ỌMWỤ ỌDADA 35

Ohe Oluhye bala IJekọbụ Ị-ịBẹtẹlụ

1Ụka ọọwa, Ohe Oluhye à byi iJekọbụ yẹkẹẹ, “IJekọbụ ee, rụ kele kaka kụ ịBẹtẹlụ mẹ. Aa me ogidi okiliya ụ-ụwa ham am Ohe Oluhye ọlẹ kam mẹ ịlọm jẹng ụ-ụgbẹyị ụka ká lẹẹ rụnyẹ rụ hi Ịsọ ọnyịnang mẹ.”

2Ọọwa, iJekọbụ à byi alẹpwa nyamwụ tụ angịlẹ wuu kị juwa tọọ yẹkẹẹ, “Ọng myị ọng nyanụ ā mwụ ijiga nyamwụ hụrụ, kanụ hụ́ ịlọnụ charị-charị bala o-go ịwụrụ icheri-cheri kụrụ ịnyịnyị mẹ. 3Ahị jam ka rụ ka ịBẹtẹlụ ẹga kam ka me ogidi okiliya ha Ohe Oluhye lẹ. Ọwa-à dam ụbwọ ụka kam ji ẹpwụ nya akama bala ọ-hụ tam ẹ-ẹga myị ẹga wuu ọlẹ kam bwu wuu lẹ.” 4Ọọwa, ị kpa ijiga nyaa wuu bala ang i-gu arụ nyaa kịla iJekọbụ lẹ, ọ yaa chị ụjẹ ju eji ọ-ọmwụ nya okoji nya ooku ọlẹ kọ ju iChekem chwẹẹ lẹlẹ.

5Ụka ká iJekọbụ anyị juwa jẹ rụ, Ohe Oluhye họ ká uhi ọtụka-ọtụka ju alepweji ịdagaga jwaa wuu. Lẹẹlẹ, ị́ ku iJekọbụ anyị kaka mwẹla taa ka.

6Ọọwa, iJekọbụ bala angịnyị nyamwụ wuu à jẹ gbee kịị pwụ ịBẹtẹlụ ọlẹ ká ẹnyị ọkịla nyamwụ ri iLusi ọ-ọpyị nya iKenan lẹlẹ. 7Ụka kị pwụ ụwa, iJekọbụ kele kaka me ogidi okiliya ha Ohe Oluhye. Ọ wụrụ ẹnyị nyamwụ Ẹlịbẹtẹlụ ọlẹ ká etu nyamwụ ri Ohe Oluhye nya ịBẹtẹlụ, chajị ẹ-ẹgẹwẹ, Ohe Oluhye a mẹ ịlọmwụ jẹ iJekọbụ ụka ọlẹ kọ juwa rụnyẹ rụ hi Ịsọ ọnyịnamwụ lẹ. 8Ụ-ụwa, iDebora ọlẹ kọ ri ọngọ kpa iRibeka la enjwo à gbu lẹ. Ị ju ogu nyamwụ eji ọ-ọmwụ nya okoji ooku ọhẹ ọlẹ kọ ji ka edii nya ịBẹtẹlụ. Ịnyị a du kị wụrụ ẹnyị nya ụwa Alọn-ịBakutu lẹ.

9Ụka ká iJekọbụ nya bwu ịPadan-aram kpá, Ohe Oluhye chị ịlọmwụ ehe mẹjọọ myịmyị. Ọ wahị kụrụ iJekọbụ 10byoo yẹkẹẹ, “IJekọbụ, wo mẹ, ịnọ, ẹnyị nyang a ri iJekọbụ lẹ, ma, bwu alẹ ọlẹ kele kịlahị, ẹnyị onyeewe nyang a ka ri Isirẹlụ lẹlẹ.” Ịnyị lẹ, ị wụrụ iJekọbụ Isirẹlụ jaabwọ ká Ohe Oluhye ya lẹlẹ. 11Ohe Oluhye myịmyị byi iJekọbụ yẹkẹẹ, “Wo mẹ, Am ayịdang a ri Ohe Oluhye Agụgụ lẹ. Anyị nyang ka ri ẹpwụma bala ọ-pyẹ ka ri pwụma datị-datị. Ịdịrịhụ lụmẹ-lụmẹ ka bwu ẹpwụ nyang kpehe ịnyịnyị. 12Ọpyị ọlẹ kam ya ha Ebiraham bala Ayịsiki lẹẹ lẹ, m ya hang ịnyịnyị bala anyị ịtụma nyang wuu pyịyọọ lẹ.” 13Ịnyị, Ohe Oluhye a rụ bwu ụwa kele ka uhye hi iJekọbụ ẹ-ẹga ọlẹ ká Ohe Oluhye ya ẹla tọọ lẹlẹ. 14Ụka ọọwa, iJekọbụ kele kaka hu ẹjwọ ọtụka-ọtụka ọhẹ kele kaka wu eji ụ-ụwa gbọng ẹ-ẹga ọlẹ ká Ohe Oluhye ya ẹla tọọ. Ọọwa, ọ hu ere bala ida nya olivu kele kaka yẹ hụ ẹjwọ ọọwa lẹlẹ. 15IJekọbụ wụrụ ẹnyị nya ẹga ọọwa ọlẹ ká Ohe Oluhye ya ẹla tọọ ịBẹtẹlụ.

Igu Ogbugbu nya IRichẹlụ

16IJekọbụ anyị hu ang ẹdịyẹ bwu ịBẹtẹlụ juwa rụ kịlahị. Ụka kị jẹ lụrụ hi ẹga ọlẹ kị wụrụ Ẹfụratị lụmẹ lẹka lẹ, ang nya ọnyị a juwa họ iRichẹlụ lụmẹ kaka kpoye ụ-ụgbẹyị lẹlẹ. 17Ụka ká iRichẹlụ chị ụma nụwa ọ-ọbẹ nya igu, ọnyang ọlẹ kọ juwa kpọọ ụma byoo yẹkẹẹ, “IRichẹlụ, a ju uhi ka. A juwa tụbwọọ ka ma ọnyị ọlẹng ọkịla hile iJosẹfụ lẹ.” 18IRichẹlụ gbu ụ-ụwa ụ-ụbwụma. Ahyaahị, ká iRichẹlụ wụrụ ẹnyị nya ọnyị ọọwa, iBenoni kpá bwaaa lẹ, ọ chị ẹjẹ lẹlẹ. Ma, iJekọbụ adịda nya ọnyị wụrụ ẹnyị nya ọnyị ọọwa, iBenjamịn. 19IRichẹlụ a gbu lẹ, ị jwoo eji ụ-ụwa ụ-ụgbẹyị nya Ẹfụratị lẹlẹ. Ẹfụratị ọọwa, ị wụrụ ịBẹtịlẹhẹm ịnyịnyị lẹ. 20IJekọbụ ju ẹjwọ ọtụka ọhẹ eji u-uhye nya iworu nya iRichẹlụ. Ẹjwọ ọọwa juwa pyịyọọ daalẹ lala ang o-ju iworu nya iRichẹlụ ẹjẹẹ. 21Ụka ká ọwẹ chịpwụrụ kpá, Isirẹlụ bala angịnyị nyamwụ juwa jẹdịyẹ nyaa kele kịlahị ịnyịnyịịnyị gbee kị kaka chịkụ ẹ-ẹgẹhẹ. Ẹga ọọwa ju ọdana ọhẹ ọlẹ kị wụrụ Ẹda chwẹẹ lụmẹ.

Anyị Alẹng nya IJekọbụ

22Ụka kị kụ ẹ-ẹga ọọwa, ị ya je iJekọbụ ya iRubẹn ọnyị nyang nyị kele kaka jẹbyị ta iBiliha ahụ-ọnchẹ ọlẹ kaahụ nyị ye lẹ. Ẹla ọọwa wụ Isirẹlụ ẹjẹ lụmẹ kaka kpoye.

Anyị alẹng nya iJekọbụ wuu la angị iwo kụrụ imiiye. 23Anyị alẹng ịlẹ ká iLiya ma ha iJekọbụ a lẹẹ lẹ: IRubẹn ọlẹ kọ ri ọnyị ọgbahị nya anyị nya iJekọbụ wuu, bala iSimyọn bala iLivayị bala iJuda bala Ịsakaa bala ISẹbụlọn. 24Anyị ịlẹ ká iRichẹlụ ma ha iJekọbụ a lẹẹ lẹ: IJosẹfụ bala iBenjamịn. 25Anyị nya iBiliha ọlẹ kọ ji ata nya iRichẹlụ a lẹẹ lẹ: ịDan bala ịNafụtali. 26Anyị nya iSilipa ọlẹ kọ ji ata nya iLiya a lẹẹ ịnyịnyị lẹ: ịGadị bala Achẹẹ. Ịịwẹ anyị alẹng ịlẹ ká iJekọbụ ma kpa nya bwu ịPadan-aram a la lẹ.

Igu Ogbugbu nya Ayịsiki

27IJekọbụ jẹ gbee kọ pwụ ẹga nya Ayịsiki adamwụ ụ-ụwa ẹ-ẹga ọlẹ kị wụrụ ịMamrẹ. ỊMamrẹ ọọwa ju iKiriyatị-aba ọlẹ ká ẹnyị ọkịla nyamwụ ri iHebirọn chwẹẹ. Ebiraham bala Ayịsiki kụ ụwa ẹnẹhẹ ene-ene lẹ. 28Ehe oriri nya Ayịsiki wuu la ẹka ohu ookpokpo da ẹka iwo ineku gbẹgbịlẹ. 29Ịịwẹ Ayịsiki a bwu gbu la ụchẹ ị-ịnyịrọ lẹlẹ. Ịsọ bala iJekọbụ a ju ogu nya adaa eji la awụlẹ lẹ.

Currently Selected:

ỌMWỤ ỌDADA 35: IBNO

Highlight

Copy