Jọnị 8
8
Sẹfị Ḅụ In Kun Ẹrẹḅọ Ma
1Anịtẹso ọrụḅọ-ọrụḅọ so warị mum, Jizọsị kụma ò so Olivu Tụndụ mẹ mum. 2Jen ene ḅaa ḅẹ dede-funfun ḅụ ọ̀ nwẹnị pịkịma Tamụnọ-warị mẹ mu. Tomi mamgba mu ò gbori ikelema tẹ ọ̀ lẹgị tẹ saakị ye kẹ ịn tolumam. 3Oloko toluma apụ ma na, Farịsiiapụ ma na nwẹnị á di-a ḅẹ owiḅọ na tii-arị ogbo in kun gbọrụ ẹrẹḅọ kẹ ḅo inimgba tọrọkọ sịẹma. 4Tẹ ịn nwẹnị Jizọsị ḅẹẹ, “Ye-tolumaḅọ, ma ẹrẹḅọ ma á di-a owiḅọ na tii-arị anga ḅụ kịnị á kunm. 5#Lẹv 20.10; Dit 22.22-24Wamịna oloko ḅụ Mozizi tọn koroma wararị mịnẹ ọkọ sime ye mịẹ ẹrẹḅọ ịn ḍụḅarị kẹ á gbin ḅaa. Ndẹẹ mịọkụ ị́ ḅịḅị?” 6Jizọsị ḅịḅị paka ḅẹ ye ḍọkị tẹ ḅẹrẹ kẹ ọ̀ sịḅị gbana mie in gotẹ miemẹ ḍuko ye. Kụma ọ̀ nwẹnị tuu tẹ kiri ḅio ọ̀ ḅara-tụngbalị kẹ ye kẹẹ.
7Ịn paa sịẹ tẹ jaị, jaị kẹ ò gbelarị ogbo ọ̀ nwẹnị tụkụ tẹ ịn ḅẹẹ, “Ọmịna ḅụ jen ene amụ si mịẹ-a ḅọ tarị ḍụḅarị mẹ kẹ á gbin.” 8Anịtẹso ọ̀ nwẹnị pịkị tuu tẹ kiri ḅio ye kẹẹ. 9In miemẹ naa tẹso, inimgba gbọrụḅọ, gbọrụḅọ nwẹnị so, omongi apụ ma tarị som. Jizọsị na ẹrẹḅọ ma na ngẹrị nwẹnị kọn, arị paa anịanga sịẹ wararị. 10Ọ̀ nwẹnị tụkụ tẹ á ḅẹẹ, “Ndẹẹ ini? Gbọrụḅọ-sọ kọn tẹ ḅẹrẹ-pẹlẹ ị́ ḅara sima-a?” 11Á nwẹnị pakịrị, “Ị̀ nyanaḅọ, gbọrụḅọ-sọ kọn-a.”
Jizọsị nwẹnị ḅẹẹ, “Ọkọ ḅẹḅẹ, iḅim. Yẹrị sọ à ḅẹrẹ-ḅarasii pẹlẹ ị́ pịrị-a. Soo, kụma ḅarị jen kẹ si mịẹ ma.”
Jizọsị Anie Tomikiri Mẹ Ḅẹ Bele Mẹ
12 #
Mat 5.14; Jọn 9.5 Jizọsị jen kẹ ẹkwẹn Farịsiiapụ ma pịrịm, ori mẹẹ, “Yẹrị anie tomikiri mẹ ḅẹ bele mẹ, ì ḍukamẹnjịḅọ-mẹnjịḅọ ḍumo bele nyana ḅa, tẹ ḅarị jen kẹ kanakana ḅio mẹnjị ḅịa.”
13 #
Jọn 5.31
Farịsiiapụ ma nwẹnị ọ̀ ḅẹẹ, “Mịọkụ ḅarana ị́ ḅụụ ḅẹ ḅẹrẹ ḍukoarị ye mẹ, í ḍuko ye mẹ gberie-sọ mịẹfinji-a í gboloma ye ḅụ.”
14Jizọsị nwẹnị pakịrị, “Ọkọ-a, à ḅarana ị̀ ḅụụ ḅụ ḍukoarị ye mẹ karakaraye, àrị à sime tẹ ḅo anga na à muarị anga na nimi wararị ẹrẹsị. Ọmịnị kụma à sime tẹ ḅo anga-o, à muarị anga-o, ó nimi-a. 15Ọmịnị tomikiri ḅẹ apụ ḅẹrẹkọn-kọn ḅara kịngẹ mie ó ḍiki tẹ kọn-arị, yẹrị à gbọrụḅọ-sọ kọn-a. 16Kụma à nwẹnị ọkọ mịẹ sọ, ị̀ ḅẹrẹkọn mẹ karakaraye sọ ḅa, ị̀ ḅịḅị ngẹrị anị ḅụ ofori gotẹ; Ḍaḅọ ḅe tẹ ị̀ kẹ fịrịma ḅọ ḅe ị̀ na emi. 17#Dit 19.15Ọmịna oloko ḅio anị kẹẹ koro wararị, mịnẹ gbọrụ ḅẹrẹ ḅụ maa apụ ḍuko ye gberie mịẹ tẹ ḅẹḅẹ in ḍuko ye mẹ karakaraye sọ tẹ. 18Àrị ị̀ ḅụụ ye ḍukoarị, tẹ ị̀ kẹ fịrịma Ḍaḅọ ḅe sọ pịkị ị̀ ḅụụ ḅẹ ye ḍukoarị.”
19Ịn nwẹnị ò gbela, “Ị́ ḍa ḅọrọ tọ-anga emi?”
Jizọsị nwẹnị pakịrị, “Ọmịnị ì nimi-a, ị̀ Ḍa ḅe sọ ọmịnị ò nimi-a. Ọmịnị ì nimi namịna ọ́ pịkị ị̀ Ḍa ḅe sọ nimi tẹ.”
20Jizọsị Tamụnọ-warị mẹ ḅio ye tolumarị sakị mie ọ̀ ma ma ḍuko ye, ịn kẹ Tamụnọ pịrịarị igbigi kẹ sụa, sụa igbe ma kẹ koroma, koroma ḅio mẹ ḅụ. Tẹ gbọrụḅọ-sọ ó kun-a, ọ̀ sakị amụ la-a ẹrẹsị.
Ọmịnị Ine À Muarị Anga Mu Ḅịa
21Jizọsị jen kẹ ịn ḅẹẹm, “À so ḅa; ọmịnị ị̀ ḍọkị ḅa, kụma ọ́ mịẹarị asi ma ḅụ mie ó sime tẹ fịị ḅarịye. Yẹrị muarị anga mẹ ọmịnị inetẹ mu ḅịa.”
22Mie ḅụ Juu-ḅẹ ḅẹrẹtọn-apụ ma ḅẹẹm, “Ọ́ ḅẹẹarị mịnẹ wa inetẹ ò muarị anga mẹ mu ḅịa. Ọ̀ ḅọrọ ori ọ̀ ḅụụ ḅaa ḅẹ ye ḍukoarị mụnọọ?”
23Jizọsị nwẹnị pakịrị, “Ọmịnị ó sime mị tomikiri mẹ pịrịm, yẹrị kụma So-ḅio à sime tẹ ḅom. Ọmịnị mị tomikiri mẹ ḅẹ apụ, kụma yẹrị mị tomikiri mẹ ḅẹ ḅọ-a. 24Anie à gotẹ ọ́ ḅẹẹ ye mịnẹ ọmịnị ọ́ mịẹarị si mẹ ḅụ sime tẹ fịị ḅa. Ó minini-a mịnẹ ‘Yẹrị Anie Yẹrị’ ḅee ḅẹḅẹ, ọmịnị ọmịna si ḅụ sime tẹ fịị ḅa.”
25Ịn nwẹnị ò gbela, “Ị́yẹrị tụḅọ?”
Jizọsị nwẹnị pakịrị, “Tarị pịrị-pịrị ḅụ à ḍuko ọ́ pịrị tẹ. 26Ọmịna ḅụụ à nyana tẹ ḍuko ḅẹ aị ḅakam, kpọma ọ́ kẹ si kiri sịẹma ḅẹ aị. Anịsọ, ị̀ kẹ fịrịma ḅọ ḅe karakara ḅọ ẹrẹsị, àrị ọ̀ ḅịḅị naa ye kịngẹ mie à ḍuko tomikiri mẹ pịrịarị ye.”
27Ịn naa ḍin-a mịnẹ Ḍaḅọ ḅe gboloma ye mie Jizọsị ḍuko ịn pịrị sime ye. 28Mie ḅụ ọ̀ nwẹnị ịn ḅẹẹ, “Ó Tomḅọ Tụḅọ ḅe saakị gelema sakị mie ó nimi ḅarịye mịnẹ ‘Yẹrị Anie Yẹrị’; anịsakị ọ́ pịkị nimi ḅa mịnẹ àrị ì soku ḅẹ kụrọ kẹ gberie-sọ mịẹ-a, kụma Ḍaḅọ ḅe tọn ị̀ pịrị ye kịngẹ mie à ḍukoarị ye. 29Tẹ ori ị̀ kẹ fịrịma ḅọ ḅe ị̀ na emi; gbọrụ sakị sọ ofori ori ì koroma so, sakị mamgba àrị ò ḅio ḅẹlẹmarị ẹrẹsị.”
30Jizọsị ḍuko aị ma naa apụ ma ḅẹ tọnwa-apụ ò mininim.
Ḅarana Sịḅị Nyana Atomi Na Omoniapụ Na
31Mie ḅụ Jizọsị ò minini apụ ma ḅẹẹm, “Ọmịnị ì tolumaye mẹ mịẹarị ḅẹḅẹ, ọ́ karakara ḅara kẹ ì ḍukamẹnjịapụ sọ tẹ, 32ọ́ karakara mẹ nimi ḅa, tẹ karakara mẹ mịẹtẹ ọ́ ḅarana sịḅị nyana tẹ apụ sọ ḅa.”
33 #
Mat 3.9; Luk 3.8 Ịn nwẹnị pakịrị, “Wamịnị Ebira-amụ furo paka apụ, tẹ jene-jene amụ wa gbọrụḅọ-sọ omoni sọ-a. Anịsakị ị́ ḅẹẹarị, ‘Ọ́ ḅarana sịḅị nyana tẹ apụ sọ ḅa’ ḅẹẹ ye mẹ í tiye fiearị?”
34Jizọsị nwẹnị ịn ḅẹẹ, “À karakara mẹ ḍuko ọ́ pịrịarị, si mịẹarị ḅọ, mịẹarị ḅọ anie si omoniḅọ. 35Omoniḅọ mḅọ ḅo omoni fịrị mẹnjịarị furo mẹ ḅẹ ḅọ sọ gbamaso ḅịa, kụma furo mẹ ḅụ iyi owiḅọtụḅọ sime furo mẹ pịrị gbamasom. 36Tụḅọ ḅe ọ́ mịẹtẹ ọ́ ḅarana sịḅị nyana ḅẹḅẹ, anịsakị rẹ mie ọ́ karakara ḅara kẹ ḅarana sịḅị nyana tẹ ye. 37Ọmịnị Ebira-amụ furo pakam mẹ à nimi wararị. Anịsọ ọ́ paa ị̀ ḅaa ḅẹ ḅọkọ ḍọkịarị, ọmịnị ì tolumaye mẹ daa-ọkị ḍụkụ-a ẹrẹsị. 38Ị̀ Ḍa kẹ ì ḍie tẹ ye gboloma ye mie à ḍukoarị, kụma ọmịna ḍaḅọ ḍuko ọ́ pịrị tẹ ye mie ọ́ mịẹarị ye.”
39Ịn nwẹnị ọ̀ pakịrị, “Ebira-amụ anie wamịna ḍaḅọ.”
Jizọsị nwẹnị pakịrị, “Ebira-amụ nwẹnị karakarama tẹ ọmịna ḍaḅọ ḅe namịna, mimgbe ori ḅe mịẹ gbọrụ aị ma mie ọmịnị sọ mịẹ ḅẹ ye. 40Anịngẹ-kụraḅio à mịẹ tẹ aị mamgba anie kẹ Tamụnọ ḅịḅị à naa karakara mẹ ḍuko ọ́ pịrị, anịsọ ọ́ paa ị̀ ḅaa ḅẹ ḅọkọ ḍọkịarị. Ebira-amụ ọkọ sime ye mịẹ-a sakị! 41Ọmịna ḍaḅọ mịẹ ye mie ọ́ mịẹarị ye.”
Ịn nwẹnị pakịrị, “Tamụnọ ḅe ḅioju ngẹrị anie wamịna ḍaḅọ, wa jen ḍaḅọ nyana-a, tẹ wamịnị anie ọ̀ karakara awọmẹẹ.”
42Jizọsị ịn ḅẹẹm, “Karakara-ḅara-ḅụ Tamụnọ nwẹnị ọmịna ḍaḅọ namịna, mimgbe ọmịnị ị̀ ḅẹlẹma tẹ, kẹ gotẹ ọkọ ḅẹẹarị, ye, mịọkụ à mịanga emi ye mẹ ọ̀ ḅụụ mie à sime tẹ ḅo ye. Àrị ì soku-ḅẹ kụrọ kẹ ḅo-a, kụma ori ị̀ kẹ fịrịmam. 43Tiye ẹrẹsị ọmịnị à ḍukoarị ye mẹ naa ḍin-a? Anị gotẹ ọkọ mịẹarị ye anie ọmịnị inetẹ inema tẹ ì oku mẹ poki-a. 44Ọmịnị ọmịna ḍaḅọ Ekwesu ḅe awọmẹ, tẹ ọ́ ḍọkịarị ọmịnị ọmịna ḍaḅọ ḅiiarị ye mịẹ. Ye tarị sakị kụra-ḅio sọ ori anie kịnị-ḅaḅọọ, tẹ jen sakị, jen sakị amụ ọ̀ pịkị karakara mẹ na gbọrụ jụ ḅọrọ-a, ọ̀ ḅụụ karakara nwẹn-sịn ye ofori ẹrẹsị. Ori iruoarị sakị, iruoarị sakị ọ̀ kọn-kọn ḍumo ḅara mẹ mie ọ́ kọn-arị ye, ori anie iruoḅọ, tẹ pịkị iruo mamgba ḍaḅọ ẹrẹsị. 45Kụma à karakara mẹ ḍukoarị, anie ó gotẹ ì minini-a ye. 46Ọmịna ḅụ tụḅọ inetẹ yẹrị mịẹ tẹ si ḍuko ḅẹ? À karakara mẹ ḍukoarị kụma tiye paka tẹ ọmịnị ì minini-a? 47Tamụnọ ḅụ sime tẹ ḅo ḅọ, ḅo ḅọ mie pịkị Tamụnọ ẹkwẹn ma pokiarị ḅọ. Anị sime-ḅara ḅụ, ọmịnị ọ́ Tamụnọ ḅụ ḅo-a ẹrẹsị ọ́ pịkị poki ḅịa.”
Jizọsị Na Ebira-amụ Na
48Ịn nwẹnị Jizọsị gbela, mịnẹ Sameriya ḅẹ ḅọọ, tẹ oru pịkị ị́ ḅụụ ḅio emi mẹ “Wa karakaraye ḍuko-a?”
49Jizọsị pakịrịm, “Oru ị̀ ḅụụ ḅio ofori. Àrị ị̀ Ḍa kụn-arị, kụma ọmịnị ị̀ kẹ ye-sịn-a. 50À tomi kẹ ị̀ pịrị ḅẹ kụn ḍọkị ị̀ ḅụụ pịrị-a. Kụma anị ḍọkịarị ḅọ emi, tẹ ọ̀ pịkị ḅẹrẹ-ḅaraiḅi pẹlẹ ị̀ pịrị ḅa. 51À karakara mẹ ḍuko ọ́ pịrịarị; ì tolumaye mẹ ḍuko ḅara mịẹ ḅọ, mịẹ ḅọ fịị ḅịa gbamasom.”
52Ịn nwẹnị ọ̀ ḅẹẹ, “Mịọkụ mie wa nimi lama tẹ ye mịnẹ oru ị́ ḅụụ ḅio emi! Ebira-amụ fịịm, tẹ ịkịankoroapụ ma sọ fịịm, anịsọ ḅẹẹarị mịnẹ í tolumaye mẹ ḍuko ḅara mịẹ ḅọ, mịẹ ḅọ fịị ḅịa gbamasom. 53Wamịna ḍaḅọ Ebira-amụ fịịm; wa sịn-a ị́ ị́ ḅụụ ọkị Ebira-amụ nẹngịmarị, ọkọ? Anịsakị ịkịankoroapụ ma sọ fịịm. Í kuromarị tụḅọ?”
54Jizọsị pakịrịm, “Yẹrị ḅarana kụn kẹ ị̀ ḅụụ pịrịarị ḅẹḅẹ anị kụn mẹ gberie-sọ la ḅịa. Ị̀ Ḍa ḅe anie kụn kẹ ị̀ pịrịarị ḅọ, anie ọmịnị mẹẹ ọmịna Tamụnọ ḅe. 55Jene-jene amụ ọmịnị ò nimi-a, kụma yẹrị àrị ò nimi wararị. À ḅẹẹm àrị ò nimi-a ḅẹḅẹ àrị ọ́ kịka tẹ iruoḅọ sọ tẹ. Kụma àrị ò nimi wararị tẹ pịkị ọ̀ ḅịḅị pokiarị. 56Ọmịna ḍaḅọ Ebira-amụ ì ḅo sakị mẹ ẹrị ḅẹ tẹ ḅioḅẹlẹm, ori anị ẹrị tẹ pịkị ḅioḅẹlẹm.”
57Ịn nwẹnị ọ̀ ḅẹẹ, “Ị́ sịḅị kụra amesi oyi finji amụ ḅọrọ-a — ị́yẹrị mẹẹ ị́ Ebira-amụ ẹrị tẹ?”
58Jizọsị nwẹnị pakịrị, “À karakara mẹ ḍuko ọ́ pịrịarị, tẹrẹmẹ Ebira-amụ iyi ‘Àrị Emi.’ ”
59Anịtẹso ịn nwẹnị ịn kẹ ò gbin ḅẹ aḍụḅarị kolokolo, kụma Jizọsị ọ̀ ḅụụ kikima tẹ Tamụnọ-warị mẹ koroma-som.
Currently Selected:
Jọnị 8: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
