ỌMWỤ ỌDADA 15

Ohe Oluhye Nwa Iro ha Ebiram

1Ụka kọ nọ chẹẹ lẹ, Ebiram a yọyị a-arụrụ lẹlẹ. Ịnyị lẹ, Amkpaa a ya ẹla tọọ a-arụrụ yẹkẹẹ,

“A ju uhi ka.

Am ayịdang a ri ọkụmada nyang lẹ.

M̀ ka nwụng uri ọtụka-ọtụka.” 2Ma, Ebiram wẹ yẹkẹẹ, “Ọngọlahị Amkpaa ee, ịịyẹ a tị́ ka ri apyobwuna nya ụdụ ọtụka-ọtụka ọọwa ọlẹ ká ka ya ham kọ ri ká ya ọnyị ọhẹ-lọhẹ ham ma kpong-kpong ka? Yẹ wẹẹ! Ó-ri kam gbu alẹ, ọnyọhị nyam Eliyesa ọlẹ kọ ri ọla ịDamasịkọsị a dachichi wẹẹ ka ri ugu nyam lẹlẹ. 3À tị́ yẹ-ẹ̀ wẹ lẹ, á ya ọnyị ọhẹ-lọhẹ ham ma kaka gbee ká ọnyọhị amamadiroko ọlẹ kam kpakpa ẹ-ẹpwa nyam a wẹẹ ka pwọ ugu nyam ri lẹ.” 4Ịnyị, Amkpaa a ya ẹla ta Ebiram yẹkẹẹ, “Ebiram, a chuko ka, ẹnwa. Ọ-ọnyọhị ọlẹpwa nyang ọwẹ a ka ri ugu nyang kpong-kpong ka. M̀ juwa ka ya ọnyị ọlẹng hang ma chajị kọọwa a ka ri ugu nyang hang pyii wẹẹ.” 5Ọọwa, ọ kpa Ebiram kpehe wẹ ọdọda lẹ, ọ mẹ ịdịchụ iluhye-ọgba jọọ lẹlẹ. Ọ byi Ebiram yẹkẹẹ, “Ebiram, chẹhị kele ka uhye-ọgba ka yẹ ịdịchụ ịwẹ wuu wẹẹ, jaabwọ ká ịdịchụ ịwẹ ju iru gbee ká ka jẹ-ẹ waa kpá myị kaka wẹẹ, ịnyịnyị-ịnyịnyị, anyị nyang a ka ju iru lụmẹ-lụmẹ ị-ịlahị lẹlẹ.” 6Ịnyị lẹ, Ebiram a kpa ọkịlẹtụ ookpokpo la ọmyịmyị ẹ-ẹga nya Amkpaa ụ-ụwa lẹ, Ohe Oluhye ayịdang a tịtị wa Ebiram nya ọngịnyị ọnyịịla ị-ịlahị nya ịlọmwụ ọ-ọla ọọwa lẹlẹ.

7Ohe Oluhye myịmyị ya ẹla ta Ebiram yẹkẹẹ, “Ebiram, Am ayịdang a ri Amkpaa ọngọlẹ kọ gbang kpehe bwu epweji nya Uu ọ-ọpyị nya ala ịKaldịya nyanụ chajị kam ka hu ọpyị ọlẹgẹlẹ hang la lẹ.” 8Ma, Ebiram wẹ byoo yẹkẹẹ, “Ọngọlahị Amkpaa ee, ịịyẹ a tị́ ka ri ang ọ-ju ẹjẹẹ yẹkẹẹ, ahụ nyị juwa ka ya ọpyị ọlẹ ham la ịnyịlẹhị mẹ?” 9Ọọwa lẹ, ọ byi Ebiram yẹkẹẹ, “Kele ká wu ụgba nya ẹna ọnyang ọlẹ kọ gu ẹka ịta, ká wu ụgba nya embiri ọlẹ kọ gu ẹka ịta, ká wu omilodo ọlẹ kọ gu ẹka ịta, ká wu enewulo ọhẹ bala okiripete ọhẹ kpa wam mẹ.” 10Ịnyị lẹ, Ebiram a kpa iyo ịwẹ wuu kele kịlọọ jaabwọ kọ byoo lẹlẹ. Ọọwa lẹ, Ebiram a gu iyo ọnyọnyọọnyị ene mememe imiiye nịrọ awụlẹ u-uhye ị-ịlahị nya Amkpaa lẹlẹ. Ma, ịchịnụ ịwẹ lẹ, ọ́ gwaa ịwa ene ịnyị ka. Ọ tụụbwọ hyaa ịwa gu ụwa ịịwẹ lẹpwụ-lẹpwụ. 11Ịnyị lẹ, ụka ká epwu ịhyẹ hụ warị kaka kụ u-uhye nya iyo ịwẹ, juwa tịtọ kị ka ryaa lẹ, Ebiram kwaa wuu rụ hyaa.

12La obyi pyii, ụka ká ẹnụ juwa hu ẹchị ẹgbụ, une ọtụka-ọtụka a chụ Ebiram lẹlẹ. Ịnyị lẹ, ukpowu okpẹm-kpẹm ọhẹ a chị kụrụ Ebiram ụ-ụwa lẹ, ọ juwa ju uhi ọtụka-ọtụka lẹlẹ. 13Ọọwa lẹ, Amkpaa a ya ẹla ta Ebiram yẹkẹẹ, “Ebiram wo mẹ! Anyị ịtụma nyang ka mwụ kaka kụ ọpyị ọkịla lala angga ụ-ụwa. Ị ka yẹ ri anyịhị nya alọpyị ọọwa lala ẹka ohu ine (400) gbẹgbịlẹ ụ-ụwa. 14Ma, ẹ-ẹkpẹ nya ọọwa, am ayịdang ka yẹ alepwoja ọọwa akama kwiwa. M̀ ka họ ká anyị ịtụma nyang wuu ka kpụ ụdụ chakụ-chakụ bwu ụwa nyà. 15Ahụ ayịdang lẹ, a ka ri ehe tata, chị okwirichi kụnyẹ-kụnyẹ ene ká ka gbu. Ẹ-ẹpwụ nya okpunyi, a tị ka gbu ụka ọọwa ịnyịnyị lẹ. 16Ụka ká alogu nya anyị ịtụma nyang ịwẹ a chịpwụrụ ụ-ụwa ọ-ọpyị ọọwa gbegbegbe jịra alogu nya oyi ohene kpá lẹ, anyị ịtụma nyang ịwẹ a ka nya tịrẹkpẹ warị wẹ ọpyị ọlẹ myịmyị lẹlẹ. Chajị ụka kọ ka pwụ ụka ọọwa kpá lẹ aalẹ, ang onyobyi ọhọhọ nya ala Amọ ịlẹ ayịdang ka nwa pwụ achinege kpụ am Ohe Oluhye ayịdang ka yaa akama o-oluhye nya ang onyobyi ọhọhọ nyaa ọọwa lẹ.”

17Ụka ká ẹnụ byi kpá, ká owu chị lẹ, Ebiram a chẹhị kaka yẹ ẹchụ iyegu nya ịwa ọhẹ ká ila juwa chị ịmwụ bwu ẹpwụ nyamwụ kpehe bala ẹlẹlẹ nya ila ọhẹ ọlẹ kọ lala ila nya ukunggo kọọwa bala ẹchụ ọlaanyị juwa chịpwụrụ bwu apewa nya iyo ịlẹ ká Ebiram ya kịla iya ụ-ụwa lẹlẹ. 18Ụka ọwẹ kpangga, ẹnụtụrụ ọwẹ, Amkpaa a nwa iro ha Ebiram ụ-ụwa lẹ. Ọ nwa iro ọọwa họọ yẹkẹẹ, “Am ayịdang myị ọnụ hang yẹkẹẹ, ọpyị ọlẹ kọ lẹẹ bwu ihu nya ala Ijipiti ọlẹ lalaala kele ka Ihu iYufuretisi lẹẹ, m̀ ka hu ọpyị ọlẹ ha anyị ịtụma nyang bala anyị nyaa wuu pyịyọọ. 19Ọpyị ọọwa a wẹ ká ala ịKẹn bala ala iKenisi bala ala ịKadịmọn, kụ lẹẹlẹẹ lẹ, 20tụ ala iHiiti bala ala iPerisi bala ala iRefa, 21bala ala Amọ bala ala iKenan bala ala ịGẹgachị bala ala iJebusi anyị kụ ịnyịnyị lẹ. Ma, anyị ịtụma nyang ahụ Ebiram bala anyị nyaa wuu, m̄ ka hu ọpyị ọwẹ ha pyịyọọ ịnyịlẹhị lẹlẹ.”

Currently Selected:

ỌMWỤ ỌDADA 15: IBNO

Highlight

Copy