ÚKLƆ́ KÚ ĀCOTƐ̄HƆ̄ 2

Alelékwū Ihɔ gā ɛ̄cī Upɛ́ntīkɔ̄si

1 # Ulīf 23.15-21; Obla 16.9-11 Eko nɛ̄ ɛ̄cī Upɛ́ntīkɔ̄si le yá ā, odúúdú ācocɛ̄lɔ̄ɔwɔicō ā bá tɔ̄há ɛga ékpó. 2Anɔ́ɔ igbeékpónú ācɛ ā pó uya nōo yɔ̄ ī wā ŋmá ɔkpáncō, uya ā lɛbɛ̄ɛka ákú owu nōo yɔ̄ ī tá lɔfú nɛ̄hi ā. Anɔ́ɔ uya ā yɔ̄ ɛga dóódu kú ipú inu ɛga nēé bá ā á. 3Igbeékpónú é má odée nōo lɛbɛ̄ɛka ígblɛ́nyī ɔlá ā nōo wā í lɛ iyī nū kɔ̄ ce éyééye kú uwā ɛyí ā. 4Anɔ́ɔ é le mu mla Alelékwū Ihɔ, klla gbɔɔ́ ō ka ucē ɛyɛ́ɛyɛ́yí, ɛ́gɛ́nɛ̄ Alelékwū ā je ɔfú lɛ uwá kéē ka lɛ ā.

5Ó lɛ ācɛ Ujíyu nēe ī gbā Ɔwɔicō nēe ŋmá éwo dóódu nōo yɔ̄ ɛcɛ ā wā í lā Ujerúsālɛm. 6Abɔ̄ é lɛ uya nyā pó ā, ɛwa ā gaá le jīla tɔ̄há, anɔ́ɔ ó le yá uwā eyījii ohígbū ka éyééye kú uwā pó abɔ̄ nɛ̄ ācocɛ̄lɔ̄ɔwɔicō ā bá ī kɛlā ucē kú ɔlɛ́ uwā. 7Ó le yá uwā eyījii, é klla le kpó hídáagó bá yɔ̄ ī kahíníī, “Odúúdú ācɛ nēe bá yɔ̄ ī kɛlā mbá ā é wɛ ācɛ Ugálīli ŋ́ nɛɛ? 8Abɔ̄ ó yá lɛ nɛ̄ éyééye kú alɔ kē pó ɛlā kú uwā okónu ucē kú ɔlɛ́ alɔ nēé ma alɔ tū ipú nū ā? 9Ācɛ Upátīya mɛ́mla ācɛ Umɛ́dīya mla ācɛ Ɛlam mɛ́mla ācɛ nēe lā Umesopotémīya, mɛ́mla Ujudíya mla Ukapadósīya, Upɔ́ntɔ̄si mɛ́mla Ésīya, 10Ufrayigíya mɛ́mla Upamfilíya, Íjīpiti mla áklō kú Ulíbīya nōo wɛ ákú Sayiríni mɛ́mla aúgbɔga nēe ŋmá Uróm, kwu ācɛ Ujíyu mɛ́mla aílɔ́wá nēe ī gbā Ɔwɔicō ɛ̄gbā bɛ̄ɛka ācɛ Ujíyu āa, 11mɛ́mla ācɛ ōhī kú alɔ nēe ŋmá Ukrɛ́ti mɛ́mla ācɛ Árábu. Nááná alɔ pó abɔ̄ ācɛ ā bá yɔ̄ ī kɛlā okónu ucē kú ɔlɛ́ alɔ, é bá ī kɔ̄ɔ̄kā kú úklɔ́ idáagó nɛ̄ Ɔwɔicō yá ā.” 12Anɔ́ɔ ó le yá odúúdú uwā eyījii, é kē jɛ́ɛyí nū ŋ́. É da iyī uwā ɔ̄kā kahíníī, “Ɔdí wɛ ɛyí ɛ̄nyā ā?” 13Amáŋ ācɛ ɔhá nēe bá ī ka alakpɔ̄ tū uwā ā kahíníī, “Ejé ɛ̄yīpɛ̄ lɛ uwá kwú.”

Ɛlā nɛ̄ Upíta ka ɛ̄cī Upɛ́ntīkɔ̄si ā

14Anɔ́ɔ Upíta mɛ́mla ayíkpó ohile igwóléyi ā, cāŋjɛ, anɔ́ɔ ó jɔkɔ gicō gbɔɔ́ ō kɛlā lɛ ɛwa ā kahíníī, “Ācɛ Ujudíya mɛ́mla odúúdú ācɛ nēe lā Ujerúsālɛm, aá jāhɔ̄ gā um ká um da aá ɛyí ɔdā nyā. 15Ejé í kwú ācɛ nēe bá ā ɛ́gɛ́nɛ̄ aá leyīce ā ŋ́, ɛ́gɛ́nɛ̄ ó wɛ oje ahāanɛ kú ɔ̄cɔ̄ɔ̄cī kllɔ́dɔ́ɔ́ ā. 16Amáŋ ɛ̄nyā wɛ ɔdā nɛ̄ Ujówɛlu ɔ̄comɛ́ɛbɛ ka á,

17 # Ujów 2.28-32 ‘Anɔ́ɔ Ɔwɔicō ka, ‘Ipú ɛ̄cī ámōōmɛ ā

n géē cē Alelékwū kú um klá ācɛ dóódu.

Ayínɔ̄nyīlɔ mɛ́mla ayínɔ̄nyā kú aá géē mɛ́ɛbɛ, klla í kacɛ̄.

Ayípɛ̄ oklóbīya kú aá kē í mɛ́ɛbɛ,

anyākwɔ́cɛ kú ɔlɛ́ aá kē í nɔɔ̄na.

18N géē cē Alelékwū kú um klá ɔ̄cocɛ̄hɔ̄ nɔ̄nyīlɔ mɛ́mla ɔ̄cocɛ̄hɔ̄

nɔ̄nyā kú um

ipú ɛ̄cī ɔ́ɔmā. É kē í kacɛ̄ dúú.

19N kē í yúklɔ́ ō hɛ́ ācɛ idáagó ipú ɔkpáncō ɛhícō,

n klla í ma ɔdocābɔ fu ipú ɛcɛ ɛháajɛ ɔkpáncō,

oyī mɛ́mla ɔlá mɛ́mla odúúdú géē yɔ̄.

20É géē lɛ ɛnɔ yá kóō le dobū,

é kē í yá ɔyā kóō le tɔ́wá bɛ̄ɛka oyī ā.

Gbɔbū ká ɛ̄cī kú Óndú ā kóō wā ā,

ɛ̄cī nɛ̄hi mɛ́mla ɛ̄cī olɔfú ā. 21Ó lɛ āā, ɔ̄cɛ dúúmā nōo hī Óndú ā kóō tá ɔ̄ abɔ̄, ó géē nya ɔ́ tá.’

22“Aá lɛ ɛlā nyā pó ɛ́ɛ́ ācɛ ɔlɛ́ um Ísrɛ̄lu. Ujísɔ̄si kú Unásārēti, ɔ̄cɛ nɛ̄ Ɔwɔicō le mafú ka anúɔ fu á o ŋmá úklɔ́ nɛ̄hi mɛ́mla ɔdā idáagó mɛ́mla ɔdōcābɔ̄ nɛ̄ Ɔwɔicō yá bū abɔ̄ nū ɔtāhɛ̄ kú aá, ɛ́gɛ́nɛ̄ aá abɔ̄yí aá jé ā. 23#Umát 27.35; Umák 15.24; Ulúk 23.33; Ujɔ́n 19.18 Ujísɔ̄si nyā, ɛ́gɛ́nɛ̄ ɔdā nɛ̄ Ɔwɔicō ī miya abɔ̄yīnū ā gē lɛ ā, ó tɛtɛ lɛ ɔ́ miya táajɛ kéē géē je Ujísɔ̄si tū aá abɔ̄, aá géē cɛ̄ lɛ ācobīyíne kéē lɛ ɔ́ nyɔ́kpá. 24#Umát 28.5,6; Umák 16.6; Ulúk 24.5Amáŋ Ɔwɔicō le yá kóō le héyī ŋmá ɔlékwū, ɔ́ɔmā cābɔ̄ kóō le ɔ́ hɛ́tá ŋmá ɔnɔ kú ikwū, ohígbū kóō tɔ́ɔtɛ́ lɛ ikwū kóō kwú ɔ̄ klá ajɛ glá gɛ ŋ́. 25#Aíjē 16.8-11Ohígbū ka Udéfīdi kɛlā lɛyíkwu ɔ́ kahíníí,

‘N gē má Óndú ā iyɔ̄bū um eko dóódu,

ɔdā dúú í gáā tū um ufi glá ŋ́, ohígbū ka ó yɔ̄ mla um.

26Ohígbū ɔ́ɔmā ɔtū he um, n gē gwéeyē nɛ̄hi eko nɛ̄ n gē kɛlā.

Ami wɛ ɔ̄cɛ nōo ī kwú, nááná,

n leyīce ɔdā nɛ̄ awɔ Ɔwɔicō í yá ga um ā, 27ohígbū ka á gáā habɔ̄ um tá ɔlékwū ŋ́,

á kōō gáā cɛ̄ ká ɔkpíyē kú ɔ̄cocɛ̄hɔ̄ kú uwɔ kóō wā tāajɛ ipú únóji ŋ́. 28A le ɔwɛ kú oyēeyī mafú gā um,

anɔ́ɔ abɔ̄ a yɔ̄ pī um ā, ɔtū he um nɛ̄hi.’

29“Aɔ́máapú um, n lɛ ɛlā ka lɛ aá péee lɛyíkwu ádā alɔ nɛ̄hi Udéfīdi. Ó gekwú, é lɛ ɔ́ nyi, únóji kú nū kē yɔ̄ pī alɔ jāā kwu ícɛ nyā. 30#Aíjē 132.11; 2 Usám 7.12,13Eko nɛ̄ Udéfīdi yēeyī ā, ó wɛ ɔ̄comɛ́ɛbɛ. Ó kē jé oji nɛ̄ Ɔwɔicō ce lɛ ɔ́ ā. Ɔwɔicō le oji cē ɔ̄ ka anúɔ géē je éyi kú ayááyí nū lé ɔcɛ́ ɛ́gɛ́nɛ̄ Udéfīdi abɔ̄yī lé ā. 31Udéfīdi jé ka ɔdā nyā géē yá, anɔ́ɔ ó kɛlā kéē géē je Ohɔ́nyɛtá héyī ŋmá ɔlékwū. Ó klla kahíníī, “É gáā habɔ̄ ɔ̄ tá ɔlékwū ŋ́, é kē gáā cɛ̄ lɛ ɔkpíyē kú nū wa tāajɛ ipú únóji ŋ́.’ 32Ɔwɔicō kē kwú Ujísɔ̄si piíí nyā ú héyī ŋmá ɔlékwū, odúúdú alɔ kē wɛ ijáalí kú ɔ́ɔmā. 33Ɔwɔicō kwú ɔ̄ ú héyī nyɔ̄ í cīce abɔ̄lɔ́ná ɛga ojīlīmā nɛ̄hi kú nū ā, abɔ́ɔ nōó mīyɛ Alelékwū Ihɔ nɛ̄ Ɔwɔicō Ádā nū cokónu o je lɛ ɔ́ ā. Ɔdā nɛ̄ aá yɔ̄ ī má klla yɔ̄ ī pó nyā wɛ ɛhi nɛ̄ Ádā ā cokónu nū ā nɛ̄ n. 34#Aíjē 110.1Ohígbū ka Udéfīdi í tīcō ga ɔkpáncō ŋ́, amáŋ anú abɔ̄yī nū ka,

‘Óndú ā da Óndú um ka,

Cīce abɔ̄lɔ́ná kú um 35jāā gbéeko nɛ̄ n lɛ aólɛlā kú uwɔ yá uka ō lɛ ikpó ce ɔ́ kú uwɔ.’

36Ohígbū ɔ́ɔmā, odúúdú ācɛ kú Ísrɛ̄lu kéē jé ɔkwɔ̄ɔ̄kwɛ̄yi ka Ujísɔ̄si nyā, nɛ̄ aá nyɔ́kpá ā nɛ̄ Ɔwɔicō je pīya Óndú mɛ́mla Ohɔ́nyɛtá á.”

37Eko nēé lɛ ɛ̄nyā pó ā, ɔtū kú uwā le bīya nɛ̄hi, anɔ́ɔ é da Upíta mɛ́mla ācotɛ̄hɔ̄ ohile ā kahíníī, “Ayínɛ́ alɔ, ɔdí nɛ̄ alɔ géē yá ā?” 38Anɔ́ɔ Upíta da uwá kahíníī, “Aá lɛ ohílīpú kú aá pīyabɔ̄ kéē lɛ éyééye kú aá yá Ubatísim, o ŋmá lɛ iyē kú Ujísɔ̄si Ohɔ́nyɛtá ā, cɛ́ɛ́ kéē habɔ̄ íne nɛ̄ aá bīya ā tá lɛ aá, cɛ́ɛ́ aá kē í mīyɛ ɛhi kú Alelékwū Ihɔ. 39Ohígbū ka Ɔwɔicō cokónu ā lɛ aá mɛ́mla ayí aá mɛ́mla ācɛ dóódu nēe bá ɛga oligbó, ɔ̄cɛ dóódu nɛ̄ Óndú Ɔwɔicō abɔ̄yīnū hīgwúā.” 40Anɔ́ɔ Upíta lɛ abɔ̄ tɛ́yīpɛ̄ kɛlā lɛ uwá, ó klla kɛlā alɛwa ɔhá yɔ̄ ī lɔfú tū uwā iyē yɔ̄ ī da uwá kahíníī, “Aá lɛ iyī aá nyatá cɛ́ɛ́ kéē híī yá italā ɛ́gɛ́nɛ̄ é gáā yá ācobɔ̄bíipú nēe bá ā ŋ́.” 41Ācɛ alɛwa cɛ̄ olɛhɔ̄ kú nū ā, anɔ́ɔ é lɛ uwá yá ubatísim, ícíícɛ ɔ́ɔmā. É le ācɛ úlā ahāapa ce ofigwó (3,000) gba áluka uwā. 42Anɔ́ɔ é kwú ɔtū kú uwā ú táajɛ yɔ̄ ī jé ɔdā nɛ̄ acotɛ̄hɔ̄ yɔ̄ gē nwū ā, é bá ī lé ɔdōlé tɔ̄há klla bá ī gbɔ̄ɔkɔ lɛ Ɔwɔicō tɔ̄há.

Ācɛ nēe cɛ̄ɛ̄lā ā gē jīla tɔ̄há

43Ɔwɔicō bī ācotɛ̄hɔ̄ ā le yúklɔ́ ō hídáagó mɛ́mla ɔdōcābɔ̄ alɛwa, anɔ́ɔ ɛjɛ̄ɛ̄jī ācɛ ā le kpó hídáagó á. 44#Ācot 4.32-35Odúúdú ācɛ nēe cɛ̄ɛ̄lā Ujísɔ̄si ā bá tɔ̄há piyóó, kē kɔ̄ ɔdā dóódu nēé lɛ ā tɔ̄há. 45É gē kpó agbénú kú uwā mɛ́mla ɔdā nēé lɛ ā lá, anɔ́ɔ é gē kɔ̄ ije kú nū lɛ odúúdú uwā ɛ́gɛ́nɛ̄ ɛgbá kú ɔnyɔɔnyɛ lɛ ā. 46Anɔ́ɔ ɛ̄cī dóódu é gē nyɔ̄ Agblīihɔ-nɛ̄hi ā tɔ̄há, gē bī ɔtū nɛ̄hɛ́ mla ɔtū ogbonɛnɛ gē lé ɔdōlé, 47yɔ̄ ī cɛ̄tra Ɔwɔicō. É kē he odúúdú ācɛ ɔtū. Óndú ā kē ī ka ācɛ nēé yɔ̄ ī hɛ́tá ā tū ipú ɔ́wá kú uwā ɛ̄cī dóódu.

Currently Selected:

ÚKLƆ́ KÚ ĀCOTƐ̄HƆ̄ 2: IFBCL

Highlight

Copy