Jọnị 10

Anana Ḍikiḍikiḅọ Ḅe Egberi Mẹ

1Jizọsị nwẹnị ḅẹẹ, “À karakara ye mẹ ḍuko ọ́ pịrịarị; anana koko onu mẹ ḅẹ ḅọkọ mẹ ḅụ sọ-mu-a tẹ jen pakịrị anga kpọlị sọarị ḅọ anie furuḅọ, pịkị kụrọ-ḅara kẹ amịna nye-a ye ọkịarị ḅọ. 2Onu ḅọkọ mẹ ḅụ ḅọrọ sọ-muarị ḅọ ḅe anie anana ma ḍikiḍikiarị ḅọ ḅee. 3Onu ḅọkọ mẹ ḍikiḍikiarị ḅọ ḅe finji ọ̀ pịrị tẹ ori ori anana ma ẹrẹ kẹ ịn sịn tẹ ini ọ̀ pọkọ lekiri tẹ paka ọ̀ dama-muarị, tẹ ọ̀ tọrọkọ tarị tẹ ịn kẹ pakarị. 4Ori ịn pakama fama sakị ọ̀ tọrọkọ tarị tẹ anana ma ori ọḅụ ḍuka muarị, ini ọ̀ pọkọ lekiri wararị ẹrẹsị. 5Ịn jụmọ kẹ ọkọ ḍuka mu ḅịa; anie nakara ọkọ sime ḅọ ḅe ḅụ ịn mangị-so ḅa, ini ọ̀ pọkọ lekiri-a ẹrẹsị.”

6Jizọsị mị egberi mẹ gbaa ịn pịrịm, kụma ò fie ye ịn naa ḍin-a.

Jizọsị Anie Iḅi Anana Ḍikiḍikiḅọ Ḅe

7Mie ḅụ Jizọsị nwẹnị sin ḅẹẹ, “À karakara ye mẹ ḍuko ọ́ pịrịarị: yẹrị anie anana ma ḅọrọ sọarị onu-ḅọkọ mẹ. 8Ḅo tẹrẹmẹ à ḅo apụ mamgba furu apụ, pịkị kụrọ ḅara kẹ amịna nye-a ye ọkịarị apụ famam; kụma anana ma in poki-a; 9yẹrị anie ḅọrọ sọ onu-ḅọkọ mẹẹ. Ḅẹḅọ-ḅẹḅọ tẹ ị̀ ḅụụ ḅọrọ sọ ḅọ, sọ ḅọ gberie-sọ ḅarị mḅọ la ḅịa; mḅọ sọ na paka na tẹ pịkị fịye ẹrị fị ḅa. 10Furuḅọ ḅe jen gotẹ ḅo-a furu na, ḅaa na, guluguluma na sikima. Yẹrị à gotẹ ḅo ye ó ḍumo nyana ḅẹ ḅara, ḅin gbasịtẹ ḍumo.

11“Yẹrị anie iḅi anana-ḍikiḍikiḅọ ḅee, minini tẹ fịị anana ma pịrị tẹ in ḍumo ḅẹ ḅọ ḅe. 12Tọrụ kẹ anana ma ḅụụ wẹrị ḅẹ ẹrẹsị ini ọkọ ḅọ ḅe, ori karakaramatẹ anana ma ḍikiḍikiarịḅọ ḅe-a pịkị ịn nyanaḅọ-a ẹrẹsị, anana kun pẹị-pẹị nama ḅoarị tẹ ori ẹrị kụma ori anana ma koroma mangị-soarị; tẹ anana kun pẹị, pẹị nama ḅe ịna ḅụ ḅẹ jaị kun ọkị tẹ kirikọn-aị gala-galamarị. 13Ọkọḅọ ḅe mangị-soarị ori papaa ọkọḅọ kịngẹ ẹrẹsị, tẹ ọ̀ pịkị anana ma bala-a. 14#Mat 11.27; Luk 10.22Yẹrị anie iḅi anana-ḍikiḍikiḅọ ḅee, àrị ị̀ anana ma nimi wararị, tẹ ị̀ anana ma sọ ì nimi wararị 15Ḍaḅọ ḅe kẹ ì nimi tẹ yẹrị sọ kẹ ò nimi wararị ḅara mẹ, tẹ à fịị anana ma pịrịarị, in ḍumo ḅẹ ḅara. 16Ja anana tẹ sime ị̀ pịrị aị emi, tẹ mị anana koko onu mẹ ḅio ofori aị. Ini ma sọ àrị ịn kẹ ḅo ḅa; ini ị̀ pọkọ naa ḅa, tẹ inimgba gbọrụ anana-ogbo mịẹ ḅa gbọrụ anana-ḍikiḍikiḅọ suku-ḅio.

17“Ḍaḅọ ḅe ị̀ ḅẹlẹmarị, à minini tẹ ì ḍumo ḅụ ḅara-siin tẹ fịịarị ẹrẹsị, mịẹtẹ à pịkị siin anị ọkị ị̀ ḅụụ pịrị ḅẹ ḅara. 18Gbọrụḅọ-sọ kụrọ-ḅara kẹ ị̀ ḅara ì ḍumo ọkị-a. Yẹrị ḅarana ị̀ ḅụụ-ḅẹlẹ ḅara ḅụ anị ḅụ ḅara-siin-arị, tẹ à kụrọ nyana wararị kẹ anị ḅụ ḅara-siin, tẹ pịkị anị ọkị ị̀ ḅụụ pịrị. Miemẹ anie ị̀ Ḍa ḅe tọn ị̀ pịrịm à mịẹ ḅẹ ḅara.”

19Ịn pịkị ḅarị gbọrụ-ḅịḅị-fiea ịna ogboku, ọ̀ kọn ẹkwẹn ma gotẹ. 20Ịna ḅụ ḅẹ tọnwa-apụ ḅẹẹarị, “Oru ọ̀ ḅụụ ḅio emi! Ọ̀ nọmụarị ḅara ḍikii! Ó tiegotẹ ò pokiarị?”

21Kụma osi apụ mẹẹ, “Oru ḅụụ ḅio simearị ḅọ inetẹ mị ḅara mẹ ẹkwẹn ḅịa. Ndẹẹ oru inetẹ tọrụngbọ-pụụntẹ-apụ mịẹ tẹ ịn ye ẹrị ḅẹ ḅara?”

Tomi Ma Jizọsị Sịkịm

22Sakị mẹ okiringa sakịị, tẹ ịn Tamụnọ-warị mẹ mịẹ fịafịama sakị mẹ kẹ ḅiokoroma Alalị mẹ fịarị sakị Jeruselemu ḅụ, 23Jizọsị Tamụnọ-warị mẹ ḅẹ Sọlọmọnị Sịḅị Kikima Anga nwẹn-sịn yọ mẹ ḅụ mẹnjịarị ogbo, 24tomi ma ḅo ò gbori-ikelema tẹ gbelam, “Ị́ wa kẹ ḅio-maaịn-tọn ḅụ wẹrị mu tọ sakị la ḅẹ? Karakara ḅara kẹ ḍuko banabanama wa pịrị, ị́yẹrị Mẹsaya ḅe ḅẹḅẹ.”

25Jizọsị nwẹnị pakịrị, “À ḍuko ọ́ pịrị ḅọrọma tẹẹ, kụma ọmịnị ì minini ḅẹ ḅii-a. Àrị ị̀ Ḍa ḅe kụrọ kẹ kọrịarị aị ma ì ḍuko pakamarị. 26Kụma ó ḅii-a ó minini, ọmịnị ị̀ atomi-a ẹrẹsị. 27Ị̀ atomi mie à ḍukoarị ye naarị; àrị in nimi wararị, ịn pịkị ì ḍukamẹnjịarị. 28À sime gbamaso ḍumo kẹ ịn pịrịarị, tẹ ịn ḅarị fịị ḅịa gbamasom. Gbọrụḅọ-sọ inetẹ ị̀ ḅara ḅio ịn pụkọ-ọkị ḅịa. 29Ị̀ Ḍa ḅe kẹ ị̀ pịrị tẹ ye mẹ ḅẹẹye-ḅẹẹye nẹngịm, tẹ gbọrụḅọ-sọ inetẹ Ḍaḅọ ḅe ḍikiḍiki ḅara ḅio ịn pụkọ-ọkị ḅịa. 30Ḍaḅọ ḅe na ị̀ na gberie.”

31Anịtẹso tomi ma nwẹnị pịkị ḍụḅarị kolokolo ịn kẹ ò gbin ḅẹ ḅara. 32Jizọsị nwẹnị ịn ḅẹẹ, “Tọnwa iḅi akọrịnama à nwẹn kọrị tẹ ọmịna tọrọkọ, anie Ḍaḅọ ḅe kẹ ị̀ pịrịm à kọrị ḅẹ aị ma, mịna aị ma ḅụ ọmịnị gotẹ ḍụḅarị kẹ ì gbin ḅẹ ḅiiarị ye tiye?”

33 # Lẹv 24.16 In pakịrịm, “Wa gbọrụ iḅi kọrịnama sọ gotẹ ḍụḅarị kẹ í gbin ḅẹ ḅii-a, kụma ị́ Tamụnọ fie simearị ye gotẹ. Ị́yẹrị ẹrẹḅọ iyiḅọ kụma ị́ ị́ ḅụụ kẹ Tamụnọ sọma ḅẹ ḍọkịarị!”

34 # Dev 82.6 Jizọsị nwẹnị pakịrị, “Ọmịna Oloko Ḍiri ḅio anị kẹẹ koro wararị, mịnẹ Tamụnọ ḅẹẹm, ‘Ọmịnị tamụnọọ.’ 35Tamụnọ nwẹnị ori ẹkwẹn pịrị apụ ma ḅẹẹm, ‘ọmịnị tamụnọ’, wa pịkị nimi wararị mịnẹ Fịafịa Ḍiri mẹ ḍuko tẹ ye mẹ karakaram; 36ndẹẹ mịọkụ ọmịnị inetẹ ḅẹẹ ḅẹ mịnẹ Ḍaḅọ ḅe sẹlẹ-ọkị tẹ kẹ tomikiri fịrịma ḅọ ḅe Tamụnọ fie-simarị à ḅẹẹm, ‘yẹrị Tamụnọ Tụḅọ’ gotẹ? 37Ọmịnị ì minini ma, à nwẹnị ị̀ Ḍa ḅe ḅiiarị à mịẹ ḅẹ aị ma mịẹ-a ḅẹḅẹ. 38Kụma àrị arị mịẹarị ḅẹḅẹ, ọ́ nwẹnị ì minini-a sọ, ọ́ paa ị̀ akọrịnama ma minini na-iḅim, mịẹtẹ ọ́ gbọrsịḅị nimi ḅẹ ḅara mịnẹ Ḍaḅọ ḅe ị̀ ḅụụ ḅio emi, tẹ yẹrị pịkị Ḍaḅọ ḅe ḅụụ ḅio emi.”

39Ịn pịkị jen gbọrụ sakị kẹ ini ine-ḅara, ine-ḅara mịẹ tẹ Jizọsị kun so ḅẹ ḍọkịm, kụma ọ̀ nwẹnị ịna ḅara gbarị.

40 # Jọn 1.28 Anịtẹso Jizọsị nwẹnị pịkịma Jodanị Tọrụ mẹ saḅa-anga ḅụ Jọnị sime tẹ minji sara sime anga mẹ mu, tẹ anịanga sime. 41Tọnwa atomi ọ̀ dama-ḅom. Ini mẹẹ, “Jọnị ḅe ọ̀ ḅụụ-buama-aị mịẹ-a sọ, ḅị tomḅọ ḅe ḅụ ó ḍuko ye goyegoye karakara famam.” 42Tẹ anịanga sime tọnwa-apụ Jizọsị mininim.

Currently Selected:

Jọnị 10: KBTP

Highlight

Copy