Jọnị 16

1“Ọmịna minini ọmịna ḅụụ ḅio so ḅịa ḅara mie à gotẹ miemẹ ḍuko ọ́ pịrị ye. 2Ama-awarị ma ḅio ini ó dee pakama ḅa, tẹ sakị ḅo ḅa, tẹ ọ́ ḅaa ḅọ, ḅaa ḅọ ọkị ḅa mịnẹ mḅọ mie mịẹarị ye ḅụ mḅọ fịrịmẹnjị Tamụnọ pịrịarị. 3Tomi gotẹ mịna aị ma kẹ ọ́ mịẹ ḅarịye ịn Ḍaḅọ ḅe nimi-a, pịkị yẹrị sọ. 4Kụma à miemẹ ḍuko ọ́ pịrị tẹ, mịẹtẹ ịn mịna aị ma kẹ ọ́ mịẹ ḅẹ sakị mẹ ḅo la sakị ọ́ kẹ ḅiokoroma ḅa mịnẹ à tarị ḍuko ọ́ pịrị wẹrị tẹ.

Fịafịa Tẹmẹ Ḅe Kọrịnama Mẹ

“Sukuyọ-saakị ḅụ à mịna aị ma ḍuko ọ́ pịrị-a, anị sakị àrị ọmịnị na emi ẹrẹsị. 5Kụma mịọkụ à so ị̀ kẹ fịrịmaḅọ ḅe ḍọkụma-muarị, tẹ ọmịna ḅụ gbọrụḅọ-sọ à muarị anga tọ-anga mọ kẹ ì gbela-a. 6Tẹ mịọkụ à ḍuko ọ́ pịrị tẹ ye mẹ mịẹtẹ kururu ọmịna aḅioḅẹngbọ sọ ḅin tẹ. 7Kụma à karakara mẹ ḍuko ọ́ pịrịarị: à so mẹ iḅi kẹ ọ́ mịẹ àrị ọmịnị na sime nẹngị ḅa, anie à sọ-a kụma Ḅarasụaḅọ ḅe ḅo ọ́ pịrị ḅịa ẹrẹsị. À so kụma anị sakị rẹ àrị ọ̀ kẹ ọ́ fịrịma ḅa. 8Tẹ ò ḅo sakị ọ̀ mịẹtẹ tomikiri ḅẹ atomi ma lekiri ḅa mịnẹ ịn tọkọrọ tẹ si gboloma ye ḅụ, pịkị karakara mẹ gboloma ye ḅụ na, Tamụnọ ḅẹrẹkọn gboloma ye na ḅụ. 9Ịn tọkọrọ tẹ si gboloma ye ḅụ, anie ini ì minini-a ẹrẹsị; 10karakara mẹ gboloma ye ḅụ sọ ịn tọkọrọ tẹ, anie à so Ḍaḅọ ḅe ḍọkụma-muarị, tẹ ọ́ ḅarị jen kẹ ị̀ ẹrị ḅịa ẹrẹsị; 11tẹ pịkị ḅẹrẹkọn gboloma ye mẹ ḅụ sọ ịn tọkọrọ tẹ, anie mị tomikiri mẹ ḅẹ ḅẹrẹtọnḅọ ḅe, Anịngẹ-kụraḅio ini ọ̀ kọn tẹ ẹrẹsị.

12“À tọnwa jaị nyana tẹ ḍuko ọ́ pịrị ḅẹm, kụma mịọkụ mẹ ḅụ ḅaka ḅa ọ́ jaị naa kụma. 13Anịsọ Tẹmẹ ḅe, tẹ Tamụnọ gboloma karakara mẹ mịẹfinjiarị ḅọ ḅe, ḅo sakị, Ori ọ́ kẹ mu bebe karakara mẹ ḅio suu ḅa. Ori ọ̀ ḅara-kuḅu ḅẹ kụrọ kẹ ẹkwẹn ḅịa, kụma ọ̀ naa ye mie ò ḍuko ḅarịye, tẹ pịkị tọrọkọ-jụ paka ḅarị aị sọ ḍuko ọ́ pịrị ḅa. 14Ọ̀ mịẹtẹ àrị ebube nyana ḅa, anie ori yẹrị ḍuko ye ọkị ḍuko ọ́ pịrị ḅẹ ẹrẹsị. 15Ị̀ Ḍa ḅe nyana ye, nyana ye ì nye, anie mie à gotẹ ḅẹẹ ye mịnẹ Tẹmẹ ḅe à kẹ ọ̀ pịrị ḅarị ye ọkị ḍuko ọ́ pịrị ḅa.

Kururu Na Ḅioḅẹlẹ Na

16“Boowa kala-sakị ḅụ ọ́ ḅarị jen kẹ ị̀ ẹrị ḅịa, tẹso, boowa kala-sakị ḅọrọ tẹso, ọ́ pịkị ị̀ ẹrị ḅa.”

17Ò ḍukamẹnjịapụ ma ḅẹ ja apụ nwẹnị jụmọ-jụmọ gbela, “Miemẹ ḅọrọ tiye fiearị? Ọ̀ wa ḅẹẹarị mịnẹ ḅo-a kala-sakị ḅụ wa ḅarị ori ẹrị ḅịa, tẹso, boowa kala sakị ḅọrọ tẹso, sakị wa pịkị ori ẹrị ḅa; tẹ ọ̀ pịkị ḅẹẹarị, ‘Anie à so Ḍaḅọ ḅe ḍọkụma-muarị ẹrẹsị.’ 18Mie ‘boowa kala-sakị’ mẹ ḅọrọ tiye fiearị? Ò ḍukoarị ye tiye-o, tiye-o wa nimi-a.”

19Jizọsị nimim mịnẹ ini ò gbela ḅẹ ḅiim ḅẹ sakị ori ịn ḅẹẹm, “À ḅẹẹm, ‘Boowa kala-sakị ḅụ ọ́ ḅarị ị̀ ẹrị ḅịa, tẹso, boowa kala-sakị ḅọrọ tẹso, ọ́ pịkị ị̀ ẹrị ḅa.’ Miemẹ gboloma ye mie ọ́ kẹ jụmọ-jụmọ gbelarị ye, anị-a? 20À karakara mẹ ḍuko ọ́ pịrịarị: ọmịnị owu tẹ owu-aminji ọmịna atọrụ sara ḅa, kụma tomikiri ḅẹ atomi ḅioḅẹlẹ ḅa; ó kururu ḅa, kụma ọmịna kururu mẹ pịkị-ḅo ḅioḅẹlẹ sọ ḅa. 21Iyi la tẹ ẹrẹḅọ kururu sime á pịrịm, á tọrụsiẹrị sakị la tẹ ẹrẹsị; kụma á tụḅọ mẹ iyi koroma tẹ ḅẹḅẹ arị á tọrụsiẹrị mẹ kẹ ḅioḅọrọma tẹ, anie á tụḅọ iyi tomikiri koroma tẹ mẹ ḅẹ ḅioḅẹlẹ mẹ ẹrẹsị. 22Anie anị ọmịnị na sime-ḅara: mịọkụ ó kururuarị, kụma à pịkị sin ọmịnị ẹrị ḅa, anịsakị ḅioḅẹlẹ ọmịna aḅioḅẹngbọ sọ ḅin ḅa, anie gbọrụḅọ-sọ inetẹ ọmịna ḅụ sin ọkị ḅịa ḅioḅẹlẹ.

23“Anị ene mẹ ḅụ, ọmịnị ị̀ ḅara gberie-sọ ḅii ḅịa. À karakara mẹ ḍuko ọ́ pịrịarị: Ḍaḅọ ḅe ị̀ ẹrẹ ḅụ ọmịnị ọ̀ ḅara ḅii ye, ḅii ye kẹ ọ́ pịrị ḅa. 24Ọkị ḅo mịọkụ la sọ amụ ó gberie-sọ ḅii-a ị̀ ẹrẹ ḅụ; ó ḅii, ọ́ nyana ḅa, mịẹtẹ ọmịna ḅioḅẹlẹ mẹ busunu ḅarị ḅara.

Jizọsị Tomikiri Mẹ Nẹngịma Tẹ

25“Egberima-ẹkwẹn ḅụ à mịna aị ma ḍuko ọ́ pịrị tẹ. Kụma sakị ḅo ḅa anie à ḅarị egberima-ẹkwẹn kọn ọ́ pịrị ḅịa sakị, tẹ giregire ḅara kẹ Ḍaḅọ ḅe gboloma ye ḍuko ọ́ pịrị ḅẹ sakị mẹ. 26Anị ene mẹ ḅụ, ọmịnị ị̀ ẹrẹ ḅụ ọ̀ ḅara ye ḅii ḅa; àrị ọ́ ḅẹẹ-a mịnẹ àrị ọ̀ ḅara ye ḅii ọ́ pịrị ḅa; 27Ḍaḅọ ḅe ḅioju ọ́ ḅẹlẹmarị. Ò gotẹ ọ́ ḅẹlẹmarị ye anie ọmịnị ị̀ ḅẹlẹmarị tẹ minini tẹ mịnẹ Tamụnọ ḅụ à sime tẹ ḅom. 28Ḍaḅọ ḅe ḅụ à sime tẹ mị tomikiri mẹ ḅom; tẹ mịọkụ à tomikiri mẹ koroma soarị, à so Ḍaḅọ ḅe ḍọkụma-muarị.”

29Anịtẹso ò ḍukamẹnjịapụ ma nwẹnị ọ̀ ḅẹẹ, “Mịọkụ í giregirema ẹkwẹn tẹ, ị́ ḅarị egberima-aị kẹ sụa-a. 30Mịọkụ wa nimi tẹ mịnẹ ye goyegoye í nimi fama wararị. Kịnị ye kẹ í gbela tẹrẹmẹ í ye ḍuko na-iḅi-a. Miemẹ mie wa gotẹ mininiarị ye mịnẹ Tamụnọ ḅụ í sime tẹ ḅom.”

31Jizọsị nwẹnị ịn pakịrị, “Mịọkụ ó minini tẹ? 32Sakị mẹ ḅoarị, mịọkụ sọ anị ḅo la tẹ, anie ọmịnị-mgba gala-gala fama ḅarị sakị mẹ, tẹ ọrụ warị-warị mu tẹ yẹrị ngẹrị kọn ḅẹ sakị mẹ. Kụma tomi-juḅẹye, yẹrị ngẹrị ofori, Ḍaḅọ ḅe na ị̀ na emi ẹrẹsị. 33À miemẹ ḍuko ọ́ pịrị tẹ, mịẹtẹ ọmịnị ị̀ ḅụ oḅolo sime tẹ dein nyana ḅarị ḅara. Tomikiri ḅẹ atomi ọ́ kẹ tọrụsiẹrịma ḅa. Kụma ó ḅiokpọọ! À tomikiri mẹ nẹngịma tẹ!”

Currently Selected:

Jọnị 16: KBTP

Highlight

Copy