ỌMWỤ ỌDADA 36

Any Ịtụma nya Ịsọ

1Ọlẹ a ri oja nya anyị nya Ịsọ ọlẹ ká ẹnyị ọkịla nyamwụ ri Ẹdọm lẹ. 2Ịsọ ye ịhụ nyamwụ wuu bwu ọpyị nya ala iKenan. Ẹnyị nya ịhụ nyamwụ ịịwa a lẹẹ lẹ: Ada ọnyị nya Elọn ọla iHiiti bala Oholibama ọnyị nya Ana ọlẹ ká adamwụ ri iSibyọn ọla iHivi ịnyịnyị. 3Ahụ ọhata nya Ịsọ ri ịBasẹmatị ọnyị nya Ichimẹlụ. Ọnyịnịna nya ịBasẹmatị ọlẹng ri iNebayotu. 4Ada ma Elifasị ha Ịsọ. ỊBasẹmatị ma iReyuwẹlụ ha Ịsọ. 5Oholibama ma iJewuchi bala ịJalam bala iKora ha Ịsọ ịnyịnyị. Ịịwẹ anyị alẹng nya Ịsọ ịlẹ kọ ma ọ-ọpyị nya iKenan a la lẹ.

6Ụka kọ nụwa ịnyịnyịịnyị, Ịsọ hu ang ẹdịyẹ bala ịhụ nyamwụ wuu bala anyị nyaa anyang bala alẹng wuu bala alọdọdẹpwa nyamwụ ịkịla wuu rụ kaka kụ ẹpwa hwẹẹẹ, hi iJekọbụ ọnyịnamwụ. Ọ go ịna bala iyo ịlẹpwa ịkịla ịlẹ kọ la bala ang myị ang nyamwụ ịkịla wuu kpa ba ịlọmwụ rụ ka ọpyị nya iKenan ịnyịnyị. 7Ang odudu ká Ịsọ bala iJekọbụ chị ebwo hi awụlẹ ri chajị ịwa angị imimiiye kpụ ụdụ la ịna bala ịmwụ lụmẹ gbee ká amẹ ịlẹga ọlẹ kị kụ á nwa ịna bala ịmwụ nyaa oriri kaka. 8Ọọwa, Ịsọ a kele kaka kụ ẹpwa ẹ-ẹpwa ịgbọdọ ọlọpyị nya ala ịSẹyii. Ẹnyị ọkịla nya Ịsọ à ri Ẹdọm lẹ.

9Anyị nya Ịsọ adịda ogogo nya ala Ẹdọm ịlẹ kị kụ ịgbọdọ ịlọpyị nya ịSẹyii a lẹẹ lẹ. 10Ẹnyị nyaa ri Elifasị ọnyị ọlẹng ọlẹ ká Ada ma ha Ịsọ. IReyụwẹlụ ọnyị ọlẹng ọlẹ ká ịBasẹmatị ahụ oheeye nya Ịsọ ma họọ. 11Elifasị a ma anyị alẹng ịlẹ lẹ: ịTẹman bala Ọmaa bala iSefo bala ịGatam bala ịKẹnasị. 12Ahụ-ọnchẹ ọlẹ ká Elifasị ye ọhẹ kị wụrụ iTimna ma ọnyị ọlẹng ọhẹ họọ ịnyịnyị. Ẹnyị nya ọnyị ọọwa ri Amalẹkị. Ịịwẹ anyị i-bwu ẹpwụ nya Ada ahụ nya Ịsọ a la lẹlẹ. 13Anyị alẹng nya iReyuwẹlụ a lẹẹ lẹ: ịNahatị bala ịSẹra bala ịChama bala iMisa. Ịịwẹ anyị ịlẹ kị bwu ẹpwụ nya ịBasẹmatị ahụ oheeye nya Ịsọ a la lẹlẹ. 14Oholibama ahụ ọhata nya Ịsọ ọlẹ kọ ri ọnyị nya Ana, ọnyị ọlẹng nya iSibyọn ma anyị alẹng angị ịta ha Ịsọ. Ẹnyị nyaa ri iJeyuchi bala ịJalam bala iKora.

15Ọlẹ a ri anyị ịtụma nya Ịsọ lẹ. Anyị nya Elifasị ọnyị ọgbahị nya Ịsọ ịlẹ kị ri alegbeju nya imwawụ ọnyọnyọọnyị a lẹẹ lẹ: ịTẹman bala Ọmaa bala iSefo bala ịKẹnasị bala 16iKora bala ịGatam bala Amalẹkị. Ịịwẹ alimwawụ nya Elifasị ịlẹ kị kụ ọpyị nya Ẹdọm a ju iru kaka ba lẹ. Angịwẹ a bwu ẹpwụ nya Ada ahụ nya Ịsọ lẹ. 17Anyị nya iReyuwẹlụ ọnyị oheeye nya Ịsọ ịlẹ kị ri alegbeju nya imwawụ ọnyọnyọọnyị a lẹẹ lẹ: ịNahatị bala ịSẹra bala ịChama bala iMisa. Ịịwẹ alimwawụ nya iReyuwẹlụ ịlẹ kị kụ ọpyị nya Ẹdọm a ju iru kaka ba lẹ. Angịwẹ a bwu ẹpwụ nya ịBasẹmatị ahụ oheeye nya Ịsọ lẹ. 18Anyị nya Oholibama ahụ ọhata nya Ịsọ ịlẹ kị ri alegbeju nya imwawụ nyaa a lẹẹ ịnyịnyị lẹ: iJeyuchi, ịJalam bala iKora. Angịwẹ a bwu ẹpwụ nya Oholibama ọnyị nya Ana ọlẹ kọ ri ahụ ọhata nya Ịsọ lẹ. 19Ịịwẹ anyị ịtụma nya Ịsọ ịlẹ kị ri alegbeju nya imwawụ ọnyọnyọọnyị nyaa a la lẹlẹ.

Anyị Ịtụma nya ỊSẹyii

20-21Angịlẹ a ri anyị nya ịSẹyii ọla ịHọọ adịda ogogo nya ala Ẹdọm wuu lẹ. Anyị nyamwụ ịịwa ịlẹ kị ri alegbeju nya imwawụ ọnyọnyọọnyị nyaa a lẹẹ lẹ: iLotan bala iChobalụ bala iSibyọn bala Ana bala iDichọn bala Ẹsẹẹ bala iDichan. Ala Ẹdọm ịwẹ a kụ ọpyị ọọwa jene nya alụma nya Ịsọ lẹ. 22Anyị nya iLotan ri iHori bala ịHẹman. Ọnyịnịna nya iLotan ọnyang ri iTimna. 23Anyị nya iChobalụ ri Aluvan bala ịManahatị bala Ebalụ, iChefo bala Ọnam. 24Anyị nya iSibyọn a lẹẹ lẹ: Aya bala Ana. Ana ọwẹ ye ẹmwụ-enyi ịhyẹ ịlẹ ká enyi nyamwụ kaa chị ila lụmẹ. Ọ ye ẹmwụ-enyi ịịwa ụka ọlẹ kọ juwa kpa anyịrẹ nya iSibyọn adamwụ ri amẹ u-ugbileji. 25Anyị nya Ana a lẹẹ lẹ: iDichọn bala Oholibama ọlẹ kọ ri ọnyị ọnyang. 26Anyị nya iDichan a lẹẹ lẹ: ịHẹmdan bala Ẹchịban bala Itiran bala iCheran. 27Anyị nya Ẹsẹẹ a lẹẹ lẹ: iBilihan bala ịSaavan bala Akan. 28Anyị nya iDichan a lẹẹ lẹ: Uusi bala Aran. 29Alegbeju nya imwawụ ọnyọnyọọnyị nya ala ịHọọ a lẹẹ lẹ: iLotan bala iChobalụ bala iSibyọn bala Ana bala 30iDichọn bala Ẹsẹẹ bala iDichan. Ịịwẹ alegbeju nya imwawụ nya ala ịHọọ à la kaka ba bala imwawụ nyaa kị kụ ọ-ọpyị nya ịSẹyii ọlẹ ká ẹnyị ọkịla nyamwụ ri Ẹdọm lẹlẹ.

Ịdịrịhụ nya Ala Ẹdọm

(1 Ego Ogbegbe 1:43-54)

31Angịlẹ a ri ịdịrịhụ nya ala Ẹdọm ene-ene ká ala Isirẹlụ la adịrahụ nya ọgbanyẹ-ọgbanyẹ nyaa lẹ. 32IBela ọnyị nya ịBẹyọọ ri adịrahụ nya ala Ẹdọm. IBela ọwẹ bwu epweji nya iDinhaba. 33Ụka ká adịrahụ iBela gbu, iJobabụ ọnyị nya ịSẹra ọla ịBọsịra ri adịrahụ ku ọmwakpa nyamwụ. 34Ụka ká adịrahụ iJobabụ gbu, iHucham ọlẹ kọ bwu ọpyị nya ala ịTẹman ri adịrahụ ku ọmwakpa nyamwụ. 35Ụka ká iHucham gbu, ịHadad ọnyị nya ịBẹdadị olepweji nya Aviti ri adịrahụ ku ọmwakpa nyamwụ. ỊHadadị ọwẹ dẹwụ kụrụ ala iMidiyan ọ-ọpyị nya ala iMowabụ. 36Ụka ká ịHadadị adịrahụ gbu, ịSamla ọlẹ kọ bwu epweji nya ịMasereka ri adịrahụ ku ọmwakpa nyamwụ. 37Ụka ká adịrahụ ịSamla gbu, ịChawulu ri adịrahụ ku ọmwakpa nyamwụ. ỊChawulu ọwẹ bwu epweji nya iRehobotu ọlẹ kọ kụ ọnụ Ihu iYufuretisi. 38Ụka ká adịrahụ ịChawulu gbu, ịBaalụ-ịhanan ọnyị nya Achibo ri adịrahụ ku ọmwakpa nyamwụ. 39Ụka ká adịrahụ ịBaalụ-ịhanan gbu, ịHadaa ri adịrahụ ku ọmwakpa nyamwụ. ỊHadaa bwu epweji nya ịPawu. Ẹnyị nya ahụ nyamwụ ri iMehetabẹlụ ọnyị nya ịMatiredi. ỊMatiredi ọwẹ ri ọnyang. Ịnịna nya ịMatiredi ọwẹ a ri iMesahabụ lẹ.

40Ẹnyị nya imwawụ nya anyị ịtụma nya Ịsọ ịlẹ kị wụrụ kaka da wule ẹnyị nya anyị nya Ịsọ ịlẹ kị ri adịda ogogo nya imwawụ-imwawụ nyaa wuu datị-datị a lẹẹ lẹ: iTimna bala Aluva bala ịJẹfẹtị 41bala Oholibama bala Ela bala iPinọn 42bala iDenasị bala iMibisa 43bala ịMagi-idiyẹlụ bala Iram. Angịwẹ a ri adịda ogogo nya imwawụ ọnyọnyọọnyị nya anyị ịtụma nya Ịsọ ịlẹ ká ẹnyị nya ẹpwụma nyaa ri Ẹdọm lẹ. Ị ya ẹnyị nya epweji nya imwawụ ọnyọnyọọnyị nyaa wụrụ ẹnyị nya adịda ogogo nya imwawụ-imwawụ nyaa wuu ịnyịnyị.

Currently Selected:

ỌMWỤ ỌDADA 36: IBNO

Highlight

Copy