ỊJỌN 10

Oja Ọkpịta nya Ịkpịlọ

1IJisọsị myịmyị byaa yẹkẹẹ, “Nya ịlẹhị-ịlẹhị, m byinu yẹkẹẹ, ọng myị́ ọng ọlẹ kọ jụ bwu ọnụ nya ụgbẹyị kele ka ẹpwụ nya ẹpwang nya ịkpịlọ ka, kọ ri ká ọngọọwa á kpụ uhye bwu ẹga ọkịla kele aalẹ, oloyi, ọngọọwa a ri lẹ! 2Ma, ọngọlẹ kọọwa ayịdang á jụ bwu ọnang nya ụgbẹyị nya ube ọọwa kele ka ẹga nya ịkpịlọ lẹ aalẹ, ọngọọwa a ri ọngọgbikpịlọ ịịwa lẹlẹ. 3Aalẹ, ọngọgbikpịlọ ịịwa kem, ọngọ gbe ọnang nya ụgbẹyị ube ọọwa, a ka wụrụ ụgbẹyị ha lẹ. Aalẹ, ọngọọwa, ịkpịlọ ịlụwa a tị kaa wo omyi nyamwụ ịnyịnyị lẹ chajị, ọngọọwa kaa wụrụ ịkpịlọ nyamwụ ọnyọnyọọnyị ẹnyị lẹ, ọ kaa kpaa kpehe ba ịlọmwụ lẹlẹ. 4Ụka kọ gba ịkpịlọ ịịwa kpehe bwu ẹpwang nyaa kpá lẹ, ọ kaa ji ịlahị nyaa lẹ, ịkpịlọ ịịwa a kaa bọọ jẹ lẹlẹ. Chajị, ị jẹ́ omyi nyamwụ datị. 5Ó ri ká ọngga á kele ka ẹga nya ịkpịlọ ịịwa, ị́ kaa myị-ị ba ọngga ọọwa jẹ ka. Ọkọkọ nya ọọwa lẹ, ị kaa rụnyẹ rụ hyoo. Chajị, ị kaa jẹ́ omyi nya ọngga ọọwa datị hi ịnya ọngọ gbaa gbe.”

6IJisọsị kpa oja ọkpịta ọwẹ ya ẹla taa. Ma, alụwa á tị wo etu nyamwụ jaabwọ kọ ri kpangga datị ka.

IJisọsị a Ri Ọngọgbikpịlọ Ọnyịịla Lẹ

7Ịnyị, iJisọsị a myịmyị byaa yẹkẹẹ, “Am kpakpakpa a ri ọnụ ụgbẹyị o-bwu ka ube nya ịkpịlọ nya Ohe Oluhye lẹ. 8Angị ịkịla ịlẹ wuu kị warị jene nyam, ri aleyi bala alagbụrụ wuu. Ma, ịkpịlọ ịịwa á wo omyi nyaa kpong-kpong ka. 9Am kpakpakpa a ri ọnụ ụgbẹyị o-bwu ka ube nya ịkpịlọ nya Ohe Oluhye ọọwa lẹlẹ. Lẹ, ọng myị́ ọng ọlẹ kọ ka myị-ị bwu ẹga nyam jụ kele ka ube nya ịkpịlọ ọọwa lẹ aalẹ, ọ ka chịda lẹ. Aalẹ, ọngọọwa ka la ọngịrị juwa jụ bwu ọnang nya ube ọọwa kpehe bala ọ-jụ ka ẹpwang, ka juwa tịtọ nya ang oriri jaabwọ kọ họ́ọ kaka ba myị́ ịnyịnyị lẹ. 10Oloyi kaa ka ẹpwa nya ọngịnyị ehe, chajị nyọka hu ang yoyi bwu ụwa bala ọ-nwụ ọngịnyị ịlụwa bala ọ-ka ta ang myị́ ang ịlụwa wuu ayịreji. Ma, am lẹ, m tị warị wẹ odehe ọlẹ, chajị ká angịnyị ehe ka jẹ́-ẹ bwulam la ọhịhị nya Ohe Oluhye, kị ka jẹ́-ẹ la ọhịhị ọọwa mwụ aba ba ịnyị!”

11“Am kpakpakpa a ri ọngọgbikpịlọ ọnyịịla lẹ! Ọngọgbikpịlọ ọnyịịla kaa nwụlanọ nyọka gbu wọnụ nya ịkpịlọ nyamwụ ju. 12Ma, ọngọlẹ kị tị diro-diro kaka gbe ịkpịlọ nya okpoko, kọọwa ayịdang á la ịkpịlọ ịịwa ka lẹ, ụka kọ yẹ odọmwụu kọ juwa warị, ọ kaa rụnyẹ rụ hi ịkpịlọ ịịwa. Ọọwa lẹ, odọmwụu ọọwa, a kaa kele kaka wu ịkpịlọ ịịwa bala o-nyaa epepe wuu lẹlẹ. 13Ọngọlẹ kị diro-diro kaka gbe ịkpịlọ, kaa rụnyẹ rụ ịnyị, chajị, ọwa ayịdang, á kaa myị-ị me irya, juwa kpahị ju ịkpịlọ ịịwa yẹẹyẹẹ kpong-kpong ka, a du lẹ. 14Am kpakpakpa a ri ọngọgbikpịlọ ọnyịịla ọọwa lẹlẹ. Ịkpịlọ nyam jẹ́m datị hi angịkịla. Am ayịdang tị tịtị jẹ́ ịkpịlọ nyam ịịwa yẹẹyẹẹ. 15Chajị, ịnyịnyị Adịda ayịdang a jẹ́m yẹẹyẹẹ bala, am, ọ-tịtị jẹ́ Adam yẹẹyẹẹ lẹlẹ. Am ayịdang nwụlanọ kam ka gbu wọnụ nya ịkpịlọ nyam ịịwa ju lẹ. 16Ịkpịlọ nyam ịkịla ịhyẹ juwa, ịlẹ kị ri ebwo nya ịkpịlọ ịlẹ ka. M ka kpa ịkpịlọ ịịwa warị kaka jula ịkịla ịlẹ ịnyịnyị. Ịkpịlọ ịịwa tị ka wo omyi nyam ịnyịnyị. Ọọwa lẹ, ebwo nya ịkpịlọ imimiiye ịwẹ a ka yẹjula awụlẹ lẹ, ị ka ji ekpeleji nya ọngọgbikpịlọ ookpokpo ịnyịnyị lẹlẹ.”

17“Ang odudu kam há Ohe Oluhye Adịda lụmẹ ri chajị nyọlẹ kaam ayịdang myị hu ọhịhị nyam deeji ga ha igu. Chajị kam ka myịmyị-ị̀ hu ọhịhị nyam ọọwa tịrẹkpẹ bwu eji. 18Ọngọngọhẹ ọkịla á juwa ye ọhịhị nyam ọọwa bwu ẹga nyam ka. Ma, am ayịdang a wẹẹ tụụbwọ hyoo deeji la ịlọm lẹ. Chajị, m la ọngịrị nyọka tụụbwọ hi ọhịhị nyam deeji la irya nya ịlọm myị́ bala ọ-ka hwoo bwu eji myị́ ịnyịnyị. Chajị, ịnyị, Ohe Oluhye Adam, a dam ehile yẹkẹẹ, am nyị họ lẹ.”

19Ụka ọọwa lẹ, ala iJuu ịlụwa a chị ịlaa ebwo imiiye jaabwọ ká irya omeme nyaa ọlẹga nya iJisọsị gu ene hi awụlẹ, chajị nya ala ịlẹ kọ ya wẹ lẹlẹ. 20Iru nya angịnyị lẹpwụ nyaa juwa yẹkẹẹ, “Olegu onyobyi a wẹẹ họ ta ọlẹng ọwẹ lẹ, ọlụla, ọ ri lẹ. Ịịyẹ a tị́ du kanụ dọmwụ juwa ke ụrụ la ẹla oyaya nyamwụ kpong-kpong?” 21Ma, angịkịla juwa yẹkẹẹ, “Eheehe! Anyị, ọngọlẹ ká olegu onyobyi juwa wu, a tị́ ka jẹ́-ẹ juwa ya ẹla yẹẹyẹẹ ịịwẹ myị́? Anụ ya ká olegu onyobyi ka jẹ́-ẹ họ alidu uda nya idu ọkpụkpụ nyaa myị́?”

Ala iJuu Pwa IJisọsị

22Ụka ọọwa, ang oriri ọtụka-ọtụka nya ala iJuu ọhẹ juwa i-iJerusalẹm. Ụka ọọwa ri ụka nya alogo ọtụka-ọtụka ọlẹ kị wụrụ “iwinta.” Ala iJuu kaa họ ang oriri ọọwa nya ọ-kpa kpịtịya nya ụka ọlẹ kị chị ịgọgọ ju ube ịgọgọ ọtụka nya Ohe Oluhye nyaa. 23IJisọsị juwa jẹdịyẹ tụ ọnụụkpa ọlẹ kị wụrụ ọnụụkpa nya iSolomọn ụ-ụwa u-ube ịgọgọ ọtụka nya Ohe Oluhye nya ala iJuu ọọwa da. 24Ọọwa lẹ, ala iJuu ịhyẹ a kele kaka dagaga ju iJisọsị lẹ, ị juwa ya ẹla tọọ yẹkẹẹ, “A tị́ ka tụụbwọ hiihi ẹ-ẹpwụ nya ukpowu chajị nya ịlọng tata kaka ba anyị? Ya ẹla nya ịlẹhị jehi alẹ mẹ! Ahụ kpakpakpa a ri ịKịrayịsị ọọwa lẹ?”

25IJisọsị wẹ byaa yẹkẹẹ, “M tị́ ya jenu ene-ene lẹ. Ma, ánụ tị myị kpa ọkịlẹtụ ookpokpo myị lam kaka. Ụkụrwọ ẹbyẹbyị ịlẹ kam wẹẹ kpa ọngịrị nya Ohe Oluhye Adam họ wuu la ịlaa, a ri ibeenu nyam lẹ! 26Ma, anụ ayịdang á tị myị myị lam kpong-kpong kaka. Chajị, ánụ ri ịkpịlọ nyam ka, ịnyị a du lẹ! 27Angịlẹ kị ri ịkpịlọ nyam kaa wo omyi nyam. Am ayịdang tị jẹ́ ịkpịlọ nyam yẹẹyẹẹ. Ịkpịlọ ịịwa tị kaa bam jẹ ịnyịnyị. 28M ya ọhịhị ọmyịmyị-ka haa lẹ. Ịwa ayịdang á ka gbu kpá ẹnẹnẹhẹ kaka. Ọngọngọhẹ á tị jẹ́-ẹ jwaa gbile kpa rụ la agbụrụ bwu ẹpwụtụbwọ nyam myị́ kpong-kpong kaka ịnyịnyị. 29Ohe Oluhye Adam ọlẹ kọ kpa angịwẹ wam a ri Agụgụ ọlẹ kọ gụ ọng myị́ ọng wuu lẹlẹ. Ọngọngọhẹ á juwa ọlẹ kọ ka jụ angịịwa gbile kpa rụ la agbụrụ bwu ẹpwụtụbwọ nya Adịda ọọwa myị́ kpong-kpong kaka. 30Am bala Adịda ọọwa ayịdang tị ri ọngịnyị ọngọ ookpokpo.”

31Ọọwa lẹ, ala iJuu ịịwa a go ajwọ myịmyị, ịnọ, kị ka da mịla iJisọsị lẹlẹ. 32IJisọsị wẹ byaa yẹkẹẹ, “Iru nya ụkụrwọ ịnyịịla lụmẹ-lụmẹ ịlẹ kam họ ẹ-ẹpwarịrị nyanụ bwula ọngịrị nya Adam lẹ, oyina lẹpwụ nyaa, anụ tị́ tịtọ nyọka da ajwọ nwụm chajị nyamwụ kpong-kpong?”

33Ala iJuu ịịwa wẹ byoo yẹkẹẹ, “Áhị́ tịtọ nyọka da ajwọ nwụng, chajị nya ụkụrwọ ọnyịịla ka! Ma, chajị nya ẹla o-ya pyị ẹ-ẹga nya Ohe Oluhye kem ịnyị! Chajị, ahụ ọngọlẹ ká ri ọngịnyị ehe ọlam-ọlam, a tị mwọọgịlẹ juwa hu ịlọng lala Ohe Oluhye ayịdang.”

34IJisọsị wẹ byaa yẹkẹẹ, “Ị tị́ da kpehe rụ́ angịnyị ehe ẹ-ẹpwụ nya ụpwụ nya ehile nyanụ ẹ-ẹgẹhẹ yẹkẹẹ, ‘Ọng myị́ ọng lẹpwụ nyanụ wuu ri Ohe lẹ!’ 35Ịnọ, angịlẹ kị juwa kpa ụrụ wo ẹla nya Ohe Oluhye kem, a wẹ ká Ohe Oluhye ayịdang wụrụ Ohe wẹ ẹ-ẹgẹwẹ lẹ! Ahị tị jẹ́ yẹkẹẹ, ẹla myị́ ẹla ọlẹ ká Ụpwụ Ịgọgọ á ya lẹ aalẹ, ẹla ọọwa ri ẹla nya ịlẹhị ọ-pyịyọọ gbe oyi myị́ oyi lẹ. 36Am ayịdang lẹ, Ohe Oluhye Adịda a tị chụm, dum ẹrụ lẹẹ warị wẹ odehe ọlẹ lẹ. Ee lẹ, anyị, anụ tị́ ka jẹ́-ẹ yẹkẹẹ, am nyị juwa ya ẹla pyị Ohe Oluhye chajị nyọlẹ kam yẹkẹẹ, am kpakpakpa a ri Ọnyẹwẹ nya Ohe Oluhye lẹlẹ, tị tị mẹ? 37Ó ri kam juwa họ ụma nya ụkụrwọ ọ-lala ịnya Adam Ohe Oluhye kaka lẹ aalẹ, anụ myị lam kaka. 38Ma, ọ́ tị ri ụma nya ụkụrwọ ị-lala ịnya Ohe Oluhye ọọwa kam lẹẹ họ ịnyịlẹhị lẹ aalẹ, ó riri kanụ ka myị-ị myị lam wẹwẹ ka aalẹ, anụ tụmwụ-tụmwụ myị la ụkụrwọ ẹbyẹbyị ịịwa, chajị kanụ ka jẹ́-ẹ jẹ́ myịmyị kpụrụrụ yẹkẹẹ, Ohe Oluhye Adịda nyị jam ẹ-ẹpwụ nyam ịnyịlẹhị bala o-ri yẹkẹẹ, am ayịdang nyị tị tịtị juwa ẹ-ẹpwụ nyamwụ ịnyịlẹhị ịnyịnyị mẹ.”

39Angịwẹ myịmyị juwa maga kị ka wu iJisọsị. Ma, iJisọsị tị gwaa be ụ-ụwa. 40IJisọsị rụ bwu ẹgẹwẹ kpoye nya Ihu ịJọdan kele ka ẹga ọlẹ ká ịJọn hụ juwa hụ angịnyị enyi Ohe nya ọgbanyẹ-ọgbanyẹ. Ịnyị, iJisọsị a hụwa ẹ-ẹga ọọwa lẹlẹ. 41Iru nya angịnyị lụmẹ-lụmẹ ba iJisọsị kele ka ẹga ọọwa. Angịịwa juwa yẹkẹẹ, “O ri nya ịlẹhị, ịJọn ọngọ hụ enyi Ohe lẹ, ọ́ họ ụkụrwọ ẹbyẹbyị ịtụka-ịtụka ka! Ma, ẹla myị́ ẹla ọlẹ kọ tị ya wuu rụ́ ọnyị ọlẹng ọlẹ lẹ, ọ ri nya ịlẹhị.” 42Ọọwa lẹ, iru nya angịnyị lụmẹ-lụmẹ a myị la iJisọsị la ọkịlẹtụ ookpokpo ẹ-ẹga ọọwa lẹlẹ.

Currently Selected:

ỊJỌN 10: IBNO

Highlight

Copy