ỌMWỤ ỌDADA 38

IJuda bala ỊTamaa

1Ẹnụtụrụ ọhẹ, iJuda rụ bwu ẹga nya anyadamwụ ịkịla kele ka ẹpwa nya ọlẹng ọhẹ ọlẹ kị wụrụ iHira kaka kụ ụwa tọọ. Ị wụrụ ẹnyị nya epweji nyaa Adulam. 2IJuda yẹ onjwo ọyẹẹnọ ọhẹ ọlẹ ká adamwụ ri iChuwa ọla iKenan. Ụka kọ yẹ ọyẹẹnọ ọọwa lẹ, ọ họ́ọ lụmẹ. Ịnyị lẹ, ọ yoo lẹlẹ. 3Ahụ nyamwụ ọọwa jẹnyị ma ọnyị ọlẹng họọ. Ị wụrụ ẹnyị nyamwụ Ẹẹrị. 4Ụka kọ nọ chẹẹ, ahụ nya iJuda myịmyị jẹnyị ọkịla. Ọ ma ọnyị ọlẹng oheeye. Ị wụrụ ẹnyị nyamwụ Ọnan. 5Ahụ nya iJuda ọwẹ myịmyị jẹnyị. Ọ ma ọnyị ọlẹng ọhata. Ị wụrụ ẹnyị nyamwụ iChela. IJuda kụ ọpyị nya ịKẹsibu ụka ọlẹ kị ma iChela họọ.

6Ụka ká Ẹẹrị ọnyị ọgbahị nya iJuda nwa ọngịnyị, iJuda ye ahụ họọ. Ẹnyị nya ahụ ọọwa ri ịTamaa. 7Ma, Ẹẹrị ọwẹ tị ri ọngọ la egbeju-ọngịrị lụmẹ ị-ịlahị nya Amkpaa. Ọọwa, Ohe Oluhye a nwọọ lẹlẹ. 8Ụka kọ nọ chẹẹ, iJuda byi Ọnan ọlẹ kị ma hile Ẹẹrị yẹkẹẹ, “Ọnan ee, kele kaka chị ahụ nya Ẹẹrị ọnyịnang ida ye, chajị ká ka ma anyị la ẹnyị nya Ẹẹrị ọnyịnang mẹ.” 9Ọnan chị ahụ ọọwa ida ye jaabwọ kị byoo. Ma, ọ tị jẹ ya ọnyị nyamwụ ọhẹ-lọhẹ nyị́ ka ri ịnya ọwa ayịdang ka. Chajị nya ọọwa lẹ, Ọnan kaa ka ẹga nya ahụ-ogu ọwẹ lịjẹẹhị. Ọ́ kaa myị-ị enyi nyamwụ-ụ̀ ka ẹpwụ nya ahụ ọwẹ. ka Ọkọkọ nya ọọwa lẹ, ọ kaa da enyi nyamwụ hụrụ odehe chajị ká ahụ-ogu ọọwa á ka jẹnyị ka. 10Ọwẹ ká Ọnan họ ịnyị lẹ, ọ wụ Amkpaa ẹjẹ lụmẹ. Ịnyị lẹ, Ohe Oluhye a nwọọ ịnyịnyị lẹlẹ. 11Ụka ká iJuda yẹ ká anyị alẹng nyamwụ angị imimiiye ịwẹ gbu lẹ, ọ chọọ uko ká iChela ọnyị ọlẹng ọhịhị nyamwụ ka gbu ịnyịnyị. Ọọwa, ọ byi ịTamaa ahụ-ogu nya ọnyị nyamwụ ọwẹ yẹkẹẹ, “ỊTamaa ọnyịm, a tị́ yẹ jaabwọ ká iChela ri onjwo ochiche wẹ wẹẹ lẹ.” Lẹ, rụ ka ẹpwa adang kaka hụ ụ-ụwa gbe ụka ọlẹ ká iChela ka nwa ahụ oyeye ene kọ ka yeng mẹ. Ụka ọọwa, ịTamaa rụ kele ka ẹpwa nya adamwụ jaabwọ kị byoo.

12Ụka kọ nọ chẹẹ, ọnyị nya iChuwa ọlẹ ká iJuda ye gbu. Ụka ká iJuda họ ida nya ahụ nyamwụ ọọwa kpá, iJuda bala iHira ọla Adulam oligu nyamwụ hu ang kele ka iTimna kaka yẹ angịlẹ kị juwa pwọ ịkpịlọ nya iJuda egbii. 13Ụka ọọwa, ọngọhẹ kele ka ya je ịTamaa yẹkẹẹ, “ỊTamaa, adang-ẹpwa juwa ka kam ka iTimna ka ẹga ọlẹ kị juwa pwọ ịkpịlọ nyamwụ egbii lẹ.” 14ỊTamaa kele kaka pwọ awụrụ nya ahụ-ogu nyamwụ ịlẹ kọ kụrụ cheeji. Ọ hu ang inyeewe kụrụ gbịlẹ-gbịlẹ, go ịpwụ dabarị ịlọmwụ chahị-chahị. Ọọwa, ọ kele kaka hụhụ ọ-ọchapiye nya Ẹnayịm lẹlẹ. Ẹnayịm ọọwa juwa ụ-ụgbẹyị nya iTimna. ỊTamaa họ ịnyị, chajị ọ jẹ ya iJuda nyị́ tịtọ ká iChela ọnyị nyamwụ nyị ka chị ọwa ida ye kaka. IChela nwa ahụ oyeye lẹ, ma ị́ tị kpahị nya ịTamaa kaka. 15Ụka ká iJuda pwụ ụwa, kọ yẹ ịTamaa lẹ, ọ moo ọlakpara, chajị nyọlẹ ká ịTamaa da ịpwụ rị ịlọmwụ chahị-chahị. 16IJuda tụ bọọ lẹ, ọ byoo yẹkẹẹ, “M̀ tịtọ kam ka kpang ka ube.” Ọ́ jẹ ịTamaa ahụ-ogu nya ọnyị nyọwa nyaa wẹ lẹ ka. ỊTamaa byoo yẹkẹẹ, “Ịyẹ a tị́ ka nwụm ham ene ká ka kpam ka ube?” 17IJuda wẹ byoo yẹkẹẹ, “M̀ ka wu ụgba nya ẹmwụ nyam ọhẹ du wang.” ỊTamaa byoo yẹkẹẹ, “Hu ịngịhyẹ ham kam ya nụwa nya ang-ẹjẹẹ gbe ụka ká ka ya du warị mẹ.” 18IJuda wẹ byoo yẹkẹẹ, “Ịịyẹ a tị́ tịtọ kam ka hu hang mẹ?” Ọ byi iJuda yẹkẹẹ, “Hu ang ọwẹ ká kaa kpa ju ang nyang ẹjẹẹ bala ori nyamwụ ham bala ọgọdọ nyang ọwẹ ká kaa kpa wẹ ụ-ụbwọ mẹ.” Ịnyị lẹ, iJuda a go ang ịwẹ wuu ha ọnyang ọwẹ jaabwọ kọ ya lẹlẹ. Ọọwa, iJuda a kpọọ ka ube lẹ, ọ jẹnyị lẹlẹ. 19Ụka ká iJuda rụ, ịTamaa rụ ka ẹpwa ịnyịnyị. Ụka kọ pwụ ẹpwa, ọ yi ịpwụ ịwẹ cheeji. Ọ hu awụrụ nya ahụ-ogu kụrụ myịmyị.

20Ụka kọ nọ chẹẹ, iJuda wu ụgba nya ẹmwụ ọọwa du iHira ọla Adulam oligu nyamwụ ẹrụ kịla ọnyang ọlẹ kọ kpa ka ube, chajị ká ọnyang ọọwa ka tụụbwọ hi ang ịlẹ kọ ya họọ du iHira nyà wọọ. Ma, ụka ká iHira pwụ ụwa lẹ, ọ́ yẹ ọnyang ọọwa ụ-ụwa ka. 21Ụka ọọwa, iHira tọ angịhyẹ nya alepweji ọwẹ ịtọ yẹkẹẹ, “Ale, ọlakpara ọlẹ kọ kaa hụ ọ-ọnụ ụgbẹyị nya Ẹnayịm ọlẹ a tị́ ka alẹ?” Angịịwa wẹ byoo yẹkẹẹ, “Eheehe! Ọnyang ọlịnyị ọhẹ-lọhẹ á jam ẹgẹlẹ kpong-kpong koo!” 22Ụka ká iHira nyà pwụ ẹga nya iJuda, ọ ya je iJuda yẹkẹẹ, “M̀ kele lẹ, ḿ yẹ ọnyang ọlẹnụmwụ ụ-ụwa ka. Ụka kam tọ alụwa wo lẹ, ị byim ya ọlakpara ọlịnyị ọhẹ nyị́ jam ẹgẹlẹ ka.” 23IJuda wẹ byi iHira yẹkẹẹ, “Ọ hiigu, ọ́ họ lẹ, ọ kpa ang-abwọ nyam ịlanyị ụ-ụwa mẹ! Am tị wu ẹmwụ ọlẹ kam myị ọnụ họọ chajị nyamwụ dung kpa kele wẹ lẹ. Ọ-tọọtọ, a tị́ tọọ kaka wẹ lẹlẹ. Ba mẹ, a ya abwọhẹ gụ ọwẹ ká angịnyị a kpa hụlọ ẹhụ juhi kaka. Ẹla myị lẹ.”

24Ụka kọ nọ chẹẹ lala ịya ịta, angịhyẹ warị kaka ja iJuda oja chajị nya ịTamaa. Ị byoo yẹkẹẹ, “Á jẹ ka tụbwọ aalẹ, akpara-akpara ịTamaa ahụ-ogu nya ọnyị nyang a lalẹẹ họ lẹlẹ. Ọ dọmwụ jẹnyị lalẹẹ lẹẹlẹẹ lẹ.” Ụka ká iJuda wo ẹla ọọwa lẹ, ọ wụ ẹjẹ lụmẹ. Ọ du angịhyẹ ẹrụ ahyaahị yẹkẹẹ, “Anụ kele kaka wu ịTamaa ọwẹ, kpa warị kanụ jwọọ ila lahị-lahị mẹ.” 25Ụka ká alẹrụ nya iJuda ịịwa wu ịTamaa juwa kpọọ rụ kele kọ lọ nwụnwụ lẹ, ịTamaa a go ang nya iJuda ịlẹnụmwụ du ọngọhẹ ẹrụ kịla iJuda adamwụ ẹpwa ayịdang ahyaahị lẹlẹ. Ọ ya nyị byi iJuda yẹkẹẹ, “Ọngọlẹ kọ la ang-abwọ ịwẹ a jum ẹnyị ọlẹ lẹ. Anụ byoo kọ wụla ang-abwọ ịlẹ yẹ yẹẹyẹẹ, chajị kọ ka jẹ ọngọlẹ kọ la ang ọ-kpa ju ang-ẹjẹẹ ọlẹ bala ori nyamwụ bala ọgọdọ ọlẹ mẹ.” 26Ụka ká iJuda yẹ ang-abwọ ịịwa lẹ, ọ jaa ogu kị ri ịnyamwụ ịnyịlẹhị. Ọọwa lẹ, ọ yẹkẹẹ, “Ẹla nya ịTamaa nyaa hagụ ịnya ọọwa lẹ, chajị ọwa nyị́ ya ẹga da ha iChela ọnyị nyọwa nyị ye ịTamaa mẹ ka lẹ, ọwa nyị la abyị ịnyịlẹhị lẹ.” Ọlịnyị lẹ, iJuda á myịmyị kpa ịTamaa ka ube gụ olene ọọwa kaka.

27Ụka ká ụka nya ọnyị ọmama nya ịTamaa pwụ lẹ, ị jẹ kọ kpa ẹnyị nya anyewa lẹlẹ. 28Ụka kọ juwa hyụma nya ọnyị ọmama, ụbwọ nya anyewa ọhẹ kpehe jene. Ọnyang ọlẹ kọ juwa kpọọ ụma kele kaka hu owu ọnyọmịla bwọ ọnyị ọwẹ ụ-ụbwọ ọọwa. Ọ yẹkẹẹ, “Ọnyị ọlẹ a kpehe jene lẹ.” 29Ahyaahị, kị ya owu ọọwa bwọ ọnyị ọwẹ kpá lẹ, ọnyị ọọwa a wa ụbwọ nyamwụ ju lẹlẹ. Ọọwa, ọnyị ọkịla a gba kpehe jene nyamwụ lẹlẹ. Ọnyang ọlụbwụma ọọwa byi ọnyị ọlẹ kị ma wẹ yẹkẹẹ, “Ahụ ọnyị ọwẹ, a chakpa da ụpwụ lụmẹ.” Ịnyị a du kị wụrụ ẹnyị nya ọnyị ọọwa, ịPẹrisi ọlẹ ká etu nyamwụ ri “ene ogugu” lẹ. 30Ụka kọ nọ chẹẹ lẹ, ọnyị ọkịla ọlẹ kị ya owu ọnyọmịla bwọ ụ-ụbwọ a gba kpehe ịnyịnyị lẹlẹ. Ị wụrụ ẹnyị nyamwụ ịSẹra.

Currently Selected:

ỌMWỤ ỌDADA 38: IBNO

Highlight

Copy