ỌMWỤ ỌDADA 17

Ụwụwụ Ọdada Ri Ẹjẹẹ nya Iro Ọnwanwa

1Ụka ká Ebiram gu ẹka ohu ine kụrụ iwo, iwo kụrụ ihikichu, Amkpaa Ohe Oluhye chị ịlọmwụ ehe mẹjọọ, ya ẹla tọọ yẹkẹẹ, “Ebiram, am ayịdang a ri Ohe Oluhye Agụgụ wuu lẹlẹ. Aa juwa hịhị ba ụgbẹyị nyam, am Ohe Oluhye jẹ, ká cheji ba ang myị ang onyobyi ọhọhọ wuu mẹ! 2Ebiram, ọ́-ri ká myị họ jaabwọ kam ya wẹ lẹ aalẹ, iro ọlẹ kaam Ohe Oluhye nwa hang ene u-uhye nya ang ịlẹ kam wẹẹ họ hang lẹ, M ka haa jịra hang ịnyịlẹhị. Am ayịdang ka họ ká anyị ịtụma nyang ka pyẹ ju iru lụmẹ-lụmẹ.” 3Ịnyị lẹ, Ebiram a juwa kpụ eteji, raabwọ ha Amkpaa Ohe Oluhye ụ-ụwa lẹlẹ. Ụka ọọwa, Ohe Oluhye ya ẹla ta Ebiram byoo yẹkẹẹ, 4“Ebiram, wo mẹ! Iro ọlẹ kam nwa hang wẹẹ, ọ ka họ jịra. Ahụ Ebiram ka ri adịda nya alepwoja la datị-datị ị-ịlahị ịnyịlẹhị. 5Ẹnyị nyang á ka ri Ebiram bwu alẹ kele kịlahị kaka, ma, Ebiraham mẹ ịnyị. Chajị am Ohe Oluhye yẹ ẹnyị nyang daalẹ lẹ. Chajị am ayịdang ka họ ká ka ri adịda ogogo nya alepwoja datị-datị jaabwọ ká etu nya Ebiraham ri. 6Am ka họ ká anyị ịtụma nyang ka pyẹ ju iru lụmẹ-lụmẹ gbee kị ka ri alepwoja la datị-datị. Am ka họ ká ịdịrịhụ lụmẹ-lụmẹ ka bwu ụtẹ nyang kpehe ị-ịlahị ịnyịnyị. 7Ebiraham, wo mẹ! Am jam nwa iro ọlẹ hang ahụ ayịdang gbee ju ka aloyi ọnyị myị ọnyị nya anyị ịtụma nyang wuu pwụ ọmyịmyị nya odehe ọlẹ lẹẹ. Am Ohe Oluhye ayịdang ka ri Ohe Oluhye nyang bala Ohe Oluhye nya anyị alụma nyang wuu gbee ju ka ọbaba nya odehe ọlẹ ịnyịnyị. 8Am Ohe Oluhye ka hu ọpyị nya iKenan ẹga ọlẹ kaahụ ayịdang ri ọngga wẹ ụ-ụwa alẹ, hang bala anyị nya ụma nyang ị-ịlahị kị ka lọọ pyịyọọ gbee pwụ ụka myị ụka. Am ayịdang ka ri Ohe Oluhye nyang bala anyị nya ụma nyang ịnyịnyị lẹ.”

9“Am Ohe Oluhye tịtọ kaahụ Ebiraham ayịdang bala aloyi ọnyị myị ọnyị nya anyị nya ụma nyang wuu, ka kpa ehile nya iro ọnwanwa ọlẹ kam nwa hanụ lẹẹ pyịyọọ ju ká ọbaba nya odehe ọlẹ pyii lẹ. 10Ehile nya iro ọnwanwa ọọwa ri yẹkẹẹ, ahụ ayịdang bala ọnyị ọlẹng ọnyị myị ọnyị ọlẹpwa nyang wuu ka da ụwụwụ pyii alẹ lẹ. Ehile nya ụwụwụ ọdada ọlẹ ka juwa hang bala ọnyị ọlẹng ọnyị myị ọnyị nya anyị ịtụma nyang wuu gbee pwụ oyi myị oyi pyii ịnyịnyị lẹ. 11Ụwụwụ ọdada ọọwa kanụ ka da a ka ri ang o-ju ẹjẹẹ nya iro ọnwanwa ọlẹ kam nwa hanụ wẹ lẹlẹ. 12Ụka myị ụka ká ọnyị ọlẹng nyang ahụ ayịdang lee ọnyị ọlẹng ọnyị myị ọnyị nya alụma nyang wuu pwụ ụka myị ụka á gu ụtụrụ ineku lẹ aalẹ, anụ dọọ ụwụwụ mẹ. Ó-riri ká ọnyị ọọwa á ri ọnyị nyanụ bwu ẹpwụ lee ọnyọhị nyanụ ọlẹ kanụ rara bwu ija ịkịla tụ anyị alẹng nyaa wuu, anụ ka daa ụwụwụ pyii lẹ. 13Anụ ka da anyị alẹng ịnyị myị ịnyị ịlọdọdẹpwa nyanụ wuu ụwụwụ pyii lẹ. Ó-riri kị ri anyị alẹng i-bwu ẹpwụ nyanụ lee ịlẹ kị ri anyịhị ịlẹ kanụ rara. Chajị ụwụwụ ọdada nyanụ ayịdang ọọwa ọlẹ kọ ri ang ibeenu ọlịnyịrọ nyanụ a ri ang-ẹjẹẹ u-uhye nya iro o-gbe oyi myị oyi ọlẹ kam lẹẹ nwa hanụ alẹ lẹlẹ. 14Ọlẹng nyanụ ọnyị myị ọnyị kọ da ụwụwụ ka aalẹ, ị ka be ọngọọwa deeji hi ẹpwụ nya angịnyị nyam, chajị ọ bịrị iro ọlẹ kam nwa tọọ lẹ.”

15Ohe Oluhye myịmyị byi Ebiraham yẹkẹẹ, “Ebiraham wo mẹ! Ẹnyị nya ahụ nyang á ka ri iSerayị kaka. Am jam ka ya ẹnyị nya ahụ nyang, iSerayị daalẹ lẹ. Lẹ, á wụrwọọ iSerayị kokoo. Ọwa ka ri iSera bwu alẹ kele kịlahị lẹlẹ. 16Am ka wahị kụrụ iSera ahụ nyang. Am ka ya ọnyị ọlẹng họọ ma. Am ka wahị kụrwọọ gbee kọ ka yẹ ri ịnịna ogogo nya alepwoja la datị-datị. Anyị nya alụma nya iSera ịhyẹ lụmẹ-lụmẹ ka ri ịdịrịhụ ụ-ụwa e-epwoja la datị-datị ị-ịlahị wẹẹ.” 17Ịnyị lẹ, Ebiraham a juwa kpa ẹtẹ eji ha Amkpaa Ohe Oluhye lẹ. Ọ hụlọ ẹhụ, juwa ya ẹla ta ịlọmwụ yẹkẹẹ, “Ahyu, anụ ya ká okwirichi ọlẹ kọ gu ẹka ohu ịrụ lala am lẹ, ka myịmyị jẹ-ẹ ma ọnyị alẹ myị wẹẹ? Lee, iSera kọọwa gu ẹka ohu ine kụrụ iwo lẹ, ka jẹ-ẹ ma ọnyị myị alẹ wẹẹ?” 18Ụka ọọwa, Ebiraham wẹ byi Ohe Oluhye yẹkẹẹ, “Ọ tị́ lanyị Adam, họ ká Ichimẹlụ a ri ọngọ ka wo ẹnyị-ehe nyam chẹẹ mẹ!” 19Ịnyị lẹ, Ohe Oluhye a wẹ byoo yẹkẹẹ, “Ehe, ịnyị, ọ ka la ka. iSera ahụ nyang ka jẹnyị. Ọ ka ma ọnyị ọlẹng. Ị ka wụrụ ẹnyị nyamwụ Ayịsiki. Am Ohe Oluhye ka nwa iro o-gbe oyi myị oyi ọlẹ ha Ayịsiki ayịdang bala anyị ịtụma nyamwụ ịkịla wuu gbee pwụ ọmyịmyị nya odehe ọlẹ.” 20Ohe Oluhye myịmyị byi Ebiraham yẹkẹẹ, “Am wo omyi nya ọbịlẹ bịlẹ nyang ọlẹ ká bịlẹm u-uhye nya Ichimẹlụ lẹ, Ebiraham. Am ka wahị kụrụ Ichimẹlụ. Am ka họ ká alụma nyamwụ ka pyẹ lụmẹ-lụmẹ ị-ịlahị. Am ka họ kọ ka yẹ ri adịda nya anyị iwo kụrụ imiiye ịhyẹ ịlẹ kị ka ri ịdịrịhụ. Am ka họ kọ ka yẹ ri adịda nya epwoja ọtụka-ọtụka. 21Ma, ẹ-ẹga nya Ayịsiki ọlẹ ká iSera ahụ nyang wẹẹ ka ma hang lụka ọlịịlẹ ịhwọngkịla, Am ayịdang a ka họ ọnụ ọmyịmyị nya iro ọnwanwa nyam ọlẹ kam nwa hanụ jịra pyii lẹlẹ.”

22Ụka ká Ohe Oluhye ya ala ịlẹ ta Ebiraham kpá lẹ, ọ rụ bwu ẹga nya Ebiraham lẹlẹ. 23Ẹnụtụrụ ọlẹ ká Ohe Oluhye da Ebiraham ehile nya ụwụwụ ọdada ọwẹ kpangga, Ebiraham a họ ehile ọọwa jịra ịnyịnyị-ịnyịnyị lẹ. Ebiraham da Ichimẹlụ ọnyị nyamwụ ụwụwụ. Ọ da anyị alẹng ịnyị myị ịnyị ịlẹpwa nyamwụ wuu ụwụwụ. Tụ anyịhị alẹng ịlẹpwa nyamwụ ịlẹ wuu kọ rara bwu ija ịkịla bala anyị alẹng nyaa ịlẹ wuu kị mama anyịhị ụ-ụwa ọdọdẹpwa nya Ebiraham, ọ daa ụwụwụ wuu ịnyịnyị. 24Ebiraham ayịdang gu ẹka ohu ine kụrụ iwo, iwo kụrụ ihikichu ene kọọwa ayịdang da ụwụwụ ẹnụ ọọwa. 25Ichimẹlụ lẹ, ọ gu ẹka iwo kụrụ ịta ene kịị dọọ ụwụwụ. 26Ebiraham bala Ichimẹlụ ọnyị nyamwụ da ụwụwụ ẹnụ alaalẹ. 27Ebiraham ayịdang bala Ichimẹlụ, tụ anyịhị alẹng bala anyị alẹng nyaa wuu a ri angịlẹ kịịwa wuu da ụwụwụ ju awụlẹ alaalẹ wuu lẹ.

Currently Selected:

ỌMWỤ ỌDADA 17: IBNO

Highlight

Copy