ULÚKU 19

Ujísɔ̄si mɛ́mla Usakíyɔ̄si

1Ujísɔ̄si le bēhé tá ipú Ujérīko anɔ́ɔ ó kē yɔ̄ ī yɛ bū ipú nū á. 2Ó lɛ otrɛ̄yí kú ācɛ odɔ̄lɛ́ éyi nōo yɔ̄ nɛ̄ iyē nū lé ka Usakíyɔ̄si. Ó kē lɛ agbénú. 3Ó yɔ̄ ī cēyītīkwū kóō lɛ ɔ̄cɛ nɛ̄ Ujísɔ̄si wɛ ā má, amáŋ ó mɛ́ɛbɛ bū acá kú ɛwa nēe yɛ jīla Ujísɔ̄si tá ā glá ŋ́ ohígbū ka ó wɛ ima. 4Ohígbū ɔ́ɔmā ó le inya kwu ga iyɔbū ɛwa ā gaá le icō ɔcí Usíkāmɔ tū, cɛ́ɛ́ kóō lɛ Ujísɔ̄si nōo gáā wā í yɛ ɔwɛ ɔ́ɔmā ā má. 5Eko nɛ̄ Ujísɔ̄si gā útū ɔcí ā, ó je eyī má icō, anɔ́ɔ da Usakíyɔ̄si kahíníī, “Hīlatá fíyaa fíyaa Usakíyɔ̄si, ohígbū ka n géē gbɔga ɔlɛ́ uwɔ ícɛ piíí.” 6Usakíyɔ̄si le hīlatá fíyaa fíyaa wāajɛ ŋmá icō ɔcí ā, anɔ́ɔ ó le Ujísɔ̄si bī ga ɔlɛ́ nū. Ó kē mīyɛ ɔ́ mla éeyē nɛ̄ɛ̄nɛ̄hi. 7Odúúdú ācɛ nēe má ɔ̄ ā gbɔɔ́ ō ko kahíníī, “Ɔ̄cɛ ā le yɛ ga ɔlɛ́ ɔ̄cobīyíne gáā gbɔga!” 8Usakíyɔ̄si nyāŋjɛ anɔ́ɔ ó da Óndú ā kahíníī, “Po mɛ́ɛ̄ n, ɔkpani! N géē je āyā éyi kú okɔ̄ ɛga ɛpa kú agbénú kú um lɛ ācogbɛhá. Ɔ́dāŋ ka n le ɔcɛ dúúmā pīyatū mīya anú odée nɛɛ, n géē gbā ɔ̄ lɛ ɔ́ ɔ́klá ɛnɛ.” 9Ujísɔ̄si da ɔ́ kahíníī, “Ícɛ nyā Ɔwɔicō le ipɔ́ɔnū nyā nyatá ɛɛ́, ohígbū ka ɔnyīlɔ nyā, wɛ ɔyɔ́ɔ́yí kú Ébrahām dúú. 10#Umát 18.11Ami, Ɔyínɔ̄nyīlɔ kú ɔ̄cɛ, wā gaá tíne, cɛ́ɛ́ ká n̄ lɛ ācɛ nēe bí ā nyatá.”

Ita kú aíkpīije kú ugóolu ā

(Umát 26.14-30)

11Ācɛ ā le ahɔ̄ jē lɛ ɔdā nɛ̄ Ujísɔ̄si ka ā. Ó le bá lɛ Ujerúsālɛm eko ɔ́ɔmā ɛɛ́. Ācɛ ā bá ī leyī táajɛ kú ajɔ̄ɔ̄cɛ́ kú Ɔwɔicō ɔ́ɔ gáā wɛ̄ɛcɛ bóobū. Ohígbū ɔ́ɔmā ó yɔ̄ ī kɛlā lɛ uwá anɔ́ɔ ó le ita nyā kwu lɛ uwá á. 12Ó kahíníī, “Ó lɛ ɔ̄cɛ nɛ̄hi éyi nōo yɔ̄ ī nyɔ̄ ɔlɛ́ oligbó kéē je ɔcɛ́ lɛ ɔ́ cɛ́ɛ́ kóō kwúcē wā ɔlɛ́. 13Ó le ācocɛ̄hɔ̄ kú nū igwó ā hīgwú anɔ́ɔ le ikpīije kú ugóolu kpó kɔ̄ lɛ éyééye kú uwā, anɔ́ɔ ó da uwá kahíníī, ‘Aá bī ɛ̄nyā le tɔ́hí gbéeko nɛ̄ n pīyɛyí.’ 14Amáŋ ɔ̄cɛ ā í he ācɛ kú ajɛ ɔlɛ́ nū ɔtū ŋ́, anɔ́ɔ é le olɛhɔ̄ tū ce ɔ́ ɔkwu kahíníī, ‘Alɔ í dɔɔ̄kā kú ɔ̄cɛ nōo yɔ̄ nyā kóō wɛ ɔcɛ́ kú alɔ ŋ́.’ 15É kwú ɔ̄cɛ ā ú pīya ɔcɛ́ anɔ́ɔ ó pīyɛyí gā ɔlɛ́ á. Ɔkwɔɔkwu ɔ́ɔmā ó le ɛhɔ̄ tū kéē lɛ ācocɛ̄hɔ̄ igwó ā hīgwú gé lɛ ɔ́ cɛ́ɛ́ kóō lɛ itene nēé lɛ ŋmá ɔ́hí kú uwā ā jé. 16Ákú aflɛ́yí ā wā gaá ka kahíníī, ‘Ɔkpani, n le ikpīije ugóolu igwó ɔhá lɛ itene būla ɛ̄nɛ̄ a je ga um ā.’ 17Ɔcɛ́ ā da ɔ́ kahíníī, ‘Ahínyá, a wɛ ɔ̄cocɛ̄hɔ̄ olɔhi! Abɔ̄ a le yá lɔhi ipú ɔdā nɛ̄ŋ́cɛ́ nyā ā, n géē kpó aígelī igwó gā uwɔ ká ā leyīkwu uwá.’ 18Ɔ̄cocɛ̄hɔ̄ ɔ́mpa ā wā gaá ka kahíníī, ‘Ɔkpani, n le ikpīije ugóolu ɛhɔ̄ ɔhá itene būla ɛ̄nɛ̄ a je ga um ā.’ 19Ɔcɛ́ ā da ɔ́ kahíníī, ‘Ahínyá, a géē leyīkwu aígelī ɛhɔ̄.’ 20Ɔ̄cocɛ̄hɔ̄ ɔhá gā gaá da ɔ́ kahíníī, ‘Ɔkpani, ikpīije ugóolu éyi kú uwɔ ā yɔ á. N le ɔ́ gbō tayínū ipú adíko nɛŋcɛ́ éyi. 21N gē yúúfi uwɔ ohígbū ka a wɛ ɔ̄cɛ o lɔnɔ nɛ̄hi. A gē je ɔdā nōó wɛ ákú uwɔ ŋ́, a kē ī cē ɔdā nɛ̄ á nyi ŋ́.’ 22Ɔcɛ́ ā da ɔ́ kahíníī, ‘Ɛlā nɛ̄ a ka ŋmá okónu kú uwɔ piíí ā nɛ̄ n gáā le kɛpɔ̄ tū uwɔ á. A jé ka n wɛ ɔ̄cɛ olɔnɔ. N gē je ɔdā nōó wɛ ákú um ŋ́, n kē ī cē ɔdā nɛ̄ ń nyi ŋ́. 23Ɔdíyā nɛ̄ á kē kwú ije kú um ú tá ɛga nēé ī kpó ije tū ā ŋ́ mā ā? Cɛ́ɛ́ ń géē yɛ í le itene lɛ ce ɔ́ ɛyí eko nɛ̄ n pīyɛyí.’ 24Anɔ́ɔ ó da ācɛ nēe háyi abɔ́ɔ ā kahíníī, ‘Aá mīyɛ ikpīije ugóolu éyi ā ŋmá abɔ̄ nū cɛ́ɛ́ ká aá kwú lɛ ɔ̄cɛ nōo lɛ ikpīije ugóolu igwó ā.’ 25Amáŋ é kahíníī, ‘Ɔkpani, ɔ̄cocɛ̄hɔ̄ ɔ́ɔmā lɛ ikpīije ugóolu igwó ɛɛ́!’ 26#Umát 13.12; Umák 4.25; Ulúk 8.18Ɔcɛ́ ā tóohi kahíníī, ‘N da aá ka, ɛjɛ̄ɛ̄jī ācɛ nēe lɛ odée ā, é kōō í je lɛ uwá fíyɛ́. Amáŋ ɔ̄cɛ nōó lɛ ɔdā dúúmā ŋ́ mā, ó kōō wɛ oligíí nōó lɛ ā, é géē mīyɛ ɔ́ ŋmá abɔ̄ nū. 27#Umát 25.14-30Amáŋ aólɛlā kú um nēé dɔɔ̄kā ká n̄ wɛ ɔcɛ́ kú uwā ŋ́ mā, á lɛ uwá bī wā amānyā abālɔbányā ká aá lɛ uwá kpó ŋmó iyɔ̄bū um.’”

Ujísɔ̄si gāājɛ Ujerúsālɛm

(Umát 21.1-11; Umák 11.1-11; Ujɔ́n 12.12-19)

28Eko nɛ̄ Ujísɔ̄si lɛ ɛlā nyā ka kwɛyí ā ó le hɛ́ tá iyɔ̄bū ācɛ ā lɛyíkwu Ujerúsālɛm 29Abɔ̄ ó le bá lɛ Ubɛ́tifégi mɛ́mla Ubɛ́tani, ɛgiyí ɛfú kú ɔcí kú ólīifu ā, ó le ayíkpó ɛpa kú nū tɛ̄hɔ̄ nyɔ̄ iyɔ̄bū. 30Ó da uwá kahíníī, “Aá nyɔ̄ ipɔ́lɛ́ nōo yɔ̄ iyɔ̄bū aá abɔ́ɔ ā. Abɔ̄ aá le bēhé ā, aá géē má ɔyí ijakī nɛ̄ ɔ̄cɛ dúúmā í ce jéjéē ɛ́ɛ́ ŋ́ mā wū ajɛ. Aá lɛ ɔ́ wī cɛ́ɛ́ aá lɛ ɔ́ bī wā amānyā. 31Ɔ́dāŋ ka ɔ̄cɛ dúúmā lɛ ɔ̄kā da aá ka ɔdíyá nɛ̄ aá ī wī ɔ̄ ā, aá da ɔ́ kahíníī, ‘Ó ce Óndú ā ɛgbá.’ 32Anɔ́ɔ é le pɛ́ i yɛ gaá le ɔyí ijakī ā mā ɛ́gɛ́nɛ̄ nōó da uwá lɛ ā yíílí. 33Abɔ̄ é bá yɔ̄ wī ɔ̄ ā, aóndú nū da uwá ɔ̄kā kahíníī, “Ɔdíyá nɛ̄ aá yɔ̄ ī wī ɔ̄ ā?” 34É tá ohi kahíníī, “Ó ce Óndú ā ɛgbá.” 35Anɔ́ɔ é le ɔyí ijakī ā bī gé lɛ Ujísɔ̄si á. Anɔ́ɔ é le úwé kú uwā plla ce ɛyí ɔyí ijakī, anɔ́ɔ é kwú Ujísɔ̄si í ce ɛyí nū á. 36Abɔ̄ ó ce ɔ̄ yɔ̄ ī nyɔ̄ ā, ācɛ le úwé kú uwā plla bá iyɔ̄bū ɔwɛ lɛ ɔ́. 37Eko nēé le bá lɛ Ujerúsālɛm ā, ɛgiyí owulatu kú ɛfú kú ɔcí olífu ā, ɛwa nɛ̄hi kú ācɛ nēe gē yɛce ɔ́ ā gbɔɔ́ ō tá Ɔwɔicō ahínyá, bá gē gwéeyē í jɔkɔ gicō ge cɛ̄tra iyē nū ohígbū úklɔ́ nɛ̄hi ohídáagó nēé má ā. 38#Aíjē 118.26É kahíníī, “Ɔwɔicō kóō hɔ́hā ce ɔcɛ́ nōo Óndú ā tɛ̄hɔ̄ wā ā! Ɛbɔ́ kóō yɔ̄ ɔkpáncō, ofu kóō yɔ̄ lɛ Ɔwɔicō.” 39Anɔ́ɔ ācɛ Ufárisīi ōhī nēe bá ipú ɛwa ā da ɔ́ kahíníī, “Utíca, lɛ ɛgba dɛ̄ tū ayíkpó kú uwɔ kéē bá cíí.” 40Ujísɔ̄si tá uwā ohi kahíníī, “N da ka ɔ́dāŋ ka ācɛ nēe bá nyā kwú okónu ú klá, aɛ́cɔ̄ abɔ̄yī uwā géē tɔ́ɔga.”

Ujísɔ̄si jikwū ohígbū Ujerúsālɛm

41Eko nōó le túbla Ujerúsālɛm ajaajɛ lɛ ɔ́ má eyī ā, ó le ikwū je ohígbū nū 42yɔ̄ ī ka kahíníī, “Eyī yá um ka ā lɛ ɔdā nɛ̄ a í yá ó yá ɛ́ɛ́ ká ā lɛ ɛbɔ́ lɛ ā jé ícɛ. Amáŋ á kē má ɔ̄ abālɔbányā glá ŋ́! 43Eko géē wā nɛ̄ aólɛlā kú uwɔ géē cīíbɔm tū uwɔ biílí géē kpɛ́fú tá uwɔ ŋmá áklō dóódu. É géē je awɔ mɛ́mla ācɛ nēe bá ipú igá ā yíífi. 44É gáā mabɔ̄ ɛcɔ̄ dúúmā tá ce ɛyí ɔhá ipú uwɔ ŋ́. Odúúdú aɔ́dā nēe bá nyā í yá uwɔ ohígbū ka á jé eko nɛ̄ Ɔwɔicō wā kóō nyā uwɔ tá ā ŋ́.”

Ujísɔ̄si le ācotɔ́hí nū bɛ̄cɛ ŋmá Agblīihɔ-nɛ̄hi ā

(Umát 21.12-17; Umák 11.15-19; Ujɔ́n 2.13-22)

45Anɔ́ɔ Ujísɔ̄si le bēhé tá ipú Agblīihɔ-nɛ̄hi ā, anɔ́ɔ ó gbɔɔ́ ō nū ācotɔ́hí ā bɛ̄cɛ á. 46#Ayis 56.7; Ujer 7.11Ó yɔ̄ ī ka lɛ uwá kahíníī, “É tá ɔ̄ ipú ɔkpíihɔ ā kahíníī, ‘É géē hī Agblīihɔ-nɛ̄hi kú um ā ka inu ɛga nɛ̄ ācɛ géē gbɔ̄ɔkɔ gā um.’ Amáŋ aá kwú ɔ́ ú pīya inu o tayínū kú aúwī!”

47 # Ulúk 21.37 Ɛ̄cī dóódu Ujísɔ̄si gē nwū ācɛ ɛlā Ɔwɔicō ipú Agblīihɔ-nɛ̄hi ā. Aótrɛ̄yí kú ācogwɛ́ɛya, aútíca kú íne mɛ́mla aótrɛ̄yí kú ācɛ ā dɔɔ̄kā kéē lɛ ɔ́ ŋmó. 48Amáŋ é má ɔwɛ ō le ŋmó ɔ̄ ŋ́, ohígbū ka odúúdú ācɛ ā gē jāhɔ̄ gē pó ɛjɛ̄ɛ̄jī ɛlā nōo ī ka ā tá ɔkɛklɛ kú nū.

Currently Selected:

ULÚKU 19: IFBCL

Highlight

Copy