ỊJỌN 8
8
Ọnyang Ọlẹ Kị Wu Ụka Ko Juwa Kpa Ụya Họ
1Ma, iJisọsị rụ kele ka uhye nya Ọgbọdọ Olivu. 2Ịnyị, iJisọsị a chahị la ụtụrụ gbegbegbe tịrẹkpẹ rụ kele ka ube ịgọgọ ọtụka nya Ohe Oluhye nya ala iJuu lẹ, iru nya angịnyị lụmẹ-lụmẹ a bọọ kele ka ụwa lẹ, ọ hụhụ ụ-ụwa, juwa mẹ ang jaa lẹlẹ. 3Ụka ọọwa, ala ịtịcha ị-mẹ ehile nya iMosisi jẹ bala ala ịFarisii ịhyẹ a kpa ọnyang ọhẹ ọlẹ kị wu lụka kọ juwa kpa ụya họ, kele kaka godayị rịrị ị-ịlahị nya aluche wuu lẹlẹ. 4Ọọwa lẹ, ị byi iJisọsị yẹkẹẹ, “Ayịbahị ịtịcha, ahị wu ọnyang ọlẹ lụbwọ lẹhị u-uhye nya ụya ọhọhọ. 5IMosisi tị da ẹ-ẹpwụ nya ehile nyamwụ hahị yẹkẹẹ, ahị nyị da ajwọ nwụ ọnyang ọ-họ ụya ọlịnyị pyii. Lẹ, anyị, ahụ a tị́ ya?” 6Ịwa ayịdang ya ẹlẹwẹ, chajị nyọka ma iJisọsị yẹ kem, kị ka jẹ́-ẹ ye ang ọlẹ kị ka kpa chị ẹla bọọ ụ-uhye nyamwụ. Ma, iJisọsị hirikpẹẹ, juwa kpa ụkụchụ nyamwụ da ụpwụ ị-ịpyị ụka ọọwa. 7Ịnyị, ụka kị juwa kịlahị la ọ-tọ iJisọsị ịtọ ịnyịnyịịnyị lẹ, iJisọsị a hu hwaa rịrị kọkọ lẹ, ọ byaa yẹkẹẹ, “O hiigu. Ọngọlẹ kọ họ ang onyobyi kaka, ẹ-ẹpwụ nyanụ lẹ aalẹ, ọngọọwa a da ẹjwọ mịla ọnyang ọlẹ jene-jene mẹ.” 8Ịnyị, iJisọsị a hirikpẹẹ myịmyị, juwa da ụpwụ ị-ịpyị ụka oheeye lẹlẹ. 9Ụka ká angịwẹ wo ọwẹwẹ nya iJisọsị ịnyị lẹ, ị juwa rụ, ọngọhẹ ọngọhẹ bwu ọngọgbahị nyaa gbee kaka ju ka onjwo nyaa lẹlẹ. Ịnyị, iJisọsị ụbwọọmwụ kem a hi hụwa bala ọnyang ọọwa godayị kọkọ ụ-ụwa lẹlẹ. 10Ịnyị, ụka ká iJisọsị nịra kpaa myịmyị lẹ, ọ byi ọnyang ọwẹ yẹkẹẹ, “Ẹnwa ọnyang, ale, angịlẹ kị chị ẹla bang a tị́ ji mẹ? Ọngọngọhẹ nyaa á hi godayị rịrị ka ya eje wung kaka?”
11Ọnyang ọọwa wẹ byoo yẹkẹẹ, “Ee, ọngọngọhẹ á hi jam kaka, Ayịbahị!” iJisọsị wẹ byoo yẹkẹẹ, “Ọ hiigu. Aalẹ, am ayịdang lẹ, ḿ tịtị ya eje wung ka, ịnyịnyị! Rụ ka ẹpwa mẹ. Ma, a tị họ ang onyobyi myịmyị gụ ọwẹ kokoo!”
IJisọsị A Ri Ahịgboo nya Alodehe Lẹ
12IJisọsị myịmyị byi iru nya angịnyị ịlụwa yẹkẹẹ, “Am kpakpakpa a ri ahịgboo nya ọhịhị ha alodehe ọlẹ lẹ. Ọng myị́ ọng ọlẹ kọ myị bam jẹ lẹ aalẹ, ọngọọwa á ka juwa jẹdịyẹ ẹ-ẹpwụ nya ukpowu myịmyị kaka. Ma, ọngọọwa ka la ahịgboo nya ọhịhị ọlẹ kọ ka juwa kpọọ ụgbẹyị pyịyọọ lẹ.”
13Ala ịFarisii wẹ byoo yẹkẹẹ, “A juwa ya ịlọng dodehe lẹ, ẹla oyaya nyang ọọwa á ri nya ịlẹhị kaka!”
14IJisọsị wẹ byaa yẹkẹẹ, “O ri nya ịlẹhị, am ayịdang wẹẹ ri ibeenu nya ịlọm, juwa ya dodehe lẹ! Ma, ẹla nya ịlẹhị a tị wẹ kam wẹẹ ya lẹ. Chajị, m jẹ́ ẹga ọlẹ kam bwu warị bala ẹga ọlẹ kam juwa jẹ ka. Ma, ánụ tị jẹ́ ẹga ọlẹ kam bwu warị lee ẹga ọlẹ kam juwa jẹ ka datị ka. 15Irya nya angịnyị ehe kem, anụ a kaa kpa chị eje nya ẹla nyanụ jaabwọ kanụ juwa kpẹhị yẹ kem lẹ. Ma, am lẹ, aḿ tị kaa ya eje wu ọngọngọhẹ kpong-kpong ka. 16Ma, ọ́ tị dọmwụ riri kam juwa ya eje wu ọngọngọhẹ wu wẹẹ, ịnọ, eje ọchịchị nyam ọọwa ka ri nya ịlẹhị. Chajị ám ụbwọm la ịlọm kem, ịnọ, a ka la eje ọọwa ka. Ma, ịnọ, am bala Adam ọlẹ kọ dum ẹrụ warị ịnyị! 17Ị da kpehe ẹ-ẹpwụ nya ehile nyanụ yẹkẹẹ, ang myị́ ang ọlẹ ká angịnyị angị imiiye nyị́ myị ju awụlẹ ẹ-ẹpwụ nyanụ lẹ aalẹ, ibeenu oriri nyaa ọọwa nyị ri nya ịlẹhị lẹ. 18Am ayịdang jam ri ibeenu nya ịlọm lẹ. Adam ayịdang ọlẹ kọ tị dum ẹrụ warị tị jam ri ibeenu nyam ịnyịnyị-ịnyịnyị lẹ.”
19Ịnyị, ị wẹ byi iJisọsị yẹkẹẹ, “Ale, adang ọọwa a tị́ ji ene?” iJisọsị wẹ byaa yẹkẹẹ, “Ánụ́ jẹ́ ụma nya ọngọlẹ kaam ayịdang riri jẹ́jẹ ka. Lee, ọ-jẹ́ ụma nya ọngọlẹ ká Adam ọọwa ri ka ịnyịnyị. Ma, ó ri kanụ jẹ́m ayịdang lẹ, ịnọ, anụ ka jẹ́ Ọngọlẹ ká Adam ọọwa ri ịnyịnyị lẹ.”
20IJisọsị juwa ya ẹlẹwẹ jaa ẹ-ẹpwụ nya ube ọlẹ kị kaa ya okpoko nya ọhaha nyaa ju u-ube ịgọgọ ọtụka nya Ohe Oluhye nya ala iJuu. Ụka ọọwa, ọngọngọhẹ á wu iJisọsị kpong-kpong ka. Chajị, ụka nya owuwu nya iJisọsị á pwụ lẹka.
IJisọsị Yẹkẹẹ, Ánụ́ Ka Bam Ka Ẹga Ọlẹ Kam Juwa Jẹ Ka Myị́ Ka
21IJisọsị myịmyị byaa yẹkẹẹ, “M juwa ka rụ hiinu wẹẹ! Ụka ọọwa, anụ ka pịlahị nyam, ma, ánụ tị ka yẹm kaka. Ma, anụ ka gbu ẹ-ẹpwụ nya ịhọbịrị ịhọhọ nyanụ ịwẹ. Ánụ́ ka bam warị wẹ ẹga ọlẹ kam juwa jẹ ka myị́ kpong-kpong ka.”
22Ịnyị, alegbeju nya ala iJuu ịwẹ a yẹkẹẹ, “Ọlẹ kọ wẹẹ yẹkẹẹ, ‘Ánụ́ ka bam warị wẹ ẹga ọlẹ kam juwa jẹ ka myị́ ka,’ wẹ lẹ. Ọọwa tị́ ri yẹkẹẹ, ọ juwa ka rụ kaka ju ịlọmwụ orinwa ẹ-ẹgẹhẹ lẹ, lee?”
23IJisọsị wẹ byaa yẹkẹẹ, “Anụ ayịdang ri aleji. Ma, am lẹ, m tị bwu uhye-ọgba hireji. Anụ ri alodehe ọlẹ. Ma, am ayịdang lẹ, ḿ tị ri alodehe ọlẹ tanụ kpong-kpong ka. 24Ịnyị a du kaam ayịdang byinu yẹkẹẹ, anụ ka gbu ẹ-ẹpwụ nya ịhọbịrị ịhọhọ nyanụ ịwẹ pyii lẹlẹ. Anụ tị ka gbu la ịhọbịrị ịịwa ịnyịlẹhị, ó ri kaanụ ayịdang á myị myị yẹkẹẹ, am kpakpakpa nyaa ri, Amkpaa ọọwa, ịnyịlẹhị lẹlẹ ka.”
25Ị wẹ byoo yẹkẹẹ, “Ahụ, owo tị́ ene?” IJisọsị wẹ byaa yẹkẹẹ, “Am kpakpakpa a ri ọngọọwa ọlẹ kam ya jenu ene-ene bwu ọmwụ ọdada lẹ.” 26IJisọsị myịmyị byaa yẹkẹẹ, “Ịnọ, m ye ala ka ya lụmẹ-lụmẹ u-uhye nyanụ bala ọ-ka ya eje wunu myị́ u-uhye nyaa wẹ! Ma, Ọngọlẹ kọ dum ẹrụ warị tị ri Ọngịnyị nya ẹla nya ịlẹhị. Ẹla ọlẹ kam tị wo bwu ẹga nyamwụ kem, ẹla ọọwa, m kaa ya je alodehe lẹ.”
27Ụka ọọwa lẹ, alegbeju nya ala iJuu ịịwa á wo etu nya ẹla ọọwa jẹ́ yẹkẹẹ, Ohe Oluhye Adịda kpangga, iJisọsị nyaa wẹẹ ya ẹla rụ́ lẹ kpong-kpong ka. 28Ịnyị lẹ, iJisọsị a myịmyị byaa yẹkẹẹ, “Ụka ọlẹ kaanụ ayịdang á wu Ọnyị nya ọngịnyị ehe ọlẹ gu oji kpá u-uhye kpá lẹ aalẹ, anụ ka jẹ́ yẹkẹẹ, am kpakpakpa nyaa ri Amkpaa ọọwa, ịnyịlẹhị lẹlẹ. Anụ ka jẹ́ ịnyịnyị ụka ọọwa yẹkẹẹ, am nyị́ jam họ ịngịngịhyẹ bwula ọngịrị nya ịlọm kem kpong-kpong ka. Ma, jaabwọ ká Adịda ayịdang nyị juwa mẹjẹm kaka ba kem, am nyaa ka bwu ya dodehe ịnyịlẹhị ịnyịnyị lẹlẹ. 29Ọngọlẹ kọ dum ẹrụ warị lẹ, ọ jam tam pyịyọọ. Ọngọọwa á myị tụụbwọ him da ụbwọọmwụ kpong-kpong ka. Chajị, am ayịdang jam kaa họ ang ọlẹ kọ juwa kpọọ ịpyọ ụka wuu.”
30Ịnyị, iru nya angịhyẹ ịlẹ kị wo ẹla oyaya nya iJisọsị ọọwa, a kpa ọkịlẹtụ nyaa wuu myị lọọ ụ-ụwa lẹlẹ.
Ịlọng Ọlala lee Ọnyọhị Oriri Tị́?
31Ụka ọọwa, iJisọsị byi ala iJuu ịịwa ịlẹ kị myị lọọ ụ-ụwa yẹkẹẹ, “Ó ri kaanụ ayịdang á juwa kpa ẹla ọmẹjẹ nyam ọlẹ họ ụkụrwọ ẹ-ẹpwụ nya ọhịhị nyanụ kịlahị-ịlahị lẹ aalẹ, anụ ri angịjụgbẹyị nyam ịnyịlẹhị lẹ. 32Aalẹ, anụ ka jẹ́ ẹla nya ịlẹhị ọlẹ kọ bwu ẹga nya Ohe Oluhye hireji datị lẹ. Aalẹ, ẹla nya ịlẹhị ọọwa tị ka họ kanụ ka la ịlọnụ ịnyịnyị myị́ lẹ.”
33Angịịwa wẹ byi iJisọsị yẹkẹẹ, “Ahị, anyị nya Ebiraham a lẹẹ lẹ. Ahị́ ri ọnyọhị nya ọngọngọhẹ ẹnẹnẹhẹ lẹka! Ee lẹ, ịịyẹ a tị́ ri etu nyọlẹ ká ya wẹ yẹkẹẹ, ahị nyị ka la ịlọhị tịtị mẹ?”
34IJisọsị wẹ byaa yẹkẹẹ, “Nya ịlẹhị-ịlẹhị, m byinu yẹkẹẹ, ọng myị́ ọng ọlẹ kọ họ ang onyobyi lẹ aalẹ, ọnyọhị nya ọhọbịrị ọhọhọ, ọngọọwa a ri lẹlẹ. 35Ọnyọhị ọlọdọdẹpwa á kaa juwa ọdọdẹpwa ọọwa pyịyọọ ka. Ma, ọnyị ọlọdọdẹpwa tị ka juwa ọdọdẹpwa ọọwa pyịyọọ! 36Chajị nya ọọwa lẹ, ó ri ká Ọnyẹwẹ nya Ohe Oluhye ayịdang á họng ká la ịlọng ene lẹ aalẹ, ịlọng ọlala ọọwa ri ịnya ịlẹhị-ịlẹhị lẹ!” 37IJisọsị myịmyị byaa yẹkẹẹ, “Ịnọ, m jẹ́jẹ kanụ ri anyị nya Ebiraham riri! Ma, anụ tị jam tịtọ nyọka nwụm nwụ, chajị, ánụ tịtọ nyọka ye ẹla nyam ọlẹ kam wẹẹ ya jenu kpa họ ụkụrwọ kpong-kpong ka. 38Ẹla ọlẹ kam yẹ ẹ-ẹga nya Adam, kpangga, m wẹẹ ya jenu lẹ! Ẹla ọlẹ kaanụ ayịdang tị, tịtị, juwa wo bwu ẹga nya adanụ anụ, a tịtị wẹ kanụ wẹẹ họ ịnyịnyị lẹlẹ.”
39Ị wẹ byi iJisọsị yẹkẹẹ, “Ebiraham a ri adahị lẹ!” iJisọsị wẹ byaa yẹkẹẹ, “Ó ri kanụ ri anyị nya Ebiraham ịnyịlẹhị lẹ, ịnọ, anụ ka họ ụma nya abwẹla ọ-lala ịnya Ebiraham lẹ. 40Ma, lẹẹlẹẹ lẹ, anụ tị́ yẹ jaabwọ kanụ wẹẹ tịtọ nyọka nwụm, am ọngọlẹ kam wẹẹ ya ẹla nya ịlẹhị ọlẹ kam wo bwu ẹga nya Ohe Oluhye jenu lẹ. Ebiraham á tị họ abwẹla ọlịnyị ọhẹ-lọhẹ kpong-kpong ka. 41Ẹla nya ịlẹhị, m ya lẹ! Ụma nya ang ọlẹ ká adanụ ayịdang họ, ụma nya ang ọọwa pyii anụ wẹẹ họ ịnyịnyị lẹlẹ.” Ị wẹ byi iJisọsị yẹkẹẹ, “A yẹhị lẹẹ lẹ, ahị́ la adịda imiiye ẹnẹnẹhẹ lẹka. Adịda ookpokpo, ahị la lẹ. Ọngọọwa a ri Ohe Oluhye ayịdang lẹ.”
42IJisọsị wẹ byaa yẹkẹẹ, “Ó ri Ohe Oluhye ayịdang mịlẹ-mịlẹ kọ ri adanụ ịnyịlẹhị lẹ, ịnọ, m ka háanụ pyii lẹ. Chajị ẹga nya Ohe Oluhye ọọwa kpangga, m bwu warị lẹ. Ám ayịdang, a tị du ịlọm ẹrụ warị wẹ odehe ọlẹ kpong-kpong ka. Ma, Ohe Oluhye la ịlọmwụ a dum ẹrụ warị lẹ. 43Ó ri kanụ ri anyị nya Ohe Oluhye lẹ, ịịyẹ a tị́ du kanụ tị tị wo etu nya ẹla ọmẹjẹ nyam myịmyị kaka wẹ mẹ? Ang odudu kanụ kaa wo etu nya ẹla nyam myịmyị ka, ri yẹkẹẹ, ánụ nwụlanọ nyọka kpa ọkịlẹtụ ookpokpo ye ẹla nyam juwa kpa họ ụkụrwọ kpong-kpong ka. 44Anyị nya Ohe Onyobyi, anụ ri lẹ! Irya nya adanụ Ohe Onyobyi ọọwa pyii, anụ tị wẹẹ họ ịnyịnyị lẹ! Chajị ọwa ayịdang ri ọngọ nwụ angịnyị bwu ọmwụ-ọmwụ ọdada. Ọ́ tị myị kaa ji oye nya ẹla nya ịlẹhị kpong-kpong ka. Chajị ẹla nya ịlẹhị ọhẹ-lọhẹ á ji ẹpwụ nyamwụ ka. Jaabwọ ká ọnọọkịla omeme kpangga a tọchị ri abwẹla ọhọhọ nya Ohe Onyobyi ọwẹ ayịdang lẹlẹ, ọnọọkịla omeme á ri ịngịngịhyẹ onyeewe nyamwụ kaka. Chajị ọlọnọọkịla bala adịda nya ọnọọkịla omeme kpangga, Ohe Onyobyi ọwẹ a ri lẹ! 45Ma, jaabwọ kaam ayịdang tị jam kaa ya ẹla nya ịlẹhị kem jenu lẹ, ịnyị a du kanụ tịtọ nyọka myị lam kpong-kpong kaka lẹlẹ! 46Oowo lẹpwarịrị nyanụ a tị́ juwa kọ ka ye ụma nya ọhọbịrị ọhẹ-lọhẹ ọlẹ kam họ ka me ụchụ, gbe dodehe jum lẹẹ mẹ? Ee lẹ, ọ tị́, tị tị lanyị kam jam ya ẹla nya ịlẹhị jenu lẹ, kanụ tị myị myị lam kpong-kpong kaka mẹ? 47Ọng myị́ ọng ọlẹ kọ ri Ọnyị nya Ohe Oluhye riri ịnyịlẹhị lẹ aalẹ, ẹla nya Ohe Oluhye, Adamwụ ka họ́ọ pyii lẹ. Ang odudu kanụ wo ẹla nyam juwa kpa họ ụkụrwọ kpong-kpong ka, ri yẹkẹẹ, anụ ayịdang á ri anyị nya Ohe Oluhye ka, ịnyị a du lẹ!”
IJisọsị Bala Ebiraham
48Ụka ọọwa, ala iJuu ịịwa wẹ byi iJisọsị yẹkẹẹ, “Ọlẹ kahị yẹkẹẹ, ahụ ayịdang ri ọla ịSameriya bala ọ-yẹkẹẹ, olegu onyobyi juwa họ tang lẹ, áhị́ me ọnụ ka!”
49IJisọsị wẹ byaa yẹkẹẹ, “Olegu onyobyi ọhẹ-lọhẹ á jam họ tam ka! Ma, Ohe Oluhye Adam ayịdang, m wẹẹ ju ihi lẹ. Ọọwa, anụ a wẹẹ jum ẹpẹpẹ lẹ. 50Ọọwa á tị ri yẹkẹẹ, m juwa charịnya kanụ ka juwa wam, juwa gwogbo ham tị koo! Ma, ọngọ ookpokpo ọhẹ juwa ọlẹ kọ juwa tịtọ kị ka jum ihi pyii. Ọngọọwa ayịdang a ri ọngọlẹ kọ ka chị eje nya ang myị́ ang wuu lẹlẹ. 51Nya ịlẹhị-ịlẹhị, m byinu yẹkẹẹ, ọng myị́ ọng ọlẹ kọ kpa ọkịlẹtụ ookpokpo myị la ẹla nyam lẹ aalẹ, ọngọọwa á ka gbu kpá ẹnẹnẹhẹ kaka.”
52Ala iJuu ịịwa wẹ byoo yẹkẹẹ, “Ẹhẹẹ! Ugbẹnyị, ahị jẹ́ ịnyịlẹhị wẹ yẹkẹẹ, olegu onyobyi a wẹẹ họ tang lẹlẹ! Ebiraham gbu gbalẹ-gbalẹ lẹ. Alọmwụ inyogo nya Ohe Oluhye tị gbu wuu ịnyịnyị lẹ. A tị jẹ́ juwa yẹkẹẹ, ọng myị́ ọng ọlẹ kịị nyị myị la ọwa lẹ aalẹ, ọngọọwa nyị́ ka jẹ́-ẹ kpa igu ka ẹhị nyamwụ kpá ẹnẹnẹhẹ kaka. 53Lee, a tị́ juwa ya kaahụ ayịdang a gụ Ebiraham adahị lẹ mẹ? Ọwa ayịdang tị gbu lẹ. Alọmwụ inyogo nya Ohe Oluhye wuu, tị gbu ịnyịnyị lẹ! Ee lẹ, o-owo a tị́ me irya kaahụ ayịdang ri kpong-kpong?”
54iJisọsị wẹ byaa yẹkẹẹ, “Ó ri am ayịdang, kam jam wahị ha ịlọm wẹẹ, ịnọ, ogbo ogwogwo ha ịlọm ọọwa ka ri ang ododu. Ma, Adam ayịdang a wẹẹ ya ụmụmẹ nyam dodehe lẹ. Ohe Oluhye ọọwa pyii, anụ tị ya wẹ yẹkẹẹ, nyị ri Adịdịwa lẹ. 55Ma, ánụ tị jẹ́ Ọngọlẹ ká Ohe Oluhye ọọwa ri kpangga ka. Am lẹ, m jẹ́ Ọngọlẹ kọ ri yẹẹyẹẹ. Ó ri kam byinu yẹkẹẹ, am ayịdang á jẹ́ Ọngọlẹ ká Ohe Oluhye ọọwa ri kpong-kpong ka aalẹ, m ka ri ọlọnọọkịla lala anụ anụ ayịdang lẹ. Ma, m jẹ́ Ọngọlẹ ká Ohe Oluhye ri. M tị kaa kpa ẹla ọlọnụ nyamwụ họ ụkụrwọ jịra wuu ịnyịnyị. 56Ebiraham adanụ ogogo chị ọkẹkẹnị la oyi nyamwụ lụka ọlẹ kọ juwa ya ẹhị rịrị gbe ẹnụtụrụ ọlẹ kọ ka yẹm. Ụka ọlẹ ká ẹnụtụrụ ọọwa pwụ eji kọ yẹm lẹ, ọ chị ọkẹkẹnị ọtụka-ọtụka ịnyịlẹhị.”
57Ala iJuu ịịwa wẹ byoo yẹkẹẹ, “Ahyu! Kaahụ ayịdang á gu ẹka ohu-iye kụrụ iwo myị́ lẹka wẹẹ, ọọwa lẹ, a dodo jẹ́ yẹ Ebiraham ẹ-ẹhị myị́ lẹlẹ?”
58IJisọsị wẹ byaa yẹkẹẹ, “Nya ịlẹhị-ịlẹhị, m byinu yẹkẹẹ, ene kị ka ma Ebiraham lẹ, am ayịdang juwa lẹ.”
59Ịnyị, ụka ká ẹla ọọwa waa ẹjẹ lụmẹ lẹ, ị go ajwọ kị ka da mịla iJisọsị lẹlẹ. Ma, iJisọsị ayịdang tị jụ kwiikwii gba kpehe bwu ẹpwụ nya ube ịgọgọ ọtụka nya Ohe Oluhye nya ala iJuu ọọwa hyaa.
Currently Selected:
ỊJỌN 8: IBNO
Highlight
Share
Copy
Want to have your highlights saved across all your devices? Sign up or sign in
Igede Bible © The Bible Society of Nigeria, 2019.
