ỌMWỤ ỌDADA 16

ỊHẹga bala Ichimẹlụ Ọnyị nyamwụ

1Ụka ọọwa, iSerayị ahụ nya Ebiram-ḿ ma ọnyị ka. Ọ tị la ọnchẹ ọnyang ọhẹ bwu ọpyị nya ala Ijipiti ká ẹnyị nyamwụ ri ịHẹga. 2Ụka kọ nụwa ịnyịnyịịnyị lẹ, iSerayị à byi Ebiram yẹkẹẹ, “Ayịbam ee, wo mẹ! À tị́ yẹ jaabwọ ká Amkpaa-á ya ọnyị ọhẹ-lọhẹ ham ma kaka-à wẹ lẹ. Lẹẹlẹ, ka ẹga nya ọnchẹ ọnyang nyam mẹ. Ọhẹka, m̀ ka ye ọnyị bwuloo myị.”

Ọọwa, Ebiram à myị ju iSerayị lẹlẹ. 3Ebiram kụ ọpyị nya iKenan ẹka iwo chiriri ụka ká iSerayị hu ịHẹga ọnchẹ ọnyang nyamwụ họọ ye nya ahụ-ọnchẹ. 4Ịnyị, Ebiram à ka ẹga nya ịHẹga lẹ, ọ jẹnyị lẹlẹ. Ụka ká ịHẹga jẹ ọwa nyị juwa lẹnyị lẹ, ọ dọmwụ nyọka ya ẹhị da iSerayị ayaamwụ bwee lẹlẹ.

5Ọọwa lẹ, iSerayị à chị eru ju Ebiram yẹkẹẹ, “Ayịbam, ahụ à ju ọmwụ nya ẹpẹpẹ ọlẹ kam la ịHẹga lẹẹ lẹ. M̀ hu ọnchẹ nyam jung u-ube kpụ ọ jẹnyị kpá lẹ, m̄ dachichi wẹẹ lọọ ẹpẹpẹ wẹ lẹka le? Amkpaa-à jẹ ó-ri am lee ahụ ká ri oku ẹ-ẹpwụ nya ẹlẹwẹ lẹlẹ.”

6Ọọwa, Ebiram à wẹ byi iSerayị yẹkẹẹ, “Ọ́ lịnyị aalẹ, ọnchẹ ọlata nyang ịHẹga ayịdang à tị́ ri, jaabwọ kọ háng lẹ, à họọ mẹ.” Ịnyị, iSerayị à juwa kpa ịHẹga nmaanmaa lụmẹ-lụmẹ gbee kọ rụnyẹ rụ hi ẹpwa nya Ebiram lẹlẹ.

7Ụka ká ịHẹga juwa jẹ ịnyịnyịịnyị lẹ, olegu-ẹrụ nya Amkpaa ọhẹ a tọọ ọ-ọnụ ẹmwụ nya enyi ọhẹ, ụ-ụgbẹyị nya iChuu ọlẹ kọ dụwa u-ugbileji lẹlẹ. 8Olegu-ẹrụ ọọwa byoo yẹkẹẹ, “ỊHẹga, ọnchẹ ọnyang nya iSerayị, ale a tị́ wẹẹ bwu? A tị́ juwa jẹ ka ale?” ỊHaga wẹ byoo yẹkẹẹ, “M̀ jam rụnyẹ rụ hi ayam iSerayị ọlẹ kọ juwa tụm pyịpyị lụmẹ-lụmẹ.” 9Ọọwa lẹ, olegu-ẹrụ nya Amkpaa ọwẹ a byoo yẹkẹẹ, “Rụ tịrẹkpẹ kele ka ẹpwa nya ayang ka kpa ịlọng keji họọ yẹẹyẹẹ mẹ.” 10Olegu-ẹrụ ọwẹ myịmyị byoo yẹkẹẹ, “ỊHẹga, Amkpaa ka họ ká anyị nyang ka pyẹ gbee lụmẹ kị ka jẹ-ẹ waa kpá myị kaka ị-ịlahị wẹẹ. 11Yẹ mẹ, ẹnyị nyang ọwẹ ká jẹ wẹẹ, a ka ya ma ọnyị ọlẹng. A ka wụrụ ẹnyị nyamwụ Ichimẹlụ,#16:11 Etu nya ẹnyị ọlẹ ri Amkpaa wo lẹ. chajị a tị́ yẹ jaabwọ ká Amkpaa wo omyi nyang ẹ-ẹpwụ nya akama wẹ lẹ.” 12Olegu-ẹrụ ọọwa myịmyị byoo yẹkẹẹ, “ỊHẹga, wo mẹ! Ichimẹlụ ọnyị nyang ọwẹ á ka wo ẹla ka, lala ụnyịrẹ ọlẹ kọ chochi. Ichimẹlụ ayịdang bala angịnyị angịkịla wuu ka ri aluji nya awụlẹ. Ọ ka chị ebwo ẹpwa nyamwụ datị hi aanamwụ ịkịla wuu ịnyịnyị.” 13Ọọwa lẹ, ịHẹga a ju Amkpaa ọlẹ kọ ya ẹla tọọ ụ-ụwa ẹnyị yẹkẹẹ, “A ri Ohe Oluhye ọngọ yọyị,” chajị ịHẹga ayịdang yẹkẹẹ, “Ahyu! Am a jẹ yẹ Ohe Oluhye kpá, m̄ jẹ jam hịhị wẹẹ lẹ-ẹ́?” 14Ọọwa, ị wụrụ ẹnyị nya ịwẹẹlụ ọlụwa “Ịwẹlụ nya iBiyẹlahayị-ịrọyị#16:14 Etu nya ẹnyị ọlẹ ri Ịwẹlụ nya Ọngọ Hịhị ọlẹ kọ juwa yẹm” lẹlẹ. Ẹmwụ enyi ọọwa juwa ẹ-ẹpwarịrị nya Kades bala Bẹrẹd.

15Ịnyị lẹ, ịHẹga a ma ọnyị ọlẹng ọọwa ha Ebiram lẹ, Ebiram a wụrụ ẹnyị nyamwụ Ichimẹlụ lẹlẹ. 16Ebiram gu ẹka iwo ineku kụrụ ịrwọnyẹ (86) ụka ká ịHẹga ma Ichimẹlụ họọ.

Currently Selected:

ỌMWỤ ỌDADA 16: IBNO

Highlight

Copy