fịnị ḅụ fịye agba mịẹ KỊNỊNYANAḄỌ ḅe pịrị ḅẹ ḅiokoroma kiri sọ ḅarị ḅara. 8Ịnyọsara-Ene goyegoye ḅụ Erọnị sakị mẹmgba Izirẹlịapụ ma sịḅị ẹrẹsị anị kẹ ọrụtọn ḅara koroma ḅa KỊNỊNYANAḄỌ ḅe tọrọkọ ḅụ, sime gbamaso ọḅọkụ ḅara ḅụ. 9#Mat 12.4; Mak 2.26; Luk 6.4Anị Erọnị na, ori owiapụ-awọmẹ na pịrị ḅa, anịsakị fịafịa yọ ḅụ ịn sime tẹ anị fị ḅa, fịnị ḅụ mịẹ KỊNỊNYANAḄỌ ḅe pịrị agbamịẹye mẹ ḅụ paka-ḅo fịafịa-tẹịn ḍiekiri, anị sime ọ̀ pịrịm nwẹn ḅẹẹ sakị; sime ọ̀ pịrị mu ḅẹẹ-sakị ḅẹẹ-sakị la ḍiekiri.”

Ịn Tamụnọ Wọlọ Gbọrụ Owiḅọ Ḅaam

10Gbọrụ owiḅọtụḅọ tẹ ọ̀ ḍa Ijiputi ḅẹ ḅo kụma ori iyingi Izirẹlị ḅẹ ḅọ nwẹnị Izirẹlịapụ ma ogbo ḅio paka-ḅo. Ori na jụmọ na nwẹnị kobiri-ogbo mẹ sime anga ḅụ kamụ sọ. 11Izirẹlị ḅẹ ẹrẹḅọ ma owiḅọtụḅọ ḅe nwẹnị Tamụnọ Ẹrẹ fie sime tẹ ye karị. Ịn nwẹnị ori ọkị-ḅo Mozizi pịrị — ò iyingi ẹrẹ Sẹlomoti anie Dibiri ẹrẹḅọtụḅọ, Danị furo-ḅẹ-ḅọ ḅe — 12ịn nwẹnị ori ịkasị koroma, tẹ KỊNỊNYANAḄỌ ḅe ḅịḅị kẹ anị pịrị ḅẹ ḅara koru. 13KỊNỊNYANAḄỌ ḅe nwẹnị Mozizi ḅẹẹ, 14“Kobiri-ogbo mẹ ogbo-ḅio ḅụ ori ḅe tẹ ye karị ḅọ ḅe pakama-ḅo tẹ inima tẹ ò ye mẹ karị tẹ naa apụ ma ịna aḅara kẹ ọ̀ sịḅị ọgọnọ gbana, anịsakị yee tomina-ogbo mẹmgba ḍụḅarị kẹ ò gbin ḅaa. 15Anịsakị Izirẹlịapụ ma ḅẹẹ, ḅẹḅọ-ḅẹḅọ tẹ ḅịḅị kẹ amịna Tamụnọ lama ḅọ, lama ḅọ, amịna si dogi ḅa. 16Oriḅe tẹ KỊNỊNYANAḄỌ ḅe ẹrẹ fie sima ḅọ, sima ḅọ, ini mḅọ ḅaa ḅa, tomina-ogbo mẹmgba ḍụḅarị kẹ mḅọ gbin ḅa; igoniḅọ ḅe na, ama-kuḅu ḅẹ ḅọ ḅe na gbọrụ ḅara, mḅọ Tamụnọ Ẹrẹ fie sima, sima, ini mḅọ ḅaa ḅa.”

17 # Pks 21.12 “Tomḅọ ḅaa ḅọ, ḅaa ḅọ ini mḅọ ḅaa ḅa. 18Jụmọ nama ḅaa ḅọ ḅaa ḅọ, mḅọ jen nama kẹ ò kiri ḍima ḅa. Ḍumo na ḍumo na ḅụra ḅa.”

19“Tomḅọ mḅọ na kpeki tẹ angarị ḅọ ekelima tẹ kẹ jen ḅara wẹrị wẹrị, mḅọ kẹ anị mịẹ ḅara, mie ọ́ kẹ anị tomḅọ mẹ sọ mịẹ ḅarị ḅara. 20#Pks 21.23-25; Dit 19.21; Mat 5.38Mgbe anyịma na mgbe anyịma ḅụra ḅa; tọrụngbọ pụnma na tọrụngbọ pụnma ḅụra ḅa; aka ḅakụ siin na aka ḅakụ siin ḅụra ḅa. Tomḅọ jụmọ ekelima ḅara, mḅọ sọ ọkọ kẹ ekeli ḅa. 21Tomḅọ tẹ nama ḅaa ḅọ ḅaa ḅọ, jen nama kẹ ò kiri ḍima ḅa; anịsakị tomḅọ tẹ jen tomḅọ ḅaa ḅo ḅaa ḅọ, ini mḅọ ḅaa ḅa. 22#Kịẹ 15.16Gbọrụ oloko mie ọ́ sụa kẹ igoniḅọ na, ama-kuḅu ḅẹ ḅọ na pịrị ḅarịye; gbala Yẹrị anie KỊNỊNYANAḄỌ ọmịna Tamụnọ ḅee ẹrẹsị.”

23Mị-ḅara mie Mozizi ẹkwẹn Izirẹlị ḅẹ apụ ma pịrị ḅara; tẹ ịn nwẹnị kobiri-ogbo mẹ sime anga mẹ ḅụ ḅịḅị kẹ Tamụnọ lama ḅọ ḅe pakama-ḅo, tẹ ḍụḅarị kẹ ò gbin ḅaam. Mị-ḅara mie Izirẹlị ḅẹ apụ ma kẹ KỊNỊNYANAḄỌ ḅe tọn Mozizi pịrị ye mẹ mịẹ ḅara.

Currently Selected:

Lẹvitikọsị 24: KBTP

Highlight

Copy