Imatiwu 10

Odeyi Ijeesu ẹwụrẹva

(Ịmk 3.13-19; Irk 6.12-16; Ụkọ 1.13)

1Ijeesu ộ hị́ ezirẹma anị ẹwụrẹva gụ, dị ọ sị ọda yị wa ka ẹ̀ẹ dụ ụhwẹ echuu jịnẹ, dị ẹ̀ rẹẹ mẹ avaba ụkụ irenyi-irenyii yị aza nị. 2Ịrẹha ezirẹma ẹwụrẹva ẹnẹẹ yị: Ọnịpaapa vị Ịsayịmọnị ana a rẹẹ̄ hị́ Ipita, beri Andụrụ ọyịnyara anị; Ijemiisi ọnịrị Ịjọọnụ ọyịnyara anị; ana vị ezi Izebedi; 3Ihwiripi beri Ibatoromiwu; Ịtọmọsị ọnịrị Imatiwu ọdẹkẹhirehi, Ijemiisi ozi Arịhwịyọsị, ne beri Ịtadịyọsị; 4Ịsayịmọnị Anikenaani beri Ijudasi Isikarịyọtị, ọza ana vana sị Ijeesu chire ọnịvị anị ụvọ.

A mẹ̀ vọrọ ka ezirẹma ẹ̀ mẹ̀ ụkọrọ ẹnịnị

(Ịmk 6.7-13; Irk 9.1-6; 10.3-12)

5Dị Ijeesu tụ́ wa nọ ẹhẹ, dị ọ kà a yị wa ka: Asị ẹ nọ ịdị Anigiriki u! Asị ẹ rẹ ngụ ẹkụra Anịsamarịya nịnị. 6Ama nọ ịdị Anisirẹrị nịnị, agụvị ka eni e vú anka atẹmẹ avọọ nị! 7Na kà a yị wa nịnị ka ụmẹ ana Ada ayị ẹbẹẹba aa sịị mẹ ịjọva ọ sị gụrị ẹtẹ. 8Waa mẹ ọnịkụ ụkụ ẹnịnị, dị ụ waa ha okuu kwẹẹtẹ nịnị! Waa rẹẹ mẹ ọnịkụ ọbanyị nịnị ụkụ, dị ụ wa rẹẹ dụ ụhwẹ echuu jịnẹ nịnị! We yi sí ụta tụ́ ịnị ịsa ọnị ụ dọ nịnị; agụvị avọọ ẹwụ nịnị ọ̀ rẹẹ sị yị aza ọọhẹ! 9Asị ụ za ẹkẹhị ọnyọọnyị nịnị tụ́ ịnị asụnụ awụ nịnị! 10#1 Ịkọ 9.14; 1 Itim 5.18Wàaa na nịnị, asị ụ za ampo nịnị! Asị ụ rẹ za awuru gụ ẹẹva nịnị, asị ụ rẹ za adava nịnị! Asị ụ hyakụ za okutẹ nịnị! Â vọrọ ka à sị ịsọyịrị yị aza ana aa mẹ̀ ụkọrọ.

11“Ẹkụra tụra ẹkụra ọnị ụ wàa ngụ nịnị, ne sì ọza ana vaa dọ wụ nịnị ọzọga, dị ụ wa yà ịzọọ nịnị pooro dị ụ wa va hụụnị ẹkụra ọnọọ nịnị! 12Wàaa ngụ ini eehi nịnị, kụ́ anineehi ọnọọ ka ẹngwọọrọ ọ̀ va awụ nịnị o! 13Anineehi ọnọọ ẹ̀ẹ dọ wụ nịnị ọzọga, ẹngwọọrọ awụ nịnị ọ̀ yà pe wa. Ama ẹnịnị ẹ̀ yị dọ wụ nịnị ọzọga, dị ẹngwọọrọ awụ nịnị ọ̀ và ká wụ nịnị vẹ. 14#Ụkọ 13.51Ọza tụra ọza ẹnẹ ẹ̀ yị dọ wụ nịnị, dị ẹ̀ yị rẹ wụ́ ịrẹyị awụ nịnị nị, bànyị edudu ahụ awụ nịnị hi ịzọọ, wàaa hụụnị ẹkụra ọnọọ, àa vị ini eehi ọnọọ nịnị. 15#Imt 11.24; Oyn 19.24-28#Irk 10.4-12Ịzẹyịza, dị ma kà a wụ nịnị ka ịnị ẹkụhị ọkarẹyị, ọ vaa daahi yị anẹkụra Isodọmị ọnịrị Igomora hu anẹkụra ọnọọ.”

A vaa sị ụyaa rị ezirẹma Ijeesu

(Ịmk 13.9-13; Irk 12.11-12; 21.12-19)

16 # Irk 10.3 “Re, mị tụ́ wụ nịnị aa na anka atẹmẹ ana aa nọ ịnị akakana akatapooro nịnị avọọ nị. Agụvị avọọ â nyị ka wa tangwa yẹẹrẹ nịnị anka ẹwụ avọọ, ama dụ wa yà anka arivadi nịnị ẹnẹ ẹ̀ yị mā mẹ ọza ịrẹyị odivi avọọ. 17#Ịmk 13.9-11; Irk 12.11,12; 21.12-15Ama sị eyi pe ẹngụ awụ nịnị, oo! Â nyị aza ana vaa za wụ nịnịị nọ ikootu. E re vee tụ́ wu nịnị ịjapa ini irehi ahẹkẹ Aniju ẹnịnị. 18A rẹ vaa za wụ nịnịị nọ ịda ịgọvọnọ nịnị ọnịrị ohinọyị nịnị agụvị amị kẹnẹ, ka wa kà enube ọyịza yị wa ọnịrị anẹhẹ ana vọ. 19Ịhị àa hị́ wụ nịnị ịrẹka, asị u ne roo tịtẹ nịnị ka u mè vee tụ́ ohi, à vị ka sị ụ vaa kà kẹ! Ịjị ụmẹ òo si tù, ịsị àa vọrọ ka wa kà nịnị, a vaa sị zụ̀ wụ nịnị. 20Agụvị ka ẹ yị vị ẹwụ nịnị ọ vaa kà ịrẹyị nịnị. Ụhwẹ Ọnịnị Ada awụ nịnị ana yà ịnịnẹ awụ nịnị, ọ vaa zị oze ịnị ụvọ awụ nịnịị kà ịrẹyị nị. 21#Ịmk 13.12; Irk 21.16Ẹyịnyara ẹnyị vee sì iruvo ọsa, ka à wụ ọọ. Ada vee sì iruvo ezi anị. Dị ezi kwẹẹtẹ tù aza ana ma wa, dị ẹ mẹ ka à wụ̀ wa. 22#Imt 24.9; Ịmk 13.13; Irk 21.17; Imt 24.13; Ịmk 13.13Dị avaba aza aa nyị ịhyẹrẹ awụ nịnị kẹnẹ agụvị amị. Ama ọza ana àa zụ sị ẹngụ dọ ọ pooro ne tù ẹzẹtẹ, ọnị a vaa dọ ọ há nị. 23Ịjị àaa sị ụyaa rị wụ nịnị ịnị ẹkụra ọnya, zwe nọ ịnị ẹkụra ọsa nịnị! Dị ma kà a wụ nịnị, wẹ yị va zụụ ngụ avaba ẹkụra Anisirẹrị ta, dị ẹmị Ozi ọza onigirima ọ̀ vavẹ. 24#Irk 6.40; Ịjọ 13.16; 15.20Ọza ana aa kọsẹ ịsa, o yi zụ huna ọga anị; ozi ahụ o mē re huna ọga anị. 25#Imt 9.34; 12.24; Ịmk 3.22; Irk 11.15Ọza ana aa kọsẹ ịsa ọ̀ọ sị yà anka ọga anị, ô ze; ozi ahụ ọ̀ọ rẹ sị yà anka ọga anị, o re ze. Àa na aa hị́ adarehi ‘ohirẹsụ ụhwẹ echu’, yẹ ka ịrẹha ene divi hu avọọ a vaa hị́ anineehi anị nị.”

Ẹnị a vọrọ ka è hí angwa nị

(Irk 12.2-9)

26 # Ịmk 4.22; Irk 8.17 “Agụvị avọọ asị u hí angwa ẹnịnị nịnị! Agụvị ka ẹyị nyị ịsị a sị ịsa kú, ẹnẹ ẹ̀ yị vaa tụ́ ẹhẹ; ẹ yị nyị ịsị ẹ tẹ, ọnị ọza ọ̀ yị vaa yẹ. 27Ịsị màa kà wụ nịnị ịnị ịrahụ, na kà a nịnị ụmẹ ọọdụ! Ịsa àa tangwa were kà chire wu nịnị ụtọ, na jẹẹ ịrẹsụ irehi, dụ wa nọ̀ ọ nịnị! 28Asị u hí angwa aza anaā wụ ọchẹngụ ọza kẹnẹ, ama dị ọ̀ yị zụ wụ ụhwẹ anị. Ama wee hí angwa ọza ana ahịka o zụ du ọchẹngụ ọnịrị ụhwẹ ọza ha ini ẹkụra! 29Wáá yẹ nịnị ka aara ẹẹva eepeni aa hị́ ọọ nị? Ẹ̀ yị vị Ada awụ nịnị ẹbẹẹba hụrẹ ụvọ, ẹ yị nyị ikonya ịnị ẹnịnị ana zụ hụrẹ tịtẹ. 30Avaba ẹyị ị́rẹsụ awụ nịnị vị oni Ohomorihi za ịrịka. 31Agụvị avọọ, asị u hí angwa nịnị ka ẹ yị vị u were huna aara ọrụrụ-ọrụrụ yọ nịnị! 32Ọza ana àa dọ irenu éyi aza ka áamị ọ́nị vị nị, ẹmị rẹ vaa dọ irenu ọ́vịdị Ada amị ẹbẹẹba ka áamị ọ́za ọnọọ vị nị. 33#2 Itim 2.12Ama ọza ana àa rẹ kà a éyi aza ka ọnị ọ yị yẹ mị, ẹmị rẹ vaa kà a ọ́vịdị Ada amị ẹbẹẹba ka ẹmị ẹ yị rẹ yẹ ẹ.”

Ikirisiti a vọrọ ka ọ̀ vị ọọnyị ịnị ẹhẹ ọza nị

(Irk 12.51-53; 14.26-27; Ịjọ 12.25)

34“Asị u ro o ka ẹngwọọrọ mị sị vẹ ịnị ẹhẹ nị. Mẹ yị sị ẹngwọọrọ vẹ ẹhẹ, ẹ̀ yị vị ịrẹkụ. 35#Imi 7.6Mâ vẹ ka ma va há ada ọnịrị ozi anị hi, dị ma há ọnyị ọnịrị ozi anị hi, dị ma rẹ há ọyẹ nịnị hi. 36Anineehi ọza ọ vị ọnịvị anị nị. 37Ọza ene èe sì ịrẹyị ada anị, àa vị ọnyị anị huna mị, ọ yị hụ ọ vị áamị. Ọza ene èe re sì ịrẹyị ozi ọnọrụ anị, àa vị ozi ọnẹẹ anị huna mị, ọ yị rẹ hụ ọọ vị áamị. 38#Imt 16.24; Ịmk 8.34; Irk 9.23Ọza ẹnẹ ẹ̀ yị sị apavahị anị dị ọ̀ sịị dụ mị ịrẹma, ọ yị hụ ọ vị áamị. 39#Imt 16.25; Ịmk 8.35; Irk 9.24; 17.33; Ịjọ 12.25Ọza ana àa ka ọnị aa sị ụhwẹ anịị tẹ, vi ee vú ọọ nị. Ọza ene èe ne ụhwẹ anị ta agụvị amị, vị aa sị ọọ tẹ nị.

Ohomorihiī sị ọgụụ yị ọza

(Ịmk 9.41; Irk 10.16; Ịjọ 13.20)

40 # Irk 10.16; Ịjọ 13.20; Ịmk 9.37; Irk 9.48 “Ọza ana àa dọ wụ nịnị ọzọga, ẹmị ọ rẹ dọ ọzọga avọọ nị. Ọza ana àa dọ mị ọzọga, Ohomorihi ana tụ́ mị, ọ dọ ọzọga avọọ nị. 41Ọza ana àa dọ ọnịsẹ ọzọga, agụvị ka ộ vị ọnịsẹ Ohomorihi, ọ vaa nyị tụ́ ịnị ọgụ ọnịsẹ ọnọọ. Ọza ana àa dọ ọnịzẹyịza ọzọga, agụvị ka ộ vị ọnịzẹyịza, ọ vaa nyị tụ́ ịnị ọgụ ọnịzẹyịza ọnọọ. 42Ọza ana àa ká enyi ohunẹnẹ yị ọnya ịnị aza ene èe weyi hu keekere ini ezirẹma amị, agụvị ka ộ vị ozirẹma amị, ayị zụ nyị ka ọ yị vaa dọ ọgụ anị.”

Currently Selected:

Imatiwu 10: EBTP

Highlight

Copy