UJƆ́NI 21
21
Ujísɔ̄si ma iyī nū fú lɛ ayíkpó kú nū Ugálīli
1Igbīhi ɛ̄nyā, Ujísɔ̄si klla i hɛ́bɛ̄cɛ igbɔhá kpɔ́ ɔtāhɛ̄ ayíkpó kú nū okónu ísu kú Utibérīyasi. Ɛ́gɛ́nɛ̄ ó yá lɛ ā yɔ̄ á. 2Usáyímɔ̄ni Upíta, mɛ́mla Utɔ́mɔ̄si nēé hī ka Áplɛ́ ā mɛ́mla Unatánīyɛ̄lu, ɔ̄cɛ Ukéna kú Ugálīli ā, mɛ́mla ayínɔ̄nyīlɔ ɛpa kú Usébēdi ā, mɛ́mla ayíkpó kú nū ɛpa ɔhá bá tɔ̄há. 3#Ulúk 5.5Usáyímɔ̄ni Upíta da uwá kahíníī, “N nyɔ̄ gáā kwú ɛbéenyi ɛɛ́ n.” É da ɔ́ kahíníī, “Alɔ géē nyɔ̄ mla awɔ dúú.” Anɔ́ɔ é nyɛ̄ɛ̄ gɛcɛ le tá ipú ɔ́kɔ á. Otú ɔ́ɔmā, é kwú ɔdā dúúmā ŋ́.
4Amáŋ eko nɛ̄ eyī yɔ̄ ī nyā ā, Ujísɔ̄si wā gaá háyi ɔ́kɔngɔ̄ ɔkpá ā. Amáŋ ayíkpó ā í jé ka ɔ́ɔ wɛ Ujísɔ̄si ŋ́. 5Anɔ́ɔ Ujísɔ̄si da uwá ɔ̄kā kahíníī, “Aóklóbīya um, aá kwú ɛbéenyi dúúmā ŋ́ nɛɛ?” Anɔ́ɔ é tá ɔ̄ ohi kahíníī, “Ehéee.” 6#Ulúk 5.6Anɔ́ɔ ó da uwá kahíníī, “Aá lɛ ɛ́yá kú aá tá ga abɔ̄lɔ́ná kú ɔ́kɔ ā, aá géē má ɛbéenyi í kwú.” Anɔ́ɔ é lɛ ɛ́yá ā tá, amáŋ é lɔfú pi ɔ́ wɛ̄ɛcɛ glá ŋ́ ohígbū ɛbéenyi alɛwa nēe bá ipú nū ā. 7Anɔ́ɔ ɔyíkpó nɛ̄ Ujísɔ̄si yíihɔtū nū ā da Upíta kahíníī, “Óndú ā nɛ̄ n.” Eko nɛ̄ Usáyímɔ̄ni Upíta pó kóō wɛ Óndú ā, ó lɛ īlī kú nū kpó klá iyē ohígbū kóō le iyī nū wɛ́ɛwa gbɔbū. Anɔ́ɔ ó le ómbli tá tū ipú éŋkpɔ̄ á. 8Amáŋ ayíkpó ohile ā le ɔ́kɔ ā pɛ́ ga okónu ɔkpá ā, yɔ̄ ī pi ɛya nōo le mu mla ɛbéenyi ā, ohígbū ka é ligbó lɛ ajɛ gɛ ŋ́. Ó lɛbɛ̄ɛka ikpó ofu igwɛ́ɛhɔ̄ ā.
9Eko nēé gā ɛcɛ ŋmá éŋkpɔ̄ ā, é má ɔlá ahā gē cɛ̄, ɛbéenyi mɛ́mla igbō ce ɛyí nū. 10Ujísɔ̄si da uwá kahíníī, “Aá lɛ ɛbéenyi ōhī nɛ̄ aá kwú ānāānā ā bī wā.” 11Usáyímɔ̄ni Upíta le yɛ tá ipú ɔ́kɔ ā, anɔ́ɔ ó lɛ ɛ́yá ā pi wɛ̄ɛcɛ á. Ó le mu mla ɛbéenyi nɛ̄hi nɛ̄ áluka nū wɛ ofahāapa cigwɛ́tá (153). Abɔ̄ ɛbéenyi alɛwa bá ipú ɛ́yá ā, nááná ā ɛ́yá ā í kē híla ŋ́. 12Ujísɔ̄si da uwá kahíníī, “Aá gaá lɛ ucɔ hɛ́ ɛ́ɛ́.” Amáŋ ɔ̄cɛ dúú kú ayíkpó ā í lɔtū da ɔ́ ɔ̄kā kahíníī, “Á wɛ ɔ̄nyɛ nɛ̄ ŋ́?” Ohígbū kéē jé ka ó wɛ Óndú ā. 13Ujísɔ̄si wā gaá kwú igbō ā ú lɛ uwá. Ó klla yá ɛ́gɔ́ɔmā mla ɛbéenyi ā dúú. 14Ɛ̄nyā wɛ igbo ɔ́mɛtá nɛ̄ Ujísɔ̄si hɛ́wɛ̄ɛ̄cɛ ɔtāhɛ̄ ayíkpó ā yɔ̄ mɛ́ɛ̄ á, ŋmá eko nēé je ɔ́ héyī ŋmá ɔlékwū ā.
Ɛlā ámōōmɛ nɛ̄ Ujísɔ̄si ka lɛ Upíta ā
15Eko nēé lɛ ucɔ hɛ́ ā, Ujísɔ̄si da Usáyímɔ̄n Upíta ɔ̄kā kahíníī, “Usáyímɔ̄n, ɔyí Ujɔ́ni, a yíihɔtū um fíyɛ́ ɛ̄nyā ā?” Upíta cīla kahíníī, “Īī, Óndú. A jé ka n yíihɔtū uwɔ.” Ó da ɔ́ kahíníī, “Je ɔdōlé lɛ ayí álá kú um.” 16Ó da ɔ́ ɔ̄kā igbo ɔ́mpa kahíníī, “Usáyímɔ̄ni, ɔyí Ujɔ́ni, a yíihɔtū um?” Ó cīla kahíníī, “Īī, Óndú a jé ka n yíihɔtū uwɔ.” Ujísɔ̄si da ɔ́ kahíníī, “Gbō aálá kú um.” 17Ó da ɔ́ ɔ̄kā igbo ɔmɛtá kahíníī, “Usáyímɔ̄ni, ɔyí Ujɔ́ni, a yíihɔtū um?” Upíta le mu mla ɔtūnōbí ohígbū kóō da ɔ́ ɔ̄kā igbɔ ɔmɛtá kahíníī, “A yíihɔtū um m?” Anɔ́ɔ ó cīla ɔ́ kahíníī, “Óndú, a jé ɔdā dóódu, á je ka n yíihɔtū uwɔ.” Ujísɔ̄si da ɔ́ kahíníī, “Leyīkwu aálá kú um. 18Ɔkwɔ̄ɔ̄kwɛ̄yi, n da uwɔ ka, eko nāa wɛ ɔyípōklóbīya ā, a lɛ ɛ́nyɔ́ kú uwɔ gbō, a kē nyɔ̄ ɛga dúúmā nāa tíne. Amáŋ eko nāa le pīya ɔnyākwɔ́cɛ, a gē lɛ abɔ̄ kú wɔ nāńdaa, anɔ́ɔ ɔ̄cɛ ɔhá gē gbō uwɔ ɛ́nyɔ́ á. Ó klla gē bī uwɔ nyɔ̄ ɛga nɛ̄ á tíne ŋ́ mā.” 19Ujísɔ̄si ka ɛ̄nyā kú Upíta kóō le jé ka ɛdɔ kú ikwū nɛ̄ ó géē kwú ā í yá kú ācɛ kóō lɛ ojīlīmā ce Ɔwɔicō. Eko nōó lɛ ɛ̄nyā ka kwɛyí ā, ó da ɔ́ kahíníī, “Yɛce um.”
20 #
Ujɔ́n 13.25
Upíta pīyeyī biílí anɔ́ɔ ó le ɔyíkpó nɛ̄ Ujísɔ̄si yíihɔtū nū ā nōo cīce bayi ce ɔ́ ɔtū eko ɔdōlé ɔ̄nɛ̄ ā, nɛ̄ ó klla da ɔ́ ɔ̄kā kahíníī, “Óndú, ɔ̄nyɛ géē je uwɔ lá ā?” A má yɔ̄ gē yɛce uwá ā. 21Eko nɛ̄ Upíta le ɔ́ má ā, ó da Ujísɔ̄si ɔ̄kā kahíníī, “Óndú, ɔ̄cɛ ā bɛ́ɛ?” 22Ujísɔ̄si tá ɔ̄ ohi kahíníī, “Ɔ́dāŋ́ ka n tíne kóō yɔ̄ ī yēeyī gbéeko nɛ̄ n géē wā bɛ́ɛ́gɛ, ɔdí wɛ ɛlā uwɔ gɛ? Awɔ ā, yɛce um.” 23Anɔ́ɔ ɛlā nyā le yɛ ɛbɛɛbɛ ɔtāhɛ̄ kú ayíkpó ā, ka ɔyíkpó ɔ́ɔmā ɔ́ɔ gáā kwú gɛ ŋ́. Amáŋ Ujísɔ̄si í da ɔ́ ka ɔ́ gáā kwú ŋ́ nɛɛ ŋ́, amáŋ ó kahíníī, “Ɔ́dāŋ́ ka n tíne ka ó yɔ̄ ī yēeyī jāā gbéeko nɛ̄ n wā, ɔdí wɛ ɛlā uwɔ gɛ?”
Ɛlā óŋmɛ́yí
24Ɛ̄nyā wɛ ɔyíkpó nōo gē cījáalí kú ɔdā nēe bá á, nōo klla tá ɔdā nēe bá ā tāajɛ á. Alɔ jé ka ijáalí kú nū wɛ ɔkwɛ̄yi.
25Amáŋ aɔ́dā ɔ̄há alɛwa bá nɛ̄ Ujísɔ̄si yá, nɛ̄ ɔ́dāŋ kéē lɛ uwá dúúdú tá nɛɛ, n gbɛlá ka odúúdú ɛcɛ í gáā bī ɔkpá nēe géē tá ɔ̄ tū ipú nū ā glá ŋ́.
Currently Selected:
UJƆ́NI 21: IFBCL
Highlight
Share
Copy
Want to have your highlights saved across all your devices? Sign up or sign in
