Imatiwu 11

Ijeesu ọnịrị Ịjọọnụ ọhwọzenyi

1Íjeesu mẹ̀ raà kà a yị ezirẹma anị ẹwụrẹva ịsa anaa vọrọ ka ẹ̀ mẹ, ộ hụụ ịzọọ, dị ọ na aa zụ̀ aza ịsa, dị ọ raa kà ịrẹyị Ohomorihi yị wa ịnị ẹkụra ẹnịnị nị.

Ịjọọnụ ọhwọzenyi ộ tụ́ nọ ịda Ijeesu

(Irk 7.18-23)

2Ịjọọnụ ọhwọzenyi vị ana yà ịnị ẹngwa, dị ọ wụ́ ụkọrọ oni Ikirisiti aa mẹ nị. Dị ọ tụ́ ezirẹma anị ẹnyị ne tù ọọ nị. 3Dị ẹ kà a yị Ijeesu ka, “Ẹwáá vị ọza anaa ka ọ vaa vẹ nị, à vị yee yii zí ọza ẹnẹsa eyi?” 4Dị Ijeesu tụ́ ohi, dị ọ ka, “Varẹma na kà a yii Ịjọọnụ ịsị ụ waa wụ́ ọnịrị ịsị u wee re nịnị! 5#Ayị 35.5,6; Ayị 61.1Ogweyi nịnị ee re ẹtẹ, oswahụ nịnị aa zị ụsẹ, aa mẹ ọnịkụ ọbanyị nịnị ụkụ. Ogutọ nịnị raa wụ́ ịrẹyị, aa ha oku nịnị kwẹẹtẹ hụụnị isu. Dị a raa kà enube ọyịza yị onosiye nịnị nị. 6Ọza ẹnẹ ẹ̀ yị jị mị ịrẹka vaa daa jẹ.”

Ijeesu ộ kà ịrẹyị Ịjọọnụ ọhwọzenyi

(Irk 7.24-35)

7Ịjị ezirẹma Ịjọọnụ si hu aa na, dị Ijeesu nyima aa kà ịrẹyị Ịjọọnụ zụ̀ ọkọnị aza nị. Dị ọ ka, “Ụ mẹ̀ nọ ịnị ụnọmị ne tù Ịjọọnụ, si u ro ka u vee re nịnị? Ịkẹ ana ahị ee henyi wáá yọ? 8Si u ne re nịnị, ọza ene chire irikimba wáá yọ? Wáa yẹ ka ọza ana àa vavọọ kụ́ ẹnya vị anaā yà eehi ohinọyị. 9Si u ve ne re nịnị, ọnịsẹ wáá yọ? Avọọ yịị yọ! Dị ma kà a wụ nịnị ka ọza oni u re nịnị, ộ hyakụ huna ọnịsẹ bẹẹ. 10#Ịma 3.1Ịjọọnụ ọnọọ a vịdị chẹrẹẹ tịtẹ ini oze anị ka: ‘Re, maa tụ́ ọnụtụ amịị dọ ọvịdị awụ, dị ò ne tenyi oze tịtẹ zí wu.’ 11Ịzẹyịza m maa kà a wụ nịnị nị, ịnị avaba aza anaa ma, Ịjọọnụ ọhwọzenyi ọ nyị ụbanyị hu nị. Ama ọza ene weyi hu ịzị Ada ayị ẹbẹẹba yà aa mẹ ịjọva, ọ nyị ụbanyị hu Ịjọọnụ nị. 12#Irk 16.16Hụrẹ ụmẹ Ịjọọnụ ọhwọzenyi va ngụ ajịnị, ịjọva Ada ayị ẹbẹẹba sị hụrẹ ngụ ịrẹyị ụkata nị, dị aza sị ụkata-ụkata kwẹẹtẹ tù ọọ nị. 13Avaba ọnịsẹ nịnị beri ọda Imosiisi va ngụ ụmẹ Ịjọọnụ vị ana aa kà ịsẹ ka ịjọva Ada ayị ẹbẹẹba vaa vẹ. 14#Ịma 4.5; Imt 17.10-13; Ịmk 9.11-13Wàa ka waa dọ wụ́ nịnị, Ịjọọnụ ọ vị Erija ọnọọ nị anaa ka ọ vaa vẹ. 15Ọza ana àa nyị ụtọ ọyịsị wụ́ ịrẹyị, ọ̀ sị ụtọ pe ẹtẹ! 16Sị mi ve sii juwe aza ene hi ẹhẹ booro aanị kẹ? Vị ẹ sị mẹẹ anka ezi eweyi ana yaayịtẹ ini orere avọọ nị, dị eyee nowuu hị́ anda ẹnịnị, 17dị ẹ ka: ‘Yée hú okokoro yị wụ nịnị, ama wẹ yị nyị ẹzẹ nịnị. Ya rẹ jị òrèrè yị wụ nịnị, ama wẹ yị jị òrèrè nịnị!’ 18Ịjọọnụ mẹ̀ vẹ, ọ yị rị, o yi hú, dị ụ ka vị ọ nyị ụhwẹ echu nịnị nị. 19Ẹmị Ozi ọza onigirima ọ vavẹ; maa rị, mee hú, ẹ rẹ ka: ‘Ho! Wee re ọnịnọbanyị ọnịrị ohweche! Ọta ọdẹkẹhirehi ọnịrị aza edivi ọ vị nị.’ Ịrẹyọyẹ Ohomorihiī sị ẹngụụ zụ̀ ịnị ịsa ana aa mẹ.”

Anẹkụra ẹnẹ ẹ̀ yị dọ wụ́

(Irk 10.13-15)

20Dị Ijeesu nyima, dị aa tụ́ anẹkụra ịzị ọ yà zẹẹẹ̄ mẹ̀ ụkọrọ ohyozirenu ọrụrụ-ọrụrụ anị ohuvọ agụvị ka ẹnịnị e yi ro ịnẹ varẹma: 21#Ayị 23.1-18; Ezk 26.1—28.26; Ijow 3.4-8; Emọ 1.9,10; Iza 9.2-4“Wa sị dà nịnị, ẹwụ nịnị Anikorasini. Wa rẹ sị dà nịnị, ẹwụ nịnị Anịbẹtịsayịda. Àa yaanị maanị mẹ̀ ụkọrọ ohyozirenu ịnị ẹkụra Ịtaya ọnịrị Ịsịdọnị, ẹ yaanị sị ịnẹ ro varẹma hụrẹ ụmọrụmọ, dị ẹ sị ịta arụwẹ kú ẹngụ, dị e kú ẹngụ ẹnịnị atịtọ. 22Ama dị ma kà a wụ nịnị ka ọ vaa daahi yị Anịtaya ọnịrị Anisidoni nịnịị huna wụ nịnị ịnị ẹkụhị ọkarẹyị. 23#Ayị 14.13-15; Oyn 19.24-28Ẹwụ nịnị Anikapanawumi, wéé ro ka a vaa kà wụ nịnịị hịrẹ naa ngụ ẹbẹẹba? Vụrụ-vụrụ! Vaa vaa sị wụ nịnị, di e ne wu nịnị ngụ ini ẹkụra nị! Àa yaanị mẹ̀ ụkọrọ ohyozirenu ẹkụra Isodọmị, a mẹ̀ mẹẹ ị́dị awụ nịnị, ọ yaanị yị yà ịzọọ pooro ve tù ajịnị. 24#Imt 10.15; Irk 10.12Ama dị ma kà a wụ nịnị ka ọ vaa daahi yị Anisodọmị nịnị huna wụ nịnị ịnị ẹkụhị ọkarẹyị.”

Ijeesu ọọ̄ sị ụhwọtụ yị aza nị

(Irk 10.21-23)

25Ịjọnọọ dị Ijeesu ka, “Ọga, ana nyị ẹbẹẹba ọnịrị ẹhẹ! Mâ kụ́ wụ avọ, agụvị ka ịsa ọnị ụ sị tẹ yị aza ana yẹ ịsa, wa raà sị zụ̀ aza ẹnẹ ẹ̀ yị nyị ịsị ẹ yẹ. 26Ọga, avọọ gẹdẹ-gẹdẹ o mè zé wu eyi nị. 27#Ịjọ 3.35; Ịjọ 1.18; 10.15Ada amị ọ raà sị avaba ịsa chire mi ụvọ. Ẹ yị nyị ọza ana yẹ Ozi anị, ẹ̀ yị vị Ada ọnịnya. Ẹ yị rẹ nyị ọza ana yẹ Ada, ẹ̀ yị vị Ozi anị ọnịnya ọnịrị aza ene èe zé Ozi anị eyi ka ọnị ọ̀ sị zụ̀. 28Ká mị vẹ nịnị, ẹwụ nịnị ana ayị anị sị vazi, di e reè kune ẹnya ọrata tụra wụ nịnị, ka mị vaa sị ụhwọtụụ yị wụ nịnị! 29#Ijer 6.16Navọ maa zụ̀ wụ nịnị oze, dị ma rẹẹ zụ̀ wụ nịnị ịsa; agụvị ka miī ro o yị ọza, dị mị rẹ nyị ayohunẹnẹ nị. Ịjọnọọ ayị awụ nịnị vaa nyị ụhwọtụ. 30Màa sị oze zụ̀ wụ nịnị, ọ vaa rọ wụ nịnị ẹngụ. Ẹnya ọnị mị vaa sị tụra wụ nịnị aa gẹsẹẹ aanị.”

Currently Selected:

Imatiwu 11: EBTP

Highlight

Copy