Imatiwu 12

Ịsị a vọrọ ka àa mẹ ịnị ẹkụhị ụhwọtụ

(Ịmk 2.23-28; Irk 6.1-5)

1 # Ọda 23.25 Ịhị ọnọọ, ịnị ẹkụhị ụhwọtụ ọnya, dị Ijeesu aa parahu ịnị aarẹ ọnya aanị anaa kụ́ akụ tụ́ nị. Ụngwẹ aa kụ̀ ezirẹma anị; agụvị avọọ dị ẹyaa jị ịrẹsụ akụ, dị ẹyaa rị ọọ nị. 2Ịjị Anihwarisi nịnị vavọọ re e, dị ẹ kà a yị Ijeesu ka, “Re! Wée re ézirẹma awụ màa mẹ̀ ịsa ọnị ọda ọ̀yị zẹẹ ka à mẹ ịnị ẹkụhị ụhwọtụ!” 3#1 Ịsa 21.1-6Dị Ijeesu kà a yị wa ka, “Aanịka wẹẹ̀ yị kà ịsa oni Idevidi mẹ? Ịjị ụngwẹ aa kụ̀ Idevidi ọnịrị aza anị, dị è yi re ịsa rị, 4#Ire 24.9dị ọ ngụ ini irehi ahẹkẹ Aniju na nị, dị ọ rị Ịbụrẹẹdị anaa sị yị Ohomorihi nị. Anka ọ́da mẹ̀ kà a, ẹ yị yaanị vọrọ ka ọnị aza anị ẹ̀ rị ẹngụ Ịbụrẹẹdị ọnọọ, ẹ̀ yị vị ohirẹsụ irehi Ohomorihi nịnị kẹnẹ. 5#Ịrị 28.9,10À vị wẹ yị kà a ịnị ọda oni Imosiisi mẹ nịnị ka ịnị ẹkụhị ụhwọtụ ohirẹsụ irehi Ohomorihiī mẹ̀ ụkọrọ ini irehi Ohomorihi, ama dị ẹ yị rị ịvị? 6Dị maa kà a wụ nịnị ka â nyị ọza ịzẹnị aanị ene huna irehi Ohomorihi. 7#Imt 9.13; Iho 6.6Wàa yaanị yẹ iruvo ịrẹyị ọnọnị nịnị ka: ‘Me yi sì ịsọvọ ẹ̀ yị vị ayamva’, wẹ yị yaanị aa jị ịvịị yị ọza ẹnẹ ẹ̀ yị rị ịvị nịnị, 8agụvị ka ẹmị Ozi ọza onigirima ọ vị ọga ẹkụhị ụhwọtụ nị.”

Ijeesu ộ mẹ̀ osuvọ ọnya ụkụ ịnị ẹkụhị ụhwọtụ

(Ịmk 3.1-6; Irk 6.6-11)

9Dị Ijeesu hụụ ịzọọ, dị ọ nọ ini irehi Ohomorihi ẹnịnị nị. 10Â nyị ọza ịnya aanị ana yà ịzọọ ene sú ụvọ. A rẹ nyị aza ẹnyị ịzọọ ene ee sì ka ẹnị ẹ̀ sị ịrẹyị za Ijeesu, dị ẹ họ̀ ọ ka, “Ọda ayị ọ́ọ́ zẹẹ ka à mẹ ọza ụkụ ịnị ẹkụhị ụhwọtụ?” 11#Irk 14.5Dị Ijeesu họ̀ wa use ka, “Àa nyị ọza awụ nịnị ana nyị atẹmẹ ọnya, dị ọ hụrẹ ne ngụ ịkangga ịnị ẹkụhị ụhwọtụ yọ? Aanịka wẹ yị vaa sị ọọ jịnẹẹ tụ́ ẹhẹ nịnị? 12Ọza ọnịrị atẹmẹ, ene huna ọsa? Agụvị avọọ, ọda ayị ộ zẹẹ ka à gụ ọza ụvọ ịnị ẹkụhị ụhwọtụ.” 13Ịjọnọọ dị ọ kà a yị ọnọrụ ọnọọ ka, “Tana ụvọ awụ!” Dị ọ tanaa, dị ụvọ anị ta, dị ọ rẹ sị yà anka ọsa nị. 14Dị Anihwarisi nịnị hụụ ịzọọ, dị ẹ na aa gẹ eyi, ẹ́nị mẹmẹ vaa wụ̀ Ijeesu nị.

Ịrẹyị ọnị ọnịsẹ ọnya kà, ọ sị sẹ

15Íjeesu mẹ̀ sị yẹ, dị ọ hụụ ịzọọ nị. Dị aza ọrụrụ-ọrụrụ dụ ọ aa na nị. Dị ọ mẹ avaba ọnịkụ nịnị ụkụ nị. 16Di o hú wa ụvọ ka asị ẹ kà ịrẹyị anị zụ̀ aza nị, 17agụvị ịrẹyị ana Ayịsaya ọnịsẹ kà, ọ̀ zụ sẹ. Ọ kà Ohomorihi ka: 18#Ayị 42.1-4“Ọnịtụ amị ọnị mị nyị yị. Mée sì ịrẹyị anị, ayị amị ô hine tù ọ. Mị vaa mẹ ka Ụhwẹ Ọnịnị amị ọ̀ dọ avaba ayị anị. Ọ vaa naa nọọ yị anẹhẹ ka mị vaa mẹ̀ ọkarẹyị yị wa. 19Ọ yị vaa nyị ahankata, o yi vee nowu, ọ yị rẹ vaa kụ́ ịrẹka ini orere. 20Ọ yị vaa dà ịkẹ ana àa dà gẹnẹ. Ozotupa oni owu anị ee mi, oyi vee mi ọọ. Ọyị vaa tụ́ ụhwọ́ pooro di ò re ka ịzẹyịza ộ nyị ẹbẹẹba. 21Avaba anẹhẹ vị ana vaa sị eyii tụra a.”

Ijeesu ọnịrị Ịbẹẹrịzẹbụ

(Ịmk 3.20-30; Irk 11.14-23; 12.10)

22Dị aza ẹnyị aanị sị ọza ịnya aanị vẹ ịdị Ijeesu nị. Ọza ọnọọ vị ana nyị ụhwẹ echu ene gu ọ eyi ọnịrị irenu. Ijeesu ộ mẹ̀ ọnọrụ ọnọọ ụkụ, dị ọ kụkụ aa kà ịrẹyị, di o ree re ẹtẹ nị. 23O si hí avaba ọkọnị aza ẹnẹẹ irenu, dị ẹ ka, “Ẹwáá ka ozi Idevidi ọnọọ yị?” 24#Imt 9.34; 10.25Ịjị Anihwarisi nịnị sị wụ́, dị ẹ ka, “Ụkata Ịbẹẹrịzẹbụ, ọga ụhwẹ echu nịnị ọ́nọrụ ọnọnị aa sịị dụ ụhwẹ echuu jịnẹ nị.” 25Ijeesu ộ yẹ ịsị eyee ro, dị ọ kà a yị wa ka, “Ẹkụra ohinọyị ọ̀ọ sị gà hi ẹẹva, dị ẹ và eyi kà ẹngụ nị, vi o si vu ẹtẹ avọọ nị. Àa rẹ nyị ẹkụra, àa vị irehi ana gà hi, dị ẹ và eyi kà ẹngụ nị, ẹ yị zụ kwẹẹtẹ. 26Echu àaa dụ echuu jịnẹ, ọnọọ vị ka echu ọ sị gà hi ẹẹva, e sị eyi và kà ẹngụ; ị́jọva anị mẹmẹ kụkụ nyẹngụ jẹẹ? 27Àa vị ụkata Ịbẹẹrịzẹbụ, m maa sịị dụ ụhwẹ echuu jịnẹ nị, ẹnẹ sị ụkata yị ezi ewu nịnị ẹnẹ ẹnị raa sịị dụ ụhwẹ echuu jịnẹ? Ezi ewu nịnị ụvọta ẹ vaa kà a nị. 28Ama àa vị Ụhwẹ Ọnịnị Ohomorihi, m maa sịị dụ ụhwẹ echuu jịnẹ nị, ọnọọ ộ sị zụ̀ ka ịjọva Ohomorihi ọ sị gụrị ẹwụ nịnị. 29Ẹ yị nyị ọza ana nyẹngụ ngụ ini eehi adarehi ana nyị ụkata dị ọ̀ na kụ́ ọọ ẹnya; ẹ̀ yị vị o vịdị sì oze dị ọ̀ za adarehi ọnọọ dị ọ̀ sụ́ ọ, ịjọnọọ ọgọnị di o ve re oze kụ́ ọ ẹnya irehi. 30#Ịmk 9.40Ọza ẹnẹ ẹ̀ yị yà beri emi, vị aa bàrà mị nị. Ọza ene è yi pe mi kụ́ ịsa gụ, vị aa garaa ha nị. 31Agụvị avọọ dị ma kà a wụ nịnị, ịvị tụra ịvị ọnịrị ụhụ ọnị ọza ọ̀ọ kụ̀ Ohomorihi, a vaa vagu ọọ ịnị anị. Ama ọza ana àa kụ̀ Ụhwẹ Ọnịnị ụhụ, ọza ọyị vaa vagu ọọ. 32#Irk 12.10Ọza tụra ọza ana àa kà ịrẹyị odivi hi ẹmị Ozi ọza onigirima, a vaa vagu ọọ ịnị anị. Ama ọza ana àa kà ịrẹyị odivi hi Ụhwẹ Ọnịnị, ọza ọyị vaa vagu ọọ ịnị ẹhẹ ọnọnị ọnịrị ịnị ẹhẹ ana aa vẹ.”

Ọchị ọnịrị ẹtụtụ anị

(Irk 6.43-45)

33 # Imt 7.20; Irk 6.44 “Wàa ka wa nyị ẹtụtụ ozoza, ụ hị́ ọchị ozoza! Ama wàa hị́ ọchị ọnị ụkụ za, ẹtụtụ odivi ụ waa há nị. Ẹtụtụ ọchị a sịị yẹ ẹ nị. 34#Imt 3.7; 23.33; Irk 3.7; Imt 15.18; Irk 6.45Ẹwụ nịnị ezi ibe, wẹ yị nyẹngụ kà ịrẹyị ozoza nịnị, agụvị ka ọza odivi ụ vị nịnị nị. Ịsa ene hi ịnị ayị ọza, írenu anịị̄ kà a jịnẹẹ vẹ nị. 35Ịsa ọyịza ana yà ịnị ayị ọza ọyịza, ọọ̄ mẹ̀ ka ọọ mẹ̀ ebira ozoza nị. Ịsa odivi ana yà ịnị ayị ọza odivi, ọọ̄ mẹ̀ ka ọọ mẹ̀ ebira odivi nị. 36Ama dị ma kà a wụ nịnị, avaba ịrẹyị kẹnẹ-kẹnẹ ọnị ọza ọ̀ọ kà, ọ vaa hụ agụvị avọọ kụ́ irenu anị ịnị ẹkụhị ọkarẹyị. 37Ịrẹyị awụ a vaa sị jị ịhị yị wụ nị, ọnị a rẹ vaa sị jị ịvị yị wụ nị.”

Aza ẹnyị ée sì ụkọrọ apọtẹrẹwa

(Ịmk 8.11-12; Irk 11.16,29-32)

38 # Imt 16.1; Ịmk 8.11; Irk 11.16 Ịjọnọọ dị ọzwọzọda ẹnyị ọnịrị Anihwarisi nịnị ka, “Ọga, yee sì ka wa sị apọtẹrẹwa zụ̀ yị.” 39#Imt 16.4; Ịmk 8.12Ama Ijeesu ô tụ́ ohi, dị ọ ka, “Aza edivi ọnịrị ọsẹrẹka nịnị eē sì apọtẹrẹwa nị. Ẹ yị nyị apọtẹrẹwa ana vaa sị zụ̀ wa, ẹ̀ yị vị apọtẹrẹwa Ijona ana vị ọnịsẹ. 40#Ijon 1.17Íjona mẹ̀ yà ịnịnẹ ivovo ọbanyị ọnọọ mẹ ọọdụ ẹẹta ọnịrị ịrahụ ẹẹta, avọọ Ózi ọza onigirima mẹ̀ rẹ vaa mẹ ọọ dụ ẹẹta ọnịrị ịrahụ ẹẹta ịnịnẹ ẹtẹ nị. 41#Ijon 3.5Ịnị ẹkụhị ọkarẹyị, Anininivẹ vaa kwẹẹtẹ, dị ẹ jị ịvị yị anụmẹ ọnọnị; Íjona mẹ̀ kà ịrẹyị Ohomorihi yị aza ẹnẹẹ, ée ro ịnẹ varẹma hụụnị ebira odivi ẹnịnị. Di u we re ka ọza ene ve huna Ijona, ọ yà ịzẹnị aanị nị. 42#1 Ohi 10.1-10; 2 Ịtọ 9.1-12Ịnị ẹkụhị ọkarẹyị, ohinọyị ọnẹẹ ana ra éyi ụvẹtẹ vaa kwẹẹtẹ, dị aa tụ́ anụmẹ ọnọnị ohuvọ. Ọnẹẹ ọnọọ ộ hụrẹ ụtọ ẹhẹ vẹ ka ọnị ọ̀ va wụ́ ịrẹyị ịrẹyọyẹ Isoromọnị. Di u we re ka ọza ene ve huna Isoromọnị, ọ yà ịzẹnị aanị nị.”

Ọza ana và ịrẹma Ohomorihi

(Irk 11.24-26)

43“Ụhwẹ echu ọ̀ọ jịnẹ hụụnị ẹngụ ọza, dị aa ngụ ịnị ẹtẹ ọyịwụụ zị, di ee sì ịzị a vọrọ ka ọ̀ yà tụ́ ụhwọ́, Ò yi re aha, 44dị ọ ka: ‘Maa varẹma nọ ini eehi amị ọnị mị hụrẹ.’ Ọ̀ọ vẹ, di o ve tù ka ọ sị vị osusu, a si oo hì, a sị avaba anị tenyi nị, 45dị ọ varẹma, dị ọ na kụ́ ụhwẹ echu ịhịmba ọsa ana hyakụ divi hu ọnị nyẹmba, dị ẹ vẹ, dị ẹ va ra ịzọọ. Dị ọdịrẹma ọza ọnọọ kuku si divi huna ọ mẹẹ̄ vịdịị yà. Avọọ ọ mẹ̀ vaa yàa yị anụmẹ odivi ọnọnị nị.”

Ọnyị Ijeesu ọnịrị ẹyịnyara anị

(Ịmk 3.35; Irk 8.19-21)

46Íjeesu màa yịị kà ịrẹyịị yị ọkọnị aza ẹnẹẹ, dị ọnyị anị ọnịrị ẹyịnyara anị vẹ, dị ẹ jẹẹ ẹhẹ nị. Eyee sì ka eni è pe e kà ịrẹyị. 47Dị ọza ịnya kà a yọ ka, “Re, ọnyị awụ ọnịrị ẹyịnyara awụ jẹẹ ẹhẹ, eyee sì ka eni è pe wu kà ịrẹyị.” 48Dị Ijeesu tụ́ ọza ọnọọ ohi, dị ọ ka, “Ẹnẹ vị ọnyị amị, ẹnẹ rẹ vị ẹyịnyara amị?” 49Dị ọ tana ụvọ hi ezirẹma anị dị ọ ka, “Re, ọnyị amị ọnịrị ẹyịnyara amị yị. 50Ọza ana àa mẹ̀ ịsa ana Ada amị ẹbẹẹba sì, ọnị ọ vị ọyịnyara amị ọnịrị onyeyiza amị beri ọnyị amị nị.”

Currently Selected:

Imatiwu 12: EBTP

Highlight

Copy