ULÚKU 18

Ita kú ɔnyokwu mɛ́mla ɔ̄cohɛ́pɔ̄ ā

1Anɔ́ɔ Ujísɔ̄si le ita éyi kwu lɛ ayíkpó kú nū kóō nwū uwā kéē cíkā ō gbɔ̄ɔkɔ lɛ Ɔwɔicō ojigógó, kéē híīī gbagbafú ŋ́. 2Ó kahíníī, “Ɔ̄cohɛ́pɔ̄ éyi yɔ̄ igelī éyi. Ó jé Ɔwɔicō ŋ́ ɛ́ɛ́ nōó kē ī lɛ ojīlīmā ce ɔ̄cɛ dúúmā ŋ́. 3Ó lɛ ɔnyōkwū éyi nōo lā ipú igelī ékpó ɔ́ɔmā. Ó gē wā ɔlɛ́ ɔ̄cohɛ́pɔ̄ ā gē gbɔ̄ɔkɔ lɛ ɔ́ kóō lɛ ɛpɔ̄ hɛ́ lɛ anúɔ mɛ́mla ɔ̄cɛ nōo yɔ̄ í yá anúɔ ŋmó ā. 4Gbóógbó ā ɔ̄cohɛ́pɔ̄ í yá ɔdā dúú lɛyíkwu ɛpɔ̄ ā ŋ́. Amáŋ igbīhāajɛ ā, ó da iyī nū kahíníī, ‘N yúúfi Ɔwɔicō ŋ́, ɛ́ɛ́ nɛ̄ n kōō í le ojīlīmā ce ɔ̄cɛ ŋ́. 5Amáŋ ɔnyōkwū nyā í cɛ̄ gā um lɛ enyi gwá lɛ uklló ce ɛtɛ́ ŋ́, ohígbū ɔ́ɔmā ā, ń géē lɛ ɛpɔ̄ kú nū hɛ́ lɛ ɔ́. Ɔ́dāŋ ka ń yá lɛ ā ŋ́, ó géē yɔ̄ ī wā jāā gbéeko nɛ̄ eyī le cé um!’” 6Anɔ́ɔ Óndú ā kahíníī, “Aá pó ɔdā nɛ̄ ɔ̄cohɛ́pɔ̄ obɔ̄bíipú nyā ka ā ā. 7Ó lɛ ā, Ɔwɔicō í gáā hɛ́pɔ̄hi lɛ ācɛ nēe wɛ ákú nū nēe gē jikwū otú mɛ́mla ɛnɔ tū ɔ̄ kóō tá uwā abɔ̄ ā ŋ́ nɛɛ? Ó géē kpéko bónū kóō tá uwā abɔ̄ nɛɛ? 8N̄ da aá ka, ó géē hɛ́pɔ̄hi lɛ uwá fíyaa fíyaa. Amáŋ Ɔyínɔ̄nyilɔ kú Ɔ̄cɛ ā géē má ācɛ nēe lɔtūce Ɔwɔicō kpɔ́ eko nōó kwúcē wā aa?”

Ita kú ɔ̄cɛ Ufárisīi mɛ́mla ɔ̄cɛ odɔlɛ́

9Ujísɔ̄si klla kwu ita nyā lɛ ācɛ nēe je iyī uwā ka aá wɛ ācɛ o yá ɔlɔhi, nēé kē je ācɛ ɔhá odée ŋ́ mā. 10Ó kahíníī, “Ɛ̄cī éyi, ó lɛ ācɛ ɛpa nēe pɛ́ ga ipú Agblīihɔ-nɛ̄hi ā nyɔ̄ gaá gbɔ̄ɔkɔ lɛ Ɔwɔicō. Ɔ̄cɛ éyi wɛ Ufárisīi, ɔ̄cɛ ɔhá ā wɛ odɔlɛ́. 11Ɔ̄cɛ Ufárisīi ā háyi ofūnū le ɔkɔ gbā lɛ Ɔwɔicō kahíníī, ‘Ɔwɔicō, n tá uwɔ ahínyá ohígbū ka ń wɛ ɔ̄cuújí ŋ́, ń wɛ ɔ̄cɛ obɔ̄bí ŋ́, ámāŋ ka ɔ̄cɛ o cikpɔ́nyā ɔhá, lɛbɛ̄ɛka ɛjɛ̄ɛ̄jī ācɛ ohile ā ŋ́. N tá uwɔ ahínyá ohígbū ka ń lɛbɛ̄ɛka odɔlɛ́ nōo háyi ánūmā ā ŋ́. 12N gē gwōkónu ɛ̄cī ɛpa ipú aláadi éyi. N gē je éyi ŋmá ipú igwó kú ɔdā dóódu nɛ̄ n lɛ ā gā awɔ.’ 13Amáŋ odɔlɛ́ ā le hɛ́gɛcɛ ŋmá ɛgiyí ācɛ ɔhá, ó kōō jeyī gicō kóō má ɔkpáncō glá ŋ́. Amáŋ ó le abɔ̄ gɔ́ ɔtū kú nū kóō mafú ɔtūnōbí, anɔ́ɔ ó kahíníī, ‘Ɔwɔicō, ményinyi um, n wɛ ɔ̄cobīyíne!’” 14#Umát 23.12; Ulúk 14.11Ujísɔ̄si kahíníī, “N da aá, ɔ̄cɛ odɔlɛ́ ā yá ɔdā nɛ̄ Ɔwɔicō ka kóō le kpaakpa á, ó wɛ ɔ̄cɛ Ufárisīi ā nóó. Ohígbū ka ɔ̄cɛ dúúmā nōo lɛ iyī nū je gicō, é géē tá ɔ̄ wāajɛ. Ācɛ nēe kē tá iyī uwā wāajɛ ā, é géē jé uwā gicō.”

Ayípɛ̄ mɛ́mla ajɔ̄ɔ̄cɛ́ kú Ɔwɔicō

(Umát 19.13-15; Umák 10.13-16)

15Ācɛ ōhī le ayípɛ̄ ɔlɛ́ uwā kpó gé lɛ Ujísɔ̄si kóō lɛ abɔ̄ kpó ce uwá ɛyí cɛ́ɛ́ kóō lɛ ɔhā hɛ́ ce uwá. Amáŋ ayíkpó ā le ɛgba dɛ̄ tū uwā. 16Amáŋ Ujísɔ̄si le ayípɛ̄ ā hīgwú wā ɛgiyí nū anɔ́ɔ ó kahíníī, “Aá jɛga lɛ ayípɛ̄ kéē wā ɛgiyí um. Aá híīī ci uwá o wā ɛgiyí um ŋ́, ohígbū ka ācɛ nēe lɛbɛ̄ɛka ayípɛ̄ nēe bá nyā lɛ ajɔ̄ɔ̄cɛ́ kú Ɔwɔicō á. 17Aá blakwu ɛ̄nyā! Ɔ̄cɛ dúúmā nōó cɛ̄ kú Ɔwɔicō kóō lé ɔcɛ́ oyēeyī kú nū bɛ̄ɛka ayípɛ̄ ā ŋ́, í gáā wɛ ɔ̄cɛ kú ajɔ̄ɔ̄cɛ́ kú Ɔwɔicō glá ŋ́.

Ācɛ olagbénú mɛ́mla ajɔ̄ɔ̄cɛ́ kú Ɔwɔicō

(Umát 19.16-30; Umák 10.17-31)

18Otrɛ̄yí kú ācɛ Ujíyu éyi da Ujísɔ̄si ɔ̄kā kahíníī, “Ɛ́nɛ́nɛ̄ utíca, ɔdí piíí nɛ̄ n géē yá piíí ɛ́ɛ́ ká n̄ lɛ oyēeyī opiyóó ā? 19Ujísɔ̄si da ɔ́ ɔ̄kā kahíníī, “Ɔdíyá nɛ̄ a hī um ka ɛ́nɛ́nɛ̄ ɔ̄cɛ ā? Ɔ̄cɛ ɔhá dúú í lɔhi ŋ́. Ɔwɔicō ōfōōfūnū lɔhi á. 20#Oyɛb 20.14; Obla 5.18; Oyɛb 20.13; Obla 5.17; Oyɛb 20.15; Obla 5.19; Oyɛb 20.16; Obla 5.20; Oyɛb 20.12; Obla 5.16A jé ɔ́da nɛ̄ íne kú Umósīsi dɔɔ̄kā ká ā yá ā. Ā híīī cikpó ɔnyā ɔhá ŋ́. Ā híīī ŋmó ɔ̄cɛ ŋ́. Ā híīī je odée kú ɔ̄cɛ uwī ŋ́. Ā híīī cījáalí ɛ̄kɛ̄mgbɛ̄ tū ācɛ ŋ́. Lɛ ojīlīmā ce ádā uwɔ mɛ́mla ɛ́nɛ́ uwɔ.” 21Ɔnyīlɔ ā tóohi kahíníī, “O ŋmífi nɛ̄ n wɛ ɔyípɛ̄ ā nɛ̄ n lɛ odúúdú aíne nēe bá nyā tū ŋmá á.” 22Eko nɛ̄ Ujísɔ̄si le ɛ̄nyā pó ā, ó da ɔ́ kahíníī, “Ó lɛ odée éyi nōo hile nɛ̄ a cíkā ō yá kpɔ́. nyɔ̄ gaá kwú ɛjɛ̄ɛ̄jī ɔdā nɛ̄ a lɛ ā ú kpó je lá, cɛ́ɛ́ kú ā kwú ije nū í kpó kɔ̄ lɛ ācogbɛhá. Ɔ́dāŋ ka a lɛ ɛ̄nyā yá, a géē lɛ agbénú ajɔ̄ɔ̄cɛ́ kú Ɔwɔicō. Cɛ́ɛ́ a kwúcē wā í le pīya ɔyíkpó kú um.” 23Amáŋ eko nɛ̄ ɔ̄cɛ ā le ɛlā nyā pó ā, ɔtú kwu bīya lɛ ɔ́, ohígbū koó lɛ agbénú nwuné nwuné. 24Ujísɔ̄si le má ka ɔtū le bīya lɛ ɔ́, anɔ́ɔ kahíníī, “Ó lɔnɔ nɛ̄hi kú ācɛ olagbénú kéē je pīya ācɛ kú ajɔ̄ɔ̄cɛ́ kú Ɔwɔicō! 25Ó tɔ́ɔtɛ lɛ inyankwūlūmi kóō yɛ bū ipú ɔgɔ̄ inyilá fíyɛ́ ɔ̄cɛ olagbénú kóō wɛ ɔ̄cɛ kú ajɔ̄ɔ̄cɛ́ kú Ɔwɔicō.” 26Ācɛ nēe pó ɛlā kú nū ā dɔɔ̄kā kahíníī, “Ó lɛ ā ā, ɔ̄nyɛ nēé kē í nyatá mɛ́ɛ̄ ā?” 27Ujísɔ̄si tóohi kahíníī, “Ɔwɔicō lɔfú ō yá ɔdā nɛ̄ ɔlɛɛcɛ í yá glá ŋ́ mā.” 28Anɔ́ɔ Upíta kahíníī, “Mɔ́ɔ̄! Alɔ nyɛ̄ɛ̄ hɛ̄ ɔlɛ́ alɔ tá bá ī yɛce uwɔ.” 29Ujísɔ̄si da uwá kahíníī, “Īī, n yá ká aá jé ka ɔ̄cɛ dúú nōo habɔ̄ ɔlɛ́ nū tá, ámāŋ ka ɔnyā nū ámāŋ ka ayínɛ́ nū nɔ̄nyīlɔ ámāŋ ka ádā mɛ́mla ɛ́nɛ́ ámāŋ ka ayí nū tá ohígbū ō je pīya ɔ̄cɛ kú ajɔ̄ɔ̄cɛ́ kú Ɔwɔicō, 30géē mīyɛ ulé nū igbalɛwa ipú oyēeyī nyā. Ó kē í mīyɛ oyēeyī opiyóó ŋmá ɛgiyí Ɔwɔicō ipú ɛcɛ ɔhá nōo ī wā ā.”

Ujísɔ̄si kɛlā igbo ɔ́mɛtá lɛyíkwu ikwū kú nū

(Umát 20.17-19; Umák 10.32-34)

31Ujísɔ̄si le ayíkpó igwɛ́ɛpa ā hīgwú ga ɛkwūbá anɔ́ɔ ó da uwá kahíníī, “Aá mɔ́ɔ̄, alɔ yɔ̄ ī tū ɛfu í nyɔ̄ Ujerúsālɛm. Abɔ́ɔ nɛ̄ ɛjɛ̄ɛ̄jī ɔdā nɛ̄ ācomɛ́ɛbɛ tá tāajɛ lɛyíkwu ami, Ɔyínɔ̄nyīlɔ kú Ɔ̄cɛ ā géē yá jīla á. 32É géē je ɔ́ tū ācɛ Uróm abɔ̄, nēe géē yá ɔ̄ okónu, klla í tá ahɛ klá anú. 33É géē gɔ́ itali, é kē í ŋmó ɔ̄. Amáŋ Ɔwɔicō géē je ɔ́ héyī ŋmá ɔlékwū ɛ̄cī ɔ́mɛtá nēé ŋmó ɔ̄ ā.” 34Amáŋ ayíkpó ā í jɛ́yí aɔ́dā dúú nēe bá ā ŋ́. É kē cɛ̄ lɛ uwá jɛ́yí kú aɔ́dā nēe bá nyā ŋ́. É kē jé ɔdā nɛ̄ Ujísɔ̄si yɔ̄ ī kɛlā lɛyíkwu ɔ̄ ā ŋ́.

Ujísɔ̄si le opeyī nōo ī ba ɔdā éyi hɛ́tá

(Umát 20.29-34; Umák 10.46-52)

35Abɔ̄ Ujísɔ̄si le bá lɛ Ujérīko ā, ó lɛ opeyī éyi nōo cīce okónu ɔwɛ yɔ̄ ī ba ɔdā. 36Eko nōó le úcɛ́ kú ɛwa nēe bá ī yɛ ɔwɛ ā pó ā, ó le ɔ̄kā da ācɛ nēe kwu ɔ́ ajaajɛ ā kahíníī, “Ɔdí yɔ̄ ī yá ā?” 37Uwá da ɔ́ kahíníī, “Ujísɔ̄si, ɔ̄cɛ kú Unásārēti ā wā gaá yɔ̄ ī yɛ á.” 38Anɔ́ɔ ó gbɔɔ́ ō dɛ̄gba tɛ́ɛcɛ kahíníī, “Ujísɔ̄si! Ɔyínɔ̄nyilɔ kú Udéfiidi! ményinyi um!” 39Ācɛ nēe gbɔbū kú ɛwa ā le ɛgba dɛ̄ tū ɔ̄ kóō yɔ̄ cíí. Amáŋ ó kōō dɛ̄gba tɛ́ɛcɛɛcɛ fíyɛ́ ka, “Ɔyínɔ̄nyīlɔ kú Udéfiidi! Ményinyi um!” 40Ujísɔ̄si māhayi, anɔ́ɔ ó le ɔ́da je kahíníī, “Aá lɛ opeyī ā bī gé um.” Eko nōó gā ajaajɛ ā, Ujísɔ̄si da ɔ́ ɔ̄kā kahíníī, 41“Ɔdí nɛ̄ a tíne ká n̄ yá gā awɔ ā?” Ó tóohi kahíníī, “Ɔkpani, n dɔɔ̄kā ó mɛ́ɛbɛ.” 42Anɔ́ɔ Ujísɔ̄si da ɔ́ kahíníī, “Mɛ́ɛbɛ mɛ́ɛ́nɛ! Ɔtū nɛ̄ a le ce Ɔwɔicō ā le uwɔ hɛ́tá ɛɛ́.” 43Anɔ́ɔ igbeékpónú ó gbɔɔ́ ō mɛ́ɛbɛ á, anɔ́ɔ ó gaá tá Ujísɔ̄si ɔkwu gē tá Ɔwɔicō ahínyá á. Eko nɛ̄ ɛwa ā le ɔ́ má ā, odúúdú uwā tá Ɔwɔicō ahínyá dúú.

Currently Selected:

ULÚKU 18: IFBCL

Highlight

Copy