UJƆ́NI 20

O héyī ŋmá ɔlékwū kú Ujísɔ̄si

(Umát 28.1-10; Umák 16.1-8; Ulúk 24.1-12)

1Ɔ̄cɔ̄ɔ̄cī blibli kú ɛ̄cī Aláadi eko nɛ̄ obū le du kpɔ́ɔ́ ɛ́ɛ́ mā, Umerí Umagidalíni, le tá únóji, anɔ́ɔ ó má kéē le ɛcɔ̄ ā míya ŋmá okónu únóji ā. 2Ó gbo inya ŋmá abɔ́ɔ ga ɛgiyí Usáyímɔ̄ni Upíta mɛ́mla ɔyíkpó ɔhá nɛ̄ Ujísɔ̄si yíihɔtū nū ā. Anɔ́ɔ ó da uwá kahíníī, “É kwú Óndú ā ú ŋmá únóji ɛɛ́, alɔ í jé ɛga nēé lɛ ɔ́ tá ā ŋ́.” 3Anɔ́ɔ Upíta mɛ́mla ɔyíkpó ɔhá ā nyɛ̄ɛ̄ lɛyíkwu únóji ā. 4Uwá ɛplɛ́ɛpa kwinya, amáŋ ɔyíkpó ɔhá ā le inya kwu le gwú Upíta, anɔ́ɔ ó le táajɛ únóji ā gbɔbū á. 5Ó tū kpɛɛ́, anɔ́ɔ ó má īlī ahilíki nɛ̄hɛ́ ā bá ajɛ, amáŋ ó bēhé ŋ́. 6Anɔ́ɔ Usáyímɔ̄ni Upíta kwūcē ɔ́ wā, anɔ́ɔ ó le yɛ tá ipú únóji ā. Ó má īlī ahilíki nɛ̄hɛ́ nēé le gbō ɔ̄ ā bá ajɛ abɔ́ɔ, 7anɔ́ɔ ó klla má igbogbo nēé lɛ gbō ɔ̄ ɛyí ā. Ó bá pī īlī ahilíki nɛ̄hɛ́ ā ŋ́, Amáŋ ó le hā bá ajɛ ɛgɔhá kú nū céé. 8Anɔ́ɔ ɔyíkpó ɔhá, nōo wā ɛgiyí únóji ā aflɛ́yí ā, le bēhé wā ipú nū á, anɔ́ɔ ó le ɔ́ má, ó kē cɛ̄. 9Amáŋ nááná é kōō jɛ́yí kú ɛlā nē é tá ipú ɛlɔ̄ɔwɔicō nēé ka ka ɔ́ɔ géē héyī ŋmá olékwū piíí ā ŋ́. 10Anɔ́ɔ ayíkpó ā kwúcē ga ɔlɛ́ uwā á.

Ujísɔ̄si ma iyī nū fú lɛ Umerí Umagdalíni

(Umát 28.9,10; Umák 16.9-11)

11Amáŋ Umerí háyi eyɛ̄ɛ̄cɛ kú únóji ā yɔ̄ ī jikwū. Abɔ̄ ó yɔ̄ gē jikwū ā, ó feyī kpeé ga ipú únóji ā. 12Anɔ́ɔ ó má alelékwū-ōtɛ̄hɔ̄ ɛpa nēe lɛ úwé nɛ̄hɛ́ wiiye cīce ajɛ, éyi yɔ̄ ablɛ̄yí, ɔhá yɔ̄ ablīkpó kú ɛga nēé lɛ okwū kú Ujísɔ̄si gwutá ā. 13É da ɔ́ kahíníī, “Ɔcɛnyā, ɔdíyá nāa gē jikwū ā?” Anɔ́ɔ ó da uwá kahíníī, “Ohígbū kéē kwú Óndú um ú, ń kē jé ɛga nēé lɛ ɔ́ tá ā ŋ́.” 14Eko nōó lɛ ɛ̄nyā ka kwɛyí ā, ó pīyeyī, anɔ́ɔ ó má Ujísɔ̄si háyi, amáŋ ó jé ká ɔ́ɔ wɛ Ujísɔ̄si ŋ́. 15Ujísɔ̄si da ɔ́ kahíníī, “Ɔcɛnyā, ɔdíyá nāa gē jikwū ā? Ɔ̄nyɛ nāa gē dɔɔ̄kā ā?” Ó gbɛlá ka ɔ́ɔ wɛ ɔgɛ́ɛjí kú ɛhɔ̄ ā nɛ, anɔ́ɔ ó da ɔ́ kahíníī, “Ɔkpani, ɔ́dāŋ ka a kwú ɔ̄ ú ŋmá amānyā nɛɛ, da um ɛga nāa je ɔ́ tá ā, ká um kwú ɔ̄ ú ŋmá abɔ́ɔ.” 16Ujísɔ̄si da ɔ́ kahíníī, “Umerí!” Ó pīyeyī da ɔ́ ɔkɔ kú Uhíbru kahíníī, “Rabonáyi!” (ɛ̄nɛ̄ ɛyí nū wɛ Itíca). 17Ujísɔ̄si da ɔ́ kahíníī, “Ā lɛ abɔ̄ kwu um ŋ́, ohígbū ka ń gicō ga ɛgiyí Ádā ɛ́ɛ́ ŋ́. Amáŋ nyɔ̄ ɛgiyí ayínɛ́ um nɔ̄nyīlɔ ká ā da uwá ka, n gē gicō ɛgiyí Ádā um mɛ́mla Ádā aá, Ɔwɔicō kú um mɛ́mla Ɔwɔicō kú aá.” 18Umerí Umagidalíni nyɔ̄ gaá le da ayíkpó ā kahíníī, “N lɛ Óndú ā má ɛɛ́.” Anɔ́ɔ ó da uwá ka anú ɔ́ɔ da anúɔ ɔdā nēe bá ā á.

Ujísɔ̄si le iyī nū mafú lɛ Ācotɛ̄hɔ̄ ā

(Umát 28.16-20; Umák 16.14-18; Ulúk 24.36-49)

19Ɔ̄nɔ̄ɔnɛ̄ kú ɛ̄cī ɔ́ɔmā nōo wɛ ɛ̄cī aflɛ́yí kú aláadi ā, eko nēé le ɔwɛ kú ɛga nɛ̄ ayíkpó ā bá ā gwū ohígbū ufi kú ācɛ Ujíyu ā, Ujísɔ̄si wā gaá háyi ɔtāhɛ̄ uwā, anɔ́ɔ ó da uwá kahíníī, “Ɛbɔ́ kóō yɔ̄ mla aá.” 20Eko nɛ̄ ó lɛ ɛ̄nyā ka kwɛyí ā, ó lɛ abɔ̄ mɛ́mla áklō kú nū mafú lɛ uwá. Ayíkpó ā gwéeyē eko nɛ̄ uwá lɛ Óndú ā má ā. 21Anɔ́ɔ Ujísɔ̄si da uwá igbɔhá kahíníī, “Ɛbɔ́ kóō yɔ̄ mla aá. Ɛ́gɛ́nɛ̄ Ádā ā tū um ɛhɔ̄ ā, ɛ́gɔ́ɔmā nɛ̄ n tū aá ɛhɔ̄ á.” 22Eko nōó lɛ ɛ̄nyā ka kwɛyí ā, ó lɛ owu fu klá uwá, anɔ́ɔ ó da uwá kahíníī, “Aá mīyɛ Alelékwū Ihɔ ā. 23#Umát 16.19; 18.18 Ɔ́dāŋ́ ka aá habɔ̄ íne nɛ̄ ācɛ dúúmā bīya ā tá lɛ uwá ayíka é habɔ̄ ɔ̄ tá lɛ uwá. Ɔ́dāŋ́ ka aá habɔ̄ íne nɛ̄ ācɛ bīya ā tá lɛ uwá ŋ́, ayíka é habɔ̄ ɔ̄ tá lɛ uwá ŋ́.”

Ujísɔ̄si ma iyī nū fú lɛ Utɔ́mɔ̄si

24Amáŋ Utɔ́mɔ̄si, éyi kú ipú aíkpó igwɛ́ɛpa ā nēé hī ka Áplɛ́ ā, í yɔ̄ mla uwá eko nɛ̄ Ujísɔ̄si wā abɔ́ɔ ā ŋ́. 25Abɔ̄ ó lɛ ā, ayíkpó ɔhá ā da ɔ́ kahíníī, “Alɔ lɛ Óndú ā má ɛɛ́.” Amáŋ ó da uwá kahíníī, “Ayíka n lɛ ofu kú ágbe unɛ́ɛlu ā má abɔ̄ kú nū, klla ke lɛ ayíkābɔ̄ kú um wu ofu kú ágbe kú unɛ́ɛlu ā, klla kē lɛ abɔ̄ kú um wu áklō kú nū, ń gáā cɛ̄ ŋ́.”

26Eko nɛ̄ ɛ̄cī ɔ́mahātá gā ā, ayíkpó kú nū klla le jīla ipú inu igbɔhá, Utɔ́mɔ̄si kē yɔ̄ mla uwá. Ujísɔ̄si gā kpɔ́ eko nēé lɛ ɔwɛ gwū ā, anɔ́ɔ ó háyi ɔtāhɛ̄ uwā, ó kahíníī, “Ɛbɔ́ kóō yɔ̄ mla aá.” 27Anɔ́ɔ ó da Utɔ́mɔ̄si kahíníī, “Lɛ ayíkābɔ̄ kú uwɔ wu amānyā, ká ā má abɔ̄ kú um. Ká ā klla lɛ abɔ̄ kú uwɔ wu áklō kú um, a híī wɛ ɔ̄cɛ nɛ̄ ó gē cɛ̄ɛ̄lā kú Ɔwɔicō ŋ́ mā ŋ́, amáŋ wɛ ɔ̄cɛ nōo gē cɛ̄ ā.” 28Utɔ́mɔ̄si tóohi da ɔ́ kahíníī, “Óndú um, mɛ́mla Ɔwɔicō kú um!” 29Ujísɔ̄si da ɔ́ kahíníī, “Á cɛ̄ ohígbū ka a le má ɛɛ́ ā nɛɛ? É lɛ ɔhā hɛ́ ce ācɛ nēé má ŋ́ nááná nēé cɛ̄ ā.”

Ohígbū ɔdā nēé tá ɔkōōlɔhi nyā

30Ujísɔ̄si yá aɔ́dā o cābɔ̄ alɛwa igbɔhá iyɔ̄bū kú ayíkpó kú nū nēé tá tū ipú ɔkpá nyā ŋ́. 31Amáŋ é tá ɛ̄nyā cɛ́ɛ́ kú aá cɛ̄#20.31 cɛ̄ aɔ́kpá ōhī ka, kéē yɔ̄ ī cɛ̄ (ɛlā ā) ka Ujísɔ̄si ɔ́ɔ wɛ Ohɔ́nyɛtá ā Ɔyínɔ̄nyīlɔ kú Ɔwɔicō ā, cɛ́ɛ́ ɔ́dāŋ ka aá cɛ̄, aá géē lɛ oyēeyī ŋmá iyē kú nū.

Currently Selected:

UJƆ́NI 20: IFBCL

Highlight

Copy