Suku-saakị 34
34
Sẹkẹmụ Ere Kẹ Dayịna Kanm
1Mịọkụ Dayịna Liya ẹrẹḅọtụḅọ ma tẹ arị iyi Jekọbụ pịrị ḅo ma mẹnjị mu toluma ama mẹ ḅẹ ereme ma ḍiki ḅẹ pakam, 2Hamọ, Hivayịtị kpo mẹ ḅẹ ḅọ ḅe owiḅọtụḅọ Sẹkẹmụ, ama mẹ ḅẹ amadaḅọ tụḅọ ḅe nwẹnị arị ẹrị tẹ kụrọ ḅara kẹ arị ọlọ tẹ nwẹnị arị na gboloma tẹ á mịẹ iderima. 3Ò ḅioḅẹngbọ nwẹnị Dayịna, Jekọbụ ẹrẹḅọtụḅọ ma ọgọnọ gbana; ò nwẹnị á ḅẹlẹma, tẹ bala ḅara kẹ ẹkwẹn á pịrị. 4Mie ḅụ Sẹkẹmụ ẹkwẹn ọ̀ ḍa Hamọ pịrịm, tẹ ḅẹẹm, “Mie amụ owiḅọ sime-a ẹrẹḅọtụḅọ ma sime ị̀ pịrịị, arị ị̀ ta sọ.”
5Jekọbụ mẹkịnẹ ḅo naa tẹ mịnẹ ini ori ẹrẹḅọtụḅọ Dayịna sima tẹ; kụma ori owiapụ-awọmẹ ma piri-ḅio ori opu anama na emi, mie ḅụ Jekọbụ dein-sime nwenii ịn ḅo lam. 6Hamọ, Sẹkẹmụ ḍa ḅe nwẹnị mẹnjị paka Jekọbụ na ẹkwẹn ḅẹ mu. 7Jekọbụ owiapụ-awọmẹ ma piri-ḅio ḅo la tẹso, mie ini anị naa ye; tẹ anị nwẹnị owiapụ ma ḅụụ-ḅẹsọ tẹ in ịganịma lama, gbala ò Jekọbụ ẹrẹḅọtụḅọ na gboloma ye mẹ ori Izirẹlịapụ ḅụụ ḅịḅị pakama tẹ ẹrẹsị, ọkọ sime ye kẹlẹ-sọ mịẹ na-iḅi-a.
8Kụma Hamọ nwẹnị ini na ẹkwẹn, tẹ ḅẹẹm, “Ị̀ owiḅọtụḅọ Sẹkẹmụ ḅioḅẹngbọ ọmịna ẹrẹḅọtụḅọ ma ọgọnọ emi; arị ọ́ tẹkẹm, ọmịnị á kẹ ọ̀ pịrịị, ori á sime. 9Ọ́ wamịnị na ere-sime pịrịya-pịrịyaa, ọmịnị ọmịna eremịna-awọmẹ kẹ wa pịrị simee, wamịnị pịkị wamịna eremịna-awọmẹ kẹ ọ́ pịrị sime. 10Ọ́ wamịnị na anga ḅa; anịsakị ini ama mẹ finji ọ́ pịrị ḅa; ọmịnị anị ḅio anga tẹ tuḅokọọn, tẹ anị ḅio ngọ nyana-a.”
11Sẹkẹmụ ḅe sọ á ḍa na, arị owiapụ-amịnapụ na ḅẹẹm, “Yee arị ọmịna atọrụngbọ ḅio ḅụ tọrụ-ḅẹlẹ ḍọkị-ẹrị, anị sakị ó ḍuko ị̀ pịrị ye goyegoye, à pịrị ḅa. 12Kẹ á sịḅị ḅụ ye mịẹ ḅẹ ye na, ọmịna ḍiepịrịye na ḍụḅa la tẹ ó ḅii ḅẹ ye ọ́ nwẹn ḅii, ọ́ wẹrịtẹ kẹ ị̀ ḅẹẹ ḅara, mie à pịrị ḅarị ḅara; ọmịnị paa amụ owiḅọ sime-a ẹrẹḅọtụḅọ ma kẹ ị̀ pịrịị, arị ị̀ ta sọ.”
13Jekọbụ owiapụ-awọmẹ ma nwẹnị oḅori kẹ Sẹkẹmụ na ọ̀ ḍa Hamọ na sịn ḅara kẹ ịn pakịrị, gbala Sẹkẹmụ ịna ịyịmbara Dayịna sima tẹ ẹrẹsị. 14Ịn nwẹnị ịn ḅẹẹ, “Wa inetẹ miemẹ mịẹ ḅịa, anie wamịna ịyịmbara kẹ gbọrụ owiḅọ tẹ tarị ḅụụ sin-a ḅọ pịrị mẹ, kẹ gotẹ ọkọ ḅẹẹarị, aniemẹ ḅụụ-jịrịma ye sọ wa pịrị ḅa. 15Mị gbọrụ ḅọkọ mẹ ḅụ kịngẹ mie wa ye minini ị́ pịrị ḅarị ye, mịnẹ ó ḅo wa sime-ḅara sime ḅa, tẹ ọmịna ḅụ owiḅọ nwẹn-sịn owiḅọ tarị-ḅụụ sin ḅa. 16Anịrẹ wa wamịna eremịna-awọmẹ kẹ ọ́ pịrị ḅa, tẹ pịkị ọmịna eremịna-awọmẹ ọkị wamịna-aḅụụ pịrị, tẹ ọmịnị na anga, tẹ ḅo gbọrụ atomi ḅara sọ ḅarị ye 17Kụma ọ́ wamịna ḅịḅị poki-a tẹ tarị-ḅụụ sin-a ḅẹḅẹ, anịrẹ wa wamịna ẹrẹḅọtụḅọ ọkị ḅa, tẹ wa so ḅa.”
18Ịna ẹkwẹn-aḅịḅị ma nwẹnị Hamọ na ori owiḅọtụḅọ Sẹkẹmụ na ḅụụ-ḅẹlẹ. 19Asatụḅọ ḅe ọ̀ sakị fama-a ḅara kẹ ye mẹ yem, gbala Jekọbụ ẹrẹḅọtụḅọ ma ọ̀ ḅụụ-ḅẹlẹ lamam ẹrẹsị, Mị sakị mẹ ò furo mẹmgba ḅụ ịn kụn kẹ ọ̀ pịrị tẹịnm. 20Mie ḅụ Hamọ na ori owiḅọtụḅọ Sẹkẹmụ na nwẹnị ịna opu ama mẹ ḅẹ ogigo-ḅọkọ ḅo tẹ ẹkwẹn ịna opu ama mẹ ḅẹ owiapụ ma pịrị, tẹ ḅẹẹm, 21“Mịna owiapụ ma ikia ḅara kẹ wamịnị na emi; yee ini ama mẹ ḅio anga, tẹ anị ḅio tuḅokọn, kẹ gotẹ ọkọ ḅẹẹarị, ama mẹ ḍụḅa lama tẹ ini na iḅi wararị; ó yee wa ịna eremịna-awọmẹ ọkị-ọkị sime, anịsakị yee wamịnị pịkị wamịna eremịna-awọmẹ kẹ ịn pịrị. 22Kụma mị ḅọkọ mẹ ḅụ ngẹrị mie owiapụ ma kẹ minini tẹ wamịnị na anga, tẹ gbọrụ atomi ḅara sime ḅarị ye; mịnẹ wamịna ogbo-ḅio simearị owiḅọ goḅọ-goḅọ, ịn tarị-ḅụụ sin ḅara kẹ tarị-ḅụụ sin. 23Yee wamịnị paa ini na gbọrụ ḅịḅị-kẹ-ogbosọ nyana, anịsakị ịn wamịnị na anga ḅa. Ọkọ kụma ịna opu anama ma na, ịn nyana ye na, ịna anama mamgba ḅo wamịna aị sọ ḅịa? 24Tẹ inimgba tẹ ori opu ama mẹ ḅẹ ogigo-ḅọkọ mẹ ḅụ mẹnjị paka apụ mamgba Hamọ na ori owiḅọtụḅọ Sẹkẹmụ, na ḍuko ye mẹ pokim; tẹ owiḅọ goḅọ-goḅọ inimgba tẹ ori opu ama mẹ ḅẹ ogigo-ḅọkọ mẹ ḅụ mẹnjị paka apụ mamgba tarị-ḅụụ siinm.”
25Tẹra aḍin karama ene ḅụ, tarị-ḅụụ sin ịnọ mẹ amụ ḅịya-a ogbo, Jekọbụ owiapụ-awọmẹ ma ḅẹ maa apụ Simiyọnị na, Livayị na Dayịna na gbọrụ iyingiḅọ iyi owiapụ ma nwẹnị ịna okologie ọkị tẹ opu ama mẹ ḅio sọ-mu ịna ḅụụ kịlẹ nimi-a ogbo, tẹ owiapụ mamgba ḅaa famam. 26Ini okologie mẹ kẹ Hamọ na, ori owiḅọtụḅọ Sẹkẹmụ na sọ ḅaam, tẹ Sẹkẹmụ warị ḅio Dayịna pakama ọkị tẹ kẹ som. 27Jekọbụ owiapụ-awọmẹ ma nwẹnị ịn kịnị ma ḅaa sara wararị ḅara mẹ ḅụ opu ama mẹ fọịn gbala ịna ịyịmbara si tẹ ẹrẹsị. 28Ini ịna anana ogbo-ogbo ma na, ịna opu anama ogbo-ogbo ma na, ịna yedogi-anama ma na, opu ama mẹ ḅio sime ye goyegoye na, ḍụọ ma ḅio sime ye goyegoye na ọkịm; 29ịna ngọ mamgba, ịna ḍọkọḍọkọ-awọmẹ na, ịna ereme mamgba na, ye tẹ ịna awarị ḅio sime aị mamgba ịn kuun-ọkị tẹ kẹ pẹị, pẹị aị sọmam.
30Anịtẹso Jekọbụ nwẹnị Simiyọnị na, Livayị na ḅẹẹ, “Ọ́ ḅụụ-fụka ọkị-ḅo ị̀ pịrị tẹ, à tọrụ ịnọ ḅọ sọ ama mẹ ḅio simearị Kenanị ḅẹ apụ ma na, Pẹrịzayịtị kpo ḅẹ apụ ma na pịrị tẹẹ; kịẹn-ḅịḅị ḅụ à boowa, tẹ ịn nwẹnị ịna aḅụụ kobiri gboloma tẹ ị̀ na tụḅụrụ, tẹ owu kẹ ị̀ paka kụma, yẹrị na, ị̀ warị-kpo mẹ na ịn ḅaa guluguluma ḅa.”
31Kụma ịn nwẹnị pakịrị, “Ọ̀ wamịna ịyịmbara kẹ sẹfị-ẹrẹḅọ mịẹ na-iḅi?”
Currently Selected:
Suku-saakị 34: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
