ỊJỌN 9
9
IJisọsị Họ Ọlẹng Ọhẹ Ọlẹ Kọ Kpụ Idu Bwu Ẹpwụ-ẹpwụ nya Ịnamwụ Uda
1Ụka ká iJisọsị juwa chịpwụrụ kam, ọ yẹ ọlẹng ọhẹ ọlẹ kọ kpụ idu bwu ẹpwụ-ẹpwụ nya ịnamwụ. 2Ụka ọọwa, angịjụgbẹyị nyamwụ tọọ wo yẹkẹẹ, “Ọngọlahị ee, ọhọbịrị nya owo a tị́ du ká ọlẹng ọwẹ kpụ idu bwu ẹpwụ-ẹpwụ nya ịnamwụ ịnyị? Ọhọbịrị nya adamwụ bala ịnamwụ tị́ lee ọhọbịrị nyamwụ ọwa ayịdang tị́?”
3IJisọsị wẹ byaa yẹkẹẹ, “Eheehe! Ọ-ọhọbịrị nyamwụ ọwa ayịdang lee ọhọbịrị nya adamwụ bala ịnamwụ a du ka. Ma, ọ kpụ idu ịnyị, chajị ká ụkụrwọ ẹbyẹbyị nya Ohe Oluhye ka jẹ́-ẹ chị ehe u-uhye nyamwụ kem, ịnyị! 4Ahị ka juwa họ ụkụrwọ nya ọngọlẹ kọ dum ẹrụ warị lụka ọlẹ ká ahịgboo nya ahị ọpyẹpyẹ ji hahị wẹẹ. Chajị ụka ká odu á hi ene lẹ aalẹ, ọngọngọhẹ á ka jẹ́-ẹ họ ụkụrwọ ẹ-ẹpwụ nya ukpowu ọọwa myị́ kaka. 5Chajị ọlẹ kaam ayịdang jam odehe ọlẹ wẹẹ lẹ, am kpakpakpa a ri otinika o-hu ahịgboo nya ọhịhị nya Ohe Oluhye ha alodehe lẹlẹ.”
6Ụka ká iJisọsị ya ẹlẹwẹ kpá lẹ, ọ chị́ ide da ịpyị lẹ, ọ kpa ụbwọ nyamwụ wọọ kẹtẹ-kẹtẹ lẹ, ọ bwoo tudu ọlẹng ọ-kpụ idu ọwẹ egbahị nyamwụ lẹlẹ. 7Ọọwa lẹ, iJisọsị a byoo yẹkẹẹ, “Ẹnwa ọlẹng, kele ka ụjẹ-ẹmwụ nya enyi ọlẹ kị wụrụ iSilowam kaka hụ́ ahị nyang ụ-ụwa mẹ.” Etu nya iSilowam ọọwa ri “Ọngọlẹ kị du ẹrụ.” Ụka ká olidu ọọwa kele ka ụwa kaka hụ́ ahị nyamwụ lẹ, ọ ka nya tịrẹkpẹ bwu ụwa kpá lẹ, ọ jẹ́ yọyị cheri-cheri lẹlẹ.
8Ọọwa lẹ, alogu nyamwụ bala iru nya angịkịla ịlẹ kị kaa yọọ hụhụ, juwa bịlẹ ang ene-ene, a juwa tọ awụlẹ wo yẹkẹẹ, “Ọ-ọlẹng ọlẹ kọ kaa hụhụ juwa bịlẹ ang a lalẹ ka?”
9Angịhyẹ nyaa wẹ yẹkẹẹ, “Ee, ọwa ịnyị!” Angị ịkịla nyaa juwa yẹkẹẹ, “Ehe! Ọ-ọwa ka! Ọ moo me, ọngọ ọlaanyị a moo odu lẹ.” Ịnyị, ọlẹng ọọwa ayịdang a wẹ byaa yẹkẹẹ, “Am, ọngọọwa a lẹẹ lẹ.”
10Ọọwa lẹ, angịịwa a tọọ wo yẹkẹẹ, “Anyị, ị tị́ bwu họng uda nya idu ọkpụkpụ nyang kpong-kpong?”
11Ọ wẹ byaa yẹkẹẹ, “Ọlẹng ọhẹ ọlẹ kị wụrụ iJisọsị a chị́ ide wọ ịpyị kẹtẹ kẹtẹ tudum egbahị lẹ, ọ byim yẹkẹẹ, am nyị kele kaka hụ́ ahị nyam ụ-ụjẹ-ẹmwụ nya enyi ọlẹ kị wụrụ iSilowam mẹ, lẹlẹ. Ọọwa lẹ, ụka kam kele kaka hụ́ ahị ụ-ụwa lẹ, m jẹ́ yọyị lẹlẹ!”
12Angịwẹ wẹ byoo yẹkẹẹ, “Ale, ọlẹng ọọwa a tị́ ji ene?” Ọngọọwa wẹ byaa yẹkẹẹ, “Aḿ jẹ́ ẹga kọ ji ka!”
Ala ỊFarịsii Juwa Dịrẹ Jaabwọ Kị Bwu Họ Ọlẹng Ọ-kpụ Idu Ọwẹ Uda
13Ịnyị, angịịwa a kpa ọngọ kpụ idu ene-ene ọwẹ kele ka ẹga nya ala ịFarisii lẹlẹ. 14Ẹnụtụrụ Ọhịnyọ Lụkụrwọ nya ala iJuu, iJisọsị a kpa chị́ ide wọ ịpyị kẹtẹ kẹtẹ tudu ọlẹng ọwẹ egbahị ene ká iJisọsị họọ uda nya idu ọkpụkpụ nyamwụ ọọwa lẹ. 15Ịnyị, ala ịFarisii ịịwa a tọ ọlẹng ọọwa wo yẹkẹẹ, “Anyị, ị tị́ bwu họng uda nya idu ọkpụkpụ nyang kpong-kpong?” Ọ wẹ byaa yẹkẹẹ, “Ọlẹng ọọwa chị́ ide wọ ịpyị kẹtẹ kẹtẹ tudum egbahị lẹ, m kele kaka hụ́ ahị lẹ, m jẹ́ yọyị lẹlẹ.”
16Ala ịFarisii ịịwa wẹ byoo yẹkẹẹ, “Wo mẹ! Ọlẹng ọọwa ọlẹ kọ họng uda ọọwa, á bwu ẹga nya Ohe Oluhye kpong-kpong ka! Chajị, ọngọọwa á myị kpa ehile nya ẹnụ ụtụrụ ọmwịịnyọ nyahị ahị ala iJuu kpong-kpong ka.” Ma, angịkịla ịlụwa juwa yẹkẹẹ, “Anyanyị, ọngọlẹ kọ ri ọngọhọbịrị a tị́ ka jẹ́-ẹ họ ụkụrwọ ẹbyẹbyị ọlịịwẹ myị́?” Ọọwa lẹ, ebwo ọchịchị a juwa ẹ-ẹpwarịrị nyaa bwula ọlẹ ká irya omeme nyaa oluhye nya iJisọsị datị hi awụlẹ lẹlẹ.
17Ala ịFarisii ịwẹ myịmyị tọ ọlẹng ọwẹ wo yẹkẹẹ, “A tị́ yẹkẹẹ, ọlẹng ọọwa nyaa họ ọwa uda wẹ lẹlẹ. Ee lẹ, ịịyẹ a tị́ ri irya nyang u-uhye nya ọlẹng ọọwa mẹ?” Ọngọọwa wẹ byaa yẹkẹẹ, “Am myị yẹkẹẹ, ọlọmwụ nya Ohe Oluhye, ọ ri lẹ.”
18Ma, alegbeju nya ala iJuu ịịwa ayịdang á tị tịtọ kị ka myị yẹkẹẹ, ọlẹng ọwẹ nyị kpụ idu ịnyịlẹhị ene ká iJisọsị nyị-ị họọ uda kpong-kpong ka, gbee kị be ẹkọ wụrụ adịda bala ịnịna ị-ma ọlẹng ọọwa kele ka ẹga nyaa. 19Ọọwa lẹ, ị taa wo yẹkẹẹ, “Ọnyị nyanụ a lẹẹ lẹ? Ahị wo oja yẹkẹẹ, nyị kpụ idu bwu ẹpwụ-ẹpwụ nya ịnamwụ. Ó ri ịnyị lẹ, anyị, ọ tị́ la kọ du kọ jẹ́ lẹẹ yọyị tịtị mẹ?”
20Adịda bala ịnịna nya ọlẹng olidu ọọwa wẹ byaa yẹkẹẹ, “Ee, ọnyị nyahị a wẹ ịnyịlẹhị lẹ. Ahị tị mọọ la idu ọkpụkpụ bwu ẹpwụ-ẹpwụ ịnyịlẹhị. 21Ma, jaabwọ kọ tị họ kọ du kọ jẹ́ wẹẹ yọyị lẹ, áhị́ jẹ́ koo lee ọ-jẹ́ ọngọlẹ kọ họọ uda nya idu ọkpụkpụ nyamwụ ọọwa ka ịnyịnyị! Ọwa ayịdang tị́ wẹ lẹ. Anụ tọọ wo mẹ! Ọ nwa kpụ ọ-ka jẹ́-ẹ ya ẹla la ịlọmwụ myị́ lẹ.” 22Adamwụ anyị wẹ ịnyị, chajị ịwa ayịdang juwa juhi nya alegbeju nya ala iJuu wuu. Chajị ala iJuu ịwẹ me obyi gu awụlẹ ene-ene yẹkẹẹ, ọng myị́ ọng ọlẹ kịị nyị́ ka byị ẹjẹ-ẹ ya dodehe ụ-ụda yẹkẹẹ, ọlẹng ọwẹ nyaa ri ịKịrayịsị ọọwa aalẹ, ịwa nyị ka gba ọngọọwa kpehe dodehe hi ẹpwụ nya ube ọ-mẹ ẹla nya Ohe Oluhye jẹ nyịwa pyii lẹ. 23Ịnyị a du ká adamwụ anyị wẹ yẹkẹẹ, “Ọwa ayịdang tị́ nwa ọngịnyị lẹlẹ, anụ tọọ wo mẹ” lẹ.
24Ala ịFarisii ịwẹ myịmyị be ẹkọ wụrụ ọlẹng ọ-kpụ idu bwu ẹpwụ-ẹpwụ ọọwa ka ẹga nyaa lẹ, ị byoo yẹkẹẹ, “Ohe Oluhye ayịdang, a ka gwogbo ha kem lẹ. Chajị, ahị jẹ́ yẹkẹẹ, ọlẹng ọwẹ ri ọngọhọbịrị.”
25Ọlẹng ọwẹ wẹ byaa yẹkẹẹ, “O hiigu. Ó-riri kọ ri ọngọhọbịrị lee o-ri ọngọhọbịrị ka, tụbwọ aalẹ, am lẹ, ḿ jẹ́ ọọwa koo. Ang ookpokpo ọlẹ kam jẹ́ ri yẹkẹẹ, gbalẹ-gbalẹ lẹ, m ri olidu. Ma, ọlẹẹlẹẹ lẹ, m jẹ́ yọyị lẹ.”
26Alegbeju nya ala iJuu ịwẹ myịmyị tọọ wo yẹkẹẹ, “Ịịyẹ ọ tị́ họ ẹ-ẹga nyang? Anyị, ọ tị́ bwu họng uda kọ du ká jẹ́ yọyị?”
27Ọlẹng ọwẹ wẹ byaa yẹkẹẹ, “M tị́ tịrọnụ ya jenu ugwọhẹ lẹ, ánụ tị tịtọ kanụ ka myị lam kaka. Ịịyẹ a tị́ du kanụ myịmyị juwa mam towo chẹrị chẹrị ịnyị wẹẹ? Lee, anụ tị́ juwa tịtọ kanụ ka ri angịjụgbẹyị nyamwụ kpịlọ lẹ?”
28Ọọwa lẹ, angịịwa a juwa doo ido, juwa byoo yẹkẹẹ, “Ahụ ayịdang a ri ọngọjụgbẹyị nya ọngọwẹ lẹ! Ahị lẹẹ, angịjụgbẹyị nya iMosisi, ahị ri lẹ! 29Ahị ayịdang jẹ́ yẹkẹẹ, Ohe Oluhye ya ẹla ta iMosisi. Ma, ọngọwẹ lẹ, ahị dọmwụ jẹ́ ẹga ọlẹ kọ bwubwu warị datị kpong-kpong ka lichi-lichi.”
30Ọlẹng ọwẹ wẹ byaa yẹkẹẹ, “Ẹla ọlẹ tị tị la ẹbyẹbyị lụmẹ lẹ! Anụ ayịdang á jẹ́ ẹga ọlẹ kọ bwu warị datị kaka. Ma, ọwa tị họm uda nya idu ọkpụkpụ nyam lẹẹ lẹlẹ. 31Ahị jẹ́ ká Ohe Oluhye á kaa wo omyi nya alọhọbịrị ka. Ma, ọ́ tị ri ká ọngịnyị á ri ọngọ juwa gbịgba ha Ohe Oluhye yẹẹyẹẹ bala o-juwa jwoo ihi, kẹnẹ-kẹnẹ lẹ, Ohe Oluhye a kaa wo omyi nya ọngọọwa lẹlẹ! 32Bwu ọmwụ ọdada nya odehe ọlẹ pyịyọọ daalẹ lẹ, aḿ wo oja yẹkẹẹ, ọngọngọhẹ nyị wụrụ egbahị nya olidu ọlẹ kịị nyị ma bwu ẹpwụ-ẹpwụ nya ịnamwụ ẹnẹnẹhẹ jaabwọ ká ọlẹng ọlẹ họ lẹẹ lẹka. 33Chajị nya ọọwa lẹ, ó ri ká ọlẹng ọlẹ, á bwu ẹga nya Ohe Oluhye hireji ka, ịnọ, ọ́ ka jụ ịngịngịhyẹ ọlịnyị họ myị́ kpong-kpong ka!”
34Alegbeju nya ala iJuu ịịwa wẹ byi ọlẹng ọwẹ yẹkẹẹ, “Oowo a tị́ lẹẹ ri? Ahụ ọngọlẹ kị ma ẹ-ẹpwụ nya ọhọbịrị, ká da ịhọbịrị rị mẹnẹ-mẹnẹ, a dachichi mwọọgịlẹ jam ka mẹ ang jẹẹhị alẹ lẹlẹ?” Ọọwa lẹ, ị kwoo rụ kpehe hi ube ọ-mẹ ẹla nya Ohe Oluhye jẹ nyaa ọlụwa lẹlẹ.
Idu Ọkpụkpụ Ẹ-ẹpwụ nya Olegu
35Ịnyị, iJisọsị a wo oja yẹkẹẹ, alegbeju ịịwa nyị gba ọlẹng ọwẹ kpehe hi ube ọ-mẹ ẹla nya Ohe Oluhye jẹ nyaa lẹlẹ. Ọọwa lẹ, iJisọsị a yẹ ọlẹng ọọwa lẹ, ọ byoo yẹkẹẹ, “A kpa ọkịlẹtụ nyang wuu myị la Ọnyị nya ọngịnyị ehe lẹ?”
36Ọlẹng ọwẹ wẹ byi iJisọsị yẹkẹẹ, “Mẹ ọngọọwa jẹm, chajị kam ka myị lọọ mẹ, Ayịbahị!”
37IJisọsị wẹ byoo yẹkẹẹ, “Ahụ ayịdang wẹẹ kpẹhị nya ịlọng yẹ ọngọọwa lẹ. Chajị, ọwa ayịdang a ri ọngọlẹ kọ wẹẹ ya ẹla tang lẹẹlẹẹ lẹ.”
38Ọọwa lẹ, ọlẹng ọwẹ a wẹ byi iJisọsị yẹkẹẹ, “Ee, m myị lẹ, Ọngọlahị!” Ọọwa lẹ, ọ hirikpẹẹ, juwa gbịgba ha iJisọsị ụ-ụwa lẹlẹ.
39IJisọsị ya ẹla dodehe ụ-ụwa yẹkẹẹ, “Am ayịdang warị wẹ odehe ọlẹ nyọka ri ang nya eje ọlala ha angịnyị ehe. Chajị ká angịlẹ kị jẹ́ ịlaa nya alidu nya ọkịlẹtụ ka jẹ́-ẹ yọyị. Ká angịlẹ kị tị wa ịlaa nya angị jẹ́ juwa yọyị lẹ, ka juwa ẹ-ẹpwụ nya idu ọkpụkpụ nya olegu ịnyị!”
40Ala ịFarịsii ịlụwa ịlẹ kị wo ẹlẹwẹ ká iJisọsị ya, wẹ byoo yẹkẹẹ, “Á tị́ juwa wụrụụhị ahị ayịdang alidu kpịlọ ịnyịnyị pyii ka?”
41IJisọsị wẹ byaa yẹkẹẹ, “Ịnọ, ó ri kaanụ ayịdang á jẹ́ ịlọnụ nya angị kpụ idu nya olegu wẹẹ lẹ, ịnọ, ánụ ka la abyị kpong-kpong kaka! Ma, ọlẹ kaanụ ayịdang wẹẹ wa ịlọnụ lala angị jẹ́ juwa yọyị kpá ene-ene lẹ, a du ká abyị ọlala nyanụ á ka jẹ́-ẹ myị́ hiinu kaka lẹlẹ!”
Currently Selected:
ỊJỌN 9: IBNO
Highlight
Share
Copy
Want to have your highlights saved across all your devices? Sign up or sign in
Igede Bible © The Bible Society of Nigeria, 2019.
