Jọnị 17

Jizọsị Tẹkẹ Ò Ḍukamẹnjịapụ Pịrịarị

1Jizọsị miemẹ ẹkwẹn fama tẹso, ọ̀ tọrụ saakị so ḍiki tẹ ḅẹẹm, “Ḍa, sakị mẹ laa tẹẹ. Mịẹtẹ ị́ Tụḅọ ḅe ebube nyana, mịẹtẹ Tụḅọ ḅe ebube kẹ ị́ pịrị ḅarị ḅara. 2Gbala ị́ kụrọ kẹ ọ̀ pịrịm tomḅọ goḅọ-goḅọ ḅụ, mịnẹ ò sime gbamaso ḍumo kẹ saakị ọ̀ pịrị tẹ apụ mamgba pịrịị. 3Anịsakị sime gbamaso ḍumo fiearị ye anie karakara kpọkpọ gbọrụ Tamụnọ ḅe, na Jizọsị Kịrayịsị ị́ kẹ fịrịmaḅọ ḅe na nimi. 4Tomikiri ḅụ àrị í ebube mẹ ḍie-pakama tẹ, ị́ kẹ ị̀ pịrịm à kọrị ḅẹ kọrịnama mẹ à kọrị fama tẹ. 5Ḍa! Í sime-anga ḅụ ebube kẹ ị̀ pịrị mịọkụ ḅụ, anie tomikiri amụ tẹmẹ-a sakị àrị ị́ na nyana sime gbọrụ ebube mẹ.

6“Tomikiri mẹ ḅụ ị́ sẹlẹ pakama-ḅo ị̀ pịrị apụ ma à mịẹtẹ ini í nimi tẹ. In sime ị́ pịrịm, tẹ ịn kẹ ị̀ pịrịm. Ini ị́ ẹkwẹn ḍuko ḅara mịẹ tẹ, 7tẹ mịọkụ in nimi tẹ mịnẹ ị́ kẹ ị̀ pịrị ye, pịrị ye ị́ ḅara ḅụ ḅom. 8Ị́yẹrị kẹ ị̀ pịrị oku mẹ mie à saakị ịn pịrị ye, tẹ ini anị daa-ọkịm; in nimi wararị mịnẹ àrị ị́ ḅụ sime tẹ ḅom mẹ karakaraye, tẹ in mininim mịnẹ ị̀ kẹ fịrịmam.

9“Ini mie à tẹkẹ pịrịarị ye. À tẹkẹ tomikiri mẹ pịrị-a, kụma ị́ kẹ ị̀ pịrị tẹ apụ ma, gbala ini ma in sime ị́ pịrịm. 10À nyana ye, nyana ye í nye; ị́ nyana ye, nyana ye, pịkị ì nye; tẹ ịna ḅụụ mie tomi ḅọrọ tẹ ì ebube ẹrịarị ye. 11Tẹ mịọkụ à so ị́ ḍọkụma-ḅoarị; à ḅarị tomikiri mẹ ḅio ofori, ini kụma in tomikiri mẹ ḅio emi. Fịafịa Ḍaḅọ! In koko kpaịnmaa ị́ ẹrẹ mẹ ḅẹ kụrọ mẹ ḅụ, anie kẹ ị̀ pịrị ẹrẹ mẹ, mịẹtẹ in gbọrụ ḅụ sime ḅarị ḅara, anie na ị̀ na simearị ḅara mẹ. 12#Dev 41.9; Jọn 13.18Yẹrị na ini na emi sakị ị́ ẹrẹ mẹ ḅẹ kụrọ mẹ mie à kẹ in koko kpaịnma ye, anie ị́ kẹ ị̀ pịrị ẹrẹ mẹ. Àrị ịn wẹrị kpaịnmam, tẹ ịna ḅụ gbọrụḅọ sọ fa-a, sime fa pịrị gbọrụḅọ ḅe sikima, mịẹtẹ Fịafịa Ḍiri mẹ ḍuko ye paka ḅẹ ḅara. 13Tẹ mịọkụ à so ị́ ḍọkụma-ḅoarị, tẹ mịna aị ma ḍukoarị tomikiri mẹ ḅio, mịẹtẹ ị̀ ḅioḅẹlẹ mẹ ịna aḅioḅẹngbọ sọ ḅin ḅarị ḅara. 14Àrị í oku mẹ saakị ịn pịrịm, tẹ tomikiri ḅẹ atomi in ḍiki-ḅioḅum, in sime tomikiri mẹ pịrị-a ẹrẹsị, yẹrị sọ sime tomikiri mẹ pịrị-a ḅara. 15À ḅii-a mịnẹ í tomikiri mẹ ḅio ịn saakị sin, kụma à ḅiiarị mịnẹ í Ekwesu ḅe ḅụ ịn wẹrị sikima. 16À sime tomikiri mẹ pịrị-a gbọrụ ḅara mẹ mie ini sọ sime tomikiri mẹ pịrị-a ḅara. 17Ịn wẹrị sikima ị́ ḅụụ pịrịị karakara mẹ ḅụ, ị́ ẹkwẹn mẹ anie karakara mẹ. 18Àrị ịn kẹ tomikiri mẹ fịrịmam, sọ ị̀ kẹ fịrịma gbọrụ ḅara mẹ. 19In gotẹ àrị ị̀ ḅụụ wẹrị sikima ị́ pịrịm, mịẹtẹ ini sọ karakara ḅara kẹ ịna ḅụụ wẹrị sikima ị́ pịrị ḅarị ḅara.

20“À tẹkẹ ini ngẹrị pịrị-a, kụma ịna oku mẹ ḅụ ḅọrọ tẹ ì minini ḅarị apụ sọ à tẹkẹ pịrịarị. 21À tẹkẹarị mịnẹ inimgba gbọrụ ḅụ sime. Ḍa! Yee ịn wamịna ḅụụ sime, anie ị̀ ḅụụ ḅio emi tẹ yẹrị pịkị ị́ ḅụụ ḅio emi gbọrụ ḅara mẹ. Yee ịn gbọrụ ḅụ sime, mịẹtẹ tomikiri mẹ minini ḅarị ḅara mịnẹ ị̀ kẹ fịrịmam. 22Ị́ kẹ ị̀ pịrị gbọrụ ebube mẹ mie à kẹ ịn pịrị ye, mịẹtẹ ịn gbọrụ ḅụ sime ḅẹ ḅara, anie na ị̀ na simearị ḅara mẹ. 23Yẹrị ịna ḅụụ ḅio sime, ị́yẹrị ì ḅụụ ḅio sime, mịẹtẹ ịn gbọrsịḅị gbọrụ ḅụ sime fama ḅarị ḅara, tẹ tomikiri mẹ ḅo nimi ḅa mịnẹ ị̀ kẹ fịrịmam; tẹ ị́ kẹ ị̀ ḅẹlẹmarị ḅara mẹ mie ị́ pịkị kẹ ini sọ ḅẹlẹmarị ḅara.

24“Ḍa! Ị́ ịn kẹ ị̀ pịrị tẹ, à ḅiiarị mịnẹ ini à simearị anga sime, ini ì ebube mẹ ẹrị ḅarị ḅara, anie ḅarana kẹ ị̀ pịrị ebube mẹ, anie ị́ ị̀ ḅẹlẹmarị tẹrẹmẹ tomikiri mẹ tẹmẹm gotẹ. 25Karakara mịẹarị Ḍaḅọ! Tomikiri mẹ í nimi-a, kụma yẹrị àrị í nimi wararị, tẹ mịnapụ ma sọ nimi wararị mịnẹ ị̀ kẹ fịrịmam. 26À mịẹtẹ ini í nimi tẹ, tẹ à pịkị ọkọ mịẹ tọrọkọ mu ḅa, mịẹtẹ ị́ nyana ị̀ pịrị ḅẹlẹma mẹ ịna ḅụụ ḅio sime ḅarị ḅara, tẹ yẹrị sọ ịna ḅụụ ḅio sime ḅarị ḅara.”

Currently Selected:

Jọnị 17: KBTP

Highlight

Copy