Imatiwu 26

A mẹmẹ gẹ eyi Ijeesu

(Ịmk 14.1-2; Irk 22.1-2; Ịjọ 11.45-53)

1Ịjị Ijeesu sị ịrẹyị anị ẹnẹnị kà ta, dị ọ kà a yị ezirẹma anị ka: 2#Kụra 12.1-27“Wâ yẹ nịnị ka uhurenyi aa rị Eche ọyịparahu nị. A vaa sị ẹmị Ozi ọza onigirimaa chire ọnịvị amị ụvọ, dị ẹ kanyị mị za ọchị apavahị.” 3Ohirẹsụ ẹbanyị irehi Ohomorihi ọnịrị ọzwọzọda nịnị ne beri ọdọvịdị Aniju nịnị ệ kụ́ gụ ị́da ohirẹsụ ọbanyị irehi Ohomorihi ana aā hị́ Ikayahwasi. 4Dị ẹ gẹ eyi ka ẹnị èe weree za Ijeesu, dị ẹnị ẹ̀ wụ ọọ nị. 5Dị ẹ ka asị a mẹ̀ ẹ ịnị akakana eche, agụvị ka ịrẹkụ va sị chị yị aza nị.

Ọnẹẹ ọnya ộ sị ụbanyị yị Ijeesu

(Ịmk 14.3-9; Ịjọ 12.1-8)

6Íjeesu mẹ̀ yà ịnị ẹkụra Ịbẹtanị ini eehi Ịsayịmọnị ana vị ọnịkụ ọbanyị, 7#Irk 7.37,38di ọnẹẹ ọnya aanị ká a vẹ nị. Ộ nyị eturare tụ́ ini ijonggo ọnya aanị. Eturare ọnọọ ộ katarihi. Dị aa và eturare ọnọọ hi Ijeesu ịrẹsụ, ọ mẹ̀ yaayịtẹ aa rị ịsa nị. 8Ézirẹma anị mè re e, dị ẹyaa kụ́ ayị nị. Dị ẹ ka, “Ho! Sị ẹ vẹ di ee du ọọ ha aanị? 9A yaanị nyẹngụ ná eturare ọnọọ ẹtẹẹtẹrẹ, dị a sị ẹkẹhị anị yị onosiye nịnị.” 10Ijeesu ọ sị yẹ, dị ọ kà a yị wa ka, “Sị ẹ vẹ dị ụ waa kụ́ ọọ kata a ẹngụ nịnị aanị? Ịsa ozoza ọ mẹ mị aanị nị. 11#Ọda 15.11Onosiye vị oni u wee re nịnị eyinị-eyinị; ama ẹma rẹẹ̀ yị vaa yàa pe wu nịnị pooro nị. 12Ộ va sị eturare sisi mi ẹngụ tịtẹ, di è ve ne mi. 13Ịzẹyịza m maa kà a wụ nịnị nị, aha tụra aha ana àa yà aa kà enube ọyịza ọnọnị ịnị avaba ẹhẹ, a rẹ vaa kà ịsa ọnọọ mẹ aanị, dị aa sịị tamayị anị.”

Ijudasi ô sì iruvo Ijeesu

(Ịmk 14.10-11; Irk 22.3-6)

14Ọnya ini ezirẹma Ijeesu ẹwụrẹva ana aā hị́ Ijudasi Isikarịyọtị ộ nọ ịdị ohirẹsụ ẹbanyị irehi Ohomorihi. 15#Iza 11.12Dị ọ kà a yị wa ka, “Sị ụ vaa sịị mị nịnị, dị ma sị Ijeesu chire wu nịnị ụvọ?” Dị ẹ sị akata yọ nị. 16Hụrẹ ịhị ọnọọ dị Ijudasi kuku ee sì oze ọnọọ vaa sịị sị Ijeesuu chire wa ụvọ nị.

Ijeesu ọnịrị ezirẹma anị ệ rị Echu Ọyịparahu

(Ịmk 14.12-21; Irk 22.7-14,21-23; Ịjọ 13.21-30)

17O si tù ẹkụhị ịpaapa ini Eche Ịbụrẹẹdị ẹnẹ ẹ̀ yị nyị òwù. Dị ezirẹma Ijeesu ve tù ọọ, dị ẹ họ̀ ọ ka, “Ịzị u wee sì ka ye ne tenyi tịtẹ yị wụ, dị ụ wa na yà rị Eche Ọyịparahu?” 18Dị ọ kà a yị wa ka ẹ̀ nọ ịnị ẹkụra ọsọọ, dị è ne tù ọnọrụ ọnya aanị, dị ẹ̀ kà a yọ ka, “Ọga ka ụmẹ anị o si tù, ọnịrị ezirẹma anị vaa rị Eche Ọyịparahu ini eehi awụ.” 19Dị ezirẹma Ijeesu na mẹ, anka Íjeesu mẹ̀ kà a yị wa nị. Di e tenyi ịsa Eche Ọyịparahu nị. 20Ịjị oruva si tù, dị Ijeesu ọnịrị ezirẹma anị ẹwụrẹva yaayịtẹ aa rị ịsa nị. 21Ẹ màa rị ịsa, dị Ijeesu ka, “Ịzẹyịza m maa kà a wụ nịnị nị, ọza ịnyara ịnị awụ nịnị vaa sị mịị chire ọnịvị amị ụvọ.” 22Ayị ẹnịnị e si du ẹtẹẹtẹrẹ, dị ẹyaa sị ọnya-ọnya họ̀ ọ ka, “Ẹmị wáá yọ, Ananyị yị?” 23#Ahẹ 41.9Dị Ijeesu tụ́ ohi, dị ọ ka, “Ọza ẹnẹ ẹmịrịị aa jị ụvọọ ngụ ẹnya ọnyaa rị ịsa, ọ vaa sị mịị chire ọnịvị amị ụvọ nị. 24Ẹmị Ozi ọza onigirima ve nee sú, anka Íwe Ohomorihi mẹ̀ kà a. Ama ọza ana àa sị mị chire ọnịvị amị ụvọ, ọ sị dà. Ọ yaanị dahi hu ka asị a vana ma ọza ọnọọ vụrụ-vụrụ.” 25Dị Ijudasi ana vaa sị ọọ chire ọnịvị anị ụvọ ka, “Ọga, ẹmị wáá yọ?” Dị Ijeesu ka, “Ụ mẹ̀ yị kà a, avọọ yọ.”

Ịsa oruva ọdịrẹma

(Ịmk 14.22-26; Irk 22.14-20,39; 1 Ịkọ 11.23-25)

26Ẹ́nịnị màa rị ịsa, dị Ijeesu sị Ịbụrẹẹdị, dị ọ mẹ̀ aduwa tụ́ ọọ nị. Dị ọ dà a, dị ọ sị yị ezirẹma anị nị. Dị ọ ka, “Dọ dị ụ wa rị ọọ nịnị, ọsọnị ọ vị ẹngụ amị nị.” 27Dị ọ rẹ sị ako anaa sị ká eche tịtẹ nị; dị ọ kụ́ Ohomorihi avọ, dị ọ sị yị wa nị, dị ọ ka, “Avaba awụ nịnị ò hú ịnị anị! 28#Kụra 24.8; Ijer 31.31-34Ọsọnị ọ vị anya amị oni Ohomorihi sị sị ụvọ tụ́ ịnị oto ọwọọwa, oni mi vee chee sẹ́ ẹtẹẹ yị aza ọrụrụ, dị à sị sị ịvị ẹnịnị vagu wa. 29Ịzẹyịza m maa kà a wụ nịnị nị, me mē vene hú eche ọnọnị pooro ne tù ẹkụhị oni mi vee hú ọọ ọwọọwa ịzị Ada amị yà aa mẹ ịjọva.” 30Dị ẹ jị ahẹ ọnya, dị ẹ hụụ ịzọọ, dị ẹyaa nọ ịnị Ataba Orivi nị.

Ijeesu ka Ipita vaa navọ ọnị

(Ịmk 14.27-31; Irk 22.31-34; Ịjọ 13.36-38)

31 # Iza 13.7 Ịjọnọọ Ijeesu ộ kà a yị wa ka, “Avaba awụ nịnị vee zwee hụrẹ mị ẹngụ ịrahụ ọnị, agụvị ka Iwe Ohomorihi ộ kà a ka: ‘Mi vee tụ́ Oseratẹmẹ, dị atẹmẹ nịnị gara hi.’ 32#Imt 28.16Ama Ịjị Ohomorihi ọ̀ọ sị mị ha hụụnị isu, mị vaa dọ ọvịdị awụ nịnị na ngụ Igariri.” 33Dị Ipita kà a yọ ka, “Avaba aza ẹ̀ẹ daka zwe hụrẹ wụ ẹngụ, emi e yi vee zwe.” 34Dị Ijeesu kà a yọ ka, “Ịzẹyịza m maa kà a wụ nị, ịnị ịrahụ ana aa vẹ aanị, dị ụkọkọrọ ò ve nowu, ụ vaa kà a tù ụpẹ ẹẹta ka wẹ yị yẹ mị.” 35Dị Ipita ka, “Àa daka aa wụ mịị beri ewu, mẹ yị vaa kà a ka mẹ yị yẹ wụ.” Dị ezirẹma ana vọ ẹnị rẹ vavọọ sị irenu tọ̀ ọnya nị.

Ijeesu ộ mẹ̀ aduwa ịnị ụbazị Ịgẹtịsẹmanị

(Ịmk 14.32-42; Irk 22.39-46; Ịjọ 18.1)

36Ijeesu ọnịrị ezirẹma anị e ve tù ịzị aā hị́ Ịgẹtịsẹmanị. Dị ọ kà a yị wa ka, “Yaayịtẹ ịzẹnị nịnị, ka maa naa mẹ̀ aduwa ịzọsọọ!” 37Dị ọ sị Ipita ọnịrị ezi Izebedi ẹyịva aa na nị. Ayị Ijeesu ee du, dị ẹngụ anị aa vaahi nị. 38Dị ọ kà a yị wa ka, “Ayodu aa vaa wụ̀ mị. Jẹẹ ịzẹnị nịnị, di u we pe mi sị eyi pe ẹtẹ nịnị!” 39Dị ọ kà nọ ọvịdị chee, dị ọ va ku ẹtẹ, dị aa mẹ̀ aduwa nị. Dị ọ ka, “Ọga, ọ̀ọ yaanị rụra mẹ, ụmẹ ụyọrị ọnọnị ọ̀ há hụrẹ mị ịrẹsụ; ama ẹ yị vị ịsị mi sì, ẹ̀ yị vị ịsị u wèe sì.” 40Dị ọ varẹma ve tù ezirẹma anị, di o ve tù ka ẹyaa sụ ara nị. Dị ọ kà a yị Ipita ka, “Ho! Wẹ yị nyẹngụ pe mi sị eyi pe ẹtẹ ụmẹ chee? 41Sị eyi pe ẹtẹ, dị ụ waa mẹ̀ aduwa, agụvị asị ụ ngụ ịnị ọyịzamare nịnị! Ịzẹyịza ayị awụ nịnị ee sì ka ọnị ọ̀ mẹ̀ ịsa ozoza, ama ọchẹngụ awụ nịnị vị ọkụmị.” 42Dị ọ rẹ varẹma ụpẹ ọhụva na mẹ̀ aduwa nị, dị ọ ka, “Ọga, àa vị ka ụyọrị ọnọnị ọ yị zụ hụrẹ mị ịrẹsụ, ẹ̀ yị vị mị rị ọọ, mẹ ịsị u wèe sì!” 43Íjeesu mẹ̀ rẹ vẹ, di o re ve tù ka ẹ rẹ yaa sụ ara nị, agụvị ka ara ee hine wa ẹtẹẹtẹrẹ. 44Ijeesu ọ rẹ hụụ ịdị ẹnịnị, dị ọ rẹ na mẹ̀ aduwa ụpẹ ọhụta nị, dị ọ rẹ kà ịrẹyị ọnọọ vịdị kà nị. 45Dị ọ vavẹ ve tù ezirẹma anị nị, dị ọ kà a yị wa ka, “Ụ waa yịị sụ ara nịnị, dị ụ raa tụ́ ụhwọ́ nịnị nị? Re, ụmẹ o si tù, aa vaa sị ẹmị Ozi ọza onigirimaa chire ọnịvị amị nịnị ụvọ. 46Kwẹẹtẹ, ya na nịnị! Ọza ana a sị mịị chire ọnịvị amị ụvọ, aa vaa ngụ ịzẹnị.”

Â za Ijeesu

(Ịmk 14.43-50; Irk 22.47-53; Ịjọ 18.3-11)

47Íjeesu mẹ̀ yị yà ịnị ịrẹyị aa kà, dị Ijudasi, ọnya ini ezirẹma ẹwụrẹva vẹ nị. Ộ wara aza saasa ẹngụ vẹ; aza ẹnẹẹ ệ kụ́ ụhwọ beri arubebe za. Ohirẹsụ ẹbanyị irehi Ohomorihi ọnịrị azọkụ nịnị ẹ tụ́ wa vẹ nị. 48Ọza ana aa sị Ijeesuu chire ọnịvị anị ụvọ, ộ vịdị raà sị apọtẹrẹwa ọnya yị wa, ọ ka, “Ọza ọnị mèe kú irenu, ọnịị yọ, za a nịnị!” 49Dị Ijudasi vẹ, di o wuse ne tù Ijeesu, dị ọ kụ́ ọọ, dị ọ ka, “Ọga”, di o kú ọọ irenu nị. 50Dị Ijeesu kà a yọ ka, “Ọta amị, ịsị ụ va mẹ wáá yị? Dị aza ẹnẹẹ vẹ, dị ụvọ ẹnịnị ngụ Ijeesu, dị ẹ za a nị.” 51Dị ọza ọnya ana jẹẹ pe Ijeesu tụ̀ ụhwọ anị, dị ọ sị jị ozi ahụ ohirẹsụ ọbanyị irehi Ohomorihi ụtọ nị. 52Dị Ijeesu kà a yị ọza ọnọọ ka, “Sị ụhwọ awụ varẹma tụ́ aha anị, agụvị ka ọza ana àa tụ̀ ụhwọ, ụhwọ a vaa sị wụ ọọ nị. 53Wéé ro ka mẹ yị nyẹngụ kà a yị Ada amị, dị ọ kụ́ ọkọnị anggẹẹrị nịnị va mị booro aanị? 54Màa vavọọ mẹ, Íwe Ohomorihi mẹmẹ kụkụ vaa sẹ ka ịsị ẹ vaa mẹ yị?” 55#Irk 19.47; 21.37Dị Ijeesu kà a yị wa ịnị ụmẹ ọnọọ ka, “Ẹmị ụ kụ́ ụhwọ ọnịrị arubebe aa vaa za nịnị anka oyi avọọ nịị? Eyinị-eyinị ẹmịrị ẹwụ nịnị ộ yà ini irehi Ohomorihi, dị maa zụ̀ wụ nịnị ịsa nị, wẹ yị za mị nịnị. 56Avaba ẹsẹnị aa mẹ, agụvị ịsị ọnịsẹ nịnị chẹrẹ tụ́ ini Iwe Ohomorihi ọ̀ zụ sẹ.” Dị avaba ezirẹma na a vọ tịtẹ, di e si zwe nị.

Â za Ijeesu nọ ikootu

(Ịmk 14.53-65; Irk 22.54-55,63-71; Ịjọ 18.12-14,19-24)

57Aza ana za Ijeesu, ệ sị ọ nọ ịdị Ịkayapa ana vị ohirẹsụ ọbanyị irehi Ohomorihi. Ọzwọzọda nịnị ọnịrị ọdọvịdị nịnị ẹ sị wara gụ ịzọọ. 58Ipita ộ saasa Ijeesu ẹ́nẹẹnẹ huuu na ngụ ohweje irehi ohirẹsụ ọbanyị irehi Ohomorihi, dị ọ na yaayịtẹ pe ozi ahụ nịnị ka oni ò re avaba ịsị ẹ vaa mẹ nị. 59Ohirẹsụ ẹbanyị irehi Ohomorihi ọnịrị avaba ọmọkarẹyị ê sì ịrẹyị ireche ẹnẹẹ vaa kụ́ụ za Ijeesu, agụvị dị ẹ̀ zụ wụ ọ; 60ama ẹ yị nyị ịrẹyị enee re; ama onivenu ireche ọrụrụ-ọrụrụ ệ vẹ. Ụpẹ ọnya kẹnẹ, di onivenu ireche ẹẹva vẹ nị, 61#Ịjọ 2.19dị ẹ ka, “Ọnọrụ ọnọnị ộ kà a ka ọnị o nyengu wú irehi Ohomorihi ọnọnị hi ẹtẹ, ịhyẹgwẹta anị, di oni re tenyi ọọ dà.” 62Dị ohirẹsụ ọbanyị irehi Ohomorihi kwẹẹtẹ, dị ọ kà a yị Ijeesu ka, “We yi tụ́ ohii? Wáá wụ́ ịsị aza ẹnẹnị ka waa mẹ aanị?” 63Ama Ijeesu o yi tụ́ ohi. Dị ohirẹsụ ọbanyị irehi Ohomorihi ọnọọ ka, “Mâ sị Ohomorihi ana yàra tụra wụ, kà a yị, ẹwáá vị Ikirisiti Ozi Ohomorihi ọnọọ nị?” 64#Ịda 7.13Dị Ijeesu ka, “Ẹmịị yọ nị. Dị maa kà a yị wụ nịnị ka hụrẹ ọyaanị na, u vee re ẹmị Ozi ọza onigirima ka mâ yaayịtẹ éyi ụvọrị Ohomorihi Ochẹtẹngụ. Mị vaa vẹ ini eguhi ẹ́bẹẹba.” 65#Ire 24.16Dị ohirẹsụ ọbanyị irehi Ohomorihi ọnọọ kụ́ ayị, dị ọ za awuru anị, dị ọ nàa chaara nị. Dị ọ ka, “Ho! Ọ sị Ohomorihi kụ̀ ụhụ! Si i kuku ee sì onivenu aa mẹ? Waa wụ́, ọ màa kụ̀ Ohomorihi ụhụ nịnị 66Si u ro nịnị?” Dị avaba ẹnịnị ka ộ rị ịvị isu nị. 67#Ayị 50.6Dị ẹyaa jị atẹẹ kú Ijeesu eyi, di eyee hú ọ ọsẹ nị. Dị aza ẹnyị aa nya a arụhwọtọ nị, 68dị ẹ ka, “Kà ẹ yị dị a re, ẹwụ Ikirisiti, ene ee tụ́ wu aanị?”

Ipita ka ọnị ọ yị yẹ Ijeesu

(Ịmk 14.66-72; Irk 22.56-62; Ịjọ 18.15-18,25-27)

69Ípita ọnị mẹ̀ yà ini ohweje, di ozi ahụ ọnẹẹ ọnya ká a vẹ, dị ọ ka, “Aa! Ẹwụ vị ana rẹẹ̄ dụ Ijeesu Anigariri ọnọọ zị bẹẹ!” 70Dị Ipita aa kụ́ éyi avaba ẹnịnị nị, dị ọ ka, “Mẹ yị yẹ ịsụ waa kà aanị.” 71Di o si hu aa nọ enoze nị. Ozi ahụ ọnẹẹ ọsa ô re Ipita, dị aa kà a yị aza ana jẹẹ ịzọọ ka, “Ọnọrụ ọnọnịị̄ dụ Ijeesu Anịnazarẹtị ọnọọ zị.” 72Dị Ipita raa kụ́ nị, dị aa hyeku, dị ọ ka ọnị ọ yị yẹ ọza ọnọọ nị. 73Ịjị ọ da kù chee, dị aza ana jẹẹ ịzọọ kà a yị Ipita ka, “Ịzẹyịza yọ, ọza ịnyara ẹnịnị ụ vị nị, ẹkụra awụ ộ hyakụ sị zụ̀.” 74Dị Ipita kwẹẹtẹ, di ee chìi hi ẹngụ anị, dị aa hyeku nị, dị ọ ka, “Mẹ yị yẹ ọza ọnọọ!” Kẹnẹ, dị ụkọkọrọ nowu nị. 75Dị Ipita tamayị, Ijeesu mẹ̀ vịdị kà a ka, “Dị ụkọkọrọ ò ve nowu, ụ vaa kà a tù ụpẹ ẹẹta ka wẹ yị yẹ mị.” Dị Ipita jịnẹ tụ́ ẹhẹ, dị aa jị òrèrè ẹtẹẹtẹrẹ nị.

Currently Selected:

Imatiwu 26: EBTP

Highlight

Copy