Jọnị 11
11
Lazarọsị Fịị Mẹ
1 #
Luk 10.38,39 Lazarọsị nwẹn-sịn ḅọ, tẹ Bẹtani ama ḅụ anga ḅọ, nwẹnị obi. Bẹtani anie Meri na árị mbịra Mata na anga ama. 2#Jọn 12.3(Ma Meri ma anie sẹntị kẹ KỊNỊNYANAḄỌ ḅe aḅụọ ọgọnọ ḅama sara, tẹ nwẹnị pịkị á sịḅị-ḅẹ-inume kẹ arị sin ḅọ ma. Árị iyimbere Lazarọsị mie obi ye.) 3Ini eremịna amịnapụ ma oku kẹ Jizọsị fịrịmam, “KỊNỊNYANAḄỌ, í iḅi ikiaḅọ ḅe obiarị.”
4Jizọsị anị naa sakị ọ̀ ḅẹẹm, “Mị obi mẹ Lazarọsị fịị kẹ kunoma ḅịa. Ebube ọkị-ḅo Tamụnọ pịrị anie miemẹ gotẹ paka ye, tẹ anị pịkị mịẹtẹ Tamụnọ Tụḅọ ḅe ebube nyana ḅa.”
5Jizọsị Mata na árị mbịra ma na Lazarọsị na ḅẹlẹmam. 6Anịsọ ọ̀ Lazarọsị obiarị oku mẹ naa tẹso, maa aḍin na gbasịye ọ̀ nwẹn sime gbanamam ò sime yọ ḅụ. 7Anịtẹso ori ò ḍukamẹnjịapụ ma ḅẹẹm, “Ó yee wa pịkịma Judiya mu.”
8Ò ḍukamẹnjịapụ ma nwẹnị pakịrị, “Ye-tolumaḅọ, ḅọrọ tẹ amụ ala-a sakị ḅụ tomi ma ḍụḅarị kẹ í gbin ḅẹ tọn anga mẹ ị́ pịkị pịkịma anịanga mu ḅẹ tọn-arị?”
9Jizọsị mẹẹ, “Gbọrụ eneḅaka-ogbo oyi maa aso finji nyana wararị, ọkọ-a? Ọkọẹrẹsị eneḅaka-fịafịa-ogbo mẹnjịarị ḅọ pụmbụ-pụmbụ-a, tomikiri ḅẹ bele mẹ ḅụ mḅọ tọrụ ye ẹrịarị gotẹ. 10Kụma mḅọ ḍin ḅụ mẹnjịarị ḅẹḅẹ mḅọ pụmbụarị, mḅọ ḅarị bele nyana-a ẹrẹsị.” 11Jizọsị miemẹ ḍuko tẹso, ọ̀ nwẹnị pịkị ḅẹẹ, “Wamịna ikiaḅọ Lazarọsị koro mono tẹ, kụma à mu ọ̀ saakịma ḅa.”
12Ò ḍukamẹnjịapụ ma nwẹnị pakịrị, “KỊNỊNYANAḄỌ, ò monoarị ḅẹ kụma, ọ̀ ḅụụ iḅi ḅarị ya.”
13Jizọsị fie ye Lazarọsị fịị tẹ, kụma ini kuromam papaa mono mie ọ̀ ḅẹẹ ye. 14Mie ḅụ Jizọsị ḍuko banabanama ịn pịrịm, “Lazarọsị fịị tẹ, 15kụma ó gotẹ ì ḅioḅẹlẹarị mịnẹ àrị ori na ofori anị paka sakị, mịẹtẹ ó minini ḅẹ ḅara. Ó yee wa ọ̀ ḍọkụma-mu.”
16Tọmọsị (ịn kẹ Maa apụ awọmẹ sịn ḅọ ḅe) nwẹnị ò pembema Jizọsị ḍukamẹnjịapụ ma ḅẹẹ, “Ó yee wamịnị-mgba Ye-tolumaḅọ ḅe na muu, mịẹtẹ wa ori na sọ tẹ fịị ḅẹ ḅara!”
Jizọsị Anie Fịị Ḅụ Saakị Ḅe Pịkị Ḍumo Ḅee
17Jizọsị ḅo la tẹso, ò ḅo nimi tẹ mịnẹ ịn Lazarọsị ḍiḅi tẹ ini aḍin ḅọrọ tẹ. 18Bẹtani na Jeruselemu na kpekim, tẹra tombi pembe ye mie maa ama ma kẹ ḅele ye, 19tẹ Judiya ibe ḅụ anga tọnwa-apụ Mata na Meri na ḅiokpọma ḅẹ ḅo tẹ, ịna iyimbere fịị mẹ gotẹ.
20Mata ḅo naa tẹ mịnẹ Jizọsị ḅoarị ḅẹẹ sakị árị ori na bịama ḅẹ tẹ mẹnjị pakam, kụma Meri warị ḅio simem. 21Mata Jizọsị ḅẹẹm, “KỊNỊNYANAḄỌ, ị́ mịanga sime namịna ì iyimbere ḅe ọ̀ fịị ḅịa! 22Kụma à nimi wararị mịnẹ mịọkụ sọ Tamụnọ ḅara í ḅii ye, ḅii ye ori ị́ pịrị ḅa.”
23Jizọsị nwẹnị ḍuko á pịrị, “Í iyimbere ḅe ọ̀ saakị tẹ ḍumo ḅa.”
24Á nwẹnị pakịrị, “À nimi wararị mịnẹ ọ̀ saakị tẹ ḍumo ḅa kunoma ene mẹ ḅụ.”
25Jizọsị nwẹnị á ḅẹẹ, “Yẹrị anie fị-ḅụ-saakị ḅee, pịkị ḍumo ḅee. Ì minini ḅọ, minini ḅọ mḅọ ḍumo ḅa; mḅọ ḅọrọ fịị sọ, 26tẹ ḍumo wararị tẹ ì minini ḅọ, minini ḅọ mḅọ fịị ḅịa gbamaso ḅa. Miemẹ í minini?”
27Á nwẹnị pakịrị, “Inn, KỊNỊNYANAḄỌ, à mininim mịnẹ ị́yẹrị anie Mẹsaya, Tamụnọ Tụḅọ ḅee, tẹ tomikiri mẹ ḅo ḅẹ ḅọ ḅee.”
Jizọsị Lazarọsị Gotẹ Owum
28Mata miemẹ ḍuko tẹso, á pịkịma-so tẹ ḅeri-ḅio, ḅeri-ḅio árị mbịra Meri ḅẹẹm, “Ye-tolumaḅọ ḅe ḅo tẹ í gbelarị.” 29Meri miemẹ naa tẹso, á saakị tẹ fọnya paka ori na bịama ḅẹ mum. 30(Jizọsị amụ ama mẹ ḅio sọ-a, kụma ọ̀ paa Mata ori na bịama anga mẹ ḅụ simearị ogbo Meri mu ọ̀ lam.) 31Meri na warị mẹ ḅio sime tẹ á ḅiokpọma sime apụ ma á fọnya mẹnjị paka ye mẹ ẹrị tẹ á pono pakam. Ịn kuromam á mu ḍuḅu mẹ akaka owu ḅẹ muarị.
32Meri mu Jizọsị sime anga la tẹ ori ẹrị gbọrụ sakị árị ọ̀ ḅụọ-suku ḅịkị koro tẹ ḅẹẹm, “KỊNỊNYANAḄỌ, ị́ mịanga sime namịna ì iyimbere ḅe ọ̀ fịị ḅịa.”
33Jizọsị árị owuarị ye mẹ kẹ árị ẹrịm, pịkị tomi ma árị na sọ tẹ owuarị ḅara mẹ na; anị nwẹnị ò ḅioḅẹngbọ temi, tẹ ọ̀ tẹmẹ jike lama. 34Ọ̀ nwẹnị ịn gbela, “Ọ́ ḅọrọ tọ-anga ọ̀ kẹ ḍiḅi?”
Ịn nwẹnị pakịrị, “KỊNỊNYANAḄỌ, ḅo ḍikii.”
35Jizọsị owum. 36Tomi ma nwẹnị ḅẹẹ, “Ọ̀ kẹ ọ̀ ḅẹlẹma la ḅara ḍikii!”
37Kụma ini ḅẹ ja apụ mẹẹ, “Ori kọkọ tọrụngbọ pụụn ḅọ ḅe tọrụ finji, ori-a ḅoto? Ori inetẹ mịẹtẹ Lazarọsị ḍumo ḅịa?”
Jizọsị Lazarọsị Mịẹtẹ Ò Siin Ḍumom
38Paka ye mẹ sin kpọma Jizọsị tẹmẹ jike tẹ ọ̀ mẹnjị mu ḍuḅu mẹ lam. Ḍuḅu mẹ fukuru, tẹ ịn ḍụḅarị kẹ ḅọrọ sọ anga mẹ kikimam. 39Jizọsị nwẹnị tọn, “Ọ́ ḍụḅarị mẹ saakị sikimaa!”
Mata, fịtẹ-ḅọ ḅe ịyịmbara ma nwẹnị pakịrị, “KỊNỊNYANAḄỌ, fụrụ ye ḅaka ḅa. Ò ḍiḅi tẹ inia aḍin ḅọrọ tẹẹ.”
40Jizọsị nwẹnị á ḅẹẹ, “À ḍuko ị́ pịrị-a mịnẹ ị́ Tamụnọ kụrọ mẹ ḅẹ ebube ẹrị ḅa, í minini nyanam ḅẹ kụma?” 41Ịn nwẹnị ḍụḅarị mẹ saakị sikima, tẹ Jizọsị tọrụ kẹ so da tẹ tẹkẹm, “Ḍa, àrị ịmịẹtẹ kẹ ị́ ḅẹẹm, mịnẹ ị́ ị̀ tẹkẹ naarị. 42À nimi wararị sakị mamgba ị́ ị̀ naarị, kụma mịna atomi ma mie à gotẹ mị-ḅara ḍukoarị, mịẹtẹ in minini ḅẹ ḅara mịnẹ ị̀ kẹ fịrịmam.” 43Ọ̀ mị tẹkẹ mẹ kọn tẹso, ọ̀ nwẹnị oloku pọkọ kẹ ọ̀ sịn, “Lazarọsị, paka-ḅoo!” 44Fịtẹ-ḅọ ḅe nwẹnị saakị tẹ paka-ḅo, kụma ori aḅara na ḅụọ na tọrụkuḅu na — bebe oju mẹmgba — paa ḍụẹịn ḍiḅi ḅịtẹ apakịrị ma ḅụ fịna ikelema wararị. Jizọsị nwẹnị ịn ḅẹẹ, “Ọmịnị ò fima tẹ ò so.”
Ịn Ḅiya Jizọsị Pịrị Ḅaa-Ḅẹrẹ Mẹ
(Mat 26.1-5; Mak 14.1-2; Luk 22.1-2)
45Meri ẹrị ḅẹ ḅo apụ ma ḅẹ tọnwa-apụ Jizọsị kọrị ye mẹ ẹrị tẹ ò mininim. 46Kụma ini ḅẹ ja apụ pịkịma so tẹ Jizọsị kọrị ye mẹ ḍuko Farịsiiapụ ma pịrịm. 47Mie ḅụ Farịsiiapụ ma na agbamịẹapụ ma na nwẹnị Sịẹ Kobiri mẹ sịn tẹ ini na ḅịḅị-ọkịya tẹ ḅẹẹ, “Ndẹẹ wa mịẹ ḅẹ ḅara? Ḅị tomḅọ ḅe mịẹarị ḅụụ-buama-aị ma ọmịnị ẹrị tẹ! 48Wa ò ḍiki-tọrụsin tẹ ọ̀ mị-ḅara mịẹ ma-mu kụma, ḅẹḅọ-ḅẹḅọ ò minini ḅa, tẹ Romu ḅẹ ḅẹrẹtọn-apụ ma papaa anị wẹrịso ḅịa, ịn ḅo wamịna Tamụnọ-warị mẹ kaan-sara tẹ pịkị wamịna sịẹ mẹ fama ḅa!”
49Ini ḅẹ gbọrụḅọ, Kayafasị nwẹn-sịn ḅọ, tẹ pịkị anị kụra mẹ ḅụ Sịḅịda-Agbamịẹḅọ, nwẹnị ḅẹẹ, “Ọmịnị oḅori soarị ḅara ḍikii! 50Ọmịnị inetẹ nimi ḅo-a mịnẹ gbọrụ tomḅọ fịị ama mẹ pịrị iḅi bebe sịẹ mẹ fa nẹngịm?” 51Karakaraye ḍuko ḅụ ori ḅarana miemẹ kuroma ḅo tẹ ḍuko-a, anị sime-ḅara ḅụ ori kụra mẹ ḅụ Sịḅịda-Agbamịẹḅọ ḅara ḅụ ọ̀ gbala ịkịankorom mịnẹ Jizọsị fịị Juu-ḅẹ-apụ ma pịrị ḅa, 52pịkị ini ngẹrị-a kụma ọ̀ fịị tẹ Tamụnọ atomi tẹ gala-gala wararị apụ mamgba kẹ ḅo gbọrụ ḅụ wẹrị ḅẹ ḅara.
53Anị ene ḅụ mie Juu-ḅẹ ḅẹrẹtọn-apụ ma saakị ḅaa-ḅẹrẹ-ḅiya Jizọsị pịrị ye. 54Mie ḅụ Jizọsị ḅarị kịnị nimi ḅẹ ḅara kẹ Judiya ḅụ mẹnjị-a, kụma ọ̀ sọ-mu ịkpa mẹ kpeki anga Iferemu nwẹn-sịn ama ḅụ ò ḍukamẹnjịapụ ma na simem.
55Juu-ḅẹ-apụ ma ịna Saḅaḅọrọ-Alalị mẹ fị-fị sakị mẹ ḅo kpeki tẹso, tọnwa atomi nwẹnị anga, anga ḅụ sime tẹ iwo Jeruselemu mu, ịn ḅụụ fịafịama alalị mẹ pịrị mịẹye mẹ mịẹ ḅẹ ẹrẹsị. 56Ịn Jizọsị ḍọkị ma mum, tẹ in ḅo Tamụnọ-warị mẹ ḅio kobiri tẹso, ịn nwẹnị jụmọ-jụmọ gbela, “Ndẹẹ ó kuromarị ḅara? Karakara-ḅara-ḅụ alalị mẹ ò ḅo ḅịa, ò ḅo ḅẹ aro?” 57Agbamịẹapụ ma na Farịsiiapụ ma na oloko sụam mịnẹ Jizọsị sime anga nimi ḅọ, nimi ḅọ ḅo ḍukoo, mịẹtẹ ini inetẹ ò kun ḅẹ ḅara.
Currently Selected:
Jọnị 11: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
