Suku-saakị 35
35
Tamụnọ Bẹtẹlị Ḅụ Jekọbụ Bomam
1 #
Suk 28.11-17
Tamụnọ nwẹnị Jekọbụ ḅẹẹ, “Saakịị, iwo so Bẹtẹlị mu tẹ anịjụ angaa; tẹ anị yọ ḅụ gbọrụ agbamịẹ-anga sịẹma Tamụnọ ḅe tẹ ị́ í iyimbere Ịsọ ḅụ ḍumo-mangị kọn sakị ḅụ ḅụụ pakama í ḍie ḅọ ḅe pịrịị.”
2Mie ḅụ Jekọbụ ọ̀ warị-kpo na, inimgba tẹ ori na sime apụ mamgba ḅẹẹm, “Ọmịnị ọmịna ogbo-ḅio simearị igoni atamụnọ ma, tan nguma, tẹ ọmịna aḅụụ mịẹ fịafịamaa, tẹ ọmịna opu akapa ḍimaa; 3anịtẹrẹmẹ ó yee wa saakị tẹ iwo so Bẹtẹlị mu, mịẹtẹ arị anị yọ ḅụ gbọrụ agbamịẹ-anga sịẹma Tamụnọ ḅe tẹ ị̀ ḅụụ-ḅalaḅala ene mẹ ḅụ ị̀ tẹkẹ pakịrị ḅọ ḅe, tẹ à mu anga, mu anga ḅụ ị̀ na sime ḅọ ḅe pịrị.” 4Mie ḅụ ini igoni atamụnọ tẹ ịn nyana aị mamgba na, ḅerisụaye tẹ ịn aḅeri sime aị ma na sin tẹ kẹ Jekọbụ pịrịm tẹ ori arị kẹ ịn kẹ oku nwẹn-sịn opu sịn tẹ Sẹkẹmụ na kpeki wararị ye suku ḅụ ḅọịm.
5Ịn mẹnjị ma-muarị ḅara ḅụ, Tamụnọ kẹ fịrịma tẹmẹ-naịn-naịn nwẹnị ḅo opu ama ma tẹ ini ikelema-koro wararị ama ma gbaịn, anie mịẹtẹ ịn Jekọbụ owiapụ-awọmẹ ma ḍuka-a. 6Tẹ Jekọbụ na tomi tẹ ori na sime apụ mamgba na ḅo Luzu (anie Bẹtẹlị) lam, aniemẹ tẹ Kenanị ama ḅụ simearị ye mẹ, 7tẹ anị yọ ḅụ ọ̀ nwẹnị gbọrụ agbamịẹ-anga nama tẹ ye yọ mẹ sịn Ẹlị-bẹtẹlị gbala anị yọ ḅụ mie ori ò iyimbere ḅụ ḍumo-mangị kọn sakị Tamụnọ amịna ḅụụ mịẹfinji ọ̀ pịrị ye ẹrẹsị. 8Tẹ Dibora, Ribeka dogi ḅọ ma fịịm, tẹ ini á kẹ Bẹtẹlị ḅụ suku-jụ da pakịrị anga ḅụ oku nwẹn-sịn opu sịn suku ḍiḅim; mie ḅụ ini ẹrẹ kẹ anị sịnm Alọnị-bakutu#35.8 Alọnị-bakutu fiearị ye, Owu Oku.
9Tamụnọ pịkị sin ḅụụ-pakama Jekọbụ ḍiem, tẹ ò bomam, ọ̀ Padani-aramụ (Mẹsopotemịya) ḅụ sime tẹ ḅo tẹso. 10#Suk 32.28Tamụnọ ọ̀ ḅẹẹm, “Ị́ ẹrẹ anie Jekọbụ ịn ḅarị jen-maaịn kẹ Jekọbụ kẹ ẹrẹ kẹ ị́ sịn ḅịa, kụma Izirẹlị anie ị́ fị ḅarị ye.” Mie ḅụ ori ẹrẹ ḅo Izirẹlị sọm. 11#Suk 17.4-8Tamụnọ nwẹnị ọ̀ ḅẹẹ, “Yẹrị anie Kụrọmamgba nyana Tamụnọ (Ẹlị-Sadaị), awọ iyi tẹ kamaa, opu sịẹ anịsakị opu asịẹ ogbo-ogbo ị́ ḅụụ ḅụ paka-ḅo ḅa, tẹ amadapụ ị́ ḅụụ ḅụ paka-ḅo ḅa. 12Ama mẹ tẹ à kẹ Ebira-amụ na, Ayịzịkị na pịrị ama mẹ à kẹ ị́ pịrị ḅa, anịsakị ị́ ḅọrọ sakị arị ama mẹ kẹ í furo-ḅẹ-apụ pịrị ḅa.” 13Anịtẹso Tamụnọ ò sime tẹ ori na ẹkwẹn sime anga mẹ ḅụ iwo som. 14#Suk 28.18,19Jekọbụ nwẹnị ọ̀ Tamụnọ na ẹkwẹn sime anga mẹ ḅụ gbọrụ ḍụḅarị kẹ sịẹma tẹ iru agba mịẹ anị ọgọnọ sara, tẹ pulo kẹ anị ọgọnọ saram. 15Mie ḅụ Jekọbụ ẹrẹ kẹ anị yọ mẹ tẹ Tamụnọ ori na ẹkwẹn yọ mẹ sịnm Bẹtẹlị.
Resẹlị Benijamịnị Iyi Tẹ Fịịm
16Anịtẹso ịn nwẹnị Bẹtẹlị ḅụ saakị tẹ mẹnjị; tẹ amụ ini Ifiratị kpeki-a tẹ paa sụma wararị ogbo iyi Resẹlị lam, tẹ anị á ḅụụ kụrọm. 17Arị iyi akụ mẹ ḅụ simearị ogbo, ere-iyimaḅọ ma nwẹnị á ḅẹẹ, “Ḅalafa ma, kẹ gotẹ ọkọ ḅẹẹarị, mịọkụ í jen owiḅọtụḅọ nyana ḅẹ tẹ.” 18Tẹ árị ịnyọ biin ḅẹ-yearị ogbo — gbala á fịịm ẹrẹsị — á nwẹnị ẹrẹ kẹ ọ̀ sịn Bẹnị-oni#35.18 Bẹnị-oni fiearị ye, Ì Kururu Ḅụ Ḅo Owiḅọtụḅọ; kụma ọ̀ ḍa ẹrẹ kẹ ọ̀ sịnm Benijamịnị#35.18 Benijamịnị fiearị ye, Ị̀ Ama-ḅara anịanịa Iḅi Na Ḅo Owiḅọtụḅọ. 19Mie ḅụ Resẹlị fịịm, tẹ ini á kẹ Ifiratị, anie Bẹtịlịhẹmụ mu etela ḅụ ḍiḅim, 20tẹ Jekọbụ nwẹnị á ḍuḅu ọgọnọ ḅụ gbọrụ ḅeriye saakị sịẹma; anie Resẹlị ḍuḅu mẹ ḍie-pakamarị ḅeriye, aniemẹ tẹ anịjụ sime ḅo mịmgba la ye mẹ. 21Izirẹlị paa mẹnjịma mum, tẹ Migidali-ẹda kụrọtẹ gele-warị mẹ mẹnjị iwo ḅụ ori akpụrụ-warị sịẹmam.
Jekọbụ Owiapụ-Awọmẹ Ma
(1 Pkị 2.1-2)
22 #
Suk 49.4
Izirẹlị anị ama mẹ ḅio angarị ogbo mie Rubẹnị ọ̀ ḍa ịgwa-ẹrẹḅọ Biliya na tii, tẹ árị ọbọ-simam, tẹ Izirẹlị anị gbolomaye naam tẹ ịganị ḅụramam.
Mịọkụ Jekọbụ iyi owiapụ-awọmẹ ini oyi maa owiapụ-awọmẹ finji. 23Liya owiapụ-awọmẹ anie: Rubẹnị (Jekọbụ mgbe anie Tarị Tụḅọ) na, Simiyọnị na, Livayị na, Juda na, Ịsaka na, Zẹbulọnị na. 24Resẹlị owiapụ-awọmẹ anie: Josẹfụ na, Benijamịnị na. 25Resẹlị fịrịmẹnjị-ẹrẹḅọ Biliya owiapụ-awọmẹ anie: Danị na, Nafutali na. 26Liya fịrịmẹnjị-ẹrẹḅọ Zilipa owiapụ-awọmẹ anie: Gadi na, Asa na. Mịna apụ ma anie Jekọbụ owiapụ-awọmẹ ma tẹ Padani-aramụ ḅụ ini iyi ọ̀ pịrị apụ ma.
Ayịzịkị Fịịm Tẹ Ori Awọmẹ Ò Ḍiḅim
27 #
Suk 13.18
Jekọbụ so ọ̀ ḍa Ayịzịkị ḍọkụma-ḅom Mamụrẹ anịanịa Kiriyati-aba (anie Hẹbụrọnị) ḅụ, Ebira-amụ na, Ayịzịkị na anga yọ mẹ. 28Anị sakị mẹ ḅụ Ayịzịkị sịḅị ḅọrọ aḍin anie kụra esenia si (180). 29Tẹ Ayịzịkị ịnyọ biin tẹ ọ̀ fịịm tẹ ini ò kobiri mu ori atomi pịrịm ori omongi tẹ tọnwa aḍin ọ̀ sịḅị ḅọrọm; tẹ ori owiapụ-awọmẹ Ịsọ na, Jekọbụ na ò ḍiḅim.
Currently Selected:
Suku-saakị 35: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
