Imatiwu 9

Ijeesu ộ mẹ̀ oswẹngụ ọnya ụkụ

(Ịmk 2.1-12; Irk 5.17-26)

1Ijeesu ộ ngụ ịnị ẹpa ọnya, dị ọ varẹma nọ akẹnẹ irehu, dị ọ nọ ịnị ẹkụra anị nị. 2Aza ẹnyị ê chema oswẹngụ ọnya ká a vẹ ana hụtụ ini odooro. Íjeesu mè re ka ệ sị ayị tụra ọnị, dị ọ kà a yị oswẹngụ ọnọọ ka, “Ozi emi, ngwara eyi hi, ma raa vagu wu ịnị ịvị awụ.” 3Dị ọzwọzọda ẹnyị aanị aa kà a yị ẹngụ ẹnịnị ka, “Ọnọrụ ọnọnị aa kụ̀ Ohomorihi ụhụ.” 4Ijeesu ộ yẹ ịsị eyee ro; dị ọ ka, “Sị ẹ vẹ di u wee ro ịsa odivi ịnị ayị awụ nịnị? 5Ye re ana rọ hu ọyịkà, ka â vagu ọ ịnị ịvị anị, à vị ka ọ̀ kwẹẹtẹ, dị ọ̀ọ zị ụsẹ? 6Ama mee sì ka wa yẹ nịnị ka Ozi ọza onigirima ộ nyị ụkata ọyị vagu ọza ịnị ịvị anị ịnị ẹhẹ ọnọnị.” Dị ọ kà a yị oswẹngụ ọnọọ ka, “Kwẹẹtẹ, sị odooro awụ, dị waa nọ eehi awụ!” 7Dị ọ kwẹẹtẹ, dị aa nọ eehi anị nị. 8Ịjị ọkọnị aza ẹnẹẹ re e, ô hí wa irenu, dị ẹyaa sị ụgaa yị Ohomorihi ana maanị sị ụkata yị aza nị.

Ijeesu ộ hị́ Imatiwu

(Ịmk 2.13-17; Irk 5.27-32)

9Íjeesu mẹ̀ hụụ ịzọọ, dị aa na, ô re ọnọrụ ọnya ana aā hị́ Imatiwu, ka ộ yaayịtẹ ịzị a yàā dọ ẹkẹhị irehi. Dị ọ kà a yọ ka ọ̀ọ dụ ọnị ịrẹma nị. Dị ọ kwẹẹtẹ, dị aa dụ ọọ na nị. 10#Irk 15.1,2Ộ da kù chee, dị Ijeesu yaayịtẹ ini eehi ọnọrụ ọnọọ ka ẹnị ẹ̀ rị ịsa nị. Ọdẹkẹhirehi ọrụrụ nịnị ọnịrị aza edivi nịnị ệ vẹ, dị ẹ yaayịtẹ pe ọnịrị ezirẹma anị nị. 11Ịjị Anihwarisi nịnị re e, dị ẹ kà a yị ezirẹma anị ka, “Sị ẹ vẹ dị ọga awụ nịnị ee beri ọdẹkẹhirehi ọnịrị aza edivi nịnị rị ịsa?” 12Ama ịjị Ijeesu vavọọ wụ́, dị ọ kà a yị wa ka, “Ịsa ọ̀ yị zị ọza, o mē sì ọmahọnọ. Ọza ọnị ịsa aa zị kẹnẹ, oō sì ọmahọnọ nị. 13#Imt 12.7; Iho 6.6Ama na nịnị, di u we ne sì uruvo ịsa ọnị ịrẹyị ọnọnị kà nịnị ka: ‘Me yi sì ịsọvọ, àyị vị ayamva.’ Agụvị ka mẹ yị vẹ ka ma hị́ ọnịrẹyịzẹyịza, àyị vị ka ọnịvị nịnị è ro ịnẹ varẹma nị.”

Ịrẹyị awẹ

(Ịmk 2.18-22; Irk 5.33-39)

14Ịjọnọọ di ezirẹma Ịjọọnụ ká Ijeesu vẹ nị, dị ẹ ka, “Sị ẹ vẹ dị ẹyịrị Anihwarisi nịnị sị awẹ ụpọsa-ụpọsa, dị ezirẹma ẹwụ ẹnị ẹ̀ yị mā vavọọ mẹ?” 15Dị Ijeesu kà a yị wa ka, “Aza ọza anaa nyị ọnẹẹ ẹ́ẹ́ zụ jị òrèrè ịnị ụmẹ ọnị ọva ọnẹẹ yà pe wa? Ama ẹkụhị aa vẹ anaa vaa sị ọva ọnẹẹ hụụ ịzọọ, ịjọnọọ ẹ vaa ba awẹ. 16Ọza ọ mā dà ịta ọwọọwa, dị ọ gẹ ẹ za awuru ọkụkụ. Ọza ọ̀ọ vavọọ mẹ, dị ịta ana a dà gẹ ẹ na kwooze, dị ọ kụkụ sị na hu avọọ. 17Ọza ọ mā rẹ sị eyi-eche tụ́ ini okoko ana vị ọkụmị. Ọza ọ̀ọ vavọọ mẹ, dị okoko ọnọọ chaka, dị eche ọnọọ và ha, dị okoko kuku si du ha. Eyi-eche vị anaa sịị̄ tụ́ ini okoko ana rẹ katẹngụ, dị ẹnị ẹyịva si tenyi.”

Ozi ọnẹẹ Ịjayịrọọsị ọnịrị ọnẹẹ ana kanyị ịta Ijeesu

(Ịmk 5.21-43; Irk 8.40-56)

18Ọ mẹ̀ maanị aa yịị kà ịrẹyị ẹnẹnị kẹnẹ, re, dị ọdọvịdị Aniju nịnị ọnyara vẹ nị, dị ọ va vaku ẹtẹ yọ, dị ọ ka, “Ozi emi ọnẹẹ ô wusu booro aanị; ama navọ wa vẹ dị ụ wa sị ụvọ tụra a, dị ọ̀ yàra.” 19Dị Ijeesu kwẹẹtẹ, dị aa dụ ọọ na nị. Dị ezirẹma anị ẹnị raa dụ ọọ na nị. 20Â nyị ọnẹẹ ọnya aanị ọnị ụkụ za, di e re ịnẹ ọtọtọọnya pooro hụrẹ ịrayị ẹwụrẹva nị. Dị ọ dụ Ijeesu ị́rẹma vẹ, dị ọ sị ụvọ kanyị ụtọ ịta anị nị. 21Agụvị ka ộ kà a ịnị ayị anị ka, màa yị hyakụ zụ sị ụvọ kanyị ịta anị kẹnẹ, ẹngụ amị vaa ta. 22Dị Ijeesu kana eyi, di o ree nị, dị ọ ka, “Ozi, ngụra eyi hi, ẹngụ awụ ộ ta, agụvị ka wâ sị ayị tụra mị.” Dị ẹngụ ọnẹẹ ọnọọ wụsẹ ta hụrẹ ụmẹ ọnọọ gẹdẹ-gẹdẹ nị. 23Ịjị Ijeesu va sị ngụ ini irehi ọdọvịdị ọnọọ, ô re onokokoro ọnịrị ọkọnị aza ana aa kụ́ ịrẹka. 24Dị ọ kà a yị wa ka, “Sị oze tịtẹ nịnị, agụvị ka ozi ọnọọ o yi sú, ama vị aa sụ̀ ara nị.” Dị ẹyaa sị ọọ mẹ enyinyi nị. 25Ịjị a sị aza ẹnẹẹ dụ hi ẹhẹ, dị ọ ngụ ini eehi na, dị ọ jị ụvọ chire ozi ọnọọ ụvọ nị, di ozi ọnẹẹ ọnọọ kwẹẹtẹ nị. 26Dị ịrẹyị ọnọnị sị ngụ ịrẹyị tụ́ ịnị avaba ẹtẹ ọnọọ nị.

Ijeesu ộ há ogweyi ẹẹva eyi

27Íjeesu mẹ̀ hụụ ịzọọ aa na, di ogweyi ẹẹva aa dụ ọ, di eyee nowu, dị ẹ ka, “Ẹwụ ozi Idevidi, aarịhịnị vayị ayị de!” 28Ịjị ọ va sị ngụ ini eehi, di ogweyi ẹnẹẹ ve tù ọ nị. Dị Ijeesu kà a yị wa ka, “Wáá dọ wụ́ nịnị ka ma zụ mẹ ọsọnị?” Dị ẹ kà a yọ ka, “Hịịn, Ananyị yị.” 29Dị ọ sị ụvọ kanyị eyi ẹnịnị, dị ọ ka, “Ọ̀ yà yị wụ nịnị, anka ụ mẹ̀ dọ wụ́ nịnị!” 30Di eyi ẹnịnị sị há nị. Dị Ijeesu hú wa ụvọ ẹtẹẹtẹrẹ, dị ọ ka, “Asị ụ zẹẹ ka à nyị ọza ana yẹ nịnị o!” 31Ama ẹ mẹ̀ sị hụụ ịzọọ, dị ẹyaa kà a ngụ avaba ẹkụra ẹnẹẹ zị nị.

Ijeesu ộ mẹ̀ ogurenu ọnya ụkụ

(Imt 12.22-24)

32Aza ẹnẹẹ màa jịnẹẹ tụ́ ẹhẹ, aza ệ sị ọza ịnya aanị ká a vẹ ene gu irenu, agụvị ka ộ nyị ụhwẹ echu. 33Dị Ijeesu dụ ụhwẹ echu ọnọọ jịnẹ, di ogurenu ọnọọ aa kà ịrẹyị nị. O si hí ọkọnị aza ẹnẹẹ irenu, dị ẹ ka, “Yẹẹ̀ yị maanị re da ịnị ẹtẹ Isirẹrị.” 34#Imt 10.25; 12.24; Ịmk 3.22; Irk 11.15Ama di Anihwarisi nịnị ka ohirẹsụ ụhwẹ echu nịnị ọ sị ụkata yị Ijeesu ana aa sịị dụ ụhwẹ echuu jịnẹ nị.

Ijeesu ộ vayị aza

(Irk 10.2)

35 # Imt 4.23; Ịmk 1.39; Irk 4.44 Ijeesu aa ngụ avaba ẹkụra ọbanyị ọnịrị ẹkụra oweyii zị, dị aa zụ̀ wa ịsa ini irehi ahẹkẹ Aniju ẹnịnị nị, dị aa kà enube ọyịza, Óhomorihi mẹmẹ aa mẹ ịjọva nị. Dị ọ raa mẹ avaba ụkụ irenyi-renyii yị aza nị. 36#Ịrị 27.17; 1 Ohi 22.17; 2 Ịtọ 18.16; Ezk 34.5; Ịmk 6.34Ama o mè re ọkọnị aza, ayị ẹnịnị ộ vá a, agụvị ka ọ sị ngụ wa ẹngụ, ẹ kụ́ vazi anka atẹmẹ ẹnẹ ẹ̀ yị nyị ọza ana aa tẹsị ẹnịnị avọọ. 37#Irk 10.2Dị ọ kà a yị ezirẹma anị ka, “Ịsa ịnị aarẹ ọ sị rụrụ tụ́ ịnị aarẹ, ama ọnụkọrọ ẹyị vavọọ rụrụ. 38Waa dá ịpẹẹ yị ọza ana nyị aarẹ nịnị ka ọ̀ tụ́ aza dị ẹ̀ na mẹ̀ ịsa ịnị aarẹ!”

Currently Selected:

Imatiwu 9: EBTP

Highlight

Copy