UMÁTIYU 26

Aótrɛ̄yí kú ācogwɛ́ɛya kú ācɛ Ujíyu le ujɔ̄ tū kéē lɛ Ujísɔ̄si ŋmó

(Umák 14.1-2; Ulúk 22.1-2)

1Eko nɛ̄ Ujísɔ̄si lɛ ɛlā nēe bá ā ka kwɛyí ā, anɔ́ɔ ó da ayíkpó kú nū kahíníī, 2#Oyɛb 12.1-27“Aá jé ka eko nɛ̄ ɛ̄cī ɛpa le gla ŋmá ícɛ, ucɛ kú onyatá ā géē wā, é kē í je Ɔyínɔ̄nyīlɔ kú Ɔ̄cɛ tū aólɛlā kú nū abɔ̄ kéē lɛ ɔ́ nyɔ́kpá.”

3Anɔ́ɔ aótrɛ̄yí kú ācogwɛ́ɛya mɛ́mla anyākwɔ́cɛ le jīla tɔ̄há ipú agbla kú otrɛ̄yí kú ācogwɛ́ɛya nēé hī ka Ukáyāfasi ā. 4Anɔ́ɔ é le ujɔ̄ tū tɔ̄há kú ɛ́gɛ́nɛ̄ ē géē lɛ kwú Ujísɔ̄si cɛ́ɛ́ kéē lɛ ɔ́ ŋmó tayínū lɛ ā 5Amáŋ é kahíníī, “Ó híīī wɛ eko ucɛ ā ŋ́ ohígbū nɛ̄ ācɛ géē cīlɛ̄fú.”

Ɔnyā éyi lɛ anɔ̄ okpócu nya Ujísɔ̄si iyē Ubɛ́tāni

(Umát 14.3-9; Ujɔ́n 12.1-8)

6Eko ɔ́ɔmā, eko nɛ̄ Ujísɔ̄si yɔ̄ Ubɛ́tāni ɔlɛ́ Usáyímɔ̄ni, ɔ̄cɛ nōo tɛtɛ lagwú ā, 7#Ulúk 7.37,38ɔnyā éyi wā ɛgiyí nū bī úkpe kú ɔtulalī nōo gbɔɔ́lá nɛ̄hi. Anɔ́ɔ ó lɛ ɔ́ tū ɔ̄ ɛyí abɔ̄ ó yɔ̄ ī lé ɔdōlé ā. 8Amáŋ eko nɛ̄ ayíkpó ā lɛ ɔ́ má ā, ɔtū le wú uwā, anɔ́ɔ é kahíníī, “Ohígbū ɔdí nōó gē kpó ɛ̄nyā bónū ā mɛ́ɛ̄? 9É lɔfú je ɔtulalī nyā lá ije nɛ̄hi glá, cɛ́ɛ́ kéē kwú ije ā ú lɛ aógbɛhá.” 10Abɔ̄ Ujísɔ̄si lɛ ɔdā nēé ka ā jé ā, ó da uwá kahíníī, “Ɔdíyá nɛ̄ aá ī junwalu lɛ ɔnyā ā mɛ́ɛ̄? Ɔdā olɔhi nōó yá gā um á. 11#Obla 15.11Ohígbū ka aá géē lɛ ācogbɛhá ipú aá eko dóódu, amáŋ ami ā í gáā yɔ̄ pī aá eko dóódu ŋ́. 12Ó ŋmá lɛ anɔ̄ okpócu nyā nōó le nya um iyē, ó ke lɛ um tútū gbēyī eko nēé í nyi um ā ɛɛ́. 13Ɔkwɛ̄yi, n̄ da aá ka, ɛga dóódu nēé géē tɔ́ɔna kú ɔ̄kōōlɔhi nyā ipú ɛcɛ, é géē kɛlā lɛyíkwu ɔdā nɛ̄ ɔnyā nyā yá ā, kéē bī le blakwu ɔ́.”

Ujúdasi cɛ̄ kóō yá ibīyājɛ tū Ujísɔ̄si

(Umák 14.10-11; Ulúk 22.3-6)

14Anɔ́ɔ éyi kú ayíkpó igwɛ́ɛpa ā, nēé hī ka Ujúdasi Iskáriyɔ̄tu ā, nyɛ̄ɛ̄ le tá ɛgiyí aótrɛ̄yí kú ācogwɛ́ɛya ā, anɔ́ɔ ó kahíníī, 15#Usak 11.12“Ɔdí nɛ̄ aá géē je gā um ká n̄ lɛ ibīyājɛ yá tū Ujísɔ̄si lɛ aá ā?” Anɔ́ɔ é le ikpīje nɛ̄hɛ́ ofucigwó ka lɛ ɔ́ á. 16Oŋmá eko ɔ́ɔmā ā, ó gbɔɔ́ ō tíne eko olɔhi nōó géē yá ibīyājɛ tū Ujísɔ̄si.

Ujísɔ̄si le ucɛ kú onyatá ā lé mla ayíkpó kú nū

(Umák 14.12-26; Ulúk 22.7-23; Ujɔ́n 13.21-30; 1 Ukɔ́r 11.23-25)

17Ɛ̄cī aflɛ́yí kú ucɛ kú igbō nōó ī nū ŋ́ mā ā, ayíkpó ā wā ɛgiyí Ujísɔ̄si, anɔ́ɔ é kahíníī, “Iní nɛ̄ a tíne ká ālɔ̄ tútū gā uwɔ ká ā lé ucɛ kú onyatá āa” 18Ujísɔ̄si kahíníī, “Aá ga igelī ɛgiyí ɔ̄cɛ éyi ā ku aá da ɔ́ kahíníī, “Utíca ā ka, eko kú anúɔ le bá ajaajɛ ɛɛ́, ka anúɔ géē lé ucɛ kú onyatá ā tɔ̄há mla ayíkpó kú anúɔ ɔlɛ́ uwɔ.” 19Ayíkpó ā le yá ɛ́gɛ́nɛ̄ Ujísɔ̄si da uwá ā, anɔ́ɔ é lɛ ucɛ kú onyatá ā tútū á.

20Eko nɛ̄ ɔnɛ̄ le gbo ā, Ujísɔ̄si yɔ̄ ī lé ɔdōlé mɛ́mla ayíkpó igwɛ́ɛpa ā. 21Abɔ̄ é yɔ̄ ī lé ɔdōlé ā, ó kahíníī, “Ɔkwɛ̄yi, n̄ da aá ka, ɔ̄cɛ éyi kú ipú aá géē yá ibīyājɛ tū um.” 22Ó kwú uwā iyē nɛ̄ɛ̄nɛ̄hi, anɔ́ɔ é gbɔɔ́ ō da ɔ́ ɔ̄kā éyééye kahíníī, “Óndú, ami nɛɛ?” 23#Aíjē 41.9Amáŋ ó tóohi kahíníī, “Ɔ̄cɛ nōo lɛ abɔ̄ wu ocíbú mla um ā gáā yá ibīyājɛ tū um á. 24Ɔyínɔ̄nyīlɔ kú Ɔ̄cɛ géē kwú ɛ́gɛ́nɛ̄ é tá ipú ɔkpá kú ɛlɔ̄ɔwɔicō lɛ ā ā. Amáŋ ɔ̄cɛ nōo géē yá ibīyājɛ tū Ɔyínɔ̄nyīlɔ kú Ɔ̄cɛ ā le jī ɛɛ́. Ó géē lɔhi lɛ ɔ̄cɛ ɔ́ɔmā fíyɛ́ ɔ́dāŋ kéē ma ɔ́ ŋ́.” 25Amáŋ Ujúdasi oyíbīyājɛ ā tóohi kahíníī, “Utíca, ami nɛɛ?” Anɔ́ɔ Ujísɔ̄si da ɔ́ kahíníī, “Awɔ ka lɛ ā n.”

26Abɔ̄ é bá ī lé ɔdōlé ā, Ujísɔ̄si kwú igbō ú, ó lɛ ɔhā hɛ́ ce ɔ́, ó lɛ ɔ́ ce, anɔ́ɔ ó le je lɛ ayíkpó kú nū yɔ̄ ī kahíníī, “Aá mīyɛ kú aá lé. Ɛ̄nyā wɛ ɔkpíyē kú um á.” 27Anɔ́ɔ ó kwú íkókwū ā ú, eko nōó lɛ ahínyá tá Ɔwɔicō kwɛyí ā, ó kwú ɔ̄ ú lɛ uwá anɔ́ɔ ó kahíníī, “Odúúdú aá, aá gwá. 28#Oyɛb 24.8; Ujer 31.31-34Ohígbū ka ɛ̄nyā wɛ oyī kú um nēé pɛ́ bónū ohígbū odúúdú ācɛ cɛ́ɛ́ kú Ɔwɔicō kóō géē je íne nēé bīya ā yá uwā ɛhi á. Oyī nyā nɛ̄ Ɔwɔicō le gbɛka ɛ̄yīpɛ̄ mɛ́mla ācɛ ɔlɛ́ nū á. 29“N̄ da aá ka, ŋmá abālɔbányā ń gáā gwá ejé kú īkpɔ̄cí ufáyin nyā gɛ ŋ́ jāā gbó ɛ̄cī ɔ́ɔmā nɛ̄ n géē gwá ɔ̄ ɛ̄yīpɛ̄ mɛ́mla aá ajɔ̄ɔ̄cɛ́ kú Ádā um ā.”

30Anɔ́ɔ eko nēé le ijē gwó kwɛyí á, e le bɛ̄cɛ, le pɛ́ ga ɛfu kú Olífu.

Ujísɔ̄si kɛlā lɛyíkwu íhó nū nɛ̄ Upíta gáā hɛ́ ā.

(Umák 14.27-31; Ulúk 22.31-34; Ujɔ́n 13.36-38)

31 # Usak 13.7 Ujísɔ̄si da uwá kahíníī, “Otú mā piíí ā odúúdú aá géē kwu ŋmá ɛgiyí um. Ohígbū kéē lɛ ɔ́ tá ipú ɔkpá ɛlɔ̄ɔwɔicō kahíníī, ‘N géē ŋmó ɔ̄cogbaálá ā, cɛ́ɛ́ ɔ́wá kú aálá kú nū ā kē í fíyákátā.’ 32#Umát 28.16Amáŋ eko nēé kwú um ú héyī, n géē ga Ugálīli gbɔbū lɛ aá.” 33Amáŋ Upíta tóohi da ɔ́ kahíníī, “Ɔ́dāŋ ka odúúdú ācɛ le kwu ŋmá ɛgiyí uwɔ, ń gáā kwu gbóógbóō ŋ́.” 34Ujísɔ̄si da ɔ́ kahíníī, “Ɔkwɛ̄yi, n̄ da uwɔ ka, otú mā, ofíílí ká ɔbúgwū kóō í tōgwú, a géē híhó ka anúɔ í jé um ŋ igbo ɛtá.” 35Upíta da ɔ́ kahíníī, “Ɔ́dāŋ koó kōō wɛ ka n̄ gekwú mla uwɔ náana, ń gáā híhó ka n jé uwɔ ŋ́ nɛɛ ŋ́.” Odúúdú ayíkpó ohile ā ka ɛ́gɔ́ɔmā dúú.

Ujísɔ̄si gbɔ̄ɔkɔ lɛ Ɔwɔicō ɛga nēé hī ka Ugɛtsɛ́mēni ā

(Umák 14.32-42; Ulúk 22.39-46)

36Anɔ́ɔ Ujísɔ̄si mɛ́mla ayíkpó kú nū le tá ɛga éyi nēé hī ka Ugɛtsɛ́mēni ā, anɔ́ɔ ó da ayíkpó kú nū kahíníī, “Aá báajɛ amānyā ká n̄ gɔbu gaá gbɔ̄ɔkɔ.” 37Anɔ́ɔ ó kwú Upíta mɛ́mla ayínɔ̄nyīlɔ ɛpa kú Usébēdi ā ú. Ɔtū le bīya lɛ ɔ́, ɔtūnōbí kē gbɔɔ́ ō yá ɔ̄. 38Anɔ́ɔ ó da uwá kahíníī, “Ɔtūnōbí nɛ̄hi yɔ̄ ī yá um bɔ̄dā nɛ̄ géē kwú ā. Aá bá amānyā kú aá leyī kwɛɛcɛ mɛ́mla um.” 39Abɔ̄ ó yɛ gɔbū lígíí ā, ó kwú okwúukwu ú kwajɛ lɛ eyī pīya klá ajɛ, anɔ́ɔ ó gbɔ̄ɔkɔ kahíníī, “Ádā um, ɔ́dāŋ́ koó tɔ́ɔtɛ́, yá kéē kwú íkókwū nyā ú ŋmá ɛgiyí um. Nááná ā, ó wɛ ɔdā nɛ̄ n tíne ā gáā yá ā ŋ́, amáŋ ɛ̄nɛ̄ a tíne ā kóō yá.” 40Ó gā ɛgiyí ayíkpó ā, anɔ́ɔ ó má uwā bá ī gbɔlā, anɔ́ɔ ó da Upíta kahíníī, “Ayíka aá leyī kwɛɛcɛ mla um áwa ékpó glá ŋ́ kɛ̄ɛ? 41Aá leyī kwɛɛcɛ kú aá kē gbɔ̄ɔkɔ kú Ɔwɔicō kóō cɛ̄ lɛ uwá jé áá má ŋ́. Ɔkwɔ̄ɔ̄kwɛ̄yi, odo le tútū, amáŋ ɔkpíyē ā le gbagbafú.” 42Igbɔhá, abɔ̄ ó nyɛ̄ɛ̄ igbo ɔ́mpa ā, ó gbɔ̄ɔkɔ kahíníī, “Ádā um, ɔ́dāŋ ka ɛ̄nyā í gla um glá ŋ́ ń táafú ŋ́ ayíka n lɛ ɔ́ gwá nɛ, ká ɔdā nɛ̄ a tíne ā kóō le yá.” 43Ó kwúcē wā igbɔhá anɔ́ɔ ó má uwā bá ī gbɔlā, ohígbū ka eyī kú uwā wɛ iyɔ̄lā iyɔ̄lā. 44Anɔ́ɔ ó habɔ̄ uwā tá nyɛ̄ɛ̄ gaá le ɔ̄kɔ gbā igbo ɔ́mɛtá, yɔ̄ ī kɛlā ékpó ā kpɔ́. 45Anɔ́ɔ ó kwúcē wā ɛgiyí ayíkpó ā gaá da uwá kahíníī,”Aá ī gbɔlā klla ī mlɛ́nyɔ́ kpɔ́ ɛ́ɛ́ nɛɛ? Aá má ɔ̄, eko ā gā nēé géē je Ɔyínɔnlɔ kú Ɔ̄cɛ tū ācobīyíne abɔ̄ ɛɛ́. 46Aá cāŋjɛ ká ālɔ̄ nyɔ̄. Aá mɔ́ɔ̄ oyíbīyājɛ tū um ā yɔ̄ ajaajɛ amānyā.”

Aótrɛ̄yí kú ācogwɛ́ɛya lɛ Ujísɔ̄si kwú

(Umák 14.43-50; Ulúk 22.47-53; Ujɔ́n 18.2-11)

47Ujísɔ̄si bī ɛlā okónu yɔ̄ ī ka kpɔ́, ɛ́ɛ́ nɛ̄ Ujúdasi, éyi kú ayíkpó igwɛ́ɛpa ā wā á. Ɛwa kú ācɛ ŋmá ɛgiyí aótrɛ̄yí kú ācogwɛ́ɛya mɛ́mla anyākwɔ́cɛ kú uwā wā mla anú, bī ɔkpacaŋ́gelī mɛ́mla ogbló. 48Oyíbīyājɛ ā tɛtɛ le ɔdōcābɔ̄ éyi je lɛ uwá kahíníī, “Ɔ̄cɛ nɛ̄ n géē lɛ ɔtū má ɔ̄ ɔtū ā wɛ Ujísɔ̄si á. Aá lɛ ɔ́ kwú.” 49Ikpííkpó ɔ́ɔmā, ó gā ɛgiyí Ujísɔ̄si, anɔ́ɔ ó kahíníī, “N hokónu tū uwɔ, Utíca.” Anɔ́ɔ ó le ɔtū má ɔ̄ ɔtū á. 50Amáŋ Ujísɔ̄si da ɔ́ kahíníī, “Oklóbīya um, yá ɔdā nɛ̄ a wā amānyā ohígbū nū ā.” Anɔ́ɔ é wā gaá lɛ Ujísɔ̄si kwú, bī ɔ́ á. 51Ikpííkpó ɔ́ɔmā éyi kú ipú ācɛ nēe bá mla Ujísɔ̄si ā lɛ ɔkpacaŋ́gelī kú nū pi, anɔ́ɔ ó lɛ ɔ́ gɔ́ ɔfiyɛ kú otrɛ̄yí kú ācogwɛ́ɛya ā, anɔ́ɔ ó lɛ ɔ́ ahɔ̄ éyi hɛ́ á. 52Ujísɔ̄si da ɔ́ kahíníī, “Kwú ɔkpacaŋ́gelī kú uwɔ ú wu apɛ́. Ohígbū ka odúúdú ācɛ nēe bī ɔkpacaŋ́gelī le ŋmó ācɛ ā, ɔkpacaŋ́gelī nēé géē le ŋmó uwā á. 53A gbɛlá ka n ŋ́ lɔfú tɛ̄hɔ̄ fu Ádā um kóō tū ɔ́wá kú aálelékwū-ōtɛ̄hɔ̄ fu um abālɔbányā glá ŋ́ nɛɛ? 54Amáŋ ɔ́dāŋ ka ɛ̄nyā i yá lɛ ā, abɔ̄ ó ya lɛ nɛ̄ ɛlɔ̄ɔwɔicō ā géē yá jīla mɛ́ɛ̄ ā, ɛ̄nɛ̄ o ka kóō í yá piíí ā?” 55#Ulúk 19.47; 21.37Eko ɔ́ɔmā Ujísɔ̄si da ɛwa ā kahíníī, “Aá bī ɔkpacaŋ́gelī mɛ́mla ogbló wā gaá kwú um bɛ̄ɛka n wɛ ɔ̄cohɛ́julúgwu ā nɛɛ? Ɛ̄cī dóódu n yājɛ ipú Agblīihɔ-nɛ̄hi ā gē nwɛ̄lā, aá kē kwú um ŋ́. 56Amáŋ odúúdú ɔdā nēe bá ā le yá ká ɔdā nɛ̄ ācomɛ́ɛbɛ tá ipú ɔkpá ɛlɔ̄ɔwɔicō ā kóō le yá jīla.” Anɔ́ɔ odúúdú ayíkpó ā habɔ̄ ɔ́ tá le pɛ́ kwu á.

E lɛ Ujísɔ̄si bī wā iyɔ̄bū otrɛ̄yí kú ācogwɛ́ɛya kéē kɛpɔ̄ tū ɔ̄

(Umák 14.53-65; Ulúk 22.54-55,63-71; Ujɔ́n 18.12-14,19-24)

57Ācɛ nēe kwú Ujísɔ̄si ā lɛ ɔ́ bī ga ɔlɛ́ Ukayáfāsi, otrɛ̄yí kú ācogwɛ́ɛya ɛga nɛ̄ aítíca kú íne mɛ́mla anyākwɔ́cɛ jīla tɔhá ā. 58Amáŋ Upíta yɛce ɔ́ igbīīgbīhi ɛga oligbó jāā gbéeko nōó gā agbla kú otrɛ̄yí kú ācogwɛ́ɛya ā. Ó le yɛ tá ipú inu, klla gaá yājɛ mla ācogbāājɛ kóō má ɔdā nōo gáā yá ā gaajaajɛ. 59Aótrɛ̄yí kú ācogwɛ́ɛya ā mɛ́mla odúúdú ójīla okɛpɔ̄ ā bá gē tíne ijáalí ɛ̄kɛ̄mgbɛ̄ kéē cɛ̄ tū Ujísɔ̄si, cɛ́ɛ́ kéē lɛ ɔ́ ŋmó. 60Amáŋ é má odúúmā ŋ́, nááná nɛ̄ ācɛ ocījáalí ɛ̄kɛ̄mgbɛ̄ alɛwa wā ā. 61#Ujɔ́n 2.19Igbīhāajɛ ā, aɛ́pa kú uwā wā iyɔ̄bu gaá ka kahíní, “Ɔ̄cɛ ā kahíníī, ‘N lɔfú ca Agblīihɔ-nɛ̄hi kú Ɔwɔicō ā tāajɛ, kú n̄ klla gwó ɔ̄ ipú ɛ̄cī ɛtá glá.’” 62Anɔ́ɔ otrɛ̄yí kú ācogwɛ́ɛya ā cāŋjɛ kla da ɔ́ ɔ̄kā kahíníī, “Abɔ̄ a tóohi kú ɔdā nēé cīije nū bá uwɔ ā lɛ ā ā?” 63Amáŋ Ujísɔ̄si yɔ̄ cíí. Otrɛ̄yí kú ācogwɛ́ɛya ā da ɔ́ kahíníī, “N da uwɔ ɔ̄kā ŋmá iyē kú Ɔwɔicō nōo yēeyī ā, ká ā da alɔ ɔ́dāŋ ka awɔ wɛ Ohɔ́nyɛtá, Ɔyínɔ̄nyīlɔ kú Ɔwɔicō á.” 64#Udan 7.13Ujísɔ̄si da ɔ́ kahíníī, “Awɔ ka lɛ ā á. Amáŋ n̄ da aá ka, oŋmá abālɔbányā aá géē má Ɔyínɔ̄nyīlɔ kú Ɔ̄cɛ abɔ̄ ó yājɛ abɔ̄lɔ́ná kú Ɔwɔicō nōo lɔfú fíyɛ́ dúú ā, klla géē kwúcē wā ɛyí ojuja kú ɔkpáncō. 65#Ulīf 24.16Anɔ́ɔ otrɛ̄yí kú ācogwɛ́ɛya ā lɛ īlī kú nū híla, klla kahíníī, “Ó ī ka ɛbí ɛɛ́. Abɔ̄ ó yá ɛ́ɛ́ nɛ̄ alɔ gē dɔɔ̄kā ijáalí ɛ́ɛ́ mā ā? Aá lɛ ɛbí kú nū pó ɛɛ́. 66Ɔdí nɛ̄ aá gbɛlá ā?” É tóohi kahíníī, “Ó cíkā kóō gekwú.” 67#Ayis 50.6Anɔ́ɔ é gbɔɔ́ ō táahɛ klá anú eyī, tū ɔ̄ akwū á. Ācɛ ōhī fíyɛ́ ɔ̄ abɔ̄ ahɔ̄ yɔ̄ ī ka kahíníī, 68“Da alɔ, Ohɔ́nyɛtá, ɔ̄nyɛ fíyɛ́ uwɔ abɔ̄ ahɔ̄ āa?”

Upíta híhó ka anúɔ í jé Ujísɔ̄si ŋ́

(Umák 14.66-72; Ulúk 22.56-62; Ujɔ́n 18.15-18,25-27)

69Upíta yājɛ ɛcɛ ódúdɔ̄lɛ́, anɔ́ɔ éyi kú ācocɛ̄hɔ̄ nɔ̄nyā ā wā ɛgiyí nū anɔ́ɔ ó kahíníī, “Awɔ, a yɔ̄ pī Ujísɔ̄si kú Ugálīli ā dúú.” 70Anɔ́ɔ o híhó iyɔ̄bū ācɛ dóódu kahíníī, “Ń jé ɔdā nɛ̄ a ī ka ā ŋ́.” 71Anɔ́ɔ eko nōó nyɛ̄ɛ̄ le tá okómpīinu ɔwɛ kú ɔlɛ́ ā, ɔ̄cocɛ̄hɔ̄ nɔ̄nyā ɔhá le ɔ́ má, klla da ācɛ nēe bá abɔ́ɔ ā kahíníī, “Ɔ̄cɛ ā yɔ̄ pī Ujísɔ̄si kú Unásārēti dúú.” 72Anɔ́ɔ ó híhó klla gbo ɔkpá kahíníī, “Ń jé ɔ̄cɛ ā ŋ́.” 73Eko kpií le gla, ācɛ nēe háyi abɔ́ɔ ā wā gaá da Upíta kahíníī, “Kú ɔkwɛ̄yi ā, ā wɛ ɔ̄cɛ éyi kú ipú uwā dúú, ohígbū ɔkɛ̄lā ōka kú uwɔ, mafú cāā.” 74Anɔ́ɔ ó gbɔɔ́ ō tokónu klla gbɔɔ́ ō gbo ɔkpá kahíníī, “Ń jé ɔ̄cɛ ā ŋ́.” Ɔkwɔkwu ɔ́mā ɔbúgwū lɛ ogwú tū. 75Anɔ́ɔ Upíta le blakwu ɛlā nɛ̄ Ujísɔ̄si ka ā kahíníī, “Gbɔbū ɛ́ɛ́ ká ɔbúgwū kóō tōgwú ā, a géē híhó ka anúɔ í je um ŋ́ igbɛ ɛtá.” Anɔ́ɔ ó nyɛ̄ɛ̄ le tá ɛcɛ gaá gbɔɔ́ ō jikwū nɛ̄hi á.

Currently Selected:

UMÁTIYU 26: IFBCL

Highlight

Copy