Lẹvitikọsị 22

Agbamịẹ-aị Fịafịa Na-iḅi Ḅara

1KỊNỊNYANAḄỌ ḅe nwẹnị Mozizi ḅẹẹ: 2Ḍuko Erọnị na, ori owiapụ-awọmẹ na pịrịị, ini Izirẹlịapụ ma fịafịa aị ma tẹ ịn sikima wẹrị ị̀ pịrị tẹ aị ma ḅụ, ḅụụ wẹrị ḅelemaa, mịẹtẹ ini ị̀ fịafịa ẹrẹ mẹ pilema ḅịa ḅara. Yẹrị anie KỊNỊNYANAḄỌ ḅee. 3Ịn ḅẹẹ, ọmịna furo ḅụ, ọmịna aḅụọ mamgba ikelema-koro, ọmịna aḅụụ ḅụ, ḅẹ gbọrụḅọ, nwẹnị amụ ḅụụ mịẹ fịafịama-a ogbo sọma mu fịafịa aị ma tẹ Izirẹlịapụ ma wẹrị sikima KỊNỊNYANAḄỌ ḅe pịrị aị ma la-laa, anị tomḅọ mẹ ị̀ tọrọkọ ḅụ ini mḅọ pẹlẹ-siin ḅa. Yẹrị anie KỊNỊNYANAḄỌ ḅee.

4Erọnị furo-ḅẹ-apụ ḅụ sofịnị-obi kọn, anịanịa ye ḅụụ ḅụ sara, sara paka-ḅoarị gbọrụḅọ tẹ fịafịa aị ma ḅẹ ye fị ḅẹ ḅọ ofori nwenii mḅọ fịafịa sakị la ḅa. Tomḅọ nwẹn-sịn tomḅọ tẹ ye mịẹ gboloma ḅara ḅụ ḅụụ kẹ ḅẹ ye, ḅẹ ye tẹ fịafịa-a ye, fịtẹ tomḅọ, anịanịa, owiḅọ tẹ saraye ḅụụ ḅụ sararị ḅọ, 5na ḅẹḅọ-ḅẹḅọ tẹ ḅụụ kẹ ikiriarị ye tẹ mḅọ pilema ḅarịye, anịanịa tomḅọ tẹ mḅọ pilema ḅarị ḅọ lama ḅọ, lama ḅọ ḅẹẹye-ḅẹẹye tẹ mịẹtẹ mḅọ fịafịa-a ye goyegoye sọ. 6Anị ḅọ mẹ tẹ ḅụ kẹ ọkọ sime ye lama ḅọ lama ḅọ, fịafịa-a ḅara sime nwenii mu ḅoḅiri-so la ḅa, tẹ fịafịa aị ma ḅụ ḅẹ ye fị ma mḅọ minji ḅiri tẹ amịna oju sịkịrị tẹ sikima. 7Otuka mẹ tuuideri sakị mḅọ fịafịa ḅa, anịtẹrẹmẹ mḅọ fịafịa aị ma ḅẹ ye fị ḅa, gbala ọkọ sime fịye mẹ sime mḅọ pịrịm ẹrẹsị. 8Anie mẹ tẹ ngẹrị fịị, anịanịa jen nama kanị ḅaa nama mḅọ pẹị tẹ anị ḅụ amịna ḅụụ pilema ma. Yẹrị anie KỊNỊNYANAḄỌ ḅee.

9“Anịẹrẹsị ini à tọn aị ma koko ḅa, anieofori ini arị ḅụ si fẹẹ ḅụụ pịrị, tẹ anị ḅụ ḅọrọ fịị ḅa, ini arị pilema sakị. Yẹrị anie KỊNỊNYANAḄỌ ḅe tẹ ịn mịẹ fịafịama ḅọ ḅee.”

10“Etela-ogbo ḅẹ ḅọ fịafịa fịye mẹ ḅẹ ye fị ma. Agbamịẹḅọ ḅe warị bịan igoniḅọ, anịanịa, ọkọ fịrịmẹnjịḅọ, fịafịa fịye mẹ ḅẹ ye fị ma. 11Kụma agbamịẹḅọ nwẹnị sime mḅọ pịrị tomḅọ ḅara kẹ igbigi kẹ omoniḅọ fẹẹ fẹẹ, omoniḅọ mẹ inetẹ anị ḅẹ fịye fị ḅa; anịsakị ini ma tẹ ọ̀ warị-kuḅu ḅụ ini iyi apụ ma ò fịye ḅụ inetẹ fịye fị ḅa. 12Etela-ogbo ḅẹ owiḅọ nwẹnị agbamịẹḅọ iyi ẹrẹḅọtụḅọ sime, sime, á ḅarị fịafịa aị ma ḅẹ agbamịẹye mẹ ḅẹ ye fị ma. 13Kụma agbamịẹḅọ iyi ẹrẹḅọtụḅọ di nwẹnị fịị, anịanịa mḅọ diḅọ na siya, tẹ amụ tụḅọ iyi-a, tẹ ẹrẹḅọtụḅọ ḅara kẹ pịkịma so mḅọ ḍaḅọ warị mu ḅẹḅẹ, arị inetẹ á ḍa fịye ḅụ, fịye fị ḅa, Anịsọ etela-ogbo ḅẹ gbọrụḅọ-sọ anị ḅẹ ye fị ma.”

14“Gbọrụḅọ nwẹnị nimi-a ḅara kẹ mịẹ-irima ḅụ fịafịa fịye mẹ fị-fị, mḅọ fị fịye mẹ la ye ḅẹ sọnọa akiri kẹ anị la ye ḅụ sụa tẹ kẹ fịafịa fịye mẹ kiri ḍima tẹ kẹ agbamịẹḅọ ḅe pịrị ḅa. 15Agbamịẹḅọ ḅe fịafịa aị ma tẹ Izirẹlịapụ kẹ agba mịẹ KỊNỊNYANAḄỌ ḅe pịrị aị ma pilema, 16tẹ anị ḅara ḅụ mịẹtẹ mịẹ-irima na, ḅẹrẹ-ḅarasii na ḅo ịna ọgọnọ gbana ḅịa ịna fịafịa aị ma fị ḅụ; gbala Yẹrị anie KỊNỊNYANAḄỌ ḅe tẹ ịn mịẹ fịafịama ḅọ ḅee ẹrẹsị.”

17KỊNỊNYANAḄỌ ḅe nwẹnị Mozizi ḅẹẹ, 18“Erọnị na, ori owiapụ-awọmẹ na, Izirẹlịapụ mamgba na ḅẹẹ, Izirẹlị warị mẹ ḅe ḅọ, anịanịa; Izirẹlị ḅụ simearị igoniapụ ma ḅụ ḅẹḅọ-ḅẹḅọ agbamịẹye kẹ ḅo ḅarị sakị, ḅọrọ ịlọ-sumaye-o, anịanịa ḅarana tọn ḅụụ pịrị agba, tẹ dọkịma-agba ḅara ḅụ mịẹ KỊNỊNYANAḄỌ ḅe pịrị ḅarịye ḅụ, 19anị ọkị ḅarị ḅara ḅụ, ḅẹkụ ḅụụ ḅụ ofori owi nama mie ọ́ kẹ agba mẹ mịẹ ḅarịye, anị owi-nambulo, anịanịa ejimina, anịanịa ekpe oḅori sọ. 20#Dit 17.1Ḅẹ ye, ḅẹ ye tẹ ḅẹkụ ḅụụ ḅụ emi gbọrụ ye sọ ọ́ nwẹn kẹ agba mịẹ ị̀ pịrị ma, gbala anị ḅọrọ ọ́ pịrị ḅịa ẹrẹsị. 21Ḅẹḅọ-ḅẹḅọ opu anama ogbo, anịanịa oḅori ogbo ḅụ nama ọkị tẹ kẹ ịlọ suma ḅara, anịanịa tọn ḅụụ pịrị ḅara ḅụ dein agba mịẹ KỊNỊNYANAḄỌ ḅe pịrị ḅarị sakị, mịẹtẹ anị ḅọrọ ḅarị ḅara ḅụ, anị kara-gbasị nyanam; anị ḅụ ḅẹkụ paka ma. 22Tọrụngbọ-pụụntẹ anama, anịanịa ekeliarị oju iḅi-a anama, anịanịa oju pẹlẹ-pẹlẹtẹ anama, anịanịa ḅịlarị anama, anịanịa ịkara anịanịa ivirivi sụa anama, ọ́ kẹ agba mịẹ KỊNỊNYANAḄỌ ḅe pịrị, anịanịa anị ḅẹ ye kẹ agbamịẹ-anga mẹ ọgọnọ ḅụ fịnị kẹ dọkịma agba mịẹ KỊNỊNYANAḄỌ ḅe pịrị ma. 23Owi-nambulo, anịanịa ejimina tẹ gbọrụ ḅụọ, anịanịa gbọrụ ḅara kpọlịtẹ nama, ọmịnị inetẹ kẹ tọn ḅụụ pịrị agba mịẹ ḅa; kụma karakara ịmịẹtẹ ḅẹẹ agba ḅụ anị inetẹ ḅọrọ ḅịa. 24Ḅẹẹ-nama-nama tẹ kịkọ ẹsị wararị, anịanịa kọsị, anịanịa kanị, anịanịa pẹlẹ wararị nama ọ́ kẹ agba mịẹ KỊNỊNYANAḄỌ ḅe pịrị, anịanịa kẹ ọmịna ama mẹ ḅio ḅụ agba mịẹ ma. 25Ọmịna Tamụnọ fịye ḅara ḅụ, ọmịnị igoniḅọ ḅara ḅụ ọkọ sime anama daa-ọkị tẹ kẹ agba mịẹ ma, arị ḅụ ḅẹkụ emi nwẹn ḅẹẹ sakị, arị simearị jen ọkụ mẹ gotẹ agba ma ḅọrọ ọ́ pịrị ḅịa.”

26KỊNỊNYANAḄỌ ḅe nwẹnị Mozizi ḅẹẹ, 27“Owi-nambulo, anịanịa ejimina, anịanịa ekpe-oḅori iyi sakị ḅụ ọkị mu sọnọma aḍin anị nwẹn kẹ iyingiḅọ kuḅu sime ḅa; anịsakị nine aḍin karama ene ḅụ ọkị mu mie anị kẹ fịnị ḅụ agba mịẹ KỊNỊNYANAḄỌ pịrị ḅụ anị ọkị na-iḅi ye sọ ḅarịye. 28Anị ḅọrọ nambulo, anịanịa anana, anịanịa, oḅori-sọ, ọ́ gbọrụ ene ḅụ iyingiḅọ na, tụḅọ na ḅaa ma. 29Ọmịnị ịmịẹtẹ ḅẹẹ agba mịẹ KỊNỊNYANAḄỌ ḅe pịrị ḅarị sakị, ọmịnị anị mịẹ ḅa mịẹtẹ anị ḅọrọ ḅarị ḅara. 30Anị gbọrụ ene mẹ ḅụ ọmịnị anị fị ḅa, ọmịnị anị kọnma wẹrị nwenii ene-ḅaa ḅẹ dede-ḅio lama ma. Yẹrị anie KỊNỊNYANAḄỌ ḅee.”

31“Mị-ḅara mie ọmịnị ị̀ oloko ma koko tẹ arị mịẹ ḅarị ḅara. Yẹrị anie KỊNỊNYANAḄỌ ḅee. 32Ọmịnị ị̀ fịafịa ẹrẹ mẹ pilema ma, kụma Izirẹlịapụ ma ogbo-ḅio ḅụ ọmịnị ị̀ mịẹ fịafịama ḅa. Yẹrị anie KỊNỊNYANAḄỌ ḅe tẹ ọ́ mịẹ fịafịama ḅọ ḅee. 33Ori ḅe tẹ ọmịna Tamụnọ sọ ḅẹm gotẹ Ijiputi ama mẹ ḅio ọ́ pakama-ḅo ḅọ ḅee. Yẹrị anie KỊNỊNYANAḄỌ ḅee.”

Currently Selected:

Lẹvitikọsị 22: KBTP

Highlight

Copy