ỊJỌN 11

Igu Ogbugbu nya ILasarọsị

1Ọlẹng ọhẹ juwa ọlẹ ká ẹdụrụ jụ lụmẹ e-epweji nya ịBẹtanị. Ẹnyị nyamwụ ri ịLasarọsị. ỊBẹtanị ọwẹ a ri epweji nya iMeri bala ịMata anyịnamwụ anyang lẹ. 2ỊLasarọsị ọọwa ọlẹ ká ẹdụrụ jụ, a ri ọnyịnịna ọlẹng nya iMeri ọwẹ lẹ. IMeri ọọwa a ri ọngọlẹ kọ hu ida ochoru kwọkwọ yẹ hụ iJisọsị a-ata, juwa kpa inyi nyamwụ yịlaa lẹ. 3Ịnyị lẹ, anyịnịna anyang nya ịLasarọsị ịwẹ a du ẹrụ tọ iJisọsị kaka byoo yẹkẹẹ, “Ọngọlahị, ẹdụrụ jụ ịLasarọsị ọnyịnahị ọlẹng ọlẹ kọ háng lụmẹ jam lẹẹlẹẹ!”

4Ụka ká iJisọsị wo ẹla ọọwa, ọ yẹkẹẹ, “Ẹdụrụ nya ịLasarọsị ọwẹ á ri ẹdụrụ nya igu ka. Ma, o-ya dodehe nya ẹdụrụ ọọwa ka kpa ogbo ogwogwo kịla Ohe Oluhye. Ẹdụrụ ọọwa ka họ ká angịnyị ka juwa gwogbo ha Ọnyẹwẹ nya Ohe Oluhye ịnyịnyị.”

5ỊMata bala iMeri ọnyịnamwụ bala ịLasarọsị ịwẹ wuu há iJisọsị nya ịlẹhị-ịlẹhị lụmẹ. 6Ịnyị, ụka ká iJisọsị wo ẹla chajị nya ẹdụrụ nya ịLasarọsị ọwẹ lẹ, ọ myịmyị hụ ẹ-ẹga ọọwa lala ụtụrụ imiiye lẹlẹ. 7Ụka ká ụtụrụ imiiye ịịwa chịpwụrụ kpá, iJisọsị byi angịjụgbẹyị nyamwụ yẹkẹẹ, “Anụ kẹwẹ kahị rụ tịrẹkpẹ ka ọpyị nya iJudiya mẹ.”

8Angịjụgbẹyị nyamwụ wẹ byoo yẹkẹẹ, “Ọngọlahị, ọ́ tata nyọlẹ ká ala iJuu ịlụwa maga nyọka da ajwọ nwụng lẹka. Ọọwa lẹ, a ka myịmyị-ị̀ tịrẹkpẹ rụ kele dodo lẹlẹ?”

9iJisọsị wẹ byaa yẹkẹẹ, “Awa iwo kụrụ imiiye, ahịgboo nya ahị ọpyẹpyẹ a kaa la ka? Lẹ, ụka ká ọngịnyị á juwa jẹdịyẹ ẹ-ẹpwụ nya o-hwoo nya ahịgboo nya ahị ọpyẹpyẹ lẹ, ọ́ kaa jẹ́-ẹ chị ụchụụ ẹ-ẹgẹgẹhẹ kaka. Chajị, ahịgboo olodehe ọlẹ kaa dọọ ụbwọ du kọ jẹ́-ẹ yẹ ụgbẹyị ọlẹ kọ juwa jẹ bwu yẹẹyẹẹ. 10Ma, ọ́ tị ri ká ọngịnyị á juwa jẹdịyẹ ẹ-ẹpwụ nya ukpowu nya odu ohihi, ọngọọwa kaa chị ụchụụ ụ-ụgbẹyị, chajị ahịgboo ọhẹ-lọhẹ á juwa họọ ụka ọọwa kpong-kpong kaka.” 11Ụka ká iJisọsị ya ala ịwẹ kpá wuu lẹ, ọ myịmyị byaa yẹkẹẹ, “ịLasarọsị oligu nyahị lalẹẹ nune lẹ! Ma, m tị ka kele ka ụwa, chajị kam ka chọọ ahị-une, wuloo eji lẹ.”

12Angịjụgbẹyị nyamwụ wẹ byoo yẹkẹẹ, “Ọngọlahị, ó ri kọ juwa nune lẹ aalẹ, ọ tịtị ka la gogo bwula ọọwa lẹ.”

13Ma, u-une ọnọnọ ọlam-ọlam ọlẹ, iJisọsị a tị ya ẹla rụ́ jaabwọ ká angịjụgbẹyị nyamwụ me irya ka. Igu ogbugbu nya ịLasarọsị, iJisọsị a ya ẹla rụ́ lẹ. 14Ọọwa lẹ, iJisọsị a ya dodehe gede-gede je angịjụgbẹyị nyamwụ yẹkẹẹ, “ịLasarọsị gbu lẹ! 15Ma, m tị chị ọkẹkẹnị o-oluhye nyanụ, chajị am ayịdang á juwa bwu ọmwụ ọdada ka lẹ, ọọwa ka họ kanụ ka la ọmyịmyị la ọkịlẹtụ ookpokpo myị́ ụ-ụwa. Anụ kẹwẹ kahị kele ka ẹga nyamwụ mẹ.”

16Ụka ọọwa, ịTọmasị ọlẹ kị wụrụ anyewa, byi angịjụgbẹyị nya iJisọsị ihihi yẹkẹẹ, “Anụ kẹwẹ kahị ba Ọngọlahị kele ka iJudiya, chajị kahị ka gbu tọọ ụ-ụwa ịnyịnyị mẹ.”

IJisọsị A Ri Owuleji Bwula Igu Bala Ọhịhị Ayịdang Lẹ

17Ịnyị, ụka ká iJisọsị anyị pwụ ụwa lẹ, angịhyẹ a họ ká iJisọsị jẹ́ yẹkẹẹ, ịLasarọsị nyị gbu tata, kpụ, nyị jwoo eji lala ụtụrụ ine kẹkpẹ lẹlẹ. 18Epweji nya ịBẹtanị ọwẹ lala ịmalị imiiye kem bwu epweji nya iJerusalẹm. 19Chajị nya ọọwa lẹ, iru nya ala iJuu lụmẹ-lụmẹ bwu epweji nya iJerusalẹm kaka chị iMeri bala ịMata ẹgba chajị nya igu nya ọnyịnaa ọlẹng ọọwa.

20Ụka ká iMata wo oja yẹkẹẹ, iJisọsị nyị juwa warị lẹ, ọ kele kaka tọọ ụ-ụgbẹyị lẹlẹ. Ma, iMeri ọnyịnamwụ tị hi juwa ẹ-ẹpwa. 21Ụka ká ịMata pwụ ẹga nya iJisọsị lẹ, ọ byoo yẹkẹẹ, “Ọngọlahị ee, ịnọ, ó ri ká warị tọ ịLasarọsị a-ahị lẹ, ịnọ, ịLasarọsị á tụtụm ka gbu kaka. 22Ma, m tị jẹ́ yẹkẹẹ, ang myị́ ang ọlẹ ká dọmwụ ka bịlẹ Ohe Oluhye lẹẹlẹẹ, Ohe Oluhye ka họ ang ọọwa hang myị́ wẹẹ!”

23IJisọsị wẹ byoo yẹkẹẹ, “ịLasarọsị ọnyịnang ọlẹng ka wuleji bwula igu, juwa hịhị myịmyị pyii.”

24ỊMata wẹ byoo yẹkẹẹ, “Ee, Ọngọlahị, m jẹ́ kọ ka wuleji juwa hịhị myịmyị la ẹnụtụrụ ohyẹẹkpẹ-ẹkpẹ ịnyịlẹhị wẹẹ.”

25IJisọsị wẹ byoo yẹkẹẹ, “Am kpakpakpa a ri owuleji bwula igu ayịdang bala ọhịhị lẹ! Ọng myị́ ọng ọlẹ kọ myị lam lẹ, ó riri kọ gbugbu kpá, ọ ka myịmyị wuleji bwula igu, juwa la ọhịhị ọkịla. 26Ọng myị́ ọng ọlẹ kọ tị juwa hịhị, kọ myị lam lẹ aalẹ, ọngọọwa á ka gbu kpá ẹnẹnẹhẹ kaka. A myị la ẹlẹwẹ lẹ, ịMata?”

27ỊMata wẹ byi iJisọsị yẹkẹẹ, “Ee Ọngọlahị, m myị nya ịlẹhị-ịlẹhị yẹkẹẹ, ahụ kpakpakpa a ri ịKịrayịsị Ọnyẹwẹ nya Ohe Oluhye ọlẹ kọ du warị wẹ odehe ọlẹ lẹ.”

IJisọsị Je Ida

28Ụka ká ịMata wẹ ẹlẹwẹ ịnyị kpá lẹ, ọ rụ kele ka ẹga nya iMeri ọnyịnamwụ lẹ, ọ wụrwọọ ụbwọọmwụ-ụbwọọmwụ kaka byoo yẹkẹẹ, “Ọngọlahị warị lẹ! Ọ lalẹẹ be ẹkọ wụrụng.”

29Ahyaahị ká iMeri wo ẹlẹwẹ lẹ, ọ wuleji lagaga juwa kele kaka tọ iJisọsị ụ-ụgbẹyị lẹlẹ. 30Ụka ọọwa lẹ, iJisọsị juwa ẹ-ẹga ọlẹ ká ịMata yọọ wẹẹ, ọ́ pwụ epweji nyaa ayịdang mịlẹ-mịlẹ lẹka. 31Ahyaahị ká ala iJuu ịlẹ kị juwa ẹ-ẹpwang ta iMeri, juwa kpọ́ọ ẹjẹ, yẹ jaabwọ ká iMeri wuleji lagaga juwa kpehe lẹ, ị juwa dịrọọ ẹ-ẹkpẹ-ẹkpẹ lẹlẹ. Chajị, ị me irya yẹkẹẹ, iMeri nyị juwa kele ka ẹga nya iworu kaka jida ụ-ụwa.

32Ụka ká iMeri pwụ ụwa kọ yẹ iJisọsị lẹ, ọ hị da keji a-ata nya iJisọsị lẹ, ọ byoo yẹkẹẹ, “Ọngọlahị, ó ri ká warị tọ ịLasarọsị ọnyịnam a-ahị lẹ, ịnọ, ịLasarọsị a tụtụm ka gbu kaka.”

33Ụka ká iJisọsị yẹ iMeri kọ juwa jida bala ala iJuu ịkịla ịlẹ kị kpọọ chị kị juwa jida tọọ ịnyịnyị lẹ, ọ gu iJisọsị ọ-ọkịlẹtụ lụmẹ-lụmẹ lẹ, ọ juwa chị́ arụ ẹ-ẹpwụ nya olegu nyamwụ ụ-ụwa lẹ, 34ọ taa wo yẹkẹẹ, “Ale, ị tị́ ju ịLasarọsị eji?” Ị wẹ byoo yẹkẹẹ, “Ọngọlahị, kẹwẹ kaka yẹ ẹga ọọwa lẹẹ mẹ.”

35IJisọsị jida. 36Ịnyị, ala iJuu ịlẹ kị yẹ iJisọsị ụ-ụwa a juwa yẹkẹẹ, “Oo! Anụ yẹ jaabwọ ká ọlẹng ọlẹ la ọháha ẹ-ẹga nya ịLasarọsị alẹ wẹẹ!” 37Ma, angịkịla nyaa juwa yẹkẹẹ, “Ọ-ọlẹng ọlẹ kọ kaa họ alidu uda nya idu ọkpụkpụ nyaa myị́ a lẹẹ ká? Anụ ya kọ ri kọ warị tọ ịLasarọsị a-ahị lẹẹ, ịnọ, kọ ka họ ká ịLasarọsị ka be ẹgba nya igu ogbugbu ọlẹ myị́ lẹẹ lẹ ka?”

IJisọsị Wule ỊLasarọsị Eji Bwula Igu

38Ụka ká iJisọsị myịmyị chị́ arụ ẹ-ẹpwụ nya olegu nyamwụ lẹ, ọ kele ka ẹga nya iworu nya ịLasarọsị lẹlẹ. Iworu ọọwa lala ụgbụ ọtụka-ọtụka. Ị ya ẹjwọ ọtụka ọhẹ tụ ọnụ nya ụgbẹyị nya iworu ọọwa ku. 39IJisọsị byi angịlẹ kị juwa ụ-ụwa yẹkẹẹ, “Anụ kele kaka rị ẹjwọ ọwẹ hi ọnụ nya ụgbẹyị nya iworu mẹ.” ỊMata ọnyịnịna ọnyang nya ogu ọwẹ, byi iJisọsị yẹkẹẹ, “Ọngọlahị, ọ ka juwa nyi oru lụmẹ lẹẹlẹẹ lẹ! Chajị, o-gbu ri ụtụrụ ine lẹpwụ-lẹpwụ kẹkpẹ lẹ!”

40IJisọsị wẹ byoo yẹkẹẹ, “M tị́ bying yẹkẹẹ, ó ri ká ka myị-ị la ọmyịmyị lẹ aalẹ, a ka yẹ ụkụrwọ ẹbyẹbyị nya Ohe Oluhye lẹ?” 41Ịnyị, ị kele kaka rị ẹjwọ ọọwa hi ọnụ nya iworu nya ịLasarọsị lẹlẹ. Ịnyị, ụka ká iJisọsị hu ẹhị nyamwụ hwaa rịrị ka uhye-ọgba lẹ, ọ yẹkẹẹ, “Ohe Oluhye Adịda, m jing obe chajị nyọlẹ ká wo omyi nyam lẹ. 42M jẹ́ kaahụ Ohe Oluhye kaa wo omyi nyam ụka myị́ ụka wuu. Ma, m tị jam ya ẹla ọlẹ lẹẹlẹẹ, chajị nya angịlẹ kị godayị rịrị lẹẹ ẹ-ẹgẹlẹ lẹẹlẹẹ. Chajị kịịwa ayịdang ka jẹ́-ẹ kpa ọkịlẹtụ ookpokpo myị yẹkẹẹ, Ahụ nyaa dum ẹrụ warị ịnyịlẹhị lẹ.” 43Ụka ká iJisọsị ya ịnyị kpá lẹ, ọ be ẹkọ wụrụ ịLasarọsị la omyi o-gboo yẹkẹẹ, “ịLasarọsị! Gba kpehe warị lẹẹlẹẹ mẹ!” 44Ịnyị, ogu ịLasarọsị ọọwa a wuleji bwula igu gba kpehe lịpwụ-lịpwụ ịlẹ kị ya rọọ a-abwọ bala ata nyamwụ wuu bala ịpwụ ịlẹ kị ya chị aba woo a-ahị nyamwụ wuu ịnyịnyị lẹlẹ. Ọọwa lẹ, iJisọsị a byi angịlẹ kị juwa ụ-ụwa yẹkẹẹ, “Anụ kele kaka yi ịpwụ ịwẹ hyoo kanụ tụ hyoo kọ rụ mẹ.” Ọọwa lẹ, ị họ ịnyị lẹlẹ.

Ị Me Obyi nya Igu nya iJisọsị

(ịMatiyu 26:1-5; ịMakị 14:1-2; iLuku 22:1-2)

45Iru nya ala iJuu ịhyẹ lụmẹ-lụmẹ ịlẹ kị kele kaka chị iMeri anyị ẹgba kị yẹ ụkụrwọ ẹbyẹbyị nya owuleji bwula igu nya ịLasarọsị ọwẹ kpa ọkịlẹtụ nyaa wuu myị la iJisọsị. 46Ma, angịkịla nyaa rụ kele kaka tịrị ọnụ, jaabwọ ká iJisọsị bwu họ ụkụrwọ ẹbyẹbyị ọọwa wuu ya je ala ịFarisii. 47Ọọwa lẹ, ala ịFarisii bala alegbeju nya angịkiliya nya Ohe Oluhye anyị wuu, a kele kaka la ọjịra-jịra lẹ, ị juwa yẹkẹẹ, “Anyị, ahị tị́ ka họ kpá lẹẹ mẹ? Anụ yẹ iru nya ụkụrwọ ẹbyẹbyị ịlẹ ká ọlẹng ọwẹ wẹẹ họ ịnyịnyịịnyị wẹẹ. 48Ó ri kahị hu ọlẹng ọwẹ ujiji chịng lẹ aalẹ, angịnyị wuu a ka myị lọọ ịnyịlẹhị lẹlẹ. Ụka ọọwa lẹ, ịgọmenti nya ala iRom a ka warị kaka ta ube ịgọgọ ọtụka nya Ohe Oluhye nyahị ọlẹ ayịreji bala ọ-ka ta ụpwọma nyahị wuu lẹpwụ-lẹpwụ ayịreji ịnyịnyị lẹlẹ.”

49Ọngọhẹ lẹpwụ nyaa ọlẹ kị wụrụ ịKayafasị, kọọwa a ri olegbeju ọgbahị nya angịkiliya nya Ohe Oluhye wuu la ẹka ọọwa, wẹ byaa ịwa wuu yẹkẹẹ, “Ánụ́ dọmwụ jẹ́ ịngịngịhyẹ kpong-kpong ka! 50Ọ ri anụ ayịdang, á jẹ́ yẹkẹẹ, nyị ka hiigu hahị gụ nya ọngọ ookpokpo ọ-ka gbu wọnụ nyahị ahị aluche wuu ju, gụ ụpwọma nyahị wuu lẹpwụ-lẹpwụ ọ-ka ta ayịreji ka?”

51ỊKayafasị á ya ẹlẹwẹ bwula irya nya ịlọmwụ kpong kpong kem ka. Ma, jaabwọ kọọwa a ri olegbeju ọgbahị nya angịkiliya nya Ohe Oluhye wuu la ẹka ọọwa lẹ, ọọwa, a du kọ wẹẹ yẹ ọmwụ dodehe yẹkẹẹ, iJisọsị nyị ka gbu igu wọnụ nya ụpwọma nyịwa wuu ju lẹlẹ. 52Ụ-ụpwọma nyaa ịwa kem dọmwụ, iJisọsị a gbu igu ọọwa wọnụ nyaa ju ka. Ma, igu ogbugbu nyamwụ ọọwa ka họ kị ka kpa anyị nya Ohe Oluhye ịlẹ kị juwa ẹ-ẹga la datị-datị nya odehe ọlẹ wuu kaka yẹjula awụlẹ la ẹnyị nya Ohe Oluhye ịnyịnyị.

53Bwu ẹnụ ọọwa kele kịlahị lẹ, angịwẹ a juwa me obyi jaabwọ kị ka bwu nwụ iJisọsị myị́ lẹlẹ. 54Bwula ọọwa, iJisọsị ayịdang á myị jẹdịyẹ i-iJudiya la iru nya angịnyị jẹ́ kaka, ọ rụ kele ka epweji ọhẹ ọlẹ kị wụrụ Ifurem kaka hụwa bala angịjụgbẹyị nyamwụ lẹlẹ. Ifurem ọọwa ju ugbileji nya ọpyị ochoru ọhẹ chwẹẹ.

55Ụka ká ụka nya Ang Oriri Ọchịpwụrụ nya ala iJuu juwa ju chwẹẹ, iru nya angịnyị lụmẹ-lụmẹ juwa bwu epweji ichiche kele ka iJerusalẹm, kaka họ ọhọhọ nya ọ-la cheri-cheri ị-ịlahị nya Ohe Oluhye ene ká ụka nya ang oriri ọtụka ọọwa ayịdang ka pwụ. 56Ụka ọọwa, alegbeju nya ala iJuu juwa tịtọ nya iJisọsị. I juwa tọ awụlẹ wo u-ube ịgọgọ ọtụka nya Ohe Oluhye nyaa yẹkẹẹ, “Anyị, anụ tị́ me irya? Anụ ya ká ọlẹng ọwẹ á ka wẹ ọjịra-jịra ọlẹ lẹẹ ka?” 57Alegbeju nya angịkiliya nya Ohe Oluhye bala ala ịFarisii da angịlẹ kị juwa ehile yẹkẹẹ, ọng myị́ ọng ọlẹ kịị nyị jẹ́ ẹga ọlẹ ká iJisọsị nyị́ ji lẹ aalẹ, nyị ya je ịwa chajị kịịwa nyị ka jẹ́-ẹ kaka wu iJisọsị ụ-ụwa mẹ lẹlẹ.

Currently Selected:

ỊJỌN 11: IBNO

Highlight

Copy