Imatiwu 28

Ijeesu ộ ha hụụnị isu

(Ịmk 16.1-10; Irk 24.1-12; Ịjọ 20.1-18)

1Ịjị ẹkụhị ụhwọtụ sị para hu, ịnị ẹnẹnẹ ẹkụhị ọsẹ, Imeri Anịmagịdara ọnịrị Imeri ọsa ệ na ka eni è ne re ikuta ọnọọ. 2Re, dị ẹtẹ henyi jigi-jigi nị. Anggẹẹrị Ananyị yị ọnya ô chí hụrẹ ẹbẹẹba vẹ, di o ve zina ịrẹta ene gù ụsị ọnọọ irenu kwooze, dị ọ yaayịtẹ tụ́ ịrẹsụ anị nị. 3Ọza èe re e, vị aa za anka ịnyanya avọọ nị; dị awuru anị aa vwẹtẹ sẹnẹ-sẹnẹ nị. 4Angwa ô hí oserẹtẹ ẹnẹẹ ẹtẹẹtẹrẹ, dị ẹngụ ẹnịnị aa bànyị, dị ẹ hyẹdụ hi ẹtẹ anka oku oyisú avọọ nị. 5Dị anggẹẹrị ọnọọ kà a yị anẹẹ ẹnẹẹ ka, “Asị u rè hí angwa nịnị! Mâ yẹ ka Ijeesu anaa kanyị za apavahị u wee sì nịnị nị. 6Ọ yị kụkụ yà ịzẹnị, agụvị ka a sị ọọ ha kwẹẹtẹ, anka ọ mẹ̀ vịdị kà a. Vẹ ịzẹnị, di u we ve re ịzọọ vịdị yà nịnị! 7Wụsẹ na kà a yị ezirẹma anị ka a sị ọọ ha kwẹẹtẹ hụụnị isu. Aa dọ ọvịdị awụ nịnịị nọ Igariri, u vee re e ịzọọ nịnị. Tamayị ịsị mị kà wụ nịnị, oo!” 8Dị ẹ wụsẹ hụụnị ikuta ịzọọ beri angwahi ọnịrị ịrajẹ ọbanyị, di e zwe ka ẹnị ẹ̀ na kà a yị ezirẹma anị nị. 9Kẹnẹ, dị Ijeesu ve tù wa, dị ọ kụ́ wa nị. Dị ẹ kà pe e, dị ẹ za ahụ Ijeesu, dị ẹ va ku ẹtẹ kụ́ ọọ nị. 10Dị Ijeesu kà a yị wa ka, “Asị u hí angwa nịnị! Na kà a yị ẹyịnyara amị nịnị ka ẹ̀ vara gẹrị ẹmị Ígariri, ka e vee re mi ịzọọ!”

Ịsị oserẹtẹ nịnị kà

11Ányẹnẹẹ ẹnẹẹ màa na, di oserẹtẹ ẹnyị nọ ịnị ẹkụra, dị ẹ na kà a yị ohirẹsụ ẹbanyị irehi Ohomorihi avaba ịsa ana mẹ nị. 12Dị ohirẹsụ ẹbanyị irehi Ohomorihi ne tù ọdọvịdị nịnị, dị ẹ gẹ eyi, dị ẹ sị ẹkẹhị ọbanyị yị oserẹtẹ ẹnẹẹ nị. 13Dị ẹ ka, “Kà a ka ụ màa sụ ara ịrahụ, ezirẹma anị vẹ, di e ve yi oku anị nị! 14Ịgọvọnọ ọ̀ọ wụ́ ọọ, i vee pe e kà ịrẹyị, dị ụ wẹ yị nyị ịrẹyị nịnị!” 15Dị oserẹtẹ ẹnẹẹ dọ ẹkẹhị ọnọọ nị; dị ẹ mẹ̀ ịsaa kà yị wa nị. Aniju nịnị ẹ sị enube ọnọọ gara hi ẹtẹ zịịzị pooro ve tù ajịnị.

Ijeesu ộ sị ẹngụ zụ̀ ezirẹma anị.

(Ịmk 16.14-19; Irk 24.36-51; Ịjọ 20.19-23; Ụkọ 1.6-8)

16 # Imt 26.32; Ịmk 14.28 Ezirẹma Ijeesu ẹwụrọnya ệ nọ Igariri, dị ẹ nọ ịnị ataba ọnya aanị, anka Íjeesu mẹ̀ vịdị kà a yị wa nị. 17E mè re Ijeesu, ệ va ku ẹtẹ kụ́ ọọ. Ama aza ẹnyị aa yịị jị ọọ ịrẹka. 18Dị Ijeesu ve tù wa, dị ọ kà a yị wa ka, “A raà sị avaba ụkata ịnị ẹhẹ ọnịrị ẹbẹẹba yị mị. 19#Ụkọ 1.8Agụvị avọọ, nọ avaba ẹhẹ nịnị, di u we re ka wâ mẹ ka avaba anẹhẹ ẹ̀ vara ezirẹma amị nịnị! Dị ụ waa mẹ ọyịhwenyii yị wa ịnị ịrẹha Ada ọnịrị Ozi ne beri Ụhwẹ Ọnịnị. 20Sị zụ̀ wa nịnị ka ẹ̀ẹ saasa avaba ịsa ọnị mị mẹ ọda anịị wụ nịnị! Tamayị, mị vaa yàa pe wu nịnị ịnị avaba ụmẹ pooro ne tù ọdịrẹma ẹhẹ.”

Currently Selected:

Imatiwu 28: EBTP

Highlight

Copy