Jọnị 9
9
Jizọsị Iyi Kụra-ḅio Tọrụngbọ Pụụn Sime Ḅọ Gwọm
1Jizọsị mẹnjịma muarị ogbo gbọrụ tomḅọ, tẹ iyi kụra-ḅio tọrụngbọ pụụn sime ḅọ, ẹrịm. 2Ò ḍukamẹnjịapụ ma nwẹnị ò gbela, “Ye-tolumaḅọ, tụḅọ mịẹ si ḅụ ọ̀ ḅọrọ tẹ tọrụngbọ-pụụn ḅụ iyi? Ori mịẹ si mụnọọ, ọ̀ ḍa-na-iyingi-na mịẹ si?”
3Jizọsị pakịrịm, “Ọ̀ tọrụngbọ-pụụn mẹ ori asi gboloma-a, pịkị ọ̀ ḍa-na-iyingi-na asi sọ gboloma-a. Tomi ọ̀ ḅụụ ḅụ Tamụnọ kụrọ, kọrị-kọrị ye ẹrị ḅẹm mie ọ̀ tọrụngbọ gotẹ pụụn ye. 4Ene amụ ḍin-a sakị goyegoye wa ị̀ kẹ fịrịma ḅọ ḅe kọrịnama mẹ kọrị ḅa; ḍin ḅoarị, gbọrụḅọ-sọ inetẹ kọrịnama kọrị ḅịa sakị mẹ. 5#Mat 5.14; Jọn 8.12À tomikiri emi sakị goyegoye yẹrị anie tomikiri mẹ ḅẹ bele mẹ.”
6Ò miemẹ ḍuko tẹso, Jizọsị nwẹnị fịla kẹ peteima kiri ḅio sara, tẹ anị kẹ lịka wọlọ tẹ kẹ tomḅọ ḅe atọrụngbọ ḅọrọma, 7tẹ ḅẹẹ, “Mu tẹ Silohamụ nwẹn-sịn ḍaḅa mẹ ḅio ị́ tọrụ sịkịrịị.” (Mị ẹrẹ mẹ fiearị ye anie “Fịrịmam.”) Mie ḅụ tomḅọ ḅe mu tẹ ọ̀ tọrụ sịkịrị tẹ ye ẹrịma pịkịma-ḅom.
8Anịtẹso ori na kpeki tẹ anga apụ na, tẹrẹmẹ miemẹ mịẹ ḅụ ò ye ḅii, ḅii ḅara kẹ ori ẹrị tẹ apụ na, nwẹnị gbela, “Ḅieḅe anie lẹgị tẹ ye ḅii-ḅii ḅọ ḅe ori-a?”
9Japụ ḅẹẹm, “Orii,” kụma osi apụ mẹẹ, “Gbala-gbala ori-a; ori ọ̀ kịka lamarị.”
Mie ḅụ tomḅọ ḅe ḅioju ḅẹẹm, “Yẹrị anie tomḅọ ḅee.”
10Ịn nwẹnị ò gbela, “Ndẹẹ í inetẹ mịọkụ ye ẹrịarị ḅara?”
11Ọ̀ nwẹnị pakịrị, “Jizọsị nwẹn-sịn tomḅọ lịka wọlọ tẹ kẹ ị̀ atọrụngbọ ḅọrọma tẹ ị̀ ḅẹẹm à Silohamụ mu tẹ ị̀ tọrụ sịkịrịị. Mie ḅụ à nwẹnị mu tẹ sịkịrị gbọrụ sakị àrị inetẹ ye ẹrịm.”
12Ịn nwẹnị gbela, “Ọ̀ tọ-anga emi?”
Ọ̀ nwẹnị pakịrị, “À nimi-a.”
Farịsiiapụ Ma Tomḅọ Ḅe Ḅọrọtẹ Gwọ Ḅara Sọkịrịm
13Anịtẹso ịn nwẹnị iyi kụra-ḅio tọrụngbọ pụụn sime tomḅọ ḅe kẹ mu Farịsiiapụ ma pịrị. 14Jizọsị lịka mẹ wọlọ tẹ kẹ ọ̀ pụụntẹ atọrụngbọ ma gwọ ene mẹ Ịnyọsara-Ene. 15Anịtẹso Farịsiiapụ ma nwẹnị pịkị tomḅọ ḅe gbela, ọ̀ ḅọrọtẹ ḅo tọrụ ye ẹrịarị ḅara. Ọ̀ nwẹnị ḍuko ịn pịrị, “Ọ̀ lịka kẹ ị̀ atọrụngbọ ḅọrọmam, tẹ àrị ị̀ tọrụ sịkịrịm, tẹ mịọkụ àrị inetẹ ye ẹrịarị.”
16Farịsiiapụ ma ḅẹ jen-apụ ḅẹẹm, “Miemẹ mịẹ tomḅọ inetẹ Tamụnọ ḅụụ ḅo ḅọ sọ ḅịa, ori Ịnyọsara-Ene mẹ ḅẹ oloko mẹ koko-a ḅẹ sakị.”
Anịsọ osi apụ mẹẹ, “Ndẹẹ si-mịẹḅọ inetẹ nwẹn sime ḅụụ-buama-aị mịẹ ḅẹ ḅara?” Tẹ ịn ḅarị gbọrụ ḅịḅị fie-a ịna ogboku.
17Mie ḅụ Farịsiiapụ ma nwẹnị pịkị sin jen gbọrụ sakị kẹ tomḅọ ḅe gbela, “Ị́yẹrị mẹẹ ori mie ị́ pụụntẹ atọrụngbọ ma gwọ ye ḅẹẹ sakị, í ò gbolomaye ḅụ ḍukoarị ye ḅọrọ tiye?”
Tomḅọ ḅe nwẹnị pakịrị, “Ori ịkịankoroḅọọ.”
18Anịsọ Juu-ḅẹ-apụ ma ḅẹ ḅẹrẹtọn-apụ ma paa minini ḅẹ ḅii-a mịnẹ ọ̀ tọrụ pụụn simem, tẹ mịọkụ ori inetẹ ye ẹrị tẹ, nwenii ini ọ̀ ḍa-na-iyingi-na sịn 19tẹ in gbelam, “Ḅieḅe kọkọ ọmịna tụḅọ? Ọmịnị mẹẹ ori iyi sakị ori atọrụngbọ pụụn wararị; anịtẹso sakị ndẹẹ anị paka tẹ ori inetẹ mịọkụ ye ẹrịarị ḅara?”
20Ọ̀ ḍa-na-iyingi-na nwẹnị pakịrị, “Wa nimim ori wamịna tụḅọọ, tẹ ori iyi sakị ori atọrụngbọ pụụn wararị. 21Kụma mịọkụ mịẹtẹ ori inetẹ ye ẹrịarị ye rẹ wa nimi-a, ọ̀ gwọ tẹ mịọkụ ò ye ẹrịarị ḅọ sọ wa pịkị nimi-a. Ọmịnị ò gbelaa, ò tomḅọ la tẹẹ, ori inetẹ ḅarana pakịrị amịna ḅụụ pịrị ḅa!” 22Ọ̀ ḍa-na-iyingi-na gotẹ miemẹ ḍuko ye ịn Juu-ḅẹ ḅẹrẹtọn-apụ ma ḍiki-ḅalafaam. Anịngẹ-kụraḅio ịn tọn-pẹlẹ tẹ mịnẹ Jizọsị anie Mẹsaya ḅe nwẹn ḅẹẹ ye minini ḅọ, minini ḅọ ịn ḅarị ḍụkụ tẹ mḅọ ịna ama-warị sọ ḅịa. 23Anie ọ̀ ḍa-na-iyingi-na gotẹ ḅẹẹ ye, “Ò tomḅọ la tẹẹ, ọmịnị ò gbelaa.”
24Ịn maa sakị karama ye kẹ iyi kụra-ḅio tọrụngbọ pụụn sime tomḅọ ḅe sịn pịkịma-ḅo tẹ ọ̀ ḅẹẹm, “Tamụnọ tọrọkọ ḅụ ye karị, mịnẹ karakara mẹ mie í ḍuko ḅarịye! Wamịnị nimi wararị mịnẹ ḅieḅe tẹ ị́ gwọ tomḅọ ḅe si-ḅọọ.”
25Tomḅọ ḅe nwẹnị pakịrị, “Ori si-ḅọ-o, si-ḅọa-o, yẹrị à nimi-a. Gberie mie à nimi ye, ị̀ tọrụ pụụn simem, tẹ mịọkụ à ye ẹrị tẹ.”
26Ịn nwẹnị gbela, “Ò tiye kẹ í yee? Ọ̀ tọ-ḅara kẹ ị́ pụụntẹ atọrụngbọ ma gwọ?”
27Ọ̀ nwẹnị pakịrị, “À ḍuko ọ́ pịrị ḅọrọma tẹ, tẹ ó poki ḍụkụ-a. Ó tiegotẹ sin anị naa ḅẹ ḅiiarị? Ẹbịa kụma ọmịnị sọ ò ḍukamẹnjịapụ sọ ḅẹ ḅii ḅarị ḅoto?”
28Ịn nwẹnị ye gbo ọ̀ pịrị tẹ ḅẹẹ, “Ị́yẹrị rẹ anie anịḅọ ḅe ḍukamẹnjịarị ḅọ; wamịnị kụma Mozizi mie wa ḍukamẹnjịarị. 29Wa nimim Tamụnọ ẹkwẹn Mozizi pịrịm, nwẹn ḅẹẹ Jizọsị ḅe kịngẹ kụma, anị sime-ḅara sime-ḅara sọ, ò ḅo anga tọ-anga-o tọ-anga-o, wa nimi-a!”
30Tomḅọ ḅe nwẹnị pakịrị, “Mie kịrị ḅẹrẹ-o! Ò ḅo anga ó nimi-a, kụma ori ị̀ pụụntẹ atọrụngbọ ma gwọm! 31Wa nimi ḅara ḅụ Tamụnọ si-mịẹapụ ọ̀ ḅara ḅiiarị ye mịẹ ịn pịrị pịrị-a; ọ̀ kẹ ye sịn-arị tẹ ò ḅiiarị ye mịẹarị apụ tẹkẹ mie ọ̀ naa, naa yee. 32Tomikiri mẹ bịan paka kụra-ḅio gbọrụḅọ-sọ amụ naa-a tọrụngbọ-pụụntẹḅọ mịẹtẹ mḅọ ye ẹrị tẹ ḅọ. 33Ḅị tomḅọ ḅe ọ̀ Tamụnọ ḅụụ ḅom sikima tẹ ori inetẹ mịẹ-mịẹ gberie-sọ ofori.”
34Ịn nwẹnị pakịrị, “Ị́yẹrị ḅe si ḅụụ ini í iyi tẹ pịkị í ḍikiḍiki pakama-ḅom — ị́ ḍọkịarị ị́yẹrị rẹ ye kẹ wa toluma?” Tẹ ịn nwẹnị ama-warị mẹ ḅio ò sukuruma pakama, mịnẹ ọ̀ ḅarị sọ-ḅo ma.
Tẹmẹ Ḅụ Ḅẹ Tọrụngbọ Pụụn
35Jizọsị paka ye mẹ naa tẹso, ò tomḅọ ḅe na bịama tẹ ò gbelam, “Tomḅọ Tụḅọ ḅe í ò minini?”
36Tomḅọ ḅe pakịrịm, “Ị̀ Nyanaḅọ, ḍuko ị̀ pịrị, ori tụḅọ ḅoto, mịẹtẹ àrị ò minini ḅẹ ḅara!”
37Jizọsị nwẹnị ọ̀ ḅẹẹ, “Ị́ ori ẹrị tẹẹ, tẹ mịọkụ ị́ na ẹkwẹn-arị ḅọ ḅe anie orii.”
38Tomḅọ ḅe nwẹnị ḅẹẹ, “KỊNỊNYANAḄỌ, à mininim,” tẹ ọ̀ nwẹnị Jizọsị tọrọkọ kparakị.
39Jizọsị nwẹnị ḅẹẹ, “À gbala ḅẹrẹkọn ḅẹ tẹ mị tomikiri mẹ ḅo ye ọkụ, mịẹtẹ tọrụngbọ-pụụntẹ-apụ ma ye ẹrị, tẹ ye ẹrịarị apụ ma ḅo tọrụngbọ-pụụntẹ-apụ sọ.”
40Farịsiiapụ ma ḅẹ jen-apụ tẹ anịanga ò kpeki tẹ sime apụ ò ḍuko ye mẹ naa tẹ ò gbelam, “Karakara-ḅara-ḅụ í fie-a mịnẹ wamịnị sọ tọrụngbọ-pụụn wararị?”
41Jizọsị pakịrịm, “Ọmịna atọrụngbọ pụụn sime namịna mimgbe ọ́ ḅarị ḅẹrẹ-ḅarasii nyana-a apụ sọ tẹ; kụma ọmịnị ọmịna aḅụụ kẹ ye ẹrịarị apụ ọkịarị sakị goyegoye, miemẹ fiearị mịnẹ ọ́ paa ḅẹrẹ-ḅarasii nyana wararị.”
Currently Selected:
Jọnị 9: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
