Imatiwu 27

Â za Ijeesu ne tù Ipayireti

(Ịmk 15.1; Irk 23.1-2; Ịjọ 18.28-32)

1Ịnị ẹnẹnẹ viri-viri, avaba ohirẹsụ ẹbanyị irehi Ohomorihi beri ọdọvịdị Aniju nịnị ê gẹ eyi Ijeesu ka à wụ ọọ. 2Ệ sụ́ Ijeesu orupa, dị ẹ và a tụ́ ọvịdị, dị ẹ sị ọọ na yị Ipayireti ana vị ịgọvọnọ ịzọọ nị.

Íjudasi meme sú

(Ụkọ 1.18-19)

3 # Ụkọ 1.18,19 Ịjị Ijudasi ana sị ọ chire ọnịvị anị ụvọ re ka a sị ịvị jị yị Ijeesu, ô ro ịnẹ varẹma, dị ọ sị ẹkẹhị ọnọọ, akata, dị ọ và a ịrẹma na yị ohirẹsụ ẹbanyị irehi Ohomorihi ọnịrị ọdọvịdị nịnị nị. 4Dị ọ ka, “Ma sị ịvị mẹ, agụvị ka mâ sị ọza ẹnẹ ẹ̀ yị nyị ịsị ọ mẹ chire ọnịvị ụvọ ka ẹ̀ wụ̀ ọọ.” Dị ẹnịnị tụ́ ohi, dị ẹ ka, “Ịzị ọnọọ gẹ ẹyịrị ẹwụ? Áawụ ọ́nọọ kụkụ vị nọ!” 5Dị ọ và ẹkẹhị ẹnẹẹ hi ẹtẹ ini irehi Ohomorihi, dị ọ na, di o ne zù obo yị ẹngụ anị nị. 6Dị ohirẹsụ ẹbanyị irehi Ohomorihi kụ́ ẹkẹhị ẹnẹẹ, dị ẹ ka, “Ẹkẹhị enee si sí ọza ana wụ̀ ọza ụta yị; ọda ayị ọ yị zẹẹ ka à sị tụ́ ini irehi Ohomorihi.” 7Dị ẹ gẹ eyi, dị ẹ sị ẹkẹhị ọnọọ na hị́ ẹtẹ ọnụnọkọ, ka èe ne azọgaa tụ́ ịzọọ nị. 8Agụvị avọọ a kụkụ hụrẹ aa hị́ ẹtẹ ọnọọ Ẹtẹ anya pooro ve tù ajịnị nị. 9#Iza 11.12,13Ịhị ọnọọ, ịrẹyị oni Ijeremaya ọnịsẹ vịdị kà ọ sị sẹ. Ộ kà a ka, “Ệ sị akata ọnọọ, ọpa ana Anisirẹrị nịnị ro ka ộ hụ; 10ệ sị hị́ ẹtẹ ọnụnọkọ, anka Óhomorihi mẹ̀ kà a mị.”

Ipayireti ộ họ̀ Ijeesu use ịrẹyị

(Ịmk 15.2-5; Irk 23.3-5; Ịjọ 18.33-38)

11Ijeesu ộ jẹẹ ọvịdị ịgọvọnọ, di ịgọvọnọ họ̀ ọ use ka, “Ẹwáá vị ohinọyị Aniju nị?” Dị Ijeesu tụ́ ohi, dị ọ ka, “Ụ mẹ̀ yị kà a avọọ yọ nị.” 12Ohirẹsụ ẹbanyị irehi Ohomorihi ọnịrị ọdọvịdị nịnị ệ kụ́ ịrẹka za a, ama o yi tụ́ ohi. 13Dị Ipayireti rẹ họ̀ ọ ka, “Wáá wụ́ avaba ịrẹyị awụ anaa sị tụ́ ịrẹka aanị?” 14Ama Ijeesu o yi tụ́ ohi vụrụ-vụrụ; agụvị avọọ di o si hí ịgọvọnọ ọnọọ irenu ẹtẹẹtẹrẹ nị.

Ệ jị ịvị isu yị Ijeesu

(Ịmk 15.6-15; Irk 23.13-25; Ịjọ 18.39—19.16)

15Eche ọ̀ọ maanị si tù, ịgọvọnọ ọọ̄ hụrẹ anịnẹngwa ọnya ana aza èe sì ụvọọ yị aza ẹnẹẹ. 16Ịnị ụmẹ ọnọọ, â nyị anịnẹngwa ọnya aanị ana aā hị́ Ibaraba. Ộ ngụ ịrẹyị ẹtẹẹtẹrẹ. 17Ịjị aza ẹnẹẹ sị wara gụ, dị Ipayireti họ̀ wa ka, “Eni u sì ka ma hụrẹ ụvọ wụ nịnị, Ibaraba wáá yọ nị, à vị Ijeesu ana aā hị́ Ikirisiti?” 18Ộ yẹ ka agụvị ayamịkụ ẹ sị za Ijeesu chire ọnị ụvọ nị. 19Ípayireti mẹ̀ yaayịtẹ ịnị aga ọkarẹyị anị, ose anị ộ tụ́ ụtụ hi ọọ ka, “Asị ụ bẹ ụvọ tụ́ ịrẹyị ọnọrụ ọnọọ, oo, agụvị ka ẹ yị nyị ịsị ọ mẹ. Eyi amị ô re ịrẹyị ẹtẹẹtẹrẹ ịnị ụra ajịnị agụvị ịrẹyị anị.” 20Dị ohirẹsụ ẹbanyị irehi Ohomorihi beri ọdọvịdị nịnị tụ́ aza ịrẹyị ka ẹ̀ kà a ka Ipayireti ọ̀ vana hụrẹ Ibaraba ụvọ yị ẹnị, dị ọ̀ wụ Ijeesu nị. 21Dị ịgọvọnọ ọnọọ ka, “Ye re ọnị ụ ka ma hụrẹ ụvọ wụ nịnị ịnị ẹnị ẹyịva?” Dị ẹnịnị ka Ibaraba yọ nị. 22Dị Ipayireti họ̀ wa ka, “U mè sì ka ma mẹ Ijeesu ana aā hị́ Ikirisiti?” Dị avaba ẹnịnị ka, “Kanyị ọọ zị apavahị!” 23Dị Ipayireti rẹ ka, “Sị ẹ vẹ? Sị ẹ vị ịsa odivi ọnọọ mẹ?” Dị e re nowu hu avọọ, dị ẹ ka, “Kanyị ọọ za apavahị!” 24#Ọda 21.6-9Ịjị Ipayireti re ka ẹ yị nyị ịsị ọnị zụ mẹ, ka ịrazị hyakụ aa vaa chị, dị ọ sị enyi, dị ọ sị nyịna ụvọ anị éyi avaba aza nị, dị ọ ka, “Ẹ yị nyị ụvọ amị rị tụ́ ịnị iswọọza ẹnẹ ẹ̀ yị nyị ịsị ọ mẹ aanị, oo! Ịrẹyị awụ nịnị ọ vị nị.” 25Dị avaba ẹnịnị tụ́ ohi, dị ẹ ka, “Naavọ, ịvị isu anị ọ̀ọ yà ịnị ịrẹsụ ayị ọnịrị ịrẹsụ ezi eyi!” 26Dị Ipayireti hụrẹ Ibaraba ụvọ yị wa nị. Dị ọ ka è tụ́ Ijeesu ịjapa, dị à sị ọọ, dị à na kanyị ọọ za apavahị nị.

Ezirẹkụ ệ sị Ijeesu mẹ enyinyi

(Ịmk 15.16-20; Ịjọ 19.2-3)

27Dị isoja ịgọvọnọ ẹnẹẹ sị Ijeesu nọ ịnị ọba irehi anị nị, dị ẹ hị́ isoja nịnị ana vọ gụ kara a nị. 28Dị ẹ ngwa Ijeesu awuru, dị ẹ sị awuru ohinọyị ovivi ọnya chire e nị. 29Dị ẹ mẹ ọkẹkẹrẹkụ ikeyi-ikeyi, di e si kú ọọ ịrẹsụ nị. Dị ẹ sị okutẹ chire e ụvọ nị, di e nyima dị ẹyaa kụ́ ọọ ụkụ́ isiya nị, dị ẹ ka, “Taarụ, Ohinọyị Aniju nịnị.” 30Dị ẹyaa jị atẹẹ kú ọọ nị, dị ẹ dọ ọ okutẹ ọnọọ, dị ẹyaa vàa hi ọọ ịrẹsụ nị. 31Ịjị ẹ raà sị ọọ mẹ enyinyi, dị ẹ ngwa awuru ọnọọ, dị ẹ sị awuru anị ụvọta chire e nị. Dị ẹ sị ọọ jịnẹ ka ẹnị ẹ̀ na kanyị ọọ za apavahị nị.

Â kanyị Ijeesu za apavahị

(Ịmk 15.21-32; Irk 23.26-43; Ịjọ 19.17-27)

32Ẹ mẹ̀ sị ọọ aa na, ê re Anisayireni ọnya aanị. Aā hị́ ọọ Ịsayịmọnị. Dị ẹ sị ụkata za a ka ọ̀ va za apavahị Ijeesu nị. 33Ịjị ẹ va sị ngụ ịzị aā hị́ Ịgọrịgọta, oni iruvo anị vị “Aha akokoro ịrẹsụ.” 34#Ahẹ 69.21Ệ sị eche ana a sị ịsa ọnyịrẹyị và hura yọ ka ò hú ọọ. Íjeesu mẹ̀ sị ọọ dá ree, o yi hú ọọ. 35#Ahẹ 22.18Dị ẹ za a, dị ẹ kanyị ọọ za apavahị nị. Dị ẹ gà ịta anị tịtẹ, dị ẹ jị osisi tụ́ ọọ nị. Ệ vavọọ mẹ, agụvị ịrẹyị ọnị ọnịsẹ nịnị vịdị kà, ọ̀ zụ sẹ ka, “Ệ gà ịta amị hi ẹngụ ẹnịnị ụvọ, dị ẹ jị osisii tụ́ ọọ nị.” 36Dị ẹ yaayịtẹ, dị ẹ sị eyi pe e nị. 37Ệ chẹrẹ ịrẹka ẹnẹẹ kụ́ za a tụ́ ịrẹsụ apavahị ka, “Ijeesu Ohinọyị Aniju nịnị yị.” 38Ẹ rẹ kanyị oyi ẹẹva za apavahị; ọnyara yà eyi ụvọrị anị, dị ọsa rẹ yà eyi ụvọha anị nị. 39#Ahẹ 22.7; 109.25Dị aza ẹnyị ana aa parahu aa kụ̀ Ijeesu ụhụ nị; dị eyee mi ịrẹsụ nị. 40#Imt 26.61; Ịjọ 2.19Dị ẹ ka, “Ẹwụ ene vee wú irehi Ohomorihi, di u re tenyi ọọ dà ịhyẹgwẹta anị! Àa vị Ozi Ohomorihi ụ vị nị, dọ ẹngụ awụ tụ́, di u we chí hụụ ịrẹsụ apavahị vẹ!” 41Avọọ ohirẹsụ ẹbanyị irehi Ohomorihi ne beri ọzwọzọda nịnị ọnịrị ọdọvịdị nịnị mẹ̀ raa sị ọọ mẹ enyinyi nị. Dị ẹ ka: 42“Ọọ̄ dọ aza ẹnẹsa há, ama ọ yị zụ dọ ẹngụ anị há. Ọ kà ọnị ọ vị Ohinọyị Anisirẹrị nị; ò chí hụrẹ ịrẹsụ apavahị vẹ booro aanị kẹ, di yee re e, dị ya dọ ọ wụ́. 43#Ahẹ 22.8Ộ sị ayị tụra Ohomorihi; Ohomorihi òo sì ọọ, ọ̀ dọ ọ tụ́ booro aanị kẹ! Ộ kà a ka Ozi Ohomorihi ọ́nị vị nị.” 44Dị oyi nịnị ana a rẹ kanyị za apavahị ẹnị rẹ vavọọ aa kụ̀ ọọ ụhụ nị.

Íjeesu meme sú

(Ịmk 15.33-41; Irk 23.44-49; Ịjọ 19.25-30)

45Ịnị ụmẹ agogo ẹwụrẹva, avaba ẹtẹ ọnọọ saka-saka ọ sị vara ịrahụ, pooro na ngụ ụmẹ agogo ẹẹta. 46#Ahẹ 22.1Ịnị ẹhụụ ụmẹ agogo ẹẹta, dị Ijeesu nowu tụ́ ẹba, dị ọ ka, “Ohomorihi amị, Ohomorihi amị, sị ẹ vẹ dị ụ sị ayị hụụnị ịrẹyị amị?” 47Aza ẹnyị ana jẹẹ ịzọọ, dị ẹ wụ́, ệ kà a ka vị aa hị́ Erija nị. 48#Ahẹ 69.21Dị ọza ịnya ẹnịnị wuse zwe na sị awẹ, dị ọ jị ọọ ngụ ini eche ọsụrẹyị, dị ọ sị tụ́ ịrẹsụ ọchị, dị ọ tana ẹ yị Ijeesu ka ò hú ọọ nị. 49Dị ẹnị ana vọ ka, “Naavọ nịnị ye re e, àa vị Erija aa vaa dọ ọ há nị!” 50Ijeesu o re nowu tụ́ ẹba, dị ọ hụrẹ ụhwẹ anị ụvọ nị. 51#Kụra 26.31-33Dị achị ọratụpọ anaa sị che irehi Ohomorihi, há hi ẹẹva hụrẹ ẹbẹẹba na ngụ ụvẹtẹ waara nị. Dị ẹtẹ henyi, dị ịrẹta nịnị há hi ẹẹva nị. 52Ikuta nịnị ệ há irenu, ọrụrụ ịnị aza Ohomorihi ene sú, ệ ha kwẹẹtẹ, 53dị ẹ hụụnị ikuta jịnẹ vẹ, Ịjị Ijeesu sị ha kwẹẹtẹ; dị ẹnịnị nọ ịnị ẹkụra ọnịnị, dị aza ọrụrụ-ọrụrụ re wa nị. 54Ọga isoja ẹchẹhị nịnị ọnịrị isoja nịnị ana yà pe e ene ee sere Ijeesu, ê re, ẹ́tẹ mè henyi ọnịrị avaba ịsa ana mẹ. Angwa ô hí wa, dị ẹ ka, “Ịzẹyịza, ọnọrụ ọnọnị vị Ozi Ohomorihi o!” 55#Irk 8.2,3A rẹ nyị anẹẹ ẹnyị aanị ana jẹẹ ẹ́nẹẹnẹ, di eyee re ẹtẹ nị. Ẹnịnị ệ saasa Ijeesu hụrẹ Igariri vẹ, ka ẹnị ẹ̀ va gụ ọ ụvọ. 56Imeri Anịmagịdara, ọnịrị Imeri ọnyị Ijemiisi ọnịrị Ijosẹẹhụ, ne beri ọnyị ezi Izebedi yà ịnị ẹnịnị.

A mẹmẹ sị oku Ijeesu tụ́ ịnị ụsị ịnị ịrẹta

(Ịmk 15.42-47; Irk 23.50-56; Ịjọ 19.38-42)

57Óruva mè si tù, ọzọbanyị ọnya ana vị Anarịmatịya ộ vẹ. Ịrẹha anị ọ rị Ijosẹẹhụ nị, ozirẹma Ijeesu ọnị rẹ vị nị. 58Ộ nọ ịdị Ipayireti, di o ne họ̀ use oku Ijeesu nị. Dị Ipayireti ka à sị oku Ijeesu yọ nị. 59Dị Ijosẹẹhụ sị ọọ, dị ọ na sị ịta ọvụ ọwọọwa, di o si chire e ikuma nị. 60Dị ọ sị ọọ na tụ́ ịnị ụsị ọwọọwa ọnị ọ vịdị chị tụ́ ịnị ịrẹta yị ẹngụ anị nị. Dị ọ zina ịrẹta ọbanyị ọnya gù ụsị ọnọọ irenu nị. 61Imeri Anịmagịdara ọnịrị Imeri ọsa ệ yaayịtẹ ịzọọ, dị ẹ và eyi kà ikuta ọnọọ nị.

Oserẹtẹ nịnị ê sere ikuta ọnọọ

62Ini eyinẹhẹ anị, ana vị eyinẹhẹ ẹkụhị enee si tenyi ẹngụ ẹkụhị ụhwọtụ, ohirẹsụ ẹbanyị irehi Ohomorihi ọnịrị Anihwarisi nịnị e ne tù Ipayireti. 63#Imt 16.21; 17.23; 20.19; Ịmk 8.31; 9.31; 10.33,34; Irk 9.22; 18.31-33Dị ẹ ka, “Ọga, yâ tamayị ka ovenọza ọnọọ mẹ̀ yà ẹhẹ, ộ kà a ka ịhyẹgwẹta ọnị ọnị sú, ọnị rẹ vaa haa kwẹẹtẹ.” 64Agụvị avọọ, mẹ ọda ka è ne sere ikuta ọnọọ ẹtẹẹtẹrẹ pooro dị ẹkụhị ẹẹta ọ̀ gụ, agụvị asị ezirẹma anị re oze ne yi ọọ, dị ẹ̀ẹ kà a yị aza ka vị ọ ha kwẹẹtẹ nị. Ireche ọnọọ o vee divii hu ị́ịyẹẹyẹ nị. 65Dị Ipayireti ka, “Wâ nyị oserẹtẹ nịnị, nyị wa ne sere e, u wèe mè sì nịnị!” 66Dị ẹ na, dị ẹ sị apọtẹrẹwa tụ́ ịnị ịrẹta ọnọọ ka asa a nyị ọza ana kanyị ọọ nị. Dị ẹ nyị oserẹtẹ tụ́ ịzọọ ka òo sere e nị.

Currently Selected:

Imatiwu 27: EBTP

Highlight

Copy