Jọnị 18
18
Juu-ḅẹ Ḅẹrẹtọn-apụ Fịrịma Mu Jizọsị Kunm
(Mat 26.47-56; Mak 14.43-50; Luk 22.47-53)
1Jizọsị mị tẹkẹ mẹ kọn fama tẹso, ori ó ḍukamẹnjịapụ ma na Kidirọnị nwẹn-sịn ḍaḅa mẹ saḅa som. Saḅa-koro mẹ ḅụ gbọrụ ḍụọ simem, tẹ Jizọsị ò ḍukamẹnjịapụ ma na anị ḅio sọ-mum. 2Judasị, Jizọsị kẹ tomina ḅara-ḅio dẹrịma ḅọ ḅe sọ anị sime anga nimim, tọnwa asakị Jizọsị nwẹn kẹ ò ḍukamẹnjịapụ ma na anịjụ kobiri, kobirim ẹrẹsị. 3Mie ḅụ Judasị nwẹnị Romu ḅẹ ọmụapụ ma ḅẹ ja apụ na, agbamịẹapụ na Farịsiiapụ na kẹ fịrịma, Tamụnọ-warị mẹ ḍikiḍikiapụ ma ḅẹ ja apụ na ọkị tẹ ini na ḍụọ mẹ ḅio mu; in mu sakị ini owuaị na, kpọ-tọnjọ na tọsị na kẹ sụa mum. 4Ọ̀ ḅụụ paka ḅẹ ye goyegoye nimi wẹrị wararị ḅara ḅụ Jizọsị nwẹnị kẹlẹ mẹnjị sọma-mu tẹ in gbela, “Ọ́ ḍọkịarị ḅọ tụḅọ?”
5Ini nwẹnị pakịrị, “Nazarẹtị ḅẹ Jizọsị.” Ori nwẹnị ḅẹẹ, “Yẹrị anie ori.” Anịsakị Judasị, Jizọsị kẹ tomina ḅara-ḅio dẹrịma ḅọ ḅe, na ini na sịẹ wararị anịanga. 6Jizọsị “Yẹrị anie ori” mẹ ḅẹẹ sakị, ini ọḅụ-na-isema tẹ ḅịkị kiri korom. 7Jizọsị pịkị jen kẹ in gbelam, “Ọ́ ḍọkịarị ḅọ tụḅọ?”
Ini mẹẹ, “Nazarẹtị ḅẹ Jizọsị.”
8Jizọsị nwẹnị ḅẹẹ, “À ḍuko ọ́ pịrị ḅọrọma tẹ, mịnẹ yẹrị anie ori. Ọ́ nwẹnị ị̀ ḍọkịarị ḅẹḅẹ yee mịna osi-apụ ma so.” 9Ò gotẹ miemẹ ḅẹẹ ye, jen sakị ò ḍuko tẹ ye paka ḅarị ḅara: “Ḍa, ị́ kẹ ị̀ pịrị tẹ apụ ma ḅụ à gbọrụḅọ kịngẹ sọ fama-a.”
10Sayịmọnị Pita okologie kẹ mum, tẹ ọ̀ nwẹnị anị wọrọ-pakama-ḅo, tẹ kẹ Sịḅịda-Agbamịẹḅọ ḅe omoniḅọ pẹlẹ, tẹ ori ama-ḅara ḅẹ ḅeri pẹlẹ-siin. Omoniḅọ ḅe ẹrẹ Malịkọsị. 11#Mat 26.39; Mak 14.36; Luk 22.42Jizọsị nwẹnị Pita ḅẹẹ, “Í ogie kẹ anị paka-ḅo lubulu mẹ ḅio suu! Í kuromarị ị̀ Ḍa kẹ ị̀ pịrị wararị tọrụsiẹrị kọpụ mẹ ḅio simearị ye mẹ à ḅuu ma?”
In Jizọsị Kẹ Anasị Dama-mum
12Anịtẹso Romu ḅẹ ọmụapụ ma na ịna sịḅịdaḅọ na, Juu-ḅẹ-apụ Tamụnọ-warị mẹ ḍikiḍikiapụ ma na nwẹnị Jizọsị kun tẹ ori aḅara kẹ ọḅụ pịrị fịna, 13tẹ ọ̀ kẹ tarị Anasị dama-mu. Ḅị Anasị ḅe anie Kayafasị tẹ anị kụra ḅụ Sịḅịda-Agbamịẹḅọ kiri mẹ ḅụ sime ḅọ ḅe fụanḅọ. 14#Jọn 11.49,50Ḅị Kayafasị ḅe anie jen sakị Juu-ḅẹ ḅẹrẹtọn-apụ ma ḅẹẹ ye mịnẹ gbọrụ tomḅọ kịnị mamgba sịḅị gotẹ fịị iḅi tẹịnm.
Pita Jizọsị Pikim
(Mat 26.69-70; Mak 14.66-68; Luk 22.55-57)
15Sayịmọnị Pita na Jizọsị ḍukamẹnjị jụmọ na nwẹnị Jizọsị ḍuka-mu. Anị osi Jizọsị ḍukamẹnjịḅọ ḅe Sịḅịda-Agbamịẹḅọ ḅe ó nimi lamam ẹrẹsị ọ̀ nwẹnị Jizọsị na Sịḅịda-Agbamịẹḅọ ḅe ịbarị mẹ ḅio sọ-mu, 16tẹ Pita nwẹnị etela ogigo-ḅọkọ mẹ anga sime. Anịtẹso osi Jizọsị ḍukamẹnjịḅọ ḅe nwẹnị pịkịma mu ẹkwẹn ḅọkọ ḍikiḍiki ẹrẹḅọtụḅọ ma pịrị tẹ Pita ọkị sọ-mu. 17Ḅọkọ anga mẹ ḅụ sime ẹrẹḅọtụḅọ ma nwẹnị Pita ḅẹẹ, “Ị́yẹrị sọ kọkọ anị tomḅọ ḅe ḍukamẹnjịapụ ma ḅẹ gbọrụḅọ?”
Pita nwẹnị pakịrị, “Gbala-gbala yẹrị-yaa.”
18Oḅoku sakị, ọkọẹrẹsị fịrịmẹnjịapụ ma na Tamụnọ-warị mẹ ḍikiḍikiapụ ma na nwẹnị fịnị tọnọ tẹ sịẹ anị ikelema tẹ temiarị. Mie ḅụ Pita nwẹnị saḅa in sime anga mu tẹ ini na sịẹ tẹ fịnị mẹ temiarị.
Sịḅịda-Agbamịẹḅọ Ḅe Ḅẹrẹ Kẹ Jizọsị Ḅiim
(Mat 26.59-66; Mak 14.55-64; Luk 22.66-71)
19Sịḅịda-Agbamịẹḅọ ḅe nwẹnị ori Jizọsị ḅe ḍukamẹnjịarị apụ ma na ọ̀ tolumarị ye mẹ na gboloma ye kẹ ọ̀ ḅii. 20Jizọsị nwẹnị pakịrị, “Ama-ogbo mie sakị mamgba àrị ẹkwẹn tomḅọ goḅọ-goḅọ pịrị, pịrị ye; à tolumarị ye mẹmgba ama-awarị ḅio na Tamụnọ-warị mẹ ḅio na, anie tomi mamgba kobiri, kobiri anga ma, ḅụ mie à toluma fama ye. Jene-jene amụ à ḅọị anga gberie-sọ ḍuko-a. 21Ọkọọ ḅẹ sakị ị́ pịkị tiegotẹ ḅẹrẹ kẹ ì ḅiiarị? À ḍuko ye naa apụ ma ḅii. In ḅii, à tiye ḍuko ịn pịrị ḅoto — ini à ḍuko ye nimi wararị.”
22Jizọsị mie ḍuko tẹso, Tamụnọ-warị mẹ ḍikiḍikiapụ ma ḅẹ gbọrụḅọ nwẹnị ḅara finji ọ̀ ḅọrọ tẹ ḅẹẹ, “Í ḅiokpọ ḅara, tẹ mị-ḅara kẹ ẹkwẹn Sịḅịda-Agbamịẹḅọ ḅe pịrị!”
23Jizọsị nwẹnị ọ̀ pakịrị, “À siye ḍuko tẹ ḅẹḅẹ, anị ḍuko pakama tẹ mịanga sime ḅọ, sime ḅọ naa. Kụma à ḍuko ye mẹ nwẹnị karakaraye ḅẹ kụma í tiegotẹ ì fomuarị?”
24Anịtẹso Anasị nwẹnị Jizọsị kẹ ọ̀ fịna ḅara mẹ na Kayafasị, Sịḅịda-Agbamịẹḅọ ḅe, fịrịma.
Pita Siin Jizọsị Pikm
(Mat 26.71-75; Mak 14.69-72; Luk 22.58-62)
25Arị aị ma mịẹarị sakị Pita paa osi apụ ma na sịẹ tẹ fịnị mẹ temiarị. Mie ḅụ ja apụ nwẹnị Pita ḅẹẹ, “Ị́yẹrị anị tomḅọ ḅe ḍukamẹnjịarị apụ ma ḅẹ gbọrụḅọ, ị́yẹrị-a?”
Kụma Pita anị pịkị tẹ ḅẹẹm, “Ọkọ-a, yẹrị-yaa.”
26Sịḅịda-Agbamịẹḅọ ḅe omoniapụ ma ḅẹ gbọrụḅọ, Pita ḅeri kịrị-siin ḅọ ḅe mịnaḅọ, nwẹnị paa ḍụkụ-a tẹ Pita ḅẹẹ, “Àrị ị́yẹrị na ori na ẹrị-a ḍụọ mẹ ḅio?”
27Pita nwẹnị siin ḅẹẹ, “Ọkọ-a” tẹ anị gbọrụ kirikiri ọḅọkọ nwẹnị paan.
In Jizọsị Kẹ Payịleti Tọrọkọ Ḅom
(Mat 27.1-2,11-14; Mak 15.1-5; Luk 23.1-5)
28Dede-funfun ḅụ Juu-ḅẹ ḅẹrẹtọn-apụ ma nwẹnị tọn tẹ in Jizọsị kẹ Kayafasị warị ḅụ so Ḅẹrẹtọnḅọ ḅe opu warị mẹ mu. Ini kụma ịn warị mẹ ḅio sọ-mu-a, in ḅiim ini ịna aḅụụ wẹrị fịafịama ịna ama-anganga-ḅara ḅụ, tẹ Saḅaḅọrọ-Alalị mẹ fị ḅarị ḅara. 29Mie ḅụ Payịleti nwẹnị paka ịn dama-mu tẹ gbela, “Ó tiye kẹ ḅị tomḅọ ḅe sịḅị sẹịn-arị?”
30Ini kẹ ọ̀ pakịrị ye anie, “Ọ̀ mịẹ si ofori kụma wa ọ̀ kẹ ḅo ị́ pịrị ḅịa.”
31Payịleti nwẹnị ịn ḅẹẹ, “Ọkọ ḅẹḅẹ ọmịnị ori ọkị so tẹ ọmịna oloko ḍiki tẹ ọ̀ kọn.”
Ịn nwẹnị pakịrị, “Ọmịnị Romu ḅẹ apụ ḍụkụ tẹ wa kịnị ḅaa ḅẹ ḅẹrẹ-pẹlẹ gbọrụ tomḅọ ọgọnọ ḅụ sọ gbana-a sakị.” 32#Jọn 3.14; 12.32Jizọsị ḅara kẹ ọ̀ kọn ḅẹ fịị tọkịmarị tẹ ḍuko ye paka ḅẹm anie miemẹ gotẹ mịẹ ye.
33Payịleti nwẹnị pịkị Ḅẹrẹtọnḅọ opu warị mẹ ḅio sọ-mu tẹ Jizọsị sịn tẹ ò gbela, “Ị́yẹrị Juu-ḅẹ amadaḅọ wararị ya?”
34Jizọsị nwẹnị pakịrị, “Ị́yẹrị ḅarana miemẹ kuroma ḅo tẹ kẹ ì gbelarị mụnọọ, ja apụ ì gboloma ye tẹ ḍuko ị́ pịrị?”
35Payịleti nwẹnị pakịrị, “Í kuromarị yẹrị Juu-ḅẹ-ḅọ aro? Ị́ ama ḅẹ apụ na agbamịẹapụ ma na mie ị́ saḅama ị̀ pịrị ye. Ị́ tiye mịẹ?”
36Jizọsị nwẹnị ḅẹẹ, “Ị̀ ama-da mẹ mị tomikiri ḅẹ ama-da-a; ị̀ ama-da mẹ nwẹnị mị tomikiri ḅẹ ye namịna, mimgbe ì ḍukamẹnjịapụ ma owu paka tẹ Juu-ḅẹ ḅẹrẹtọn-apụ ma ḅarị ị̀ ọkị-a so tẹ. Gbala-gbala ị̀ ama-da mẹ mị tomikiri ḅẹ ye-a!”
37Mie ḅụ Payịleti nwẹnị ò gbela, “Anie fiearị ye ị́yẹrị amadaḅọ, anị ya?”
Jizọsị nwẹnị ọ̀ pakịrị, “Ị́ ḅịḅị ḅụ anị paka-ḅo tẹ, mịnẹ yẹrị amadaḅọọ. Mị gberie mẹ kịngẹ mie à gotẹ mị tomikiri mẹ ḅụ iyi ye, tẹ karakara mẹ gboloma ye kẹ ẹkwẹn ḅẹ ḅara. Sime karakara mẹ pịrị ḅọ, pịrị ḅọ mie ì pokiarị ḅọ.”
38Tẹ Payịleti nwẹnị gbela, “Karakara ḅọrọ tiye?”
Payịleti Ḅaa-Ḅẹrẹ Pẹlẹ Jizọsị Pịrịm
(Mat 27.15-31; Mak 15.6-20; Luk 23.13-25)
Anịtẹso Payịleti nwẹnị pịkị mẹnjị paka tomi ma dama-mu tẹ ịn ḅẹẹ, “Àrị inetẹ ḅẹrẹ-ḅarasii pẹlẹ ọ̀ pịrị ḅẹ gbọrụ ḅọkọ sọ ḍọkị ẹrị-a. 39Kụma anị mịẹ-mịẹ ḅara ḅụ, Saḅaḅọrọ-Alalị sakị goyegoye à gbọrụ ikoliḅọ ḅụụ ḅara-siin ọ̀ pịrị pịrịm. Ó ḅiiarị à Juu-ḅẹ-apụ amadaḅọ ḅe ḅụụ ḅara-siin ọ́ pịrị?”
40Ịn nwẹnị oloku kẹ ọ̀ pakịrị, “Gbala-gbala ḅieḅe-a! Barabasị mie wa ḅiiarị ḅọ!” Ḅị Barabasị ḅe anie oloko bala-a ḍumo kọn-arị opu furuḅọ.
Currently Selected:
Jọnị 18: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
