Yahwana 15

Yesu An Nfur Anap Na Jirari

1 “I an nfur anap na jirari ni, antə Təddarna an mdər wul gadinar anap ni. 2Kəlara tsi na aɗi akwa ya wa, tsa ata nthləmtari. Kəlara tsi na akwa ya, tsa ata ntsəhəmtari, kamnyar ka tsa vərvər ya hang. 3Ai giri ku kurtə ndzi kəcəkəcari kamnyar gari tə I pəla ala giri ni. 4Ka giri ndzi akwa iya, kəi ndzi akwa giri tsuwa. Apatə tsiya nfwa amzhi ya ka kərari wa, tar ma tsa ndzi tsu ata dza nfu ni, apani su aɗi tə giri amzhi harari wa, tar ma giri ndzi tsu akwa iya.

5 “I an nfur anap ni, antə giri an tsiyayerari ni. Kəlara mdə na ndzi akwa iya, antə I ndzi akwa tsa, tsa an ata ya na hangari. Kamnyar ma kula iya, su aɗi tə giri ata mzhi harari wa. 6Kamnyar kəlara mdə na aɗi ata ndzi akwa iya wa, tsa ata ndzi apa tsiya nfwa tə mdə nthləmta ka psəmta ni ka tsa ula. Tsuwa mda ata tsaptə tsiyayerari ni, ka mdə puwa akwa u'u, ka da mbamtadzi. 7Ma giri ata ndzəndzi akwa iya, tə ndərərna ata ndzi akwa ɗəffa giri, giri ata mzhi yu kəlara su tə giri akwa barari, mda ata hamta ala giri suari. 8Giri ata haptə səliyir Təddarna, ma giri akwa yatədzi hang, ka ncanta abbər giri an mjirthlipərna. 9Apatə Tədda ku hir ra, antə I ku hir giri. Antə ka giri ndzi tsu akwa hirkurərna ni. 10Ma giri ata kələngkər aka ndərərna, I ata ləkəma ka hir giri, tsu apatə Təddarna akwa hir ra, kamnyar tə I ana kələngkər alari.

11 “I pəla ala giri suayeri ngəni kamnyar ka giri ndzi nghyinghyari ka jili kucali tə I kəgari ni. 12Tsawurna ni an apani, ka giri hir nvwa giri apatə I ku hir giri. 13Hirkur aɗi na olta ngəni wa, abbər ka mdə hamta mpikari kamnyar pazhayeri arni! 14Giri an pazhayeri arna, ma giri ata hara su tə I ku tsawa ala giri. 15I aɗi akwa kəga giri abbər mafa kəra wa, kamnyar mafa aɗi ana səndə su tə mthlakərni akwa harari wa. Amma I akwa kəga giri pazhayeri, kamnyar shanga su tə I ku nggata akəla Təddarna, I ku ngkərɓəla ala giri. 16Aɗi giri an carɓəla ra wa, amma I an carɓəla giri, ka pwi giri abbər ka giri mwari ka giri ya hang, tsuwa ka yar giri ni ndzi ya na ata fəi. Antə apani kəlara su tə giri ku kiɗa akəla Tədda akwa thləmi, tsa ata na ala giri. 17Ngəni an tsawu tə I akwa hamta ala giri ni, abbər ka giri hir nvwa giri.”

Mjir Duniya Ata Sə Nggəlar Giri

18 “Ma duniya akwa nggəlar giri, ka giri ɗangta abbər tsa ku nggəlar ra akəmata tsa anggəlar giri. 19Ma giri an ar duniya, duniya ata hir surni. Amma tə giri aɗi ar duniya wa, tsuwa I ku carɓəla giri abbər ka giri səɓəla kazhar duniya, an su na hara tə duniya akwa nggəlar giri ni. 20Ɗangtə giri suayeri tə I pəla ala giri abbər, ‘Mafa aɗi ana təramta mthlakərni ka olkur wa.’ Antə ma da ku hara bwani ali, da ata hara bwani ala giri tsuwa. Ma da an psi thləm ali, da ata psi thləm ala giri tsuwa. #Mat 10:24; Luk 6:40; Yah 13:16 21Amma da akwa hara ala giri shanga suayeri ngəni ni kamnyar tə giri an arna, kamnyar da aɗi səndə mdə na thlentə ra wa. 22Ma I an ka si ka gari ala ɗa wa, sakani da aɗi ata ndzi ka biku wa. Amma kulini gariyir hwiyimta abbər da aɗi ka bikə wa ni aɗi kəra wa. 23Kəlara mdə na ku nggəlar ra, tsa ku nggəlar Təddarna tsuwa. 24Ma I an aɗi hara kəthlərayeri akwa nca ɗa, natə mda aɗi damwa na ɗar harari wa wa, sakani da aɗi ata ndzi ka biku wa. Amma kulini da ku wutə su tə I hara, amma wala apani da ku nggəlar japwa yeru ka Təddarna. 25Su ni hara apani ni kamnyar ka ndər tə mdə rəbuta akwa kakaɗər tsawur ɗa ni nghyaɓəladzi abbər, ‘Da ku nggəlar ra kula suari aɗi.’

26 “Amma I ata thlenta ala giri Mdər Dlara na ata thlata adzə Tədda. Tsa an Mambəl Ar Jirkur, na ata səɓəla adzə Tədda, tsa an ata sə hamta seɗa ata kəri. 27Wala giri ma, giri seɗarna, kamnyar giri ku ndzi ata kəma duku ka iya təng tsu akwa baɗitari.”

Currently Selected:

Yahwana 15: KNB

Highlight

Copy