ỌMWỤ ỌDADA 37

Oja nya IJosẹfụ

1IJekọbụ kụ ị-ịpyị nya iKenan ẹ-ẹga ọlẹ ká Ayịsiki adamwụ kụ gbee kọ gbu. 2Ịịlẹ oja nya alọdọdẹpwa nya iJekọbụ a la lẹ.

Ụka ká iJosẹfụ gu ẹka iwo kụrụ irwiye, ọ juwa gbe ịkpịlọ ta anyadamwụ ịkịla ẹ-ẹpwamẹ. Anyadamwụ ịịwa ri anyị alẹng nya iBiliha bala iSilipa ịlẹ kị ri ịhụ-anchẹ nya iJekọbụ. Ụka ọọwa, iJosẹfụ kaa wụrụ anyadamwụ ịịwa eje ẹ-ẹga nya adaa lụmẹ. 3Isirẹlụ hu iJosẹfụ ọnụ-ọnyị nyamwụ chajị iJosẹfụ ri ọnyị ọlẹ kọ ma la ọgbahị. Isirẹlụ gá awụrụ ọtụka ogbileji ọnyịịla-ọnyịịla ọlẹ kọ la abwọ gbọng ha iJosẹfụ. 4IJosẹfụ wụ anyadamwụ ịkịla wuu ẹjẹ lụ mẹ lẹ. Ị́ kaa ya ẹla tọọ la ẹhị okpunyi kpong-kpong ka, chajị ị jẹ ya iJosẹfụ nyaa há adịdịwa gụ ịwa angịkịla wuu lẹ.

5IJosẹfụ la ụlaa ọhẹ. Ụka kọ wa ụlaa ọọwa je anyadamwụ, ọ họ ká iJosẹfụ waa ẹjẹ lụmẹ gụ olene-ene. 6IJosẹfụ wa ụlaa ọọwa jaa yẹkẹẹ, “Anụ wo ụlaa ọlẹ kam la wẹẹ! 7M̀ la ụlaa kaahị wuu juwa chị ẹbwọ nya ịngịhyẹ lala ịrayịsị ẹ-ẹrụ. Ọọwa lẹ, ẹbwọ nya ịnyam a wuleji gọdayị kọkọ lẹ, ọọwa lẹ, ẹbwọ nya ịnya ọngọngọọng lẹpwụ nyanụ a wuleji kaka gọdayị dọgịlẹ ju ẹbwọ nya ịnyam juwa gbịgba họọ lẹlẹ.” 8Ụka ọọwa, anyadamwụ wẹ byoo yẹkẹẹ, “IJosẹfụ, ọ ri aahụ a ka ri adịrahụ nyahị wuu wẹ lẹka lee? Kaahị wuu ka juwa e-ekpeleji nyang ịnyịnyị lẹka lee?” Ọọwa lẹ, iJosẹfụ a wụ anyadamwụ ẹjẹ myịmyị gụ olene-ene chajị nya ụlaa bala ẹla ọlọnụ nyamwụ lẹlẹ. 9IJosẹfụ myịmyị la ụlaa ọkịla. Ọ wọọ je anyadamwụ yẹkẹẹ, “Anụ wo ụlaa ọkịla ọlẹ kam la lẹẹ wẹẹ. M̀ yẹ ẹnụ bala ọya bala ịdịchụ iwo kụrụ ookpokpo kị juwa hirikpẹẹ ham.” 10Ma, ụka ká iJosẹfụ wa ụlaa ọwẹ je adamwụ bala anyadamwụ ịwẹ kpá lẹ, ụlaa ọọwa wụ adamwụ ẹjẹ lụmẹ. Ọ yalibyi ta iJosẹfụ byoo yẹkẹẹ, “IJosẹfụ, alaa ịlanyị a tị́ lala ịnyị? Ọ ri am bala ịnang bala anyadang ịkịla wuu ka kpụ eteji hang lẹ?” 11Ịnyị lẹ, anyadịda nya iJosẹfụ ịwẹ a juwa la ọkịlẹtụ ijiiji ẹ-ẹga nya iJosẹfụ lụmẹ lẹlẹ. Ma, adamwụ ju ẹla nya iJosẹfụ ọọwa ẹjẹẹ nụwa u-uhye.

Ị Wu IJosẹfụ Ra Ka Ijipiti

12Ụka ọhẹ juwa ká anyadịda nya iJosẹfụ juwa kpa ịkpịlọ nya adaa ri amẹ i-iChekem. 13Ọọwa, Isirẹlụ a wụrụ iJosẹfụ kaka byoo yẹkẹẹ, “IJosẹfụ ee, anyadang lalẹẹ kpa ịkpịlọ ri amẹ i-iChekem? Kẹwẹ kam dung ẹrụ kele kaka yaa wẹẹ.” IJosẹfụ wẹ byoo yẹkẹẹ, “Adam ee, m̀ lẹẹ lẹ, dum kele mẹ.”

14Ọ byi iJosẹfụ yẹkẹẹ, “Kele ka ẹga nya anyadang ká nyà kaka ya jem ó-ri kị juwa lokpunyi bala ịkpịlọ nyaa wẹẹ.” Ịnyị, iJosẹfụ a yegiri bwu Ọkpọọ nya iHebirọn ba anyadamwụ kele ka iChekem lẹlẹ. 15Ụka kọ pwụ iChekem, ọ́ jẹ ẹga ká anyadamwụ ji datị ka. Ọ juwa ga tụ ẹpwamẹ-ẹpwamẹ da gbee ká ọlẹng ọhẹ yọọ. Ọlẹng ọọwa tọọ wo yẹkẹẹ, “Okolobya, ịyẹ a tị́ juwa tịtọ?” 16IJosẹfụ wẹ byoo yẹkẹẹ, “M̀ jam tịtọ nya anyị nya iJekọbụ ịlẹ kị jam gbe ịkpịlọ ẹgẹlẹ. A jẹ ẹga kị ji, a ka ya jem?” 17Ọlẹng ọwẹ byi iJosẹfụ yẹkẹẹ, “Ị́ jam ẹgẹlẹ kaka. M wo kị lẹẹ byi awụlẹ yẹkẹẹ, ịwa nyị rụ ka epweji nya iDotan mẹ.” Ịnyị lẹ, iJosẹfụ a rụ kele ka iDotan lẹ, ọ yẹ anyadamwụ ụ-ụwa ịnyịlẹhị lẹlẹ.

18Ụka ọlẹ ká anyadịda nya iJosẹfụ chẹhị kaka yọọ ẹ-ẹga ọlụrụ kọ juwa jẹ warị, ị mẹ obyi nya igu ju iJosẹfụ yẹkẹẹ, 19“Ẹhẹẹ, anụ chẹhị kaka yẹ olegbeju nya ụlaa ọlala kọ lalẹẹ warị moo! 20Ụka kọ warị lẹ, ahị nwọọ kahị hu ogu nyamwụ ju ka ẹpwụ nya ụjẹ-ọpyị ọhẹ mẹ. Ụka kahị nwọọ kpá lẹ, kahị byi angịnyị yẹkẹẹ, iyo ọnyọọngịrị ọhẹ a nwụ iJosẹfụ wẹ boo ri lẹlẹ mẹ. Ụka kahị họ ịnyị kpá lẹ, kahị yẹ jaabwọ ká alaa nyamwụ ịịwa ka bwu họ jịra myị mẹ.”

21Ma, ụka ká iRubẹn wo obyi omeme nyaa ọọwa lẹ, ọ́ họ́ọ ka. Ọ tịtọ kọ ka chị iJosẹfụ da. Ọọwa, ọ byi anyadamwụ yẹkẹẹ, “Anụ ba wẹẹ. Ọ́ hiigu kahị ka nwọọ nwụ ịịwẹ ka. 22Ọkọkọ nya ọọwa lẹ, anụ kẹwẹ kahị woo wu ju ka ẹpwụ nya ụjẹ-ọpyị ọhẹ lahị-lahị mẹ, chajị ọ́ chịla kahị ka nwụ ọnyadahị lịlọhị ịịwẹ kpong-kpong ka.” IRubẹn byaa ịnyị, chajị kọ ka jẹ-ẹ kele kaka gba iJosẹfụ kpehe du rụ kele kịla adaa ẹ-ẹkpẹ-ẹkpẹ nyaa. 23Ahyaahị ká iJosẹfụ pwụ ẹga nyaa lẹ, ị woo, pwọọ awụrụ ogbileji chabwọ-chabwọ nyamwụ ọlẹ kọ kụrụ lẹlẹ. 24Ọọwa lẹ, ị wu iJosẹfụ ju ka ẹpwụ nya ụjẹ-ọpyị ọhẹ ọlẹ kọ juwa lẹlẹ. Enyi ọhẹ-lọhẹ á juwa ẹ-ẹpwụ nya ụjẹ-ọpyị ọọwa ka.

25Ụka kị họ kpá, kị kele kaka hụhụ juwa ri ang, ị chẹhị kaka yẹ iru nya alọhị i-bwu Ichimẹlụ kị juwa chịpwụrụ kam bwu iGiliyadị kele ka Ijipiti. Ị kpa olo nya etiji ichoru kwọkwọ ịlẹ kị ri ọja bala etiji i-gu wụ́ ang ọ-họ ọngịnyị bala ịmaa. Ị juwa jẹ ya ogu da awụlẹ lolo nyaa u-uhye nya anyịrẹ-ịkamẹlụ juwa kpa kele kaka ra ọ-ọpyị nya Ijipiti. 26Ụka ọọwa, iJuda byi anyadamwụ yẹkẹẹ, “Anụ anyadam, anụ ba wẹẹ, ọ́-ri kahị nwụ iJosẹfụ ọnyadahị tụ ju oyi. Ịịyẹ a tị́ ka ri apyobwuna nyamwụ hahị? 27Ahị bala ọwa bwu ẹpwụ nya adịda ookpokpo lẹ, ọ́ chịla kahị ka họọ abwaabwọhẹ kpong-kpong ka. Lẹ, anụ kẹwẹ kahị hu iJosẹfụ rịra ala Ichimẹlụ ịlaanyị mẹ.” Ịnyị lẹ, anyadamwụ ịkịla wuu a myị jwoo lẹlẹ. 28Ụka ká anyadịda nya iJosẹfụ juwa kpa ẹla ọọwa ọ-ọnụ wẹẹ lẹ, ị chẹhị kaka yẹ alọhị ịlẹ kị bwu ọpyị nya iMidiyan kị juwa chịpwụrụ kam lẹlẹ. Ọọwa lẹ, anyadamwụ a kele kaka gba iJosẹfụ kpehe bwu ẹpwụ nya ụjẹ-ọpyị ọọwa ọlẹ kị hwoo ju ka lẹ, ị hu iJosẹfụ rịra ala Ichimẹlụ lokpoko onyoowuru iwo imiiye lẹlẹ. Ịnyị, ala Ichimẹlụ ịwẹ a kpa iJosẹfụ rụ kele ka ọpyị nya Ijipiti lẹlẹ.

29Ụka kọ nọ chẹẹ, iRubẹn yi oyi ẹpẹtẹ kele ka ẹga nya iJosẹfụ, ma ọ́ tị yọọ ẹ-ẹpwụ nya ụjẹ-ọpyị ọọwa ọlẹ kị hwoo ju kaka. Ụka ọọwa, ọ la iRubẹn ahịbwuu lụmẹ. Ọ wọọ ẹjẹ lụmẹ gbee kọ gu awụrụ nyamwụ ene hi ịlọmwụ. 30Ahyaahị, iRubẹn rụnyẹ kele ka ẹga nya anyadamwụ. Ọ byaa lida-lida yẹkẹẹ, “IJosẹfụ á juwa ẹ-ẹpwụ nya ụjẹ-ọpyị kaka. Anyị, m tị́ ka họ kpá wẹ mẹ?”

31Ụka ọọwa, anyadịda nya iJosẹfụ ịwẹ kele kaka wu ẹmwụ ọhẹ chimyi, ya ịwọ nyamwụ yẹ hụ awụrụ nya iJosẹfụ la ịwọ jwoo chwẹẹchwẹẹ. 32Ị wuleji hu ang kele ka ẹga nya adaa. Ị mẹ awụrụ nya iJosẹfụ ọwẹ jọọ. Ị byoo yẹkẹẹ, “Adada ee, yẹ awụrụ ọlẹ tahị wẹẹ. Ọ́ meng awụrụ nya iJosẹfụ ọnyị nyang ka? Ahị yọọ dụwa ọ-ọnụ ụgbẹyị.” 33Ụka ká iJekọbụ yọọ, ọ jẹ kọ ri awụrụ nya iJosẹfụ ịnyịlẹhị. Ọ cheko lomyi gboo yẹkẹẹ, “Ijwo adam ee, awụrụ nya iJosẹfụ ọnyịm a lẹẹ lẹ oo! Iyo ọnyẹẹgẹga ọhẹ kaka nwụm ọnyị, boo ri hwẹẹhwẹẹ wuu lẹ.” 34IJekọbụ juwa jida bala o-bida juwa gu ịwụrụ nyamwụ ene, chajị ọ tọọ olujwo lụmẹ nya igu nya iJosẹfụ ọnyị nyamwụ. IJekọbụ bida nya iJosẹfụ lụka tata, juwa kụrụ ịwụrụ nya owuru ọkpakpa. 35Anyị anyang nya iJekọbụ bala anyị alẹng nyamwụ wuu wuleji kele ka kpọọ ẹjẹ ya nyị ba mẹ. Ma, iJekọbụ á tị myị ba kaka. Ọ byi anyị nyamwụ yẹkẹẹ, “Anụ bahim mẹ. M̀ ka gbu ta iJosẹfụ jẹ lẹ.” Ịịwẹ iJekọbụ a bida nya iJosẹfụ lụmẹ-lụmẹ lẹ. 36Ụka ọwẹ lẹ, ala iMidiyan ịlẹ kị ra iJosẹfụ lẹ, ị kpọọ rụ kele kaka rịra ọlẹng ọhẹ ọlẹ kị wụrụ ịPọtịfa ọ-ọpyị nya ala Ijipiti lẹ. ỊPọtịfa ọọwa ri olegbeju ọtụka-ọtụka ẹ-ẹpwa nya adịrahụ nya ala Ijipiti wuu. ỊPọtịfa ọwẹ a ri olegbeju ọgbahị nya angịdẹwụ ịlẹ kị kaa gbe ọdọdẹpwa nya iFero Adịrahụ lẹ.

Currently Selected:

ỌMWỤ ỌDADA 37: IBNO

Highlight

Copy