Jọnị 7
7
Jizọsị Na Ori Owiapụ Amịna Apụ Na
1Mie ḅọrọ tẹso, Jizọsị nwẹnị Galili ḅụ sime tẹ mu anga, anga la, anị ibe mẹ ḅụ; ọ̀ ḅarị Judiya ḅụ ọkọ mịẹ-a, Juu-ḅẹ ḅẹrẹtọn-apụ ma ọ̀ ḅaa ḅẹ ḍọkị simem ẹrẹsị. 2#Lẹv 23.34; Dit 16.13Juu-ḅẹ-apụ ma igurugu awarị nama tẹ arị aḅio sime tẹ fị-fị Alalị mẹ nwẹnị ḅo kpeki, 3mie ḅụ Jizọsị owiapụ-amịnapụ nwẹnị ọ̀ ḅẹẹ, “Mịanga so Judiya mu, tẹ í ḍukamẹnjịarị apụ ma ị́ kọrịarị aị ma ẹrị. 4Ereso ḅẹ-ḅiiarị gbọrụḅọ-sọ mḅọ akọrịnama kẹ ḅọị anga kọrị kọrị-a. Ị́ mịna akọrịnama ma kọrịarị sakị yee bebe tomikiri mẹ í gboloma ye nimi.” 5(Ori owiapụ-amịnapụ kịngẹ sọ ò minini-a.)
6Jizọsị nwẹnị ịn ḅẹẹ, “À mu na-iḅi sakị amụ la-a, ọmịnị kụma sakị goyegoye ọmịnị na iḅi wararị. 7Tomikiri ḅẹ atomi gotẹ ó ḍiki-ḅioḅu-ḅu ye ofori, yẹrị kụma ini ì ḍiki-ḅioḅuarị, àrị ịn mịẹarị asi ma ḍuko, ḍuko ịn pịrịarị ye gotẹ. 8Ọmịnị so alalị mẹ muu, yẹrị kụma mị alalị mẹ à mu-a, à mu na-iḅi sakị amụ la-a ẹrẹsị.” 9Ò miemẹ ḍukom tẹ nwẹnị paa Galili ḅụ simem.
Jizọsị Ini Igurugu Awarị Ḅio Simetẹ Fị, Fị Alalị Mẹ Mum
10Ori owiapụ-amịnapụ ma so alalị mẹ mu tẹso, Jizọsị sọ mum; anịsọ ọ̀ ḅụụ pakama ḅara kẹ mu-a, kụma ḅọị ḅara mie ọ̀ kẹ mu ye. 11Alalị mẹ sakị ḅụ Juu-ḅẹ ḅẹrẹtọn-apụ ma ọ̀ ḍọkị ma ḅọrọm. Ịn nwẹnị gbela, “Ndẹẹ ḅọrọ ori?”
12Tomina-ogbo mẹ ḅio in ḅeri-ḅio, ḅeri-ḅio ò gbolomaye ẹkwẹn lamam. Japụ mẹẹ, “Ori iḅi tomḅọọ.” Osi apụ mẹẹ, “Ọkọ-a, ori oḅori kẹ tomi ma sịn-arị.” 13Kụma gbọrụḅọ-sọ kịnị mamgba naa ḅẹ ḅara kẹ ẹkwẹn pakama-a, in Juu-ḅẹ ḅẹrẹtọn-apụ ma ḍiki-ḅalafaam ẹrẹsị.
14Alalị aḍin ma ḅo kẹlẹ-kọnm maa anga ḍie ḅiri la tẹso Jizọsị nwẹnị saakị ye toluma Tamụnọ-warị mẹ ḅio. 15Juu-ḅẹ ḅẹrẹtọn-apụ ma iḅiọkụ ḅụụ-bua tẹ ḅẹẹm, “Ndẹẹ ḅị tomḅọ ḅe ye nimi mị opu ḅara mẹ la ḅara, jen sakị amụ ḍiri ḍawọ warị sọ mu-a ḅọ!”
16Jizọsị nwẹnị pakịrị, “À tolumarị ye mẹ ì soku ḅẹ ye-a, kụma Tamụnọ ḅara mie anị ḅoarị ye, anie ị̀ kẹ fịrịma ḅọ ḅe. 17Minini tẹ Tamụnọ ḅiiarị ye mịẹ ḍọkị ḅọ, ḍọkị ḅọ nimi ḅa ì tolumaye mẹ Tamụnọ ḅara ḅoarị na yẹrị ḅarana ị̀ kụrọ ḅụ ẹkwẹn-arị na. 18Amịna soku-ḅẹ kụrọ ḅụ ẹkwẹn-arị ḅọ anie ebube ḍọkị amịna ḅụụ pịrịarị ḅọ. Kụma mḅọ kẹ fịrịma ḅọ ebube ḍọkịarị ḅọ anie karakara tomḅọ, tẹ mḅọ ḅụ karakara-a gberie-sọ ofori. 19Oloko mẹ kẹ ọ́ pịrị ḅọ Mozizi ori-a? Kụma ọmịna ḅụ gbọrụḅọ-sọ Oloko mẹ ḍuko ye mịẹ-a. Ó gotẹ ị̀ ḅaa ḅẹ ḍọkịarị ye tiye?”
20Tomina-ogbo mẹ nwẹnị pakịrị, “Ị́yẹrị oru ị́ sịḅị ḅio emi, ị́ ḅaa ḅẹ ḍọkịarị ḅọ tụḅọ?”
21Jizọsị nwẹnị pakịrị, “À kọrị gbọrụ kọrịnama ọmịnị-mgba ḅụụ-buamam. 22#Lẹv 12.3; Suk 17.10Mozizi tọn ọ́ pịrịm mịnẹ ọmịnị ọmịna owiapụ awọmẹ tarị-ḅụụ sin (karakaraye Mozizi rẹ anị saakị-a, kụma ọmịna atẹngịapụ ma), tẹ mie ḅụ Ịnyọsara-Ene mẹ ḅụ sọ ọmịna owiḅọtụḅọ tarị-ḅụụ sin-arị. 23#Jọn 5.9Ọ́ nwẹnị Mozizi oloko mẹ ḍuko ḅara mịẹ gotẹ Ịnyọsara-Ene ḅụ owiḅọtụḅọ tarị-ḅụụ sin-arị kụma tiye ẹrẹsị anị ọmịnị ịganịmarị Ịnyọsara ene mẹ ḅụ à mịẹtẹ tomḅọ bebe ḅara kẹ oju iḅi kụma? 24Ọ́ ḅarị tọrụ ẹrịarị aị ḍiki tẹ ḅẹrẹkọn ma, kụma ó ye karakara sime-ḅara ḍiki tẹ kọọn.”
Ja apụ Gbelam Jizọsị Anie Mẹsaya Ḅe Ḅoto
25Jeruselemu ḅẹ jen-apụ ḅẹẹm, “Ḅieḅe anie ḅẹrẹtọn-apụ ma ḅaa ḅẹ ḍọkịarị ḅọ ḅe ori-a? 26Ọ́ paa ḍikii! Ama mamgba tọrọkọ ò sime tẹ ẹkwẹn-arị tẹ ịn ḅịḅị-fie ọ̀ pịrị-a! Anị inetẹ ọkọ mịẹ ḅa ọkụ-a, mịnẹ in nimi lama tẹ mịnẹ ori anie Mẹsaya ḅe? 27Kụma Mẹsaya ḅe ḅo ḅarị sakị gbọrụḅọ-sọ ò sime tẹ ḅo anga nimi ḅịa. Anịsakị wamịnị-mgba ḅị tomḅọ ḅe ḅo anga nimi-a ḅọ ofori.”
28Jizọsị Tamụnọ-warị mẹ ḅio ye-tolumarị sakị ori oloku pakama tẹ ḅẹẹm, “Ọ́ sịn-arị ọ́ karakara ḅara kẹ ị̀ ḅụụ na à ḅo anga na nimi? Àrị ì soku-ḅẹ kụrọ kẹ ḅo-a, ị̀ kẹ fịrịma ḅọ ḅe karakara ḅọọ. Ọmịnị ò nimi-a, 29kụma yẹrị àrị ò nimi wararị; ọ̀ ḅụụ anie à sime tẹ ḅo ye ẹrẹsị, tẹ ori anie pịkị ị̀ kẹ fịrịma ye.”
30Anịtẹso ịn nwẹnị ò kun ḅẹ ḅara ḍọkị, kụma gbọrụḅọ-sọ ḅara kẹ ọ̀ lama-a, ọ̀ sakị amụ la-a ẹrẹsị. 31Kụma tomina-ogbo mẹ ḅio tọnwa-apụ ò minini tẹ ḅẹẹm, “Mẹsaya ḅe ḅo sakị, ọ̀ ḅị tomḅọ ḅe kọrị tẹ ḅụụ-buama akọrịnama ma nẹngị aị kọrị ḅẹ?”
Ịn Tamụnọ-warị Mẹ Ḍikiḍiki Apụ Ma Fịrịma Jizọsị Kun Ḅẹ Mum
32Tomina-ogbo mẹ ḅeri-ḅio, ḅeri-ḅio Jizọsị gboloma ye ḅụ kọn sime ẹkwẹn mẹ mu Farịsiiapụ ma ḅeri lam, anie ḅụ ịn nwẹnị agbamịẹapụ ma ḅẹ ja apụ na Tamụnọ-warị mẹ ḍikiḍikiapụ ma ḅẹ ja apụ na fịrịma in mu ò kun-ḅoo. 33Jizọsị nwẹnị ḅẹẹ, “À boowa sakị kalịye kẹ ọmịnị na sime ḅa, anịtẹso à so ị̀ kẹ fịrịma ḅọ ḅe ḍọkụma-mu ḅa. 34Ọmịnị ị̀ ḍọkị ḅa kụma ọmịnị ị̀ ẹrị ḅịa, anie à mu sime ḅarị anga mẹ ọmịnị inetẹ mu ḅịa ẹrẹsị.”
35Juu-ḅẹ ḅẹrẹtọn-apụ ma ini-ini-ini ogboku ḅẹẹm, “Ò mu ḅẹ-yearị anga ḅọrọ tọ-anga tẹ wa ọ̀ ḍọkị ẹrị ḅịa? Ọ̀ ḅọrọ Giriki apụ opu ama ma tẹ wamịna ama ḅẹ apụ angarị anga ma mu tẹ ye kẹ Giriki apụ ma toluma ḅẹ mụnọọ? 36Ọ̀ ḅẹẹarị mịnẹ wa ọ̀ ḍọkị ḅa kụma wa ori ẹrị ḅịa, anịsakị wa pịkị inetẹ ò mu sime ḅarị anga sọ mu ḅịa. Ọ̀ ḅọrọ tiye fiearị?”
Ḍumo Pịrịarị Ngụngụḅa Minji
37 #
Lẹv 23.36
Alalị mẹ kunoma ene, anie pịkị anị ḅẹ opu ene mẹ ḅụ, Jizọsị nwẹnị saakị sịẹ tẹ oloku pakama, “Ḅẹḅọ-ḅẹḅọ tẹ minji pọkọ-tarịarị ḅọ mḅọ ị̀ dama-ḅo minji ḅuu. 38#Izi 47.1; Zẹk 14.8Anie pịkị Fịafịa Ḍiri mẹ ḍukoarị ye, ‘Ì minini ḅọ, minini ḅọ ḍumo-pịrịarị minji mḅọ ḅioḅẹngbọ ḅụ sime tẹ sara, sara paka-ḅo ḅa.’ ” 39Tẹmẹ ḅe gboloma ye mie Jizọsị ḍuko ye, anie ò minini apụ nyana ḅarịye mẹ. Anị sakị mẹ ḅụ Tamụnọ amụ Tẹmẹ ḅe kẹ kịnị pịrị-a, ori amụ Jizọsị saakị gelema mu ebube lama-a ẹrẹsị.
Tomi Ma Ogboku Pua Pakam
40Tomina-ogbo mẹ ḅẹ jen-apụ Jizọsị kọn ẹkwẹn mẹ naa tẹ ḅẹẹm, “Karakara-ḅara-ḅụ ḅị tomḅọ ḅe anie ḅo ḅẹ tẹ wa ḍiki sime Ịkịankoroḅọ ḅee!”
41Osi apụ mẹẹ, “Ori anie Mẹsaya ḅe!”
Kụma kirikọn-apụ mẹẹ, “Mẹsaya ḅe ọ̀ Galili ḅụ paka-ḅo ḅịa! 42#2 Sam 7.12; May 5.2Fịafịa Ḍiri mẹ ḅẹẹarị mịnẹ Mẹsaya ḅe Ama-da Devidi furo ḅụ mie ọ̀ paka-ḅo ḅarịye, tẹ Bẹtịlịhẹmụ ḅụ mie ọ̀ pịkị iyi ḅarịye, Devidi anga ama mẹ.” 43Mie ḅụ pua nwẹnị paka tomina-ogbo mẹ ḅio, Jizọsị gotẹ. 44Japụ ḅiim ini ò kun, kụma gbọrụḅọ-sọ ḅara kẹ ọ̀ lama-a.
Juu-ḅẹ Ḅẹrẹtọn-apụ Ma Jizọsị Minini-a Mẹ
45Tamụnọ-warị mẹ ḍikiḍikiapụ ma tẹ ịn fịrịma mu Jizọsị kun ḅẹ apụ ma pịkịma-so tẹso, agbamịẹapụ ma na, Farịsiiapụ ma na nwẹnị ịn gbela, “Ó tiegotẹ ọ̀ kẹ ḅo-a?”
46Tamụnọ-warị mẹ ḍikiḍikiapụ ma nwẹnị pakịrị, “Jene-jene gbọrụḅọ-sọ amụ ḅị tomḅọ ḅe kọn-arị ẹkwẹn ḅara kọn-a!”
47Farịsiiapụ ma nwẹnị ịn gbela, “Ọmịnị sọ ori ó toluma irima tẹ ḅarị ya? 48Jene ḅẹrẹtọn-apụ ma ḅẹ gbọrụḅọ, anịanịa Farịsiiḅọ, tẹ ò minini ḅọ ó nimi tẹ? 49Mị tomi ogbo mẹ Mozizi Oloko mẹ nimi-a, ọkọẹrẹsị Tamụnọ wori-nume sime ịn pịrịm!”
50 #
Jọn 3.1,2 Farịsiiapụ ma tẹ anịanga sime apụ ma ḅẹ gbọrụḅọ anie Nikodimọsị, gbọrụ sakị Jizọsị dama-mu ḅọ ḅe. Ori osi-apụ ma ḅẹẹm, 51“Wamịna Oloko sime-ḅara ḅụ wa inetẹ ḅẹrẹ-ḅarasii pẹlẹ tomḅọ pịrị ḅịa, wa tarị mḅọ ḅịḅị naa tẹ mḅọ mịẹ si ḍọkị pakama-ḅo tẹ sikima.”
52Ịn nwẹnị pakịrị, “Iḅim, anie ị́yẹrị sọ Galili ḅụ ḅo wararị ya? Fịafịa Ḍiri mẹ ḍawọ ḍikii, í nimi ḅa mịnẹ ịkịankoroḅọ Galili ḅụ paka-ḅo ḅo-a.” 53Anịtẹso, ọrụḅọ-ọrụḅọ nwẹnị so amịna warị mu.
Currently Selected:
Jọnị 7: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
