Lẹvitikọsị 20

Sime Ḅịḅịpoki-a Pịrị Afomu-ḅara

1KỊNỊNYANAḄỌ ḅe nwẹnị Mozizi ḅẹẹ, 2“Izirẹlịapụ ma ḅẹẹ, Izirẹlị ḅẹ apụ ma ḅụ, anịanịa igoniapụ tẹ Izirẹlị ḅụ angarị apụ ma ḅụ, ḅẹḅọ-ḅẹḅọ tẹ amịna awọmẹ ḅụ ḅẹḅọ-ḅẹḅọ kẹ Molẹkị nwẹn-sịn oru-tamụnọ ḅe pịrị ḅọ pịrị ḅọ, ini mḅọ ḅaa ḅa; ama mẹ ḅẹ apụ ḍụḅarị kẹ mḅọ gbin ḅaa ḅa. 3Yẹrị ḅe sọ anị tomḅọ mẹ na tụḅụrụ ḅara kẹ tọrụ kẹ mḅọ ọgọnọ gbana ḅa, tẹ mḅọ atomi ogbo-ḅio ḅụ mḅọ pẹlẹ-siin ḅa, gbala mḅọ amịna awọmẹ ma ḅẹ gbọrụḅọ kẹ Molẹkị nwẹn sịn oru-tamụnọ ḅe pịrị tẹ, tẹ ị̀ Fịafịa Yọ mẹ pilema, tẹ ị̀ Fịafịa Ẹrẹ mẹ mịẹ-sima tẹ ẹrẹsị. 4Anịsakị ama mẹ ḅẹ apụ ma mḅọ amịna awọmẹ ḅẹ gbọrụḅọ kẹ Molẹkị nwẹn-sịn oru-tamụnọ ḅe pịrị sakị mẹ ḅụ ịna atọrụ ḅọị tẹ gbala-gbala mḅọ ḅaa-a ḅẹḅẹ, 5anịrẹ arị ị̀ tọrụ kẹ anị tomḅọ mẹ na, mḅọ furo na ḅụ tụḅụrụ ḅara wẹrị tẹ ịna atomi ogbo-ḅio ḅụ ịn pẹlẹ-siin ḅa; mḅọ tẹ sẹfị tẹ Molẹkị nwẹn-sịn oru-tamụnọ ḅẹ ḍukamẹnjị ḅọ mẹ na, mḅọ ḍuka-mu atomi mamgba na.”

6Gbọrụ tomḅọ nwẹnị vuunma pịkị tẹ fụḅara-ḍiki-ḅịrịapụ na majịkị-mịẹapụ na ḍukamẹnji-mẹnjitẹ inina sẹfị ḅẹḅẹ, arị ị̀ tọrụ kẹ anị tomḅọ mẹ si anga ḅụ wẹrị tẹ mḅọ atomi ogbo-ḅio ḅụ mḅọ pẹlẹ-siin ḅa. 7Anịẹrẹsị ọmịnị ọmịna aḅụụ mịẹ fịafịama tẹ fịafịa ḅara simee; kẹ gotẹ ọkọ ḅẹẹarị, Yẹrị anie KỊNỊNYANAḄỌ ọmịna Tamụnọ ḅee. 8Ọmịnị ì oloko kẹẹ-koro wararị aị ma koko tẹ arị mịẹ.

Yẹrị anie KỊNỊNYANAḄỌ ḅe tẹ ọ́ mịẹ fịafịama ḅọ ḅee.

9 # Pks 21.17; Mat 15.4; Mak 7.10 Ḅẹḅọ-ḅẹḅọ tẹ amịna ḍaḅọ, anịanịa, amịna iyingiḅọ woriḅọ-woriḅọ, ini mḅọ ḅaa ḅa mḅọ amịna ḍaḅọ, anịanịa amịna iyingiḅọ wori tẹ, mḅọ ọmbie mḅọ ọgọnọ simee.

10 # Pks 20.14; Lẹv 18.20; Dit 5.18 Gbọrụ owiḅọ nwẹnị mḅọ na kpeki tẹ angarị ḅọ ta na sẹfị mẹnjị kọn, kọn, ini maa apụ ma, owiḅọ ḅe na, ẹrẹḅọ ma na ini ịn ḅaa ḅa. 11#Lẹv 18.8; Dit 22.30; 27.20Owiḅọ ḅe tẹ amịna ḍaḅọ ta na gboloma ḅọ, gboloma ḅọ, amịna ḍaḅọ paụma tẹ; ini maa apụ mamgba ini ịn ḅaa ḅa; ịna ọmbie ịna ọgọnọ emi. 12#Lẹv 18.15Gbọrụ owiḅọ nwẹnị amịna owiḅọtụḅọ ta na gboloma, gboloma; ini maa apụ mamgba ini ịn ḅaa ḅa ịn kpekitẹ amịnapụ sẹfị mẹnjị kọn tẹ ịna ọmbie ini ọgọnọ emi. 13#Lẹv 18.22Gbọrụ owiḅọ nwẹnị ẹrẹḅọ na gboloma ḅara kẹ ò pembe owiḅọ na gboloma, gboloma; ini maa apụ mamgba tọn-tọnye mịẹ tẹ, ini ịn ḅaa ḅa; ịna ọmbie ini ọgọnọ simee. 14#Lẹv 18.17; Dit 27.23Gbọrụ owiḅọ nwẹnị gbọrụ ẹrẹḅọ sime, pịkị á iyingi sọ ọkị sime, sime, aniemẹ anie si sịḅịḅio; ịn fịnị kẹ ori na, ini maa ereme mamgba na dọkịma ḅa, mịẹtẹ ọmịna ogbo-ḅio si sịḅịḅio paka ḅịa ḅara. 15#Pks 22.19; Lẹv 18.23; Dit 27.21Gbọrụ owiḅọ nwẹnị nama na gboloma, gboloma, ini mḅọ ḅaa ḅa, ọ́ pịkị nama ḅe ḅaa ḅa. 16Gbọrụ ẹrẹḅọ nwẹnị sọma mu ḅe nama, nama na gboloma, gboloma, ọmịnị ẹrẹḅọ ma na, nama ḅe na ḅaa ḅa; ịn fịị ḅa; ịna ọmbie ini ọgọnọ emi.

17 # Lẹv 18.9; Dit 27.22 Gbọrụ owiḅọ nwẹnị amịna ịyịmbara, mḅọ ḍaḅọ, anịanịa mḅọ iyingiḅọ iyi ẹrẹḅọtụḅọ ọkị paụma, tẹ á paụ ẹrị, arị pịkị ọ̀ paụ ẹrị-ẹrị, aniemẹ anie ḅụụ-jịrịma ye; ịna atomi ma awọmẹ ma ḍiki-tọrụ ḅụ ini ịn pẹlẹ-siin ḅa; ori amịna ịyịmbara paụma tẹ ẹrẹsị, ori ọ̀ mịẹ-irima mẹ dogi ḅa. 18#Lẹv 18.19Ẹrẹḅọ so ẹrịarị, tẹ gbọrụ owiḅọ á paụma tẹ arị na tii, tii, ori arị ngụngụḅa paụma tẹ, arị arị ọmbie mẹ sara, sara paka-ḅo arị anga mẹ finji tẹ ini ini maa apụ mamgba pẹlẹ-siin ḅa ịna atomi ma ogbo-ḅio ḅụ. 19#Lẹv 18.12-14Ọmịnị ọmịna iyingiḅọ ịyịmbara, anịanịa, ọmịna ḍaḅọ ịyịmbara paụma ma, aniemẹ anie gbala mḅọ mḅọ na kpeki lamatẹ mịnaḅọ paụma tẹ; ini ịna mịẹ-irima mẹ dogi ḅa. 20Gbọrụ owiḅọ nwẹnị mḅọ ḍaḅọ, anịanịa, mḅọ iyingiḅọ iyimbere ta na gboloma, gboloma, mḅọ amịna ḍaḅọ, anịanịa amịna iyingiḅọ iyimbere paụma tẹ; ini ịna si dogi ḅa. Ini awọ iyi-a ḅara kẹ fịị ḅa. 21#Lẹv 18.16Gbọrụ owiḅọ nwẹnị amịna iyimbere ta ọkị-ọkịị, miemẹ anie pilematẹ mịẹye. Ori amịna iyimbere paụma tẹ; ini awọ iyi ḅịa.

22Ọmịnị ọkọẹrẹsị ì oloko kẹẹ-koro wararị aị ma na, kụrọ ị̀ ḅara-ḅio emi ḅara kẹ à tọn aị ma na koko tẹ arị mịẹ; mịẹtẹ arị ọmịnị ọkị-ḅo tẹ ọ́ mu anga ḅẹ muarị anga mẹ, ama mẹ ọmịnị ọsụ pakama ḅịa ḅara. 23Anịsakị ọmịnị ọmịna tọrọkọ opu sịẹ mẹ tẹ à wakị ngumarị ye mẹ ḅẹ ama anga anga ḅara ma ḍiki mẹnjị ma; kẹ gotẹ ọkọ ḅẹẹarị, mịna aị mamgba ịn mịẹm, anịẹrẹsị arị ịn sịkịm. 24Kụma à ḍuko ọ́ pịrị tẹ, ọmịnị ịna ama mẹ ḅio anga ḅa, tẹ arị anị kẹ ọ́ pịrị tẹ ọmịnị anị nyana ḅa, anie ḅụụ-ḅẹlẹmatẹ iḅiọkụma fịye so-pakamarị amakiri mẹ. Yẹrị anie KỊNỊNYANAḄỌ ọmịna Tamụnọ ḅe tẹ tomi ma ḅụụ ó ḅelema ḅọ ḅee. 25Ọmịnị anịẹrẹsị fịafịatẹ anama na, fịafịa-a anama na ogboku kịrị pakama ḅa, pịkị fịafịatẹ afeni na, fịafịa-a afeni na sọ; nama ḅụụ, anịanịa feni ḅụụ, anịanịa ḅẹẹye-ḅẹẹye tẹ ogbo-ogbo ḅụụ kiri mẹ ọgọnọ ḅụ mẹnjịarị aị ma ḅụụ, arị aị ma tẹ à sikima ọ́ pịrịm, ọ́ kẹ fịafịa-a aị sọma nwẹn ḅẹẹ aị ma ḅụ, ọmịnị ọmịna aḅụụ pilema ma. 26Ọmịnị ọmịna aḅụụ mịẹ fịafịama ị̀ pịrịị, gbala yẹrị KỊNỊNYANAḄỌ ḅe à fịafịa wararị ẹrẹsị, tẹ osi atomi ma ḅụụ ó puu-ḅelema tẹẹ, mịnẹ ó sime ị̀ pịrịị.

27Owiḅọ, anịanịa ẹrẹḅọ tẹ fụḅara, anịanịa, ḅara-kuḅu ḍikiarị ḅọ, anịanịa majịkị mịẹarị ḅọ, ini mḅọ ḅaa ḅa. Ịn ḍụḅarị kẹ mḅọ gbin ḅaa ḅa. Mḅọ ọmbie amịna ọgọnọ gbana ḅa.

Currently Selected:

Lẹvitikọsị 20: KBTP

Highlight

Copy