ILUKU 3

Ẹla nya Ohe Oyaya nya ỊJọn Ọngọ Hụ Enyi Ohe

(ịMatiyu 3:1-12; ịMakị 1:1-8; ịJọn 1:19-28)

1Ẹka ọhẹ juwa ọlẹ kọ ri ụka ọlẹ ká iSisa ịTayịberiyọsị ri adịrahụ ọgbahị nya ala iRom wuu lala ẹka iwo kụrụ ịrụ gbẹgbịlẹ lẹ. Ẹka ọọwa, ịPọntịyọsị ịPayịleti a tịtị ri ịgọvụnọ nya ala iJudiya wuu lẹ. Ẹka ọọwa, iHerọdụ a ri agaba nya ọpyị nya ala ịGalili lẹ. IFilipu ọnyịnịna nya iHerọdụ ọọwa tịtị ri agaba ụ-ụwa ị-ịpyị nya ala Ituriya bala ala ịTịrakonayitisi. ỊLayịsiniyasị tịtị ri agaba nya ọpyị nya ala Abilini ịnyịnyị. 2Ẹka ọọwa, Anasị bala ịKayafasị anyị a ri alegbeju ikịla iya ịgbahị nya angịkiliya ha Ohe Oluhye wuu ịnyịnyị lẹ. Ẹka ọọwa kpangga, omyi ẹla nya Ohe Oluhye a warị chị ịJọn ọnyị nya ịSẹkaraya ọgụ ụ-ụwa u-ugbileji lẹ. 3Ụka ọọwa, ịJọn juwa ga tụ ẹga myị́ ẹga da o-oye nya ọpyị ọlẹ kọ ju Ihu ịJọdan chwẹẹ, juwa ya ẹla nya Ohe Oluhye ju angịnyị kị ka yẹ irya da bwu ẹpwụ nya ịhọbịrị ịhọhọ nyaa chajị ká Ohe Oluhye ka hịnyọhi ịhọbịrị nyaa ịịwa haa, chajị ká ịJọn ka hwaa enyi Ohe ụ-ụwa. 4ỊJọn kele ịnyị jaabwọ ká Ayịsaya ọlọmwụ nya Ohe Oluhye da ụ-ụpwụ nyamwụ ene-ene yẹkẹẹ,

“Omyi nya ọngọhẹ lalẹẹ, da ọna gboo u-ugbileji yẹkẹẹ,

‘Anụ angịnyị wuu, anụ nwụ ọhịhị nyanụ rịrị

kpakpakpa kọ pwoku ụgbẹyị nya ọhịhị nya Ọngọlahị mẹ.

Kanụ juwa la ọhịhị ọlẹ kọ la kpụrụrụ ị-ịlahị

nya Ọngọlahị ọlẹ kọ wẹẹ warị,

jaabwọ kị kaa nwụla ụgbẹyị ọchịpwụrụ bwu nya adịrahụ ọtụka-ọtụka nọ gbọọ mẹ.

5Kanụ ju ugbudu la uhye kuu ẹ-ẹga myị́ ẹga nya ọhịhị nyanụ ọlẹ kọ la kpọọ,

jaabwọ ká angị da ụgbẹyị ụkụrwọ kaa họ mẹ.

Kanụ be ịgbọdọ ịtụka bala ichiche ịlụgbẹyị ọọwa wuu cheji,

kanụ bwurwaa pẹẹpẹẹ mẹ.

Ẹga myị́ ẹga ọlẹ ká ụgbẹyị ọọwa á gu ịgịlẹ kịnọbọ lẹ,

anụ nwọọ họ kọ rụ kpụrụrụ mẹ.

Ẹ-ẹga myị́ ẹga ká ụgbẹyị ọọwa á la chwaachwaa lẹ,

anụ ma ẹga ọọwa họ kọ la hịlẹ-hịlẹ ịnyịnyị mẹ.

6Ó-ri kanụ nwụla ụgbẹyị nya ọhịhị nyanụ hiigu-hiigu ịnyị lẹ,

aalẹ, angịnyị wuu ka yẹ jaabwọ ká ọchịda

nya Ohe Oluhye kaa họ ụkụrwọ ẹ-ẹpwụ nya ọhịhị nya angịnyị ehe lẹ.’ ”

7Ụka ọọwa, iru nya angịnyị lụmẹ-lụmẹ juwa kele ka ẹga nya ịJọn kọ ka hwaa enyi Ohe la ẹnyị nya Ohe Oluhye ụ-ụwa. Ịnyị, ịJọn a byaa yẹkẹẹ, “Anụ angị byịbyị ọ-ọkịlẹtụ lala ịgbịjị ịwẹ lee! Oowo a tị́ gbileenu ụbwọ ụ-ụrụ, du kanụ lẹẹ yẹ gụrwẹ-gụrwẹ hi agbama nya Ohe Oluhye mẹ? 8Ọ hiigu. Ó-ri ịnyị lẹ aalẹ, anụ́-ụ juwa họ abwẹla ọnyịịla ọlẹ kọ ka mẹjẹ yẹkẹẹ, anụ nyị yẹ irya da bwu ẹpwụ nya ịhọbịrị ịhọhọ nyanụ wuu lẹ mẹ. Anụ pịrị ịlọnụ ju, juwa yẹkẹẹ, ịwa nyị tị́ kiji ri anyị nya Ebiraham riri lẹlẹ, ịwa nyị juwa ka be hi eje owuwu nya Ohe Oluhye u-uhye nya ịhọbịrị ịhọhọ nyịwa wuu lẹ, ka. Chajị, m jam byinu yẹkẹẹ, ọ chị Ohe Oluhye kpẹẹ nyọka họ ká ajwọ ịlam-ịlam ka yẹ ri anyị nya Ebiraham myị́. 9Ị dọmwụ ya eje o-be ọwụ nọ ọ-ọmwụ nya okoji ọnyị myị ọnyị lẹ! Okoji ọnyị kọ myị nwụ́ ugbe ọnyịịla ka aalẹ, Ọngọlahị ka kpa eje o-be ọwụ nyamwụ ọọwa hu okoji ọọwa latẹ-latẹ ene kọ ka hwọọ ju ka ẹpwụ nya ila wurum pyii.”

10Ụka ọọwa, angịlẹ wuu kị juwa ẹ-ẹga nya ịJọn tọọ wo yẹkẹẹ, “Ee lẹ, anyị, ahị tị́ ka bwu nwụ́ ugbe ọnyịịla ọọwa lẹẹ mẹ?”

11ỊJọn wẹ byaa yẹkẹẹ, “Jaabwọ kanụ ka họ ri yẹkẹẹ, ọng myị́ ọng ọlẹ kọ la ịwụrụ imiiye lẹ aalẹ, ọ hu ọhẹ nyaa ga ha ọngọkịla ọlẹ kọ la ọhẹ-lọhẹ kaka mẹ. Ọng myị́ ọng ọlẹ kọ tị la ang oriri juwa lẹ aalẹ, ọngọọwa a chị ang oriri nyamwụ ọọwa ebwo ha ọngọlẹ kọ ye ri kaka ịnyịnyị mẹ.”

12Angị nyẹ angịnyị ẹpwa ịhyẹ kele ka ẹga nya ịJọn kọ ka hwaa enyi Ohe la ẹnyị nya Ohe Oluhye ụ-ụwa ịnyịnyị. Ị tọ ịJọn wo yẹkẹẹ, “Ayịbahị ịtịcha, ịịyẹ a tị́ chịla kaahị ka họ ị-ịlahị nya Ohe Oluhye lẹẹ, ịnyịnyị mẹ?”

13ỊJọn wẹ byaa yẹkẹẹ, “Anụ ye okpoko ọkịla bwu ụbwọ nya ọngọngọhẹ dala okpoko nya ẹpwa ọnyẹnyẹ ayịdang kpong-kpong kokoo.”

14Ịsọja ịhyẹ ịlẹ kị juwa tọ ịJọn wo ịnyịnyị yẹkẹẹ, “Ahị tị́ bẹ? Ịịyẹ a tị́ chịla kahị ka họ?”

ỊJọn wẹ byaa yẹkẹẹ, “Anụ nu ọngọngọhẹ ịngịngịhyẹ nyamwụ la, nya abwẹga lee, ịnya ẹlẹlẹ ịmịla nya ẹla ọ-chị ba ọngịnyị kpong-kpong ka. Anụ myị ká okpoko nya uri nya ọya ọlẹ kị wẹẹ nwụnụ kem, a wunu ẹpwụ mẹ.”

15Ịnyị, iru nya angịnyị ịlụwa a juwa me irya nya ịlẹhị-ịlẹhị yẹkẹẹ, nyị lee, ịJọn ọlẹ nyaa tị́ ka ri ịKịrayịsị ọlẹ kịịwa nyị lẹẹ ya ẹhị rịrị gbe amalẹ kaka mẹ? 16Ọọwa lẹ, ịJọn a byi angịwẹ wuu yẹkẹẹ, “Anụ wo mẹ! Am lẹ, m jam kpa enyi ọlam-ọlam hụnụ enyi Ohe la ẹnyị nya Ohe Oluhye lẹ! Ma, ọngọhẹ ọlẹ kọ wẹẹ ka warị ẹ-ẹkpẹ nyam lẹ, Olegu Ịgọgọ bala ila, ọngọọwa a ka kpa hụnụ enyi Ohe lẹlẹ. Ọngọọwa ayịdang ri ọngọ ọtụka gụm lụmẹ kaka kpoye lẹ, ḿ dọmwụ chịla ị-ịlahị nyamwụ kpụ, m ka hiri kpẹẹ, juwa yi ori nya ugbẹtẹ nyamwụ myị́ kpong-kpong ka. 17Ọngọọwa ka kpa ọngịrị nya eje ọlala nyamwụ ụ-ụbwọ lala ụda ọ-kpa hịrị ang. Ụka kọ kpa ụda nya eje ọlala ọọwa hịrị angịnyị ehe kpá wuu lala igbi lẹ, ọ ka go ịlẹ kị ri ajẹ nyaa kpa kaka gu u-ube lẹlẹ. Ọọwa lẹ, ọ ka go ịlẹ kị ri ewoo nyaa kpa kaka ju ka ẹpwụ nya ila ọtụka ọlẹ kọ ka jẹ́-ẹ mịrị kpá ẹnẹnẹhẹ myị́ kaka pyịyọọ lẹlẹ.”

18Ịịwẹ, ịJọn a juwa bwu ụgbẹyị la datị-datị kpa ẹla Ohe oyaya nya ẹrụ ọnyịịla gbile angịnyị ụbwọ ụ-ụrụ ụ-ụwa ịnyịnyịịnyị lẹlẹ.

19Ụka ọọwa, ịJọn ọwẹ yalibyi la adịrahụ iHerọdụ nya ịlẹhị-ịlẹhị o-oluhye nyọlẹ ká iHerọdụ nu iHerodiyasị ọlẹ kọ ri ahụ nya ọnyịnịna nya iHerọdụ ọlẹng ye la ijẹẹhị. ỊJọn yalibyi lọọ u-uhye nya ang inyibyi ịkịla la datị-datị ịlẹ ká iHerọdụ juwa họ ịnyịnyị. 20Ang ọtịpyọ ọgụgụ wuu ri, iHerọdụ myịmyị wu ịJọn ọngọ hụ enyi Ohe ọwẹ kpa kaka ju agba ba ang inyibyi ịhọhọ nyamwụ ịwẹ wuu u-uhye.

Enyi Ohe Ọhụhụ nya IJisọsị

(ịMatiyu 3:13-17; ịMakị 1:9-11)

21Ụka ká ịJọn juwa kpa angịnyị hụ enyi Ohe ịnyịnyịịnyị lẹ, iJisọsị a kele kaka hụ enyi Ohe nya ịJọn ụ-ụwa ịnyịnyị lẹlẹ. Ụka ká iJisọsị juwa kpa abwọ rị ha Ohe Oluhye ụ-ụwa lẹ, epwoohe a wụrụ dụwa hwoo lẹlẹ. 22Ọọwa lẹ, Olegu Ịgọgọ nya Ohe Oluhye a ju abwụma nya enewulo hireji kaka kụ iJisọsị u-uhye ụ-ụwa lẹlẹ. Ịnyị, omyi ọhẹ a juwa ya ẹla bwu epwoohe gboo yẹkẹẹ, “Ahụ ayịdang ri Ọnyẹwẹ nyam ọlẹ ká ẹla nyang hám lụmẹ. Ang myị́ ang nya ọhịhị nyang wuu kpụm ịpyọ lụmẹ.”

Ego Ogbegbe nya Adịda Igogo nya IJisọsị

(ịMatiyu 1:1-17)

23Ụka ká iJisọsị ka dọmwụ nya ụkụrwọ nya ẹla nya Ohe Oluhye oyaya pyẹ nyamwụ kpá lẹ, ọ gu ẹka lala ohu kụrụ iwo chiriri lẹ. Angịnyị hu iJisọsị yẹkẹẹ, nyị ri ọnyị nya iJosẹfụ ọlẹ kọ ri ọnyị nya iHeli. 24iHeli ri ọnyị nya ịMatatị. ỊMatatị ri ọnyị nya iLivayị. ILivayị ri ọnyị nya ịMẹlịkị. ịMẹlịkị ri ọnyị nya ịJanayị. iJanayị ri ọnyị nya iJosẹfụ ọkịla. 25iJosẹfụ ọọwa ri ọnyị nya ịMatatịyasị. ịMatatịyasị ri ọnyị nya Emọsị. Emọsị ri ọnyị nya ịNahụm. ịNahụm ri ọnyị nya Esili. Esili ri ọnyị nya ịNagayị. 26iNagayị ri ọnyị nya ịMaatị. ỊMaatị ri ọnyị nya ịMatatịyasị ọgbahị. ỊMatatịyasị ọọwa ri ọnyị nya iSemeyin. ISemeyin ri ọnyị nya iJosẹkị. iJosẹkị ri ọnyị nya ịJọda. 27ỊJọda ri ọnyị nya iJowanan. IJowanan ri ọnyị nya iResa. iResa ri ọnyị nya iSerubabẹlụ. ịSerubabẹlụ ri ọnyị nya iSiyalitẹlụ. ISiyalitẹlụ ri ọnyị nya iNeri. 28iNeri ri ọnyị nya ịMẹlịkị ọgbahị. ỊMẹlịkị ọọwa ri ọnyị nya Adi. Adi ri ọnyị nya iKosam. iKosam ri ọnyị nya Elịmadam. Elịmadam ri ọnyị nya Ẹẹrị. 29Ẹẹrị ri ọnyị nya iJochuwa. IJochuwa ri ọnyị nya Eliyesa. Eliyesa ri ọnyị nya iJorim. IJorim ri ọnyị nya ịMatatị. ỊMatatị ri ọnyị nya iLivayị ọgbahị. 30ILivayị ọọwa ri ọnyị nya iSimyọn. ISimyọn ri ọnyị nya iJuda. IJuda ri ọnyị nya iJosẹfụ ọgbahị. IJosẹfụ ọọwa ri ọnyị nya iJonam. IJonam ri ọnyị nya Eliyakim. 31Eliyakim ri ọnyị nya iMeliya. IMeliya ri ọnyị nya ịMẹna. ỊMẹna ri ọnyị nya ịMatata. ỊMatata ri ọnyị nya ịNatan. ỊNatan ri ọnyị nya iDevidi. 32IDevidi ri ọnyị nya iJesi. IJesi ri ọnyị nya Obẹdị. Obẹdị ri ọnyị nya iBowasị. IBowasị ri ọnyị nya ịSala. ỊSala ri ọnyị nya ịNasọn. 33ỊNasọn ri ọnyị nya Aminadabụ. Aminadabụ ri ọnyị nya Adimin. Adimin ri ọnyị nya Arini. Arini ri ọnyị nya iHesirọn. IHesirọn ri ọnyị nya ịPẹrẹsị. ỊPẹrẹsị ri ọnyị nya iJuda ọgbahị. 34IJuda ọọwa ri ọnyị nya iJekọbụ. IJekọbụ ri ọnyị nya Ayịsiki. Ayịsiki ri ọnyị nya Ebiraham. Ebiraham ri ọnyị nya iTera. ITera ri ọnyị nya ịNahọ. 35INehọ ri ọnyị nya iSerugu. ISerugu ri ọnyị nya iRewu. IRewu ri ọnyị nya ịPẹlẹgị. ỊPẹlẹgị ri ọnyị nya Ẹbẹẹ. Ẹbẹẹ ri ọnyị nya iChela. 36IChela ri ọnyị nya iKeyinan. IKeyinan ri ọnyị nya Aafahadị. Aafahadị ri ọnyị nya ịChẹm. ỊChẹm ri ọnyị nya iNuwa. INuwa ri ọnyị nya ịLamẹkị. 37ỊLamẹkị ri ọnyị nya iMetusẹla. IMetusẹla ri ọnyị nya Ịnọkụ. Ịnọkụ ri ọnyị nya ịJarẹdị. ỊJarẹdị ri ọnyị nya ịMahalalẹlụ. ỊMahalalẹlụ ri ọnyị nya iKeyinan. 38IKeyinan ri ọnyị nya Ẹnọsị. Ẹnọsị ri ọnyị nya ịSẹtị. ỊSẹtị ri ọnyị nya Adam. Adam ri ọnyị nya Ohe Oluhye.

Currently Selected:

ILUKU 3: IBNO

Highlight

Copy