Lẹvitikọsị 21
21
Agbamịẹapụ Fịafịa Na-iḅi Ḅara
1KỊNỊNYANAḄỌ ḅe nwẹnị Mozizi ḅẹẹ: Ẹkwẹn agbamịẹapụ ma, Erọnị owiapụ-awọmẹ ma pịrị, tẹ ịn ḅẹẹ mịnẹ, gbọrụ agbamịẹḅọ sọ amịna atomi ogbo-ḅio ḅụ ọ̀ ḅụụ pilema fịtẹ ḍụẹịn pịrị ma, 2ori na kpekitẹịn-mịnaḅọ sikima — anie ò iyingi na, ọ̀ ḍa na, ori owiḅọtụḅọ na, ori ẹrẹḅọtụḅọ na, ori iyimbere na 3anịanịa ọ̀ ḅụụ-gboloa ịyịmbara tẹ amụ owiḅọ sime-a ḅọ. 4Ori ọ̀ ḅụụ pilema ere-sime ḅụ ori na kpeki wararị fịtẹ aḍụẹịn pịrị ma.#21.4 Hiburu Bayịbụlụ ḅụ mị ọrụ mẹ gregre ḅara kẹ kẹẹ-a
5 #
Lẹv 19.27,28; Dit 14.1 Gbọrụ agbamịẹḅọ sọ amịna sịḅị sẹịn, anịanịa amịna ḅekeke ḅẹ mpọrị agara sẹịn, anịanịa ogie kẹ gbọrụ ḅara sọ kẹ amịna oju puu ma. 6Ori ọ̀ ḅụụ wẹrị fịafịamaa, tẹ ị̀ ẹrẹ mịẹ sima ma. Ori anie fịnị ḅụ fịye agba mẹ mịẹ ị̀ pịrịarị ḅọ ẹrẹsị ọ̀ fịafịa sime ḅa. 7Agbamịẹḅọ sẹfị-ẹrẹḅọ, anịanịa owiḅọ nimi amịna ḅụụ pilematẹ ẹrẹḅọ, anịanịa owiḅọ sime siya tẹ ẹrẹḅọ sime ma; agbamịẹḅọ ḅe anie fịafịa sime amịna Tamụnọ pịrịarị ḅọ. 8Ọmịnị mḅọ mịẹ fịafịama ḅa, kẹ gotẹ ọkọ ḅẹẹarị, ori anie ọmịna Tamụnọ agbamịẹ fịye mẹ kẹ agba mẹ mịẹarị ḅọ. Yẹrị anie KỊNỊNYANAḄỌ ḅe; yẹrị ọ́ mịẹ fịafịama ḅọ ḅe à fịafịa wararị. 9Agbamịẹḅọ ẹrẹḅọtụḅọ nwẹnị sẹfị ḅụ amịna ḅụụ sima-sima, mḅọ amịna ḍaḅọ mịẹ simam. Ịn fịnị kẹ á dọkịma ḅa.
10“Sịḅịda-Agbamịẹḅọ ḅe tẹ mḅọ amịnapụ ogbo-ḅio ḅụ sịḅịdaḅọ sọ tẹ ịn fịafịa-pulo mẹ kẹ sịḅị ḅụ sara tẹ opu akapa ma kẹ sụa tẹ ịn ḅara kẹ sịḅị ọgọnọ gbana ḅọ ḅe, ini ọ̀ mịẹ fịafịama tẹẹ. Ọ̀ ḅarị amịna sịḅị-ḅẹ-inume dala-a ḅara kẹ anị sara wẹrị, anịanịa kururu ḅụ amịna akapa kan ma. 11Mḅọ tomḅọ ḍụẹịn sime anga ḅụ sọ-mu, anịanịa amịna ḅụụ pilema ma, anị ḅọ mẹ mḅọ ḍaḅọ, anịanịa mḅọ iyingiḅọ sọ. 12Fịafịa Yọ mẹ ḅụ sọ mḅọ mẹnjị paka ma, anịanịa ọ̀ Tamụnọ ḅe Fịafịa Yọ mẹ pilema; gbala ọ̀ Tamụnọ kẹ sịḅị ọgọnọ sara tẹ wẹrị fịafịama sikimarị pulo mẹ mḅọ sịḅị-ogbo emi ẹrẹsị. Yẹrị anie KỊNỊNYANAḄỌ ḅee. 13Ḅụụ-gboloa iriawọ-tụḅọ mie mḅọ sime ḅarị ḅọ. 14Diḅọ-fịtẹ-ẹrẹḅọ, anịanịa owiḅọ sime siya tẹ ẹrẹḅọ, anịanịa owiḅọ nimi amịna ḅụụ pilematẹ ẹrẹḅọ, anịanịa sẹfị-ẹrẹḅọ — mịna apụ ma ori ịn sime ma; kụma mḅọ atomi ma ogbo-ḅio ḅụ mie mḅọ ḅụụ-gboloa iriawọ-tụḅọ ọkị sime ḅarịye; 15mịẹtẹ mḅọ atomi ogbo-ḅio ḅụ mḅọ amịna awọmẹ pilema ḅịa ḅara; gbala yẹrị KỊNỊNYANAḄỌ ḅe mie mḅọ mịẹ fịafịama ye ẹrẹsị.”
16KỊNỊNYANAḄỌ ḅe nwẹnị Mozizi ḅẹẹ, 17“Erọnị ḅẹẹ, í furo-ḅẹ-apụ mamgba ikelema-koro mu ḅụọ-fa-ḅụọ-paka la, gbọrụḅọ tẹ ḅẹkụ ḅụụ ḅụ emi gbọrụḅọ-sọ sọma ḅo fịye kẹ amịna Tamụnọ pịrị ḅẹ kpekima. 18Gbala gbọrụḅọ tẹ ḅẹkụ ḅụụ ḅụ emi ḅọ tẹ sọma ḅo kpeki ḅarị ḅọ ofori; tọrụngbọ-pụụntẹḅọ, anịanịa ekeliḅọ, anịanịa akaka-anda tọrụkuḅu ḅụ emi ḅọ, anịanịa jen ọkụ simearị ḅọ, 19anịanịa ḅụọ-ekeliḅọ, anịanịa ḅara-ekeliḅọ, 20anịanịa ike-sụaḅọ, anịanịa kpụlụ lama wararị ḅọ, anịanịa tọrụngbọ ekeli kọn ḅọ, anịanịa oju ḅẹlẹmarị obi, anịanịa ivirivi-sụaḅọ, anịanịa kịkọ-ḅẹ-mbi pootẹ ḅọ. 21Erọnị agbamịẹḅọ ḅe furo-ḅẹ-apụ ma ḅụ ḅẹkụ ḅụụ ḅụ emi gbọrụḅọ tẹ sọma ḅo kpeki tẹ fịnị ḅụ sime KỊNỊNYANAḄỌ ḅe pịrị agba mịẹ ḅẹ ḅọ ofori, mḅọ ḅụụ ḅụ ḅẹkụ nyana wararị nwẹn ḅẹẹ sakị, mḅọ sọma ḅo amịna Tamụnọ fịye mẹ kẹ agba mịẹ ọ̀ pịrị ma. 22Mḅọ inetẹ mḅọ Tamụnọ fịye mẹ fị ḅa, Fịafịa-tẹịn Yọ mẹ ḅẹ ye na, pịkị Fịafịa aị ma ḅẹ aị sọ. 23Kụma mḅọ sọma ḅo kiki-pẹlẹ-ḅịtẹ mẹ, anịanịa agbamịẹ-anga mẹ kpeki ma, gbala mḅọ oju ḅụ ḅẹkụ emi ẹrẹsị, mịẹtẹ mḅọ ị̀ fịafịatẹ aị ma pilema ḅịa ḅara; gbala Yẹrị anie KỊNỊNYANAḄỌ ḅe tẹ arị mịẹ fịafịama ḅọ ḅe ẹrẹsị.”
24Mị-ḅara mie Mozizi ẹkwẹn Erọnị na, ori owiapụ-awọmẹ na, Izirẹlịapụ mamgba na pịrị ḅara.
Currently Selected:
Lẹvitikọsị 21: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
