ÚKLƆ́ KÚ ĀCOTƐ̄HƆ̄ 1

Ɔdā nōo yá nēé tɔ́kpá úklɔ́ kú ɔ̄cotɛ̄hɔ̄ ā

1 # Ulúk 1.1-4 Ɛ́nɛ́nɛ̄ Utiyófīlɔs, ipú ɔkpá aflɛ́yí nɛ̄ n tá ā, n lɛ abɔ̄ kwu úklɔ́ dóódu nɛ̄ Ujísɔ̄si yá mɛ́mla ɛ̄nɛ̄ ó nwū ŋmá eko nɛ̄ ó gbo úklɔ́ kú nū ā, 2jāā gbéeko nɛ̄ Ɔwɔicō je ɔ́ ga ɔkpáncō. Gbɔbū kóō nyɔ̄ ā, ó bī ɔfú kú Alelékwū Ihɔ le ɔ́da je lɛ ācɛ nōó fu keé wɛ ɔ̄cotɛ̄hɔ̄ ā. 3Ɛplá ɛ̄cī ofɛpa igbīhi ikwū kú nū ā, ó hɛ́wɛ̄ɛ̄cɛ ipú uwā igbo alɛwa nōo mafú péee nōó tū ō táafú nū ŋ́ kóō yēeyī ɔkwɔ̄ɔ̄kwɛ̄yi. É má ɔ̄ igbo alɛwa, ó kē kɛlā lɛ uwá lɛyíkwu ajɔ̄ɔ̄cɛ́ kú Ɔwɔicō. 4#Ulúk 24.49Eko nōó kē yɔ̄ mla uwá kpɔ́ ɛ́ɛ́ mā, ó tū uwā ukɔ́ kahíníī, “Aá nyɛ̄ɛ̄ ŋmá Ujerúsālɛm ŋ́, amáŋ aá gbēyī ɛhi nɛ̄ Ádā um cokónu ō je lɛ aá nɛ̄ n tɛtɛ kɛlā ohígbū nū lɛ aá ā. 5#Umát 3.11; Umák 1.8; Ulúk 3.16; Ujɔ́n 1.33Ujɔ́ni bī éŋkpɔ̄ gē le yá ācɛ Ubatísim, amáŋ ofíílí ká ɛ̄cī alɛwa kóō yá, é géē bī Alelékwū Ihɔ yá aá Ubatísim.”

É kwú Ujísɔ̄si ú ga ɔkpáncō

(Umák 16.19-20; Ulúk 24.50-53)

6Eko nɛ̄ ayíkpó ā lé jīla tɔ̄há ā, é da ɔ́ ɔ̄kā kahíníī, “Óndú, a géē je ajɔ̄ɔ̄cɛ́ kwúcē gé lɛ Ísrɛ̄lu eko nyā āa?” 7Amáŋ Ujísɔ̄si tá uwā ohi kahíníī, “Ádā um ōfōōfūnū gē mīya eko nɛ̄ aɔ́dā nēe bá nyā géē yá á, ó wɛ ɛlā aá kú aá jé ɔ̄ ŋ́. 8#Umát 28.19; Umák 16.15; Ulúk 24.47,48Amáŋ Ɔwɔicō géē tū aá mu mla ɔfú eko nɛ̄ Alelékwū Ihɔ ā wā gaá ce aá ɛyí. Aá kē í wɛ ijáalí kú um ŋmá Ujerúsālɛm mɛ́mla Ujudíya dóódu mɛ́mla Usamérīya klla jāā ga oŋmɛ́yí kú ɛcɛ.” 9#Umák 16.19; Ulúk 24.50,51Eko nōó lɛ ɛ̄nyā ka kwɛyí ā, ipú eyī ūwā, Ɔwɔicō kwú ɔ̄ ú ga ɔkpáncō anɔ́ɔ ojuja gaá klá anú ŋmá eyī uwā á. 10Eko nēé bá ī pléeyī tū ɔkpáncō ā, abɔ̄ ó le ticō ā, igbeékpónú ācɛ ɛpa nēe le otógwō ɛnɛ̄hɛ́ wiiyē le hɛ́wɛ̄ɛ̄cɛ ɔtāhɛ̄ uwā. 11Anɔ́ɔ é kahíníī, “Ācɛ-Ugálīli, ɔdíyá nɛ̄ aá háyi gē pléeyī tū ɔkpáncō ā? Ujísɔ̄si nyā nēé je ŋmá ɛgiyí aá ga ɔkpáncō ā, géē wā ɛ́gɛ́nɛ̄ aá má ɔ̄ gē nyɔ̄ ɔkpáncō ā.”

É lɛ ɔ̄cɛ éyi fu kwɛyí Ujúdasi

(Umát 27.3-10)

12Anɔ́ɔ é pīyɛyí wā Ujerúsālɛm ŋmá ɛyí ɛfu nēé hī ka Ólīifu, nōo yɔ̄ kwu Ujerúsālɛm ajaajɛ ā. Ó wɛ iyāwu kú ukilómīta éyi ŋmá ipú igelī ā. 13#Umát 10.2-4; Umák 3.16-19; Ulúk 6.14-16É gā Ujerúsālɛm, anɔ́ɔ é le pɛ́ ga ipú inīcō ɛga nēé gbɔga ā á. Ācɛ nēe bá abɔ́ɔ ā yɔ̄ á: Upíta, Ujɔ́ni, Ujémīsi mɛ́mla Ándru, Ufílīpu mɛ́mla Utɔ́mɔ̄si, Ubatɔlɔ́mi mɛ́mla Umátiyu, Ujémīsi ɔyínɔ̄nyīlɔ kú Álifīyɔsi mɛ́mla Usáyímɔ̄n, ɔ̄cɛ kú ɔ́wá Usílɔ̄tu mɛ́mla Ujúdasi, ɔyínɔ̄nyīlɔ kú Ujémīsi, 14É gē jīla tɔhā ojigógó gē gbɔ̄ɔkɔ mla ɔtū ékpó. Umerí ɛ́nɛ́ kú Ujísɔ̄si, ayínɛ́ kú Ujísɔ̄si nɔ̄nyīlɔ ā mɛ́mla ācɛnyā ōhī wɛ ipú uwā dúú.

15Ɛ̄cī le hɛ́tíipú lígíí ācɛ nōo cɛ̄ɛ̄lā ā le jīla tɔhā, é lɛbɛ̄ɛka ācɛ ofu ɛhīlī ā, anɔ́ɔ Upíta cāŋjɛ kóō kɛlā lɛ uwá á. Anɔ́ɔ ó kahíníī, 16“Ayínɛ́, ɔdā nēé tá tū ipú ɛlɔ̄ɔwɔicō ā le yá jīla ɛ́gɛ́nɛ̄ Alelékwū Ihɔ tɛtɛ le tū Udéfīdi okónu kóō ka lɛyíkwu Ujúdasi, nōo wɛ ɔ̄cɛ nōo bī ācɛ wā í kwú Ujísɔ̄si ā. 17Ujúdasi tɛtɛ wɛ éyi kú alɔ, ohígbū kéē lɛ ɔ́ fu kóō yúklɔ́ nyā tɔ̄há mla alɔ.” 18#Umát 27.3-8Ujúdasi bī ije kú ucē ɔ́bíipú kú nū lɛ ajɛ éyi lá. Ipú ajɛ ā nōó míya ŋmá icō wā í le ca klá ajɛ, anɔ́ɔ ubu kú nū le ca klɛ́ɛcɛ á. 19Odúúdú ācɛ dóódu kú Ujerúsālɛm le ɔdā nōo yá Ujúdasi ā pó, anɔ́ɔ é hī ajɛ ā ka, ‘Akelidáma’ okónu kú ɔlɛ́ uwā, ɔ́ɔmā lé ka Ajɛ kú Oyī. 20#Aíjē 69.25; Aíjē 109.8Ohígbū ka é le tá ipú ɔkpá kú Aíjē kú Ɛ̄gbā ka,

‘Ká ɛga nōó lā kóō le tá alácɛ̄,

ká ɔ̄cɛ dúúmā kóō yɔ̄ nōo géē lā ipú ajɛ kú nū ā ŋ́.’

Anɔ́ɔ ó klla tá ka,

‘Ɔ̄cɛ ɔhá kóō kwú ɛga kú úklɔ́ kú nū ú!’

21 # Umát 3.16; Umák 1.9; Ulúk 3.21; Umák 16.19; Ulúk 24.51 Abɔ̄ ó i lɛ āā, alɔ í fu ɔ̄cɛ éyi nōo í cījáalí ka Ujísɔ̄si le héyī ŋmá ɔlékwū, kóō mīyɛ ɔkwu kú Ujúdasi. Ó í wɛ éyi kú ipú ācɛ nēe wɛ ɔ́wá kú alɔ ɛpléeko nɛ̄ Óndú Ujísɔ̄si yɔ̄ gē yɛ ɛga dóódu mla alɔ, 22gbɔɔ́ ŋmá eko nɛ̄ Ujɔ́ni tɔ́ɔna kú ubatísim ā jāā gaá kwu ɛ̄cī nēé je Ujísɔ̄si ga ɔkpáncō ā. 23Anɔ́ɔ é le ācɛ ɛpa Ujósɛ̄fu nēé hī ka Ubasábasi nɛ̄ iyē ádā nū wɛ Ujɔ́sitɔ̄si, mɛ́mla Umatáyāsi, kpó kwɛcɛ. 24Anɔ́ɔ é le ɔ̄kɔ gbā kahíníī, “Óndú, awɔ nōo jé ɔtū kú ācɛ dóódu ā, lɛ ɔ̄cɛ éyi fu lɛ alɔ ŋmá ipú ɛpa nēe bá āā, 25kóō mīyɛ ɔkwu kú Ujúdasi ipú úklɔ́ kú ɔ̄cotɛ̄hɔ̄ nɛ̄ Ujúdasi kwúcē hɛ̄ ɔ̄ tá nyɔ̄ ɛga nōó tíne ā.” 26Anɔ́ɔ é lɛ ūlī tá ohígbū uwā, anɔ́ɔ ūlī ā lɛ Umatáyāsi kwú á. Anɔ́ɔ é lɛ ɔ́ ka tū ipú ɔ̄cotɛ̄hɔ̄ igwóléyi ā á.

Currently Selected:

ÚKLƆ́ KÚ ĀCOTƐ̄HƆ̄ 1: IFBCL

Highlight

Copy