Suku-saakị 33
33
Jekọbụ Ịsọ Na Bịamam
1Jekọbụ ọ̀ tọrụ saakị ḍiki tẹ nwẹnị ẹrị Ịsọ ḅoarị; owiapụ ẹndẹ ori na ḅoarị. Mie ḅụ ori awọmẹ ma ḍiema Liya na Resẹlị na ọ̀ maa fịrịmẹnjị-ereme ma pịrịm. 2Ọ̀ fịrịmẹnjị-ereme ma na ịna awọmẹ na kẹ tọrọkọ wẹrịm, anịtẹrẹmẹ ḅo Liya na árị awọmẹ na, tẹ nwẹnị Resẹlị na Josẹfụ na kẹ inimgba kunoma ḅụ wẹrị. 3Oriḅe ḅioju nwẹnị mẹnjị inimgba tọrọkọ ḅọrọ tẹ sọnọma asakị kẹ ọ̀ sịḅị-tuu-tuu mu kiri lama nwenii ò ḅo ò iyimbere kpekim. 4Kụma Ịsọ mangị mu ori na bịama, tẹ ekpe kẹ ọ̀ lama, tẹ ọ̀ kọngọ fịnama, tẹ ọ̀ ḅịḅị nọnjịm, tẹ ịn nwẹnị tẹmẹ-la ḅara kẹ owu. 5Tẹ Ịsọ ọ̀ tọrụ saakị tẹ ereme ma na, awọmẹ ma na ẹrị tẹso, ọ̀ nwẹnị gbela, “Ị́ na simearị apụ ma tọ apụ?”
Jekọbụ nwẹnị pakịrị, “Awọmẹ, inima tẹ Tamụnọ ḍiki-ḅụụjịrị ḅara ḅụ kẹ ị́ fịrịmẹnjịḅọ pịrị awọmẹ.” 6Anịtẹso fịrịmẹnjị-ereme ma na ịna awọmẹ na mẹnjị ḅo kpeki tẹ sịḅị-tuu iderima ọ̀ pịrịm. 7Liya na árị awọmẹ na anị gbọrụ ḅara ḅụ mẹnjị ḅo kpekim, tẹ sịḅị-tuu iderima ọ̀ pịrịm, tẹ kunoma ḅụ Josẹfụ na, Resẹlị na mẹnjị ḅo kpeki tẹ sịḅị-tuu iderima ọ̀ pịrịm.
8Ịsọ nwẹnị gbela, “Mịna ogbo-ogbo mamgba tẹ ị̀ na bịama aị ma, ḅọrọ tiye fiearị?”
Jekọbụ nwẹnị pakịrị, “Kẹ ị̀ nyanaḅọ ḅe tọrụ iḅi ọkị ḅẹ ḅara.”
9Kụma Ịsọ nwẹnị pakịrị, “Ì iyimbere, à nyana ye ị̀ na iḅi wararị; ị́ nyana ye kẹ wẹrị ị́ ḅụụ pịrịị.”
10Jekọbụ nwẹnị ḅẹẹ, “Ẹn-ẹn, arị ị́ tẹkẹm, arị í ḍiki-tọrụ ḅụ tọrụ-ḅẹlẹ ḍọkị-ẹrị tẹ ḅẹḅẹ, anịrẹ ị̀ ḅara ḅụ ì ḍiepịrịye mẹ daa-ọkịị; kẹ gotẹ ọkọ ḅẹẹarị, tụkụma ḅara ḅụ ị́ tọrụkuḅu mẹ ẹrị mẹ sime-ḅara anie gbala mḅọ Tamụnọ tọrụkuḅu mẹ ẹrịarị ọkụ ị́ nwẹnị ọkọ sime tọrụ-ḅẹlẹ ḅụ ị̀ daa-ọkị kụma. 11Àrị í tẹkẹm, ḍiepịrịye mẹ tẹ àrị ọkị-ḅo ị́ pịrị ye mẹ daa-ọkịị, gbala Tamụnọ iḅi ḅara kẹ ị̀ na mịẹ tẹ, anịsakị à pịkị à nyana na-iḅi ḅara nyana wararị ẹrẹsị.” Mị-ḅara ḅụ Jekọbụ ẹkwẹn nwenii tẹ Ịsọ ḍiepịrịye mẹ daa-ọkịm.
12Anịtẹso Ịsọ nwẹnị ḅẹẹ, “Yee wa so wa muarị anga mu, anịsakị yẹrị tarị ị́ tọrọkọ so ḅa.”
13Kụma Jekọbụ nwẹnị ọ̀ ḅẹẹ, “Ị̀ nyanaḅọ nimi wararị mịnẹ awọmẹ ma ini ịnyọ nyana-a, anịsakị anana ogbo-ogbo ma na, opu anama ogbo-ogbo ma na ḅụ ndo kẹ asambịrịma aị pịrịarị aị ma à pịkị nwẹn balarị; tẹ nwẹnị gbọrụ ene kịngẹ kẹ ịn deema mẹnjịma ḅaka kụma, anana ogbo-ogbo mamgba fịị fama ḅa. 14Yee ị̀ nyanaḅọ ọ̀ fịrịmẹnjịḅọ tọrọkọ ḅọrọ tẹ tarị tọrọkọ, tọrọkọ so, anịsakị arị etela kẹ opu anama ma tẹ ị̀ tọrọkọ simearị aị ma na, awọmẹ ma na inetẹ mẹnjị ḅarị ḅara ḅụ kẹlẹkẹlẹ ini na mẹnjị nwenii à ḅo ị̀ nyanaḅọ la ḅa Seya ḅụ.”
15Mie ḅụ Ịsọ nwẹnị ḅẹẹ, “Yee arị owiapụ ma tẹ ị̀ na simearị apụ ma ḅẹ ja apụ koroma ị́ pịrị.”
Kụma Jekọbụ nwẹnị pakịrị, “Kẹ ịn ḅii-ḅii ye emi? Yee à paa ị̀ nyanaḅọ ḍiki-tọrụ ḅụ tọrụ-ḅẹlẹ ḍọkị-ẹrị.” 16Mie ḅụ Ịsọ anị ene mẹ ḅụ ori etela da so Seya mum. 17Kụma Jekọbụ so Sukọtị mum, tẹ anịanga gbọrụ warị nama amịna ḅụụ pịrị, tẹ igurugu awarị nama ori opu anama ma pịrịm; anịẹrẹsị ini ẹrẹ kẹ anị yọ mẹ sịnm Sukọtị — anị fiearị ye “Igurugu awarị.”
18Jekọbụ Padani-aramụ ḅụ ọ̀ mẹnjị kọnma so ye mẹ gberie-sọ ḅụụ la-a ḅara kẹ ò ḅo Sịkẹmụ opu ama aniemẹ tẹ Kenanị ama mẹ ḅio simearị ye mẹ lam; tẹ ori opu ama mẹ tọrọkọ akpụrụ-warị pike tẹ simem. 19#Jọs 24.32; Jọn 4.5Ọ̀ nwẹnị Sịkẹmụ ḍa Emọ owiapụ-awọmẹ ḅara ḅụ seleḅa pakịrị sọnọa si kẹ kiri fẹẹ, anịjụ mie ori ori akpụrụ-warị pike ye. 20Anị yọ ḅụ mie ọ̀ gbọrụ agbamịẹ-anga nama tẹ anị sịn yee, Ẹlị-Elohe-Izirẹlị — anị fiearị ye “Izirẹlịapụ Tẹkẹarị Tamụnọ Ḅe.”
Currently Selected:
Suku-saakị 33: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
