ILUKU 2

Ọmama nya IJisọsị

(ịMatiyu 1:18-25)

1Ụka ọọwa, iSisa Ọgọsịtọsị adịrahụ ọgbahị nya ala iRom wuu da ehile yẹkẹẹ, angịnyị ịlọpyị nya ọọwa wuu nyị ka yụbwọ ju ụpwụ ẹ-ẹpwụ nya angịnyị ọwawa nya aluche wuu pyii lẹ. 2Angịnyị ọwawa nya ọgbanyẹ-ọgbanyẹ ọọwa dọmwụ lụka ká iKuriniyọsị ri ịgọvụnọ nya ala iSiriya. 3Ụka ọọwa, ọng myị́ ọng nyaa juwa kele ka ẹpwa-ụtụrụ nya adamwụ anyị kaka yụbwọ ju ụpwụ ẹ-ẹpwụ ụ-ụwa.

4Ịnyị, iJosẹfụ a tịtị hu ang nya ẹdịyẹ bwu epweji nya ịNasareti ụ-ụwa ọ-ọpyị nya ịGalili lẹlẹ. Ọ kele ka epweji nya ịBẹtịlẹhẹm ọlẹ kọ ri epweji nya Adịrahụ iDevidi ụ-ụwa ọ-ọpyị nya iJudiya. Chajị iJosẹfụ bwu imwawụ nya iDevidi mịlẹ-mịlẹ. 5Ụka ọọwa, iJosẹfụ kpa iMeri ọnyị ọnyang ọlẹ kọ juwa ya ẹla nyọka yeye ba ịlọmwụ kele ka ụwa kaka yụbwọ ju ụpwụ ẹ-ẹpwụ ịnyịnyị. IMeri juwa lẹnyị ụka ọọwa. 6Ụka kị juwa ị-ịBẹtịlẹhẹm wẹẹ lẹ, ụka nya ọnyị ọmama nya iMeri a họ jịra lẹlẹ. 7Ọọwa lẹ, iMeri a ma ọnyị ọlẹng nya ọgbanyẹ-ọgbanyẹ nyamwụ ụ-ụwa u-ube nya iyo ịlẹpwa lẹlẹ. Chajị, í ye ẹgẹgẹhẹ hụ u-ube nya angga kpong-kpong kaka. Ọọwa lẹ, iMeri a ya apwụ dakụrụ ọnyị onyeewe hwọọ nụwa ẹ-ẹpwụ nya ọkpịla ọ-ya ang oriri ju ha ịmwụ lẹlẹ.

Angịgbikpịlọ Wo Oja Ọnyịịla

8Lụka ọọwa, angịgbikpịlọ ịhyẹ kụ ụwa lahị, juwa kpẹhị rịrị ịkpịlọ nyaa la epwodu jijiji ụ-ụwa o-oye nya ọpyị ọọwa. 9Ụ-ụwa, olegu-ẹrụ nya Ohe Oluhye Ọngọlahị ọhẹ chị ịlọmwụ ehe mẹjaa. Ọọwa lẹ, ahịgboo nya ogbo ọtụka-ọtụka nya Ohe Oluhye Ọngọlahị a chị kụrwaa lẹ, ejiri a juwa waa ọtụka-ọtụka lẹlẹ. 10Ụka ọọwa, olegu-ẹrụ ọọwa byaa yẹkẹẹ, “Anụ juhi ka. Chajị ẹrụ ọnyịịla nya ọkẹkẹnị ọtụka a lẹẹ kam kpa warị ka ya jenu lẹ! 11Anụ wo mẹ! Ị ma Ọngọchịda ọlẹ kị wụrụ ẹnyị nyamwụ ịKịrayịsị Ọngọlahị hanụ alẹ e-epweji nya iDevidi lẹ! 12Ang o-ju ẹjẹẹ nya ọnyị ọọwa ri yẹkẹẹ, ánụ kele, anụ ka yẹ ọnyị onyeewe ọọwa kị ya apwụ dakụrụ, hwọọ nụwa ẹ-ẹpwụ nya ọkpịla ọ-ya ang oriri ju ha iyo ịlẹpwa.”

13Ịnyị, lụka ọ-mwaa lẹ, iru nya alegu-ẹrụ ilepwoohe a hireji myị ụwa kpọrịkọọ kaka jula olegu-ẹrụ ọọwa lẹ, ịwa wuu a họ wirim, juwa mwu eje, juwa gwogbo ha Ohe Oluhye nya ịlẹhị-ịlẹhị ụ-ụwa lẹlẹ. 14I juwa yẹkẹẹ,

“Ogbo a juwa ha Ohe Oluhye ẹ-ẹga oluhye.

Ká okpunyi nya Ohe Oluhye a jam odehe ta angịlẹ wuu ká ẹla nyaa kpụ Ohe Oluhye ịpyọ.”

15Ịnyị, ụka ká iru nya alegu-ẹrụ ịịwa rụ tịrẹkpẹ ka epwoohe kpá lẹ, angịgbikpịlọ ịịwa a byi awụlẹ yẹkẹẹ, “Anụ wuleji kahị rụ ka ịBẹtịlẹhẹm kaka yẹ ang ọlẹ kọ họ ụ-ụwa jaabwọ ká Ohe Oluhye Ọngọlahị du ẹrụ kaka ya jehi lẹẹ mẹ.”

16Ịnyị, ị rụ lagaga kele ka ịBẹtịlẹhẹm lẹ, ị yẹ iMeri bala iJosẹfụ bala ọnyị onyeewe ọọwa ẹ-ẹpwụ nya ọkpịla ịnyịlẹhị lẹlẹ. 17Ụka ká angịgbikpịlọ ịịwa chẹhị yẹ ọnyị onyeewe ọọwa lẹ, ị tịrọnụ nya ala ịlẹ ká olegu-ẹrụ nya Ohe Oluhye ya jaa chajị nya ọnyị ọọwa wuu ụ-ụwa lẹlẹ. 18Angịlẹ wuu kị juwa wo ọnụ-ẹla ọtịrị-tịrị nya angịgbikpịlọ ịịwa wuu lẹ, ọ laa ahịbwuu lụmẹ kaka kpoye. 19Ma, iMeri ayịdang tị wu ala ịịwa wuu kpa ẹ-ẹpwụ nya ọkịlẹtụ nyamwụ juwa kpa me irya ju ụka wuu. 20Ọọwa lẹ, angịgbikpịlọ ịwẹ a tịrẹkpẹ rụ, juwa gwogbo ha Ohe Oluhye bala o-juwa ya ụmụmẹ nya Ohe Oluhye dodehe lẹlẹ. Chajị ang ịlẹ kịịwa ayịdang kpẹhị nyaa yẹ ụ-ụwa pwoku alịlẹ ká olegu-ẹrụ ọọwa ya jaa wuu ene-ene.

Ẹnyị Ojuju nya IJisọsị

21Ịnyị, ụka ká ẹnụtụrụ ọhaneku nya ọmama nya iJisọsị pwụ lẹ, ị dọọ ụwụwụ ụ-ụbwọ lẹlẹ. Ị wụrụ ẹnyị nyamwụ “IJisọsị” ẹnụ ọọwa ịnyịnyị, jaabwọ ká olegu-ẹrụ nya Ohe Oluhye bwuru ẹnyị nyamwụ ya je iMeri ene-ene kọ jẹnyị nyamwụ.

Ị Wahị Kụrụ Ọnyị Onyeewe IJisọsị Ụ-ube Ịgọgọ Ọtụka nya Ohe Oluhye

22Ịnyị, ụka ọlẹ kị ka kpa enyi nyi ịlọ hụ iMeri chajị kọ ka jẹ́-ẹ la cheri-cheri ị-ịlahị nya Ohe Oluhye, a pwụ jaabwọ ká ehile nya iMosisi ya, ịnọnyị onyeewe nyị họ mẹ lẹlẹ. Ọọwa lẹ, iJosẹfụ bala iMeri a kpa ọnyị onyeewe iJisọsị kele ka ube ịgọgọ ọtụka nya Ohe Oluhye nya ala iJuu i-iJerusalẹm kaka chị ịgọgọ ju ha Ohe Oluhye ụ-ụwa lẹlẹ. 23Chajị Ohe Oluhye ayịdang ya ẹ-ẹpwụ nya ehile nyamwụ ene-ene yẹkẹẹ, “Ọnyị ọlẹng nya ọgbanyẹ-ọgbanyẹ ọnyị myị ọnyị ọlẹ kọ ka wụrụ ori ụma nya ọnyang ahụ aalẹ, ị ka hu ọnyị ọlẹng ọọwa chị ịgọgọ ju ham Am Ohe Oluhye Ọngọlanụ pyii lẹ.” 24Ụka kị ka kpa ọnyị ọlẹng ọlịnyị kele, angịịwa kaa kpa enewulo imiiye lee agba nya ikiripete imiiye kaka kịla iya ha Ohe Oluhye jaabwọ ká ehile nya Ohe Oluhye Ọngọlahị ya nyị họ ụka ọọwa ịnyịnyị.

25Ụka ọọwa, ọlẹng ọhẹ juwa i-iJerusalẹm kị wụrụ ẹnyị nyamwụ iSimyọn. ISimyọn ọwẹ ri ọngọ kaa họ ehile nya Ohe Oluhye jịra kpẹẹkpẹẹ lụmẹ Ọ ri ọlabwẹla ọnyịịla. Ọ juwa la ẹhị ọrịrịị-rịrị gbe ụka ọlẹ ká Ohe Oluhye ka kpụ ala Isirẹlụ wuu ẹjẹ. Ọngịrị nya Olegu Ịgọgọ nya Ohe Oluhye juwa ta iSimyọn lụmẹ. 26Ụka ọọwa, Olegu Ịgọgọ họ ká iSimyọn ọwẹ jẹ́ yẹkẹẹ, ọwa ayịdang nyị́ juwa ka gbu ka, gbee pwụ ụka ọlẹ kọọwa nyị ka yẹ ịKịrayịsị ọlẹ ká Ohe Oluhye Ọngọlahị nyị juwa ka du warị ẹ-ẹhị pyii ene. 27La ẹnụtụrụ ọhẹ, Olegu Ịgọgọ a kpa iSimyọn ọwẹ kele ka ube ịgọgọ ọtụka nya Ohe Oluhye nya ala iJuu lẹlẹ. Ẹnụtụrụ ọọwa kpangga, ị kpa ọnyị onyeewe iJisọsị ọwẹ kele ka ụwa ịnyịnyị, kị ka chị ịgọgọ jwọọ ha Ohe Oluhye, jaabwọ ká ehile nya Ohe Oluhye ya, nyị họ. 28Ịnyị, iSimyọn a ye ọnyị onyeewe iJisọsị ọwẹ kpa ụ-ụbwọ nyamwụ lẹ, ọ juwa gwogbo ha Ohe Oluhye lẹlẹ. 29Ọ yẹkẹẹ,

“Ee, ọ nwa ịnyị alẹ lẹ, ụka myị́ ụka kọ háng,

Ahụ Ohe Oluhye Ọngọlahị lẹ,

a kpam rụ la okpunyi jaabwọ kaahụ ayịdang myị ọnụ ham ene-ene mẹ.

30Chajị, a họ kam kiji kpẹhị nyam yẹ olegbeju nya ọchịda nyang Ahụ Ohe Oluhye alẹ lẹ.

31Ahụ ayịdang nwụla ọchịda nyang ọọwa nọ nyọka chọọ ehe ha alodehe wuu.

32Chajị ká ka họ ká ọchịda nyang ọọwa ka ri otinika o-hu ahịgboo

nya abwẹla ọnyịịla nyang ha ala iJentayịlị wuu lẹ.

Ọchịda nyang ọọwa ka ri ang ogbo ọtụka

ha ala Isirẹlụ angịnyị nyang ịnyịnyị.”

33Ụka ọọwa, ẹlẹwẹ ká iSimyọn ya rụ́ iJisọsị ụ-ụwa la iJosẹfụ bala iMeri ịnịna nya iJisọsị anyị ahịbwuu lụmẹ kaka kpoye. 34Ụka ká iSimyọn juwa wahị kụrwaa, ọ byi iMeri ịnịna nya iJisọsị yẹkẹẹ, “IMeri yẹ mẹ! Ọnyị nyang ọlẹ ri ọngọlẹ ká Ohe Oluhye ayịdang chụchụ, du ẹrụ warị. Ọwẹwẹ nyamwụ ọọwa ka họ ká iru nya ala Isirẹlụ ka la gogo ẹ-ẹga nya ẹla nya Ohe Oluhye. Ma, angịkịla nyaa tị ka mịla eji hi ẹla nya Ohe Oluhye. Ọwa ayịdang ka ri ang o-ju ẹjẹẹ o-bwu ẹga nya Ohe Oluhye ọlẹ ká angịnyị lụmẹ-lụmẹ ka ya ẹla onyobyi rụ́. 35Nya ịlẹhị ịnyị, ala inyibyi ịịwa ịlẹ kị ka ya rwọ́ọ, ka gung ahụ ịnamwụ chọọchọọ ẹ-ẹpwụ nya ọkịlẹtụ nyang lala oje ọkpachị. Ma, ọ tị ka lịnyị pyii chajị ká irya ịbaa-ịbaa ọlẹpwụ ọkịlẹtụ nya iru nya angịnyị ehe o-oluhye nya ọnyị ọlẹ ka jẹ́-ẹ chị ehe gede-gede.”

36Ọnyang ọhẹ ọlẹ kọ ri ọlọmwụ nya Ohe Oluhye juwa ụ-ụwa ịnyịnyị. Ẹnyị nyamwụ ri Ana. Ẹnyị nya adamwụ ri ịFanẹlu ọlẹ kọ bwu imwawụ nya Achẹ. Ọnyang ọọwa chị okwirichi lụmẹ lẹ. Ụka kọ rwọ ọrụ lẹ, ọ hụ ta ọrụmwụ lala ẹka irwiye kẹnẹ-kẹnẹ, lẹ, ọrụmwụ a gbu hyọọ lẹlẹ. 37Ịnyị, ọ ri ahụ-ogu gbee kọ gu ẹka iwo ineku kụrụ ine lẹlẹ. O-ri ọnyang ọlẹ kọ kaa dụwa u-ube ịgọgọ ọtụka nya Ohe Oluhye nya ala iJuu juwa gbịgba ha Ohe Oluhye, juwa nọ limyi ha Ohe Oluhye bala ọraabwọ ha Ohe Oluhye lodu bala alẹnụ ịnyịnyịịnyị. 38Ịnyị, Ana ọwẹ a kele lụka ọọwa, juwa ji Ohe Oluhye obe o-oluhye nya iJisọsị lẹlẹ. Ọ juwa ya ẹla rụ́ iJisọsị je angịlẹ wuu kị juwa la ẹhị ọrịrịị-rịrị gbe ụka ọlẹ ká Ohe Oluhye ka chị ala iJerusalẹm da.

Ị Kpa IJisọsị Tịrị Ẹkpẹ Rụ Ka ỊNasareti

39Ụka ká iJosẹfụ bala iMeri họ ehile nya Ohe Oluhye jịra kpá wuu lẹ, ị rụ tịrẹkpẹ ka ịNasareti ọlẹ kọ ri epweji nyaa ụ-ụwa ị-ịGalili lẹlẹ. 40IJisọsị ọnyị nyaa ọọwa nwa kaka ri adam ọlẹng [ẹ-ẹpwụ nya olegu nyamwụ bala ugbinyịrọ.] Ọ myị la ẹla ọjẹ́jẹ lụmẹ. Ọnahị nya Ohe Oluhye juwa tọọ lụmẹ kaka kpoye ịnyịnyị.

IJisọsị Ụ-ụwa U-ube Ịgọgọ Ọtụka nya Ohe Oluhye

41Ụka ọọwa, ẹka myị́ ẹka wuu, adịda bala ịnịna nya iJisọsị kaa kele ka iJerusalẹm ụka nya ọjịra-jịra nya Ang Oriri Ọchịpwụrụ. 42Ụka ká iJisọsị gu ẹka iwo kụrụ imiiye lẹ, ọ ba adamwụ bala ịnamwụ kele kaka ri Ang Oriri Ọchịpwụrụ ọọwa jaabwọ ká ehile nyaa ịwa ala iJuu wuu myị ọnụ lẹlẹ. 43Ụka ọlẹ kị hụ ụwa ri Ang Oriri Ọchịpwụrụ ọọwa kpá wuu chị eju lẹ, iMeri bala iJosẹfụ a yegiri juwa rụ ka ịNasareti lẹlẹ. Ụka ọọwa, ọnyị onjwo ochiche iJisọsị tị hi chị ọmwụ ba eji ụ-ụwa i-iJerusalẹm. Ma, adamwụ bala ịnamwụ á tị jẹ́ ịnyị kpong-kpong ka. 44Chajị ịwa ayịdang me irya yẹkẹẹ, iJisọsị nyị juwa bajẹ bala alogu ẹdịyẹ nyịwa lẹ. Ịnyị lẹ, ị jẹdịyẹ lala ahị ọpyẹpyẹ ookpokpo lẹpwụ-lẹpwụ, juwa pịlahị nya iJisọsị ka ẹga nya aanaa bala alogu ẹdịyẹ nyaa ịkịla ịnyịnyịịnyị lẹlẹ. 45Ụka kị yọọ kaka gbee lẹ, ị tịrẹkpẹ rụ kele ka iJerusalẹm, juwa pịlahị nya iJisọsị lẹlẹ. 46Ụka kị pịlahị nyamwụ gbee pwụ ụtụrụ ọhata lẹ, ị yẹ iJisọsị hụhụ ụ-ụwa u-ube ịgọgọ ọtụka nya Ohe Oluhye nya ala iJuu lẹlẹ. Ọ hụ ụwa ẹ-ẹpwarịrị nya angịmẹjẹ ịtụka-ịtụka, juwa wo ang ọmẹjẹ nyaa bala o-juwa taa ịtọ ụ-ụwa ịnyịnyị. 47Ụka ká alụwa wo ẹla ọwẹwẹ nya iJisọsị bala ọ-yẹ ụma nya ọ-jẹ́ myịmyị okpori-kpori ọlẹ kọ la lẹ, ọ laa ẹbyẹbyị lụmẹ kaka kpoye. 48Ụka ká adamwụ bala ịnamwụ yọọ ụ-ụwa lẹ, ọ laa ahịbwuu lụmẹ kaka kpoye. Ịnamwụ byọọ yẹkẹẹ, “Ọnyị nyam, ụma nya ẹla ọlanyị, a tị́ họhị họ ịnyị! Yẹ wẹẹ, am bala adang lẹẹ pịlahị nyang la uko ụ-ụbwọ amalẹ kaka.”

49iJisọsị wẹ byaa yẹkẹẹ, “Ịịyẹ a tị́ du kanụ juwa pịlahị nyam ịnyị ene? Lee, ánụ tị́ jẹ́ yẹkẹẹ, nyị chịla kaam nyị ka jam u-ube nya Ohe Oluhye Adam pyii ka?” 50Ụka ọọwa lẹ, adamwụ bala ịnamwụ á jẹ́ etu nya ẹlẹwẹ ká iJisọsị ya wẹ datị kpong-kpong ka.

51Ịnyị, iJisọsị a ba adamwụ bala ịnamwụ anyị rụ tịrẹkpẹ kele ka ịNasareti lẹ, ọ juwa jwaa ihi hiigu-hiigu ụ-ụwa lẹlẹ. Ịnamwụ ju ala ịlẹ ká iJisọsị ya wuu ẹjẹẹ ẹ-ẹpwụ nya ọkịlẹtụ nyamwụ. 52Ụka ọọwa, iJisọsị juwa nwa adam ọlẹng kịlahị-ịlahị ẹ-ẹpwụ nya ugbinyịrọ bala ẹla ọjẹ́jẹ bala ẹ-ẹpwụ nya ọnụ-ọnyị oriri ị-ịlahị nya Ohe Oluhye bala angịnyị ehe ịnyịnyịịnyị.

Currently Selected:

ILUKU 2: IBNO

Highlight

Copy