UMÁTIYU 27

Upáyílēti le ɛpɔ̄ ka tū Ujísɔ̄si

(Umák 15.1; Ulúk 23.1-2; Ujɔ́n 18.28-32)

1Ɔ̄cɔ̄ɔci blibli kú oŋmɔ́ɔ̄cī nū, odúúdú aótrɛ̄yí kú ācogwɛ́ɛya mɛ́mla anyākwɔ́cɛ kú ācɛ Ujíyu le ujɔ̄ tū lɛyí kwu Ujísɔ̄si kéē lɛ ɔ́ ŋmó. 2Anɔ́ɔ eko nēé kwú agbá ú kwu ɔ́ abɔ̄ ā, é lɛ ɔ́ bī nyɔ̄ gaá kwú ɔ̄ ú tū Upáyílēti, igbómína ā abɔ̄.

Ujúdasi lɛ iyīnū ŋmó

3 # Ācot 1.18,19 Eko nɛ̄ Ujúdasi nōo yíbīyājɛ tū ɔ̄ ā le má kéē lɛ ɔ́ ŋmɛ́pɔ̄bí ā, ó le íjéma hī, kwú īkpīije nɛ̄hɛ́ ofucigwó ā ú kwúcē gē lɛ aótrɛ̄yí kú ācogwɛ́ɛya mɛ́mla anyākwɔ́cɛ ā. Anɔ́ɔ ó kahíníī, 4“N lɛ ɔdā obɔ̄bí yá ɛ́gɛ́nɛ̄ n yá ibīyājɛ tū ɔ̄cɛ nōó yá ɔdōōbɔ̄bí ŋ́ mā.” Amáŋ é da ɔ́ kahíníī, “Ɔ́ɔmā wɛ ɛlā ɔ mɛ́ɛnɛ?” 5Ujúdasi kwú īkpīije nɛ̄hɛ́ ā ú pīya kláajɛ ipú Agblīihɔ-nɛ̄hi ā, anɔ́ɔ ó nyɛ̄ɛ̄ gaá lɛ iyī nū tōlī á. 6Aótrɛ̄yí kú ācogwɛ́ɛya gaá le īkpīije ā kpó yā ŋmá ajɛ, anɔ́ɔ é kahíníī, “Ó cíkā kéē je ijē nyā tá ɛga nēé gē lɛ ije tū ā ŋ́, ohígbū ka íne kú alɔ í cɛ̄ ŋ, abɔ̄ ó wɛ ɔ́lá kú oyī kú ɔ̄cɛ ā.” 7Anɔ́ɔ é lɛ ojuju tū gaá lɛ ajɛ kú ɔ̄comɛtɛ́ éyi lá mla ije ā kéē le nyī okwū kú aúgbɔga. 8Ohígbū ɔ́ɔmā, jāā kwu ícɛ nyā, é hī ajɛ ɔ́ɔmā kahíníī, “Ajɛ kú oyī”. 9#Usak 11.12,13Anɔ́ɔ ɛlā nɛ̄ Ujeremíya, ɔ̄comɛ́ɛbɛ ka ā le yá jīla ā. Ó kahíníī, “Anɔ́ɔ é le ikpīije nɛ̄hɛ́ ofucígwó ā kpó ŋmá ajɛ, áluka kú ije nɛ̄ ācɛ Ísrɛ̄lu cɛ̄ ka aá ī gbā ce ɔ́ ā. 10Anɔ́ɔ é kwú ije ā ú le cíla ulé ajɛ kú ɔ̄comɛtɛ́ ā, ɛ́gɛ́nɛ̄ Óndú ā da um ā.”

Upáyílēti da Ujísɔ̄si ɔ̄kā

(Umák 15.2-15; Ulúk 23.3-5; Ujɔ́n 18.33—19.16)

11É kwú Ujísɔ̄si ú bī nyɔ̄ í háyi iyɔ̄bū Upáyílēti, igbómína ā. Anɔ́ɔ ó da Ujísɔ̄si ɔ̄kā kahíníī, “Awɔ wɛ ɔcɛ́ kú ācɛ Ujíyu ā āā?” Amáŋ Ujísɔ̄si tóohi kahíníī, “Awɔ ka á nɛ.” 12Eko nɛ̄ aótrɛ̄yí kú aógwɛ́ɛya mɛ́mla anyākwɔ́cɛ ā cē ije bá ɔ̄ ā, ó tóohi dúúmā ŋ́. 13Anɔ́ɔ Upáyílēti da ɔ́ kahíníī, “Á pó áluka ije nēé cē bá uwɔ ā ŋ́ nɛɛ?” 14Amáŋ ó tá ɔ̄ ohi ékpó ŋmá ipú ije nēé cē bá ɔ̄ ā ŋ́, nōo yá ká igbómína ā kóō le hídáagó nɛ̄hi.

Upáyílēti le Ujísɔ̄si ŋmɛ́pɔ̄bí kéē lɛ ɔ́ ŋmó

15Ɛ́gɛ́nɛ̄ uculo kú igbómína ā gē lɛ eko ucɛ ā, ó gē hɛ́ alagbá éyi nōo he ójīla ɔtū ā tá lɛ uwá. 16Eko ɔ́ɔmā, é lɛ alagbá olɔfíikpó éyi yɔ̄, nēé hī ka Ubárābasi. 17Anɔ́ɔ eko nēé le jīla tɔ̄há ā, Upáyílēti da uwá kahíníī, “Ɔ̄nyɛ nɛ̄ aá tíne ká n̄ hɛ́tá lɛ aá ā, Ubárābasi kɛ̄ɛ ka Ujísɔ̄si nēé hi ka Ohɔ́nyɛtá ā?” 18Ohígbū koó jé ka oŋmá ímálānyī nēé bī ɔ̄ gé lɛ anúɔ á. 19Abɔ̄ Upáyílēti yāajɛ úgādā ɛpɔ̄ kú nū ā, ɔnyā nū le ɛ̄hɔ̄ tū fu ɔ́ kahíníī, “Ā híīī yá ɔ̄cɛ olɔhi ɔ́ɔmā ɔdā dúúmā ŋ́, ohígbū ka um móōwē alɛwa otú ipú ɔ̄na ohígbū nū.” 20Amáŋ aótrɛ̄yí kú ācogwɛ́ɛya mɛ́mla anyākwɔ́cɛ ā cɛ ɛwa ā piíí piíí kéē cɛ̄ kóō lɛ Ubárābas hɛ́tá, amáŋ kéē lɛ Ujísɔ̄si ŋmó. 21Abɔ̄ ó le lɛ ā, eko nɛ igbómína ā da uwá ɔ̄kā kahíníī, “Ɔ̄nyɛ kú ācɛ ɛpa ā nɛ̄ aá tíne ká n̄ hɛ́tá lɛ aá ā?” E kahíníī, “Ubárābasi.” 22Upáyílēti da uwá kahíníī, “Ó lɛ ā, ɔdí nɛ̄ n géē yá mla Ujísɔ̄si nēé hī ka Ohɔ́nyɛtá ā mɛ́ɛ̄ ā?” Ɛjɛ̄ɛ̄jī uwā kahíníī, “Kéē lɛ ɔ́ nyɔ́kpá.” 23Anɔ́ɔ ó da uwá kahíníī, “Ɔdí gbo, ɔdōōbɔ̄bí nyá nōó yá āa?” Amáŋ é dɛ̄gba fíyɛ́ kahíníī, “Kéē lɛ ɔ́ nyɔ́kpá.”

24 # Obla 21.6-9 Eko nɛ̄ Upáyílēti má koó lɛ ile dúúmā ō ce uwá piíí piíí gɛ ŋ́ mā, ohígbū ka egidi gbɔɔ́ ɛɛ́ mā, ó kwú éŋkpɔ̄ ú lɛ abɔ̄ nā ipéyī ójīla ā. Anɔ́ɔ ó kahíníī, “Abɔ̄ kú um í yɔ̄ oyī kú ɔ̄cɛ nōó yá ɔdōōbɔ̄bí dúúmā ŋ́ nyā gɛ ŋ́. Ɔ́ɔmā kóō wɛ ɛlā kú aá.” 25Anɔ́ɔ odúúdú ācɛ ā tóohi kahíníī, “Oyī kú nū kóō ce alɔ mɛ́mla ayí alɔ ɛyí.” 26Anɔ́ɔ ó lɛ Ubárābasi hɛ́tá lɛ uwá á. Eko nōó lɛ Ujísɔ̄si gɔ́ kwɛyí ā, ó kwú ɔ̄ ú lɛ uwá kéē lɛ ɔ́ nyɔ́kpá.

Aícɔ́ɔja yá Ujísɔ̄si ɛbɛ́

(Umák 15.16-32; Ulúk 23.26-43; Ujɔ́n 19.17-27)

27Aícɔ́ɔja kú igbómína ā lɛ Ujísɔ̄si bī ga ipú agblɔ̄cɛ́ ā. Anɔ́ɔ é lɛ aícɔ́ɔja ohile hīgwú tɔ̄há iyɔ̄bū nū. 28É lɛ úwé kú nū púla, anɔ́ɔ é kwú awulú nɔ̄wá ú wu ɔ́ iyē á. 29É le ɔflā kú ɔcɛ́ kú ujē tá, anɔ́ɔ é kwú ɔ̄ ú klá anú ɛyí á. Anɔ́ɔ é kwú onugbo ú wu ɔ̄ abɔ̄lɔ́ná. Anɔ́ɔ é lɛ okwúukwu kwāajɛ iyɔ̄bū nū yá ɔ̄ ɛbɛ́ gē kahíníī, “Ágábáidu, ɔcɛ́ kú ācɛ Ujíyu.” 30É gbɔɔ́ ō tá ahɛ klá anú, é kwú onugbo ā ú ŋmá abɔ̄ nū, lɛ ɔ́ fíyɛ́ ɔ̄ ɛyí. 31Eko nēé lɛ ɛbɛ́ yá ɔ̄ kwɛyí ā, é lɛ awulú ā púla, anɔ́ɔ é kwú úwé kú nū ú wu ɔ́ iyē á. É le ɔ́ bī gɛcɛ kéē nyɔ̄ í lɛ ɔ́ nyɔ́kpá.

Aícɔ́ɔja le Ujísɔ̄si nyɔ́kpá

32Abɔ̄ é bá ī gɛcɛ ā, e má ɔ̄cɛ Usayiríni éyi, nēé hī ka Usáyímɔ̄ni. É lɛ ɔ̄cɛ ā kwú kóō bī ɔcóōnyɔ́kpá kú Ujísɔ̄si abɔ̄fú. 33É gā ɛga nēé hī ka “Ugɔ́ligɔ̄ta” nɛ̄ ɛyí nū wɛ, “ɛgiyí ákōklō ɛyí” ā.” 34#Aíjē 69.21É le ejé nēé cēkplá mɛ́mla ɔdā ohɔ́nɔ je lɛ ɔ́ kóō gwá. Amáŋ eko nōó lɛ okónu kwu ɔ́ ā, ó tá ō gwá. 35#Aíjē 22.18Anɔ́ɔ eko nēé lɛ ɔ́ nyɔ́kpá ā, é lɛ úwé kú nū kɔ̄ lɛ iyī uwā ŋmá lɛ ūlī ō tá 36Anɔ́ɔ é má báajɛ abɔ́ɔ gbɔɔ́ ō gbō ɔ̄ á. 37É lɛ ije nēé cē bá ɔ̄ kahíníī, “Ɛ̄nyā wɛ Ujísɔ̄si, ɔcɛ́ kú ācɛ Ujíyu.” ā tá bá ɔcí ikpɛ̄yí kú nū. 38É lɛ ācɛ ohɛ́julúgwu ɛpa nyɔ́kpá mla anú. Éyi yɔ̄ abɔ̄lɔ́ná, ɔhá yɔ̄ abɔ̄lúfīyē kú nū. 39#Aíjē 22.7; 109.25Ācɛ nēe pɛ́ gaá yɛ ā ka obɔ̄bí kú nū nɛ̄hi. É jíla ɛyí ī ka kahíníī, 40#Umát 26.61; Ujɔ́n 2.19“Awɔ nōo géē ca Agblīihɔ-nɛ̄hi ā, nōo kē í gwó ɔ̄ ɛ̄cī ɛtá glá ā, lɛ iyī uwɔ hɛ́tá. Ɔ́dāŋ ka a wɛ Ɔyínɔ̄nyīlɔ kú Ɔwɔicō ā, gā ajɛ ŋmá ɔcóōnyɔ́kpá ā.” 41Aótrɛ̄yí kú ācogwɛ́ɛya mɛ́mla aítíca kú íne mɛ́mla anyākwɔ́cɛ dúú ā ka alakpɔ̄ tá ɔ̄ kahíníī, 42“Ó ī hɛ́ ācɛ ɔhá tá, amáŋ ó hɛ́ iyī nū tá glá ŋ́. Anú wɛ ɔcɛ́ kú Ísrɛ̄lu á nɛ, háyi kóō gā ajɛ ŋmá ɔcóōnyɔ́kpá ā, ká ālɔ̄ lɔtūce ɔ́. 43#Aíjē 22.8Ó lɔtūce Ɔwɔicō nɛ, kóō lɛ ɔ́ hɛ́tá mɛ́ɛ́nɛ, ɔ́dāŋ koó tíne ō nya ɔ́ tá. Ohígbū koó ka, ‘Ami ā wɛ Ɔyínɔ̄nyīlɔ kú Ɔwɔicō á.’” 44Anɔ́ɔ ācɛ ohɛ́julúgwu nēé nyɔ́kpá mla anú ā kɛlā obɔ̄bí kú nū ɔwɛ ékpó ɔ́ɔmā dúú á.

Ikwū kú Ujísɔ̄si

(Umák 15.33-41; Ulúk 23.44-49; Ujɔ́n 19.28-30)

45Anɔ́ɔ obū kwú du odúúdú ajɛ ā oŋmá oje igwɛ́ɛpa kú ɔlɛ́ɛnɔ ā jāā gbó oje ɛtá kú ɔlɛ́ɛnɔ á. 46#Aíjē 22.1Anɔ́ɔ ɔdā ō lɛbɛ̄ɛka ɛplá oje ɛtá kú ɔlɛ́ɛnɔ ā, Ujísɔ̄si dɛ̄gba tɛ́ɛcɛ gbōmgbōm kahíníī, “Ɛ́lāyi, Ɛlāyi, lamá sabaktáni?” Ɛyí ɛ̄nyā wɛ, “Ɔwɔicō kú um, Ɔwɔicō kú um, ɔdíya nɛ̄ a habɔ̄ um tá ōfōofū um ā?” 47Ācɛ ōhī nēe māháyi abɔ́ɔ ā le ɛlā nōó ka pó, anɔ́ɔ é kahíníī, “Ɔ̄cɛ ā gē hī Ɛláyíja igwú ɛɛ́.” 48#Aíjē 69.21Obōōbū ɔ́ɔmā éyi kú uwā kwinya nyɔ̄ gaá kwú isosō ú lɛ ɔ́ wu ejé ohɔ́nɔ kwú ɔ̄ ú gbō bá ɔcí anɔ́ɔ ó le je lɛ ɔ́ kóō gwá á. 49Amáŋ ācɛ ɔhá ā kahíníī, “Māháyi ká ālɔ̄ má ɔ̄ ɔ́dāŋ ka Ɛláyíja géē wā gaá nya ɔ́ tá.” 50Ujísɔ̄si dɛ̄gba gbōmgbōm igbɔhá, anɔ́ɔ ó mā owu á.

51 # Oyɛb 26.31-33 Anɔ́ɔ, īlī ohíinu igbó kú Agblīihɔ-nɛ̄hi ā kwú yílɛɛpa ŋmícō wāajɛ. Ajɛ le jíliyē, aɛ́cɔ̄ kē le yíla 52Aúnóji le kpó nwūla, anɔ́ɔ ācɛ ɔlɛ́ Ɔwɔicō alɛwa nēe tɛtɛ kwú ā le kpó héyī á. 53É le bɛ̄cɛ ŋmá únóji, igbīhi nɛ̄ Ujísɔ̄si le héyī ŋmá ɔlékwu ā, é le pɛ́ tá igelī nɛ̄hi kú ɔlɛ́ Ɔwɔicō ā, ācɛ alɛwa kē má uwā. 54Eko nɛ̄ otrɛ̄yí kú aícɔ́ɔja ofɛhɔ̄ ā mɛ́mla ācɛ nēe bá mɛ́mla anú bá ī gbō Ujísɔ̄si ā, lɛ ajɛ nōo jíliyē mɛ́mla ɔdā nōo yá ā má ā, úfi le uwá kwú nɛ̄ɛ̄nɛ̄hi, anɔ́ɔ é kahíníī, “Ɔkwɛ̄yi, ɔ̄cɛ ā wɛ Ɔyínɔ̄nyīlɔ kú Ɔwɔicō nɛ n!”

55 # Ulúk 8.2,3 Anyā alɛwa, nēe tá Ujísɔ̄si ɔkwu ŋmá Ugálīli, kéē cɛ̄ ɔ̄ ɛhɔ̄ ā, bá abɔ́ɔ bá ī má ɔ̄ ŋmá ɛga oligbó. 56Umerí Umagdalíni, mɛ́mla Umerí, ɛ́nɛ́ Ujémīsi mɛ́mla Ujósɛ̄fu, mɛ́mla ɔnyā kú Usébēdi, nōo wɛ ɛnɛ kú Ujémīsi mɛ́mla Ujɔ́ni ā.

É le Ujísɔ̄si nyi

(Umák 15.42-47; Ulúk 23.50-56; Ujɔ́n 19.38-42)

57Eko nɛ̄ ɔ̄nɔ̄ɔ̄nɛ̄ le gbo ā, olagbénú éyi ŋmá Arimatéya gā. Iyē nū wɛ Ujósɛ̄fu, ó kē wɛ ɔyíkpó kú Ujísɔ̄si dúú. 58Ó wā ɛgiyí Upáyílēti gaá le ba ɔ́ kóō kwú okwū kú Ujísɔ̄si ú lɛ anúɔ. Anɔ́ɔ Upáyílēti le ɔ́da je kéē kwú ɔ̄ ú lɛ ɔ́ á. 59Ujósɛ̄fu kwú okwū ā ú, anɔ́ɔ ó lɛ ɔ́ gbo īlī nɛ̄hɛ́ oyēŋēē. 60Ó kwú ɔ̄ ú gwutá ipú únóji ɛ̄yīpɛ̄ kú nū, nōó bū tá ipú ápátɛ́cɔ̄ ā. Ó le ɛcɔ̄ nɛ̄hi míya gwū okónu únóji ā, anɔ́ɔ ó nyɛ̄ɛ̄ á. 61Amáŋ Umerí Umagdalíni mɛ́mla Umerí ɔhá ā bá ajɛ abɔ́ɔ lɛ eyī pīya fu únóji ā.

62Oŋmɔ́ɔ̄cí nū nōo wɛ igbīhi kú otútū kú ɛ̄cī usábāti ā, aótrɛ̄yí kú ācogwɛ́ɛya mɛ́mla ācɛ Ufárisīi lɛ iyī uwā kpó wā í le jīla iyɔ̄bū Upáyílēti, anɔ́ɔ é kahíníī, 63#Umát 16.21; 17.23; 20.19; Umák 8.31; 9.31; 10.33,34; Ulúk 9.22; 18.31-33“Óndú, alɔ blakwu ɔdā nɛ̄ ɔ̄copllɔ̄cɛ ɔ́ɔmā ka, eko nōó yēeyī ā. Ó kahíníī, ‘Igbīhi ɛ̄cī ɛtá, n géē héyī.’ 64Ohígbū ɔ́ɔmā lɛ ɔfú je kéē lɛ únóji ā gwū lɔfú lɔfú jāā gbó ɛ̄cī ɔ́mɛtá ā, ohígbū nɛ̄ ayíkpó kú nū géē nyɔ̄ í je ɔ́ uwī, cɛ́ɛ́ kéē da ācɛ ā kahíníī, ‘Ó le héyī ŋmá ɔlékwu ɛɛ́.’ Ká ɛ̄kɛ̄mgbɛ̄ kú ámōōmɛ ā kóō híīī le fíyɛ́ ákú aflɛ́yí ā ŋ́.” 65Upáyílēti da uwá kahíníī, “Aá kē lɛ ācɛ nēe gbō aá, aá lɛ uwá kpó nyɔ̄ kú aá gaá lɛ ɔ́ yá lɔfú lɔfú ɛ́gɛ́nɛ̄ aá lɔfú glá.” 66Anɔ́ɔ uwá nyɛ̄ɛ̄ gaá lɛ únóji ā gwū lɔfú ŋmá lɛ ɛcɔ̄ nēé míya ce ɔ́ ā, klla lɛ ācogbāājɛ fu kéē gbō ɔ̄.

Currently Selected:

UMÁTIYU 27: IFBCL

Highlight

Copy