Jọnị 12
12
Bẹtani Ḅụ Kịnị Olo Kẹ Jizọsị Aḅụọ Suku Saram
(Mat 26.6-13; Mak 14.3-9)
1Sonio aḍin kọnm Saḅaḅọrọ-Alalị mẹ koro ḅẹ ene Jizọsị Bẹtani mum, anie Lazarọsị, ọ̀ fịị ḅụ saakịma ḅọ ḅe ama mẹ. 2Ịn nwẹnị anịanga ḅoḅiri fịye mịẹ ọ̀ pịrị, tẹ Mata sọ ḅarasụa kọrịnama kọrịm; Jizọsị na dẹbịlẹ mẹ suku lẹgị apụ ma Lazarọsị sọ ini ḅẹ gbọrụḅọ. 3#Luk 7.37,38Anịtẹso Meri nwẹnị nadị nwẹn-sịn sịn ḅụ paka-ḅo ye kẹ mịẹ, kpọma yela sẹntị ololo kẹ ḅo Jizọsị aḅụọ ḅama sara, tẹ á sịḅị-ḅẹ-inume kẹ arị sin. Sẹntị mẹ ḅẹ kụnụ mẹ nwẹnị bebe warị mẹ kana-koro. 4Tẹ Judasị Isikarịyọtị — Jizọsị ḍukamẹnjịapụ ma ḅẹ gbọrụḅọ, anie Jizọsị kẹ tomina ḅara-ḅio dẹrịma ḅẹ ḅọ ḅe — nwẹnị ḅẹẹ, 5“Ịn tiegotẹ mị sẹntị mẹ kẹ seleḅa igbigi jeia si dẹrị tẹ igbigi mẹ kẹ igoin-apụ pịrị-a?” 6Ori igoin-apụ ma balam kẹ ò miemẹ ḍuko-a, kụma ori furuḅọọ ẹrẹsị. Ori anie ịna igbigi-kokoḅọ, tẹ sakị mamgba ogbo ḅẹ igbigi mẹ ḅụ ye kpọmbị, kpọmbị tẹ kẹ amịna ḅara kuḅu ḅẹ mịẹye mịẹ mịẹm.
7Kụma Jizọsị ḅẹẹm, “Ọmịnị á wẹrịsoo! Yee árị á nyana ye kẹ ini ì ḍiḅi ḅẹ ene mẹ wẹrịma. 8#Dit 15.11Igoin-apụ ma na ọmịnị na emi sakị mamgba, kụma yẹrị ọ́ sakị mamgba ị̀ nyana ḅịa.”
Ịn Lazarọsị Ḅaa Ḅẹ Ḅẹrẹ Ḅiyam
9Tọnwa, tọnwa ḅẹ atomi naam Jizọsị Bẹtani ḅụ emi, tẹ ịn nwẹnị anịanga mu. In Jizọsị ngẹrị gotẹ mu-a, kụma pịkị Lazarọsị, fịị ḅụ ọ̀ saakịma ḅọ ḅe sọ, ẹrị ḅẹm. 10Mie ḅụ agbamịẹapụ ma tọnm mịnẹ in Lazarọsị sọ ḅaa ḅa, 11ọ̀ sịḅị gotẹ, Juu-ḅẹ-apụ ma ḅẹ tọnwa-apụ ịn sịkị tẹ Jizọsị mininiarị ẹrẹsị.
Jizọsị Owu Ḅara Iḅi-ḅọ Ḅara Kẹ Jeruselemu Sọ-mum
(Mat 21.1-11; Mak 11.1-11; Luk 19.28-40)
12Anị ḅẹ ene ḅaa ḅụ opu tomina-ogbo mẹ tẹ Saḅaḅọrọ-Alalị mẹ ḅo apụ ma naam mịnẹ Jizọsị Jeruselemu ḅoarị. 13#Dev 118.25,26Mie ḅụ ịn nwẹnị ọrọrọ ḅara dogi tẹ oloku-ma paka ori na bịama ḅẹ mu. Ini mẹẹ, “Tamụnọ tokinii! KỊNỊNYANAḄỌ ḅe ẹrẹ ḅụ ḅoarị ḅọ ḅe Tamụnọ ò bomaa! Tamụnọ Izirẹlị Amadaḅọ ḅe bomaa.”
14Jizọsị nwẹnị gbọrụ asambịrịma asụ ẹrị tẹ ori ọgọnọ kpọlị, tẹ ori ọ̀ kẹ mẹnjịm, Fịafịa Ḍiri mẹ ḅio anị wẹrịtẹ ḅẹẹ ḅara,
15 #
Zẹk 9.9
“Kpọma-ḅẹlẹmarị Jeruselemu ḅẹ apụ, ọ́ ḅalafa ma!
Ḍikii, ọmịna Amadaḅọ ò ḅoarị,
asambịrịma asụ ọgọnọ ori emi.”
16Ò ḍukamẹnjịapụ ma miemẹ fiearị ye naa ḍin-a anị sakị mẹ ḅụ, kụma Tamụnọ fịị ḅụ Jizọsị saakịma tẹ ori ebube ḅio sọ tẹso, mie ịn kẹ ḅiokoroma ye, mịnẹ Fịafịa Ḍiri mẹ miemẹ tẹ ịn mịẹ Jizọsị pịrị ye mẹ ḍuko tẹ ọ̀ ḅụụ ḅụ.
17Tomi ma tẹ Jizọsị ḍuḅu ḅio Lazarọsị sịn pakama-ḅo tẹ fịị ḅụ ọ̀ saakịma sakị sime apụ ma paka ye mẹ ḍukom. 18Anie mịẹtẹ tomina-ogbo mẹ mu ori na bịamam ịn naam mịnẹ ori mie mị ḅụụ-buamaye mẹ kọrị ye ẹrẹsị. 19Anịtẹso Farịsiiapụ ma nwẹnị jụmọ-jụmọ ḅẹẹ, “Ọmịnị ẹrị tịya, wa mịẹ pakama ḅoarị gberie-sọ ofori ḅara! Bebe tomikiri mẹ ò ḍukamẹnjịarị ḅara ḍikii!”
Girisi Ḅẹ Apụ Ma Ḅẹ Ja Apụ Jizọsị Ẹrị Ḅẹ Ḍọkịm
20Juu-ḅẹ-apụ tẹ ịn kẹ Giriki apụ sịn apụ ḅẹ jen-apụ sọ alalị sakị mẹ ḅụ Jeruselemu ḅụ tẹkẹ ḅẹ ḅom. 21Ịn nwẹnị Filipu dama-mu, oriḅe tẹ Galili ḅẹ Bẹtịsayịda ama ḅụ ḅo ḅọ ḅe, tẹ ḅẹẹ, “Wanyanaḅọ sisi, wa Jizọsị ẹrị ḅẹ-ḅiiarị.”
22Filipu nwẹnị mu ḍuko Anduru pịrị, tẹ ini maa apụ nwẹnị mu ḍuko Jizọsị pịrị. 23Jizọsị ịn pakịrịm, “Mịọkụ Tomḅọ Tụḅọ ḅe opu ebube nyana ḅẹ sakị mẹ la tẹ. 24À karakara mẹ ḍuko ọ́ pịrịarị: mbịaka mgbọlị papaa simearị ḅẹḅẹ gbọrụ mgbọlị ngẹrị ḅụ anị emi, ini anị kẹ kiri ḅio suu tẹ anị fịị sikima tẹ. Ini anị kẹ kiri ḅio suu tẹ anị fị-fịị, anị sakị rẹ mie anị tọnwa mgbọlị pakama-ḅo ḅarịye. 25#Mat 10.39; 16.25; Mak 8.35; Luk 9.24; 17.33Amịna tomikiri ḅẹ ḍumo mẹ ḅẹlẹma ḅọ, ḅẹlẹma ḅọ anị fama ḅa; mị tomikiri ḅụ amịna ḍumo ḍiki-ḅioḅu ḅọ goḅọ-goḅọ anị wẹrị kpaịnma sime gbamaso ḍumo pịrị ḅa. 26Fịrịmẹnjị ị̀ pịrị ḅẹ-ḅiiarị ḅọ, ḅiiarị ḅọ ì ḍukamẹnjị ḅa, mịẹtẹ ị̀ fịrịmẹnjịḅọ ḅe à sime anga sime ḅarị ḅara. Anịsakị ị̀ Ḍa ḅe fịrịmẹnjị ị̀ pịrịarị ḅọ, pịrịarị ḅọ kẹ kụn nyana kiri ḅụ wẹrị ḅa.
Jizọsị Ọ̀ Fịị Ḅẹ Ye Ḍukom
27“Mịọkụ ì ḅioḅẹngbọ ị̀ ḅụụ-fụkama tẹ, à tiye ḍuko ḅẹ? À ḅẹẹ ḅẹ mụnọọ, ‘Ḍa, ḍụkụ tẹ miemẹ ị̀ ḅụụ paka ma?’ Kụma anị mie à gotẹ ḅo ye, mịẹtẹ à mị tọrụsiẹrị mẹ da tolu-ḅọrọ ḅarị ḅara. 28Ḍa, mịẹtẹ ị́ ẹrẹ ebube nyana!”
Anịtẹso gbọrụ pọkọ nwẹnị So-ḅio ẹkwẹn tẹ ḅẹẹ, “À mịẹtẹ ebube ḅo anị la tẹ, tẹ à pịkị sin ọkọ mịẹ ḅa.”
29Tomina-ogbo mẹ tẹ anịanga sịẹsime apụ ma pọkọ mẹ naam, tẹ ini ḅẹ ja apụ nwẹnị ḅẹẹ mịnẹ so-alagba fiem, osi apụ mẹẹ, “Enjẹlị ẹkwẹn ọ̀ pịrịm!”
30Kụma Jizọsị nwẹnị ịn ḅẹẹ, “Mị pọkọ mẹ ì gotẹ ẹkwẹn-a, kụma ọmịnị mie anị gotẹ ẹkwẹn ye. 31Mie ịn mị tomikiri mẹ kọn ḅẹ sakị mẹ, mịọkụ mị tomikiri mẹ ḅẹ ḅẹrẹtọnḅọ ḅe ini ò sukuruma-gbin ḅa. 32In kiri mẹ ḅụ ị̀ saakị-gelema sakị à ḅẹḅọ-ḅẹḅọ nụnụ ị̀ ḅụụ pịrị ḅa.” 33(Ò miemẹ ḍuko ye mẹ anie kẹ mịẹtẹ kịnị ọ̀ kọọn ḅẹ fịị ḅara nimi.)
34 #
Dev 110.4; Ayị 9.7; Izi 37.25; Dan 7.14 Tomina-ogbo mẹ nwẹnị pakịrị, “Wamịna Fịafịa Ḍiri ḍuko wa pịrịm mịnẹ Mẹsaya ḅe ọ̀ fịị ḅịa gbamaso ḅa. Ndẹẹ ị́yẹrị pịkị inetẹ ḅẹẹ ḅẹ ḅara mịnẹ ịn Tomḅọ Tụḅọ ḅe saakị-gelema ḅẹ? Ị́yẹrị ḅẹẹarị Tomḅọ Tụḅọ ḅe ḅọrọ tụḅọ?”
35Jizọsị pakịrịm, “Bele mẹ paa boowa kala-sakị kẹ ọmịnị na sime ḅa. Ọ́ mẹnjị ó muarị anga muu, bele paa emi sakị ḅụ, mịẹtẹ kanakana mẹ ḅo ọ́ gbaịn ḅịa ḅara; kẹ gotẹ ọkọ ḅẹẹarị, ye, kanakana ḅio mẹnjịarịḅọ mḅọ muarị anga nimi nimi-a. 36Ọkọẹrẹsị ó bele mẹ mininii, ọmịnị anị nyana wararị sakị mẹ ḅụ, mịẹtẹ ó bele ḅụ ḅẹ atomi sọ ḅarị ḅara.”
Tomi Ma Jizọsị Minini-a Mẹ
Jizọsị mị ẹkwẹn mẹ kọn fama tẹso, ọ̀ nwẹnị mẹnjị so mu ịn nimi-a anga sime. 37Karakaraye ịna tọrọkọ mie ọ̀ mịna ḅụụ-buama-aị mamgba mịẹ ye sọ, ịn paa ò minini-a, 38#Ayị 53.1mịẹtẹ ịkịankoro Ayịzaya koro ịkịan mẹ paka ḅẹ ḅara:
“KỊNỊNYANAḄỌ, tụḅọ wa daḅọrọma oku mẹ minini?
KỊNỊNYANAḄỌ ḅe kụrọ mẹ ini anị mịẹfinji tụḅọ ḍie?”
39Anie ẹrẹsị ini inetẹ minini-a, gbala Ayịzaya pịkị ḅẹẹm,
40 #
Ayị 6.10
“Tamụnọ ịna atọrụngbọ pụnma tẹẹ,
pịkị ịna akuroma ịkasị tẹẹ,
mịẹtẹ ịna atọrụngbọ ḅarị ye ẹrị ḅịa ḅara,
tẹ ịna akuroma ma ḅarị ye fie ye lekiri ḅịa ḅara,
tẹ ini ị̀ dama-ḅo tẹ àrị ịn gwọ ḅịa ḅara,
Tamụnọ ọkọ ḅẹẹm.”
41Ayịzaya gotẹ miemẹ ḍuko ye ò Jizọsị ebube ẹrị tẹ pịkị ọ̀ ḅụụ ye ḍukom.
42Anị ḅara mamgba ḅụ sọ Juu-ḅẹ ḅẹrẹtọn-apụ ma ḅẹ tọnwa-apụ Jizọsị mininim; kụma Farịsiiapụ ma gotẹ in jen ḅeri naa ḅẹ ḅara kẹ anị ḍuko ḍuko-a, mịẹtẹ ini ama-warị mẹ ḅio in dee-pakama ḅịa ḅara. 43In tomi kẹ in tokini ḅẹ ye kẹ ye sịn Tamụnọ kẹ in tokini ḅẹ ye nẹngịm.
Jizọsị Ẹkwẹn Mie Tomi Kọn Ḅarị Ye
44Jizọsị nwẹnị oloku pakama tẹ ḅẹẹ, “Ì minini ḅọ, minini ḅọ mḅọ ị̀ ḅụụ ngẹrị minini-a, kụma ị̀ kẹ fịrịmaḅọ ḅe ḅụụ sọ. 45Ị̀ ẹrị ḅọ, ẹrị ḅọ ị̀ kẹ fịrịma ḅọ ḅe ẹrị tẹ. 46À bele sọ tomikiri mẹ pịrị ḅẹ ḅom, mịẹtẹ ì minini ḅọ, minini ḅọ kanakana ḅio sime ḅịa ḅara. 47Gbọrụḅọ nwẹnị naa ḅeri ngẹrị kẹ ị̀ ẹkwẹn mẹ naa tẹ anị ḍuko ḅara mịẹ-a ḅẹḅẹ, yẹrị mḅọ kọn ḅịa. À ḅo tomikiri mẹ kọn ḅẹ ḅo-a, kụma anị ḅọrọma mie à gotẹ ḅo ye. 48Ḅẹḅọ-ḅẹḅọ tẹ ị̀ sịkịarị tẹ ì oku mẹ ọkị-a ḅọ, mḅọ kọn ḅarị ḅọ emi. Ị̀ ẹkwẹn ma mie mḅọ kọn ḅarịye kunoma ene mẹ ḅụ! 49Miemẹ karakaraye, àrị ị̀ ḅara-kuḅu ḅẹ kụrọ kẹ amụ ẹkwẹn-a ẹrẹsị, kụma Ḍaḅọ ḅe tẹ ị̀ kẹ fịrịma ḅọ ḅe mie à kọn ḅẹ ẹkwẹn na à ḍuko ḅẹ ye na tọn ị̀ pịrịarị. 50Tẹ à nimi wararị mịnẹ ori tọn ye mẹ sime gbamaso ḍumo ọkị-ḅoarị. Ọkọẹrẹsị, Ḍaḅọ ḅe ị̀ ḅẹẹm mịnẹ à ḍuko ḅẹ ye mie à ḍukoarị ye.”
Currently Selected:
Jọnị 12: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
